Акты XXXIII-XLIII: земельные тяжбы и действия вижей (1562-1564): оригинал
Акты XXXIII-XLIII, земельные тяжбы и действия вижей, 1562-1564 годы. Издание, с. 40 и далее. Тексты актов в орфографии издания.
XXXIII.
(Жалоба земянки п. О. Ф. Несвѣцкой о кривдахъ и шкодахъ, чинимыхъ ей и людямъ ея п. Я. П. Угриновскимъ. Донесеніе вижа по этому дѣлу).
Року Божого Нароженя 1562, мца іюля 31 дня.
В небытности старосты Луцкого, Браславского и Веницкого князя Богуша Федоровича Корецкого, на местцы его млсти Андрей Иванович Русин, справца староства Луцкого.
Приездила до мене земянка гдрьская пни Иляшовая Несвецкая пни Олена Федоровна, жалуючи плачливе а обтяжливе на пна Януша Прокоповича Угриновского, оповедаючи тым обычаем: Ижъ, дей, „он без бытности мужа моего мене самую словы невчтивыми соромотил и боем мне грозит, кривды и втиски великие чинит. А часов, дей, недавно минулых, у петров пост, пан Януш Угриновский из служебником своим Лучкою, пришедчи моцно и кгвалтом до двора моего Угриновского, узял и выносил с пивницы горелки моее з барила на две копе грошей. А теперешних часов без бытности мужа моего после первшого оповеданя моего пан Угриновский, приходячи кгвалтом на домы подданых моих Угриновских, волы побрал, то ест у Павла в деда взял вола моего властивого, которого, дей, ми был дал Мартинецъ за долгъ, а въ Климка другого вола, а у Волоса также кгвалтовне третего вола взял. Ку тому, дей, кривды, шкоды и втиски великие подданным моим Угриновским чинит, а жоны, дей, мужские и дочки их от него упокою мети не могут. Для которых, дей, кривдъ, шкод и збытков пна Угриновского люди з Угринова проч ся росходят. А скоро, дей, который члвкъ прочъ пойдет, он, дей, того часу избы их на сторону попродает и вже, дей, не мало именя Угриновского спустошил“.
Якож на огледане того спустошеня и на опытане людей пни Иляшовая Несвецкая брала в мене вижом боярина гдрьского Красноселского Пилипа Сызоновича. Который виж там у Угринове был и, оттол приехавши, ставши передо мною, тыми словы сознал: Иж „пни Иляшовая Несвецкая, приехавши до Угринова и созвавши перед себе всих людей своих Угриновских, пытала их, для чого ся прочъ росходятъ? а люде Угриновские всподнословне поведили: „як, дей, нам проч не ити, а вы нас не бороните? бо, дей, нас пан Угриновский збивает, грабит, кони и волы в нас берет, на конех наших сам ездит и посылает к Дубну, и куды ему потреба; а еще, дей, находячи кгвалтом на домы наши, жонам и дочкам нашим упокою не дает; што, дей, мы болшей терпети не можем; але также мусим проч пойти, яко и иншие“. На тот же час выступивши, Барбара Михновая жаловала на пна Угриновского, иж, дей, „кгды муж мой пошол на роботу, тогдым перед ним не могла упокою мети; ям ся, дей, была перед ним скрила в третем дому; он, дей, и там мене знашодчи, збил и змордовал“. А пни Иляшовая Несвецкая то все мною, вижом врядовым, осветчила. А потомъ за обвоженем и показованемъ пней Несвецкое звидел есми на селе печища пустовские, и поведили мне, иж тых печищ избы пан Угриновский, як люди проч пошли, роспродал“.
И просила пни Несвецкая, абы то было записано.
А так я тую жалобу оповедане ее и вижово сознане в книги замковые записати казал.
(К. Ц. А., кн. 2036, л. 149, № 23).
XXXIV.
(Заявленіе дворянина господарскаго п. В. П. Загоровскаго о насиліяхъ, совершенныхъ надъ нимъ, при исполненіи обязанностей службы, панами Борзобогатыми. Донесеніе вижа по этому дѣлу).
Року Божого Нароженя 1563, мца февраля 6 дня, в суботу.
Пришодчы в замок Луцкий до мене, Бориса Ивановича Совы подстаростего Луцкого, дворенин короля его млсти пан Василей Петрович Загоровский, справца поборов и мыт гдрьских земли Волынское, оповедал тым обычаем: Иж „ач Иван Яцкович Борзобогатый з сыном своим Василем, не уваживши в себе росказаня его королевское млсти и не дбаючи о заруку десят тисячей коп грошей, на листе гдрьском описаную, дня вчорашняго февраля пятого, в пятницу, увязаня в двор и имене Заборол не поступили и мне, посланцу его млсти гдрьскому, зелживость вчинили. Але иж на листе его кр. млсти иншие именя их меновите описаны, то ест двор Туличов и Вечин, до которых, дей, я, наполняючи росказане его млсти гдрьское, если и увязыватися в суме пнзей, што еще на них зостало, мушу“.
И просил, абых я з уряду для того увязаня дал вижа его милости. А так я давал вижом служебника князя старосты его млсти пна моего Мартина Видковского. Который с паном Загоровским в дворе и имено Борзобогатых Туличове при увязаню был и, оттоля приехавши и ставши передо мною в замку Луцком, до книг тыми словы сознал: Иж „пан Василей Загоровский, маючи при собе шляхту людей добрых, то ест пана Ивана Шелвавского, пана Семена Григоревича Оранского, дворянина гдрьского, пана Остафья Солтана, боярина его млсти князя Костентина Острозского, воеводы Киевского, а наместника городничого и подстаростего Володимерского пана Томаса Подоского, зо мною, вижом вряду замку Луцкого, и другим вижом замку гдрьского Кременецкого в понеделок февраля осмого дня до того двора Туличовского приехали. Там служебники Борзобогатого, оповедаючи росказане пна своего Ивана Яцковича Борзобогатого, таковую стрелбу з гаковниц, з ручниц и аркабузов на нас, не допускаючи у двор, вчинили, которая бы не толко нам, не на бой приготованым, але и обварованым ку бою шкоду вчинити могла. А пред ся пан Загоровский, не боячися так далеце стрелбы, яко того стерегучы, абы ся росказане его млсти гдрьское наполнило, и хотячи ведати, естли ест который Борзобогатый в дворе, упоминаючи оных служебников Борзобогатых, абы на нас непотребне не стреляли, шол з нами просто до ворот. Там же от ворот один з служебников Борзобогатого, будучи у скритом местцу, вымерившы, стрелил на пана Загоровского з ручницы и, праве втираючи персей его, кулка шла, же его порохъ ручничный опалил. Пан Загоровский, мнимаючи быт постреленым, шол от ворот на безпечнейшое местце. На тот же час чоловека доброго шляхтича, боярина его млсти князя Костентина, воеводы Киевского, пна Остафья Солтана служебники Борзобогатого у плече и в палец правое руки зранили. К тому служебника пана Загоровского Павла з ручницы у правое плече там же от тых служебников Борзобогатого пострелено: кулка, рану шкодливую вчинивши, навылет пошла. А потом служебники Борзобогатого злеклися, мнимаючи, абы вже пан Загоровский от того, хто на него стрелил, шкодливе пострелен, тогож часу покинувши стрелбу, сами з аркабузы от ворот проч до Василя Борзобогатовича, который у дворе был, побегли. Пан Загоровский со всими нами, при его млсти будучими, маючи ворота волные, заразом в двор вшодчы и гаковниц две у ворот покиненых, с которых на нас тии служебники Борзобогатого стреляли, взявши, на вряд до замку гдрьского Володимерского наместнику пна Михайла Тихновича Козинского, городничого и подстаростего Володимерского, Володимерскому, при пану Загоровском для пригледаня тоя справы посыланому, пану Томасу Подоскому дал. И кгды вже есмо с паном Загоровским были в дворе, на тот же час заразом Василей Борзобогатович, порвавшися с тыми ж слугами и з многими помочниками и подданными своими, оповедал в том волю и росказане отца своего, иж того боронити ему росказал, з слугами своими стреляти почал и потом пана Загоровского, спротивившися росказаню гдрьскому, сегаючися словы невчтивыми и дотыкаючи руками своими, з двора выпхал и выбил вонъ. Пан Загоровский, видячи таковый кгвалт и спротивност, росказаню гдрьскому учиненую, осветчивши то нами, вижами, и тыми шляхтичами людми добрыми, оттоля ехал проч“.
Якож и тые панове, вышей менованые, при его млсти пану Загоровском в Туличове будучие, пан Иван Шелвавский, пан Семен Оранский а пан Остафей Солтан, боярин его млсти князя воеводы Киевского, и служебник пна Загоровского Павел, на вряде гдрьском в замку Луцком раны свои оказовали и то оповедали, иж служебники Борзобогатого в Туличове при пану Загоровском их поранили.
И, хотячи его млст пан Загоровский таковый кгвалт и противност, росказаню его млсти гдрьскому вчиненую, ведомости его кр. млсти нашого млстивого пана припустити, а о тую зелживость свою и раненье тых вышей менованых пна Остафья Солтана, боярина его млсти князя воеводы Киевского, и служебника своего Павла мовити, просил, абы то было записано.
А так я тое вижово и земян гдрьских сознане в книги замковые записати казал.
(К. Ц. А., кн. 2037, л. 29, № 7).
XXXV.
(Донесеніе вижа о врученіи дворяниномъ господарскимъ п. Я. Коханомъ кн. Ал. Фед. Чорторыйскому листовъ пановъ-радъ, заручнаго и напоминальнаго, данныхъ по просьбѣ бискупа Кіевскаго кн. Николая Паца).
Року Божого Нароженя 1563, мца априля 15 дня.
В небытности пана Бориса Ивановича Совы, подстаростего Луцкого на тот час, на местцы его Войтех Красовский.
Пришодчи до мене на вряд замку Луцкого дворенин гдрьский пан Яцко Кохан просил о вижа, при котором бы мел дати листы от их млсти панов рад великого князства Литовского у справах его млсти князя Миколая Паца, бискупа Киевского, князю Александру его млсти Феодоровичу Чорторыйскому. Ино я з уряду замку Луцкого давал есми на то вижом служебника князя его милости пана моего, старосты Луцкого, Браславского и Веницкого, на имя Павла Несвишского. Который виж в дворе в именью Чорторыйском князя Александра Чорторыйского был и, оттоля приехавши и ставши передо мною в замку Луцком, до книг тыми словы сознал:
Иж „яко дня вчорашняго по ведицедни (sic) въ середу мца априля четвертогонадцат дня дворенин гдрьский пан Яцко Кохан при мне, вижу врядовомъ, знашодчи князя Александра Феодоровича въ Чорторыйску, давал ему очевисто лист заручный от их млсти панов рад великого князства Литовского именем его млсти князя Миколая Паца, бискупа Киевского, о небезпеченство здоровья врядников, слуг, бояр и подданных его млсти под пятма тисячми копами грошей. Его млст князь Александро Чорторыский тот лист заручный почтиве принял и, вычитавши, дворенину отдалъ, а копею, с того листа списаную, собе взял. А потом дворенин гдрьский давал ему другий лист под печатми их млсти панов рад панства Литовского напоминалный о вчинене справедливости яко о кгвалты, о бои, грабежи, так обо вси кривды на врядника, панов, бояръ и подданных Столовицкихъ, што ширей а достоточней на томъ листе каждая реч меновите ест описана. Его млст князь Александръ Чорторыский и тот лист, почтиве принявши, вычитан (sic) и за се его дворенину отдал, а копею, с того листа списаную, собе взял. И поведил его млст: иж „права подданным его млсти князя бискупа Киевского костелным не бороню и справедливост чинити хочу“. Тогды дворенинъ домагался, ижебы его млст рокъ праву на вчинене справедливости зложил. А князь Александро Чорторыский року зложити не хотел, поведаючи: иж „кгды там в том именью самъ буду, тогды, рок зложивши, справедливост вчиню“. Што дворенин гдрьский пан Яцко Кохан, мною, вижомъ врядовым, осветчивши, отъ князя Александра Чорторыского поехал“.
А так я то вижово сознане в книги замковые записати казал.
(К. Ц. А., кн. 2037, л. 58, № 12).
XXXVI.
(Жалоба кн. Яр. Сангушковича о наѣздѣ на его землю урядниковъ маршалка господарскаго кн. Ал. Андр. Сангушковича).
Того жъ мца іюня 9 дня.
В небытности пна Бориса Ивановича Совы, подстаростего Луцкого, на тот час будучи на местцы его Войтех Красовский.
Присылалъ до вряду здешнего замку гдрьского Луцкого его млст князь Ерославъ Федорович Сонкгушкович служебника своего Андрея Василевича Ламаку, жалуючи и оповедаючи тымъ обычаем:
Ижъ, дей, вчорашняго дня, у волторокъ мца іюня осмого врядники князя Александра Андреевича Сонкгушковича Кошерского на имя — Станиславъ Глуховский, врядник Горуховский, Олехно Порядничъ, врядник Кошерский, а Зенко Сачковичъ, врядник Каменский, зобравшися з многими людми пана своего, з волостю именей своих Волынских и Полеских конно, а збройно зо вшеляким оружем, неведати, если же з росказаня пана своего, албо своволне, наехавши моцно кгвалтом на властивый кгрунтъ именя его милости на землю Буценскую, бояръ и подданых его млсти позбивали, помордовали и поранили; с которого, дей, збитя колко их подобно живы не будутъ. Там же, дей, людей позбивавши, шкод много починивши, моцно кгвалтом поля его млсти Буценское поорали.
В чом собе его млст князь Ерославъ жал, кривду и шкоды не малую быти менячи, просилъ, абы то было записано.
А так я тую жалобу оповедане его млсти в книги замковыи записати казал.
(К. Ц. А., кн. 2037, л. 85 об., № 18).
XXXVII.
(Жалоба кн. Яр. Сангушковича о наѣздѣ, совершенномъ на его землю урядниками маршалка господарскаго кн. Ал. Андр. Сангушковича. Донесеніе вижа по этому дѣлу).
Того ж мца іюня 14 дня.
Што перво сего тогож мца іюня девятого дня присылалъ до мене, Войтеха Красовского, на тот час будучего на местцу подстаростего Луцкого пна Бориса Ивановича Совы, подстаростего Луцкого, его млст князь Ерослав Федорович Сонкгушкович, жалуючи, оповедаючи тым обычаем: Ижъ, дей, яко дня вчорашнего у волторокъ тогож мца іюня осмого врядники князя Александра Кошерского — первший Гороховский Станислав Глуховский, а Кошерский и Мезовский Олехно Порядничъ, а Каменский Зенко Сачковичъ з иншими многими слугами, бояры изо всих волостей, так Волынских, яко и Полеских, людми и подданными князя Кошерского, за росказанемъ его, пана своего, собравшися з гаковницами, з ручницами, з сагайдаки, з рогатинами и з иншими многими бронями, показивши границы звечные и наехавши, дей, моцно, кгвалтом на власный кгрунтъ его млсти под имене Буцын на острове, прозвищом у Климова поля, и на Горни, землю поорали, бояр и подданных его милости постреляли, поранили, помордовали и досыт не мало шкод и грабежов им поделали. Къ тому теж послал, дей, был его млст служебника своего Матыса Моженского по потребам своим до Володавы до ее млсти княгни Романовое з листы, который, дей, з собою нес певную суму пнзей, двесте золотыхъ чирвоных а шестдесят таляров, которыи его млст был винен брату своему князю Роману. Теды, дей, тые ж врядники князя Кошерского, вышей мененныи, в тот же час едучи с того кгвалту, перенемши его на доброволной дорозе вы именю князя пна своего Селищи, не ведати для которое причины его збили и змордовали; а, поймавши его, з собою повели и до везеня окрутного осадили.
И просил мене князь Ерославъ его млст о вижа на огледане покаженя границ и теж ку огледаню як поораня земли, так збитя и зраненя бояр и подданныхъ своих, што все от тых врядников князя Кошерского за кгвалтовным наеханем их его млсть быти вчинено менил. Ино я з уряду замку гдрьского Луцкого давал есми его милости на то вижом служебника пна подстаростего Луцкого Карпа Енковича Гулялницкого. Который виж, там бывши и того всего огледавши, передо мною на вряде обличне ставши, тыми словы до книг вызнал: Иж „кгды есми приехал до князя его млсти до Несухоежь, князь его млст послал мене з врядником своим Несухоежским з бояры и подданными своими и теж з людми обчими сторонними до того именя своего Буцына, где наперед повел мене врядник его млсти, почонши от петы земли именей его млсти, то ест от земли пана Михаила Ласковича Секунское и от Мезовское, аж до остатнее петы земли именей его млсти до реки Вижвы и, ведучи мене по тым кгрунтом князя его млсти, оказывали мне грани покажоныи и менили, абы то з стороны и за росказанем князя Кошерского вчинено было. На первей, видел есми у самое петы, отколся граница кгрунтом именей его млсти починает, от врочища на имя от Верховъ поля попа Мезовского у дороги Сереховицкое, которая идет от Селища до Песочна, видел есми в сосне з одное стороны грань вырубаную и веху отбитую, а з другое целую, которую сосну менили быт сереховицкою; от тое сосны у врочища стану Курилова видел есми у Воли гран вырубаную, а другую уфой [чтение сомнительно] выяженую [чтение сомнительно]; подле дороги, которая идет на Волосовы бор видел есми две сосне, в корен спаленый, в которых поведили быт грани, а в третей з обудву сторон вырубаны, в четвертой з обудву сторон целые; тут поведили, иж за тыми гранми по чистому бору подданные князя его млсти Сереховицкие аж до речки Черемшанки деревом борным ходять к тому через чистый бор и через гостинец Ратенский, который идет на Черемшанку; поведили, же граница впала в лес Левецкий; в том лесе оказали две сосне, а третую олху вырубаную, в которых грани быти поведили, а шесть целых по волжам и в буде; от того местца видел, же граница впадает в речку Чотырку, а Чотырскою речкою впадает у речку Вижву; через тую речку Чотырку, перешедчи через Мыланцы, подданные князя Кошерского новины копали и поорали. К тому теж огледал есми бояр и подданных князя его млсти, которых, дей, тые врядники князя Кошерского позбивали и поранили. На первей, видел есми в боярина Лучки Грабовского в голове рубаных кривавых ран пят, а по рукам, по хрибту и по ногам раны битыи синии; в Петра Кузмича в голове на руках по видено и по хрибту раны киевыи битые, а на левой руце рана стреленая, а на нозе рана стреленая; в Хомы Дорошевича в голове рана рубаная, хрибет, руки и ноги кийми збито; у Васка рука левая прострелена; у Андрея Васковича на плечах, на руках раны битыи синевыи. А што ся дотыче шкод и грабежов, который они собе от тых врядников и подданных князя Кошерского быти менили, тых всих шкод и грабежов князь его млст реестр, меновите написаный, в себе быти поведил“.
И просил мене князь его млст через посланца своего, абы то все до книг замковых записано было.
Я за прозбою его млсти тое оповедане и жалобу его млсти, так теж и вызнане вижово в книги замковыи записати казал.
(К. Ц. А., кн. 2037, л. 86 об., № 20).
XXXVIII.
(Жалоба маршалка господарскаго кн. Ал. Андр. Сангушковича объ оскорбленіи, нанесенномъ ему кн. Я. Сангушковичемъ и его слугой).
Тогож мца сентебра 28 дня.
В небытности пана Бори(са) Ивановича Совы, подстаростего Луцкого, на тот час будучи на местцы его Войтех Красовский.
Писалъ и присылалъ до вряду здешнего замку гдрьского Луцкого его млст князь Александро Андреевич Сонкгушкович Кошерский, маршалок гдрьский, боярына своего Митю, жалуючи и обтяжливе на князя Ярослава Федоровича Сонкгушковича оповедаючи тым обычаем: иж, дей, „вчорашнего дня въ понеделокъ мца сентебра двадцать семого ездилъ есми по властной земли своей Конюской, полюючи зо псы, то такъ, дей, въ тотъ час князь Ярославъ Сонкгушковичъ самъ особою своею з многими слугами своими, наехавши моцно кгвалтомъ на властный кгрунт Конюский, не маючи до мене жадное причины, одно, дей, прибегши до мене самъ особою своею, черезъ заруку гдрьскую, мене словы непочтивыми зсоромотил; а потомъ, дей, слуга его Блотский, порвавшися до мене, ударил мя лукомъ по голове“.
И просил его млст князь Александро Кошерский, абы то было до книг записано.
А такъ я тую жалобу и оповедане его млсти до книг замковых записати казалъ.
(К. Ц. А., кн. 2037, л. 166 об., № 38).
XXXIX.
(Жалоба п. С. Киницкаго, Степанскаго урядника кн. Б. Острожской, о нападеніи п. Богдана Патрикія, Степанскаго урядника кн. К. Острожскаго, на его сына и людей кн. Острожской).
Року Божого Нароженя 1564, мца априля 15 дня.
Приездилъ до мене, Андрея Ивановича Русина, подстаростего Луцкого, наместник велеможное кнежны ее млсти кнгни Илиное Костентиновича Острозское кнгни Беаты с Костелца Степанский пан Станислав Киницкий с повету Белзского, жалуючи на врядника Степанского ж его млсти князя Костентина Костентиновича Острозского, воеводы Киевского, маршалка земли Волынское, старосты Володимерского, на пна Богдана Патрикия, оповедаючи тым обычаем: Иж, дей, „тых часов недавно минулых приходил до мене подданный кнежны ее млсти Острозское Степанский на имя Тишко Требушкович, жалуючи и с плачем оповедаючи, иж цыгане украли в него девят десят коп и три копы грошей личбы литовское и, покрадши, дей, з места побегли. Тогды, дей, сын мой Марцин . . . . и плачем того человека Степанского, вседши . . . . ехали за ними в погоню; также, дей, погонивши их въ колку милях от Степаня на гостинцу . . . . Дубровицком, поймал двох цыганов и вел их до Степаня. То пак, дей, врядник Степанский его млсти князя Костентина Богдан Патрикий з многими людми, з слугами и з помочниками своими в месте Степанском, заступивши ему дорогу доброволную, оных злодеев двох цыганов кгвалтом в него отнял и также, дей, двох пахолят, которые были вышли з двора кнежны ее млсти, Матуша а Станислава, к тому мешталера Войтеха, а четвертого татарина Махметовича окруте позбивал, помордовал и поранил. Што, дей, есми того часу людми добрыми сторонними обводил и осветчал“.
На што и лист с ведомства под печатми оных людей сторонних передо мною на вряде покладал, просячи, абы был вычитан и в книги замковые записан. Который лист так ся в собе мает:
„Я Прохопъ Станинский, его млсти пна Лаского служебник, Станислав Малинка, войт его кролевское млсти Ратенский, Василей Кущовский зо Дрогоща, земенин короля его млсти с повету Ратенского, — вызнаваем, иж есмо видели, кгды сын пана Станислава Киницкого, наместника кнежны ее млсти Острозское Степанского, пан Марцин вел злодеев двох цыганов, которые были украли девятдесят и три копы грошей у мещанина кнежны ее млсти Острозское Степанского на имя в Тишка Требушковича, так яко он обжаловал. Пан Марцин Киницкий, поймавши тых злодеев двох цыганов у колку милях от Степаня на гостинцы Дубровицком, и, кгдыж их вел через место Степанское, тогды там пан Богдан Патрикий, врядник его млсти князя Костентина Острозского, воеводы Киевского, заступивши пану Марцинови, сыну пана Киницкого, отнял в него тых злодеев кгвалтом; и также в тот час збито и зранено двое пахолят, которыи были выбегли з двора ее млсти кнежны Острозское: Матуша Олшамовского в руку левую ранено, рана крывавая, рубаная; Станислава Яковского ранено въ руку правую; а машталера Войтеха въ руку правую ранено, также рана рубаная; при том теж татарина кнежны ее млсти Острозское Махметовича, который был вышол з господы, не маючи при собе жадное обороны, казал его пан Патрикий збити и зранити войтови Угринови Тимошчевичови, иж его съ плацу за умерлого взялъ; якож пан Киницкий для подпору права своего на пришлый час оказывал нам того татарина, в которого есмо видели раны рубаные, аж и кост вытято, плече правое выбито, рука левая выбита и самъ увесъ збит и зраненый. Якож то нами пан Киницкий осветчал, нам оповедал и оказалъ. Которого сведоцства нашого дали есмо пану Киницкому тот наш лист з нашими печатми. Данъ . . . . . въ неделю проводную, року Божого Нароженя тисяча пятсотъ шестъ десят четвертого, мца апреля девятого дня“.
А так я тую жалобу оповедане пна Станислава Киницкого, врядника Степанского, и лист оных людей добрых, в листе меновите описаныхъ, ему на сведоцство ку праву данный, въ книги замковые записати казал.
(К. Ц. А., кн. 2038, л. 61, № 18).
XL.
(Донесеніе вижа о врученіи служебникомъ п. М. Оксака, урядника воеводы Виленскаго, земянкѣ О. Оксаковой листовъ пановъ-радъ, напоминальнаго и позовнаго, данныхъ по просьбѣ М. Оксака).
Року Божого Нароженя 1564, мца апреля 17 дня.
Приездилъ до мене, Андрея Ивановича Русина, подстаростего Луцкого, служебникъ врядника Налибоцкого ясновельможного пна его млсти пна Миколая Радивила, воеводы Виленского, маршалка земского, канцлера великого князства Литовского, старосты Берестейского и Ковенского, державцы Борисовского и Шовленского, пна Мартина Оксака на имя Иван Русин, просячи о вижа, при котором бы мел дати именем пна своего листы позовные от их млсти панов рад великого князства Литовского земянце гдрьской Григоревой Оксаковой паней Овдоти Томковне Посяговенкой . . . . . штож, дей, она по смерти брата его мужа своего небожчика Григоря Оксака забрала до себе имене его зо всими маетностями, з людми, з кгрунты оного именя и о колко десят челяди невольное, также кони, зброи, стада и к тому вси речи рухомые — золото, серебро, ланцухи, клейноты, пнзи готовые золотые, чирвоные, шаты, перла, сприт домовый, цын, медь, статок дворянин гдрьский (?) и иншие маетности речи рухомые, не обсылаючи его, ани даючи ему о том знати, все собе побрала. Што ширей а достаточней на позвех их млсти панов рад гдрьских великого князства Литовского ест описано. Ино я з уряду замку Луцкого посылал на то вижом боярина Красноселского Василя Нимецкого, который виж, там бывши, оттоля приехал и, ставши передо мною в замку Луцком, до книг замковых тыми словы сознал: Иж „тых часов у четверг прошлый мца апреля третогонадцат дня служебник пна Мартина Оксакова на имя Иван Русин при мне, вижу врядовом, и при стороне, приехавши до Посягови, и заразом шол до двора паней Григоровое Оксаковое; нижли нам самое панее Овдоти Григоровое в дворе быти не поведили, одно есмо дочку ее млсти панну знашли. Которой служебник пна . . . . Иван Русин листы от пна своего под печатми их млсти панов рад великого князства Литовского при бытности пна Ивана и пна Семена Хребтовичов Богуринских — напервей, лист навпоминалный, а потом позвы — до рук дал и рок ей очевисто ознаймил, иже бы матка ее пани Григоревая Оксаковая пни Овдотя Томковна за тыми позвы перед гдрем королем, его млстию, а в небытности гдрьской у великом князстве Литовском, ино перед их млстию пны радами, по роспущеню войска з службы гдрьское тепере прошлое весны за шесть недель ку праву сама стала и в том ся з пном Мартином Оксаком очевисто росправила. Тогды дочка паней Григоревое Оксаковое лист навпоминалный, давши перед собою вычитати, почтиве его служебнику пна Мартинову отдала, а копею, с того листа списаную, и позов оден до рук своих собе узела“.
И просил служебник пна Оксаков Иван Русин, абы то было записано.
А так я тое вижово сознане в книги замковые записати казал.
(К. Ц. А., кн. 2038, л. 62, № 19).
XLI.
(Донесеніе вижа о врученіи дворяниномъ Гр. Ело–Букоемскимъ кн. Б. Острожской листовъ господарскихъ, мандата и заручнаго, данныхъ по просьбѣ воеводы Кіевскаго кн. К. Острожскаго).
Року Божого Нароженя 1564, мца іюня 3 дня.
Присылал до мене, Андрея Ивановича Русина, подстаростего Луцкого, его млст князь Костентин Костентинович Острозский, воевода Киевский, маршалок земли Волынское, староста Володимерский, жедаючи о вижа, при котором бы мел через дворанина гдрьского листы его кролевское млсти дати ее млсти кнегини Илиной Костентиновича Острозской кнгни Беате с Костелца. Ино я з уряду замку гдрьского Луцкого посылал на то вижом служебника его млсти князя Богуша Федоровича Корецкого, старосты Луцкого, Браславского и Веницкого, на имя Павла Яновича Несвишского. Который виж, там бывши, оттоля приехал и, ставши передо мною, до книг замковых тыми словы сознал: Иж „тых часов у середу прошлую мца мая тридцать первого дня дворянин гдрьский пан Григорей Елович Букоемский при мне, вижу врядовом, и при людех зацных шляхте земян его кролевское млсти — пану Антону Яловицкому, пану Тихну Хомяку а пану Федору Петровичу Хомякох-Смордовских, — знашодчи кнгиню Илиную Костентиновича Острозскую в замку Острозском, тамже, напервей, давал ее млсти мандат его кролевское млсти о имене его млсти князя Костентина Острозского, воеводы Киевского, Словенско, которое, дей, ее млст з урядником, з бояры, з слугами, з мещаны, с подданными его млсти тамошними Словенскими у его млсти через врядников, слуг, бояр, многих подданных своих, кгвалтом отняла и в моц свою тое имене его млсти помененое Словенско, и с тым всим, што, дей, колвек в том дворе по небожчице матце его млсти маетностей было зостало, взяла; такъ теж и всю маетность врядника его млсти Словенского Василя Богдановича забрати, гумно и фолварок его млсти тамошний спустошити а подданным, дей, его млсти тамошним Словенским великие кривды и шкоды поделати казала. Што ширей а достаточней на мандате гдрьском ест описано, приказуючи, абы кнегини Илиная перед его кролевскою млстю ку праву сама стала и врядников своих, меновите описаных, Павла и Андрея Ящолду, поставила, а о противене и непослушенство напротивку росказаню и листу панов рад их млсти его млсти великого князства Литовского господару его млсти справилася, а князю Костентину его млсти, воеводы Киевскому, подле жалобы усправедливила от поданя того мандату гдрьского, то ест от середы прошлое мая тридцать первого дня, за шесть недель. Ее млст кнегини Илиная мандат его королевское млсти, почтиве принемши, вычитала и засе его дворенину гдрьскому пану Григорю Еловичу Букоемскому оддала, копею, с того мандату списаную, собе взяла и на тот рок перед гдрем его млстю стати обецала. А потом дворенин гдрьский пан Григорей Елович Букоемский давал кнгини Илиной другий лист его кролевское млсти заручный под десетма тисячми копами грошей о небезпеченство здоровя врядником, слуг, бояр и подданных его млсти князя Костентина, воеводы Киевского. Ее млст кнгиня Илиная и тот лист гдрьский заручный, почтиве принемши, вычитала и опять его дворенину гдрьскому пану Григорю Еловичу оддала. Што все мною, вижом врядовым, и людми добрыми сторонными осветчил“.
И просил дворенин гдрьский пан Григорей Елович Букоемский, абы то было записано.
А так я тое вижово сознане в книги замковые записати казал.
(К. Ц. А., кн. 2038, л. 89, № 2).
XLII.
(Жалоба п. И. Халстовскаго, намѣстника бискупа Луцкаго и Берестейскаго, объ угрозахъ, чинимыхъ ему и другимъ подданнымъ бискупа княземъ Александромъ Сангушковичомъ-Кошерскимъ).
Тогож мца іюля 12 дня.
Присылал до мене, Андрея Ивановича Русина, подстаростего Луцкого, наместник его млсти князя Яна Андрушевича, бискупа Луцко(го) и Берестейского, Торчинский пан Иван Халстовский, жалуючи и оповедаючи на князя Александра Санкгушковича Кошерского, маршалка гдрьского, иж, дей, звазнившися безвинне на него самого, на слуг его и на подданных князя бискупьих, мещан Торчинских, отповед и похвалки через лист свой вчинил, хотячи его самого о горло приправити, здоровя позбавити, а подданых Торчинских бити и рабити, где кого колвек потрафивши. На што ж и лист его отповедный в себе маючи, до мене на вряд замку Луцкого присылал.
Для которых отповедей и похвалок его наместник Торчинский пан Иван Халстовский, не будучи безпечен здоровя своего, просил, абы то было записано.
А так я тую жалобу и оповедане его в книги замковые записати казал.
(К. Ц. А., кн. 2028, л. 137, № 23).
XLIII.
(Донесеніе вижа о врученіи п. А. М. Жоравницкому листовъ пановъ-радъ, напоминальнаго и позовнаго, данныхъ по просьбѣ земянки М. Яковицкой).
Року Божого Нароженя 1564, мца сентебря 7 дня въ четвергъ.
Приходила до мене, Андрея Ивановича Русина, подстаростего Луцкого, земянка гдрьская повету Володимерского пни Василевая Яковицкая пни Маря Андреевна, просечи о вижа, при котором бы мела дати лист врядовый напоминалный о сумму пнзей так теж и позвы под печатми их млсти панов рад великого князства Литовского пану Александру Марковичу Жоравницкому, ключнику и городничому Луцкому, и брати его млсти пану Михайлу и пану Яну Жоравницким о имени Жабокрики, на котором, дей, она з мужом своим паном Василем Яковицким суму пнзей, тисячу коп грошей личбы литовское, мела; то пак, дей, они, не отдавши оное сумы пнзей, тое имене Жабокрики в моц и в держанье свое взяли. Што ширей а достаточней на позвех их млсти панов рад великого князства Литовского и на листе врядовом ест доложоно.
А так я з уряду замку Луцкого посылал на то вижом боярина гдрьского Красноселского Ждана Павловича, который виж, там бывши, оттоля пришел и, ставши передо мною, до книг замковых тыми словы сознал: иж „Пан Богдан Янчинский брат пней Василевое Яковицкое при мне, вижу врядовом, и, маючи при собе людей зацных, то ест князя Григоря Ружинского, пна Ивана Шелвовского а пна Ивана Ворышского, ходил до пна Александра Марковича Жоравницкого и, знашодчи его в месте Луцком недалеко кривого мосту, давал ему от сестры своее пнее Василевое Яковицкое лист врядовый напоминалный о суму пнзей, о которую, дей, пан Александро Жоравницкий описался листом своим ее млсти платити. А потом дал ему позвы, писаные от их млсти пнов рад великого князства Литовского, о имене Жабокрики и рок ему за тыми позвы перед гдром королем его млстю, а в небытности его млсти гдрьской у великом князстве Литовском ино перед пны радами их млстью, которые на он час у Вилни справы судовые справовати будут, по роспущеню войска з службы гдрьское и земское теперешнее восеннее за двадцать недель ку праву стати очевисто зложил. Тогды пан Александро Жоравницкий, лист врядовый напоминалный вычитавши, засе ему отдал, а копею, с того листа списаную, так теж и позов оден собе взял и на тот рок зложоный ку праву стати обецал. Што пан Богдан Янчинский мною, вижом врядовым, и тыми вышей меноваными пны осветчил“.
И просил, абы то было записано.
А так я тое вижово сознане в книги замковые записати казал.
(К. Ц. А., кн. 2038, л. 202, № 16).