Br
Брестчина
Производит · Предлагает · Приглашает

Акты LII-LXI: городские дела и полномочия должностных лиц (1566-1568): оригинал

Акты LII-LXI, городские дела и полномочия должностных лиц, 1566-1568 годы. Издание, с. 72 и далее. Тексты актов в орфографии издания.

LII.

Скан: с. 72

(Донесеніе вижа объ оскорбленіи, нанесенномъ войтомъ и мѣщанами Порыцкими дворянину п. М. Джусу, посланному для врученія листовъ господарскихъ княжатамъ Порыцкимъ).

Лѣт Бож. Нарож. 1566, мца генваря четвертого дня.

Присылал до мене, Петра Ивановича Хомяка, подстаростего Луцкого, землянинъ гдрьский пан Фронцъ Крушъ восполокъ з малжонъкою своею панею Галеною Станиславовною Залеского, просячы о вижа врядового, при которомъ бы дворянинъ гдрьский за листомъ его кролевское млсти мелъ их увязати в часть местечка Порыцкого и в инъший части именей кнжат Александровичов Порыцкихъ, то ест в тую часть, которую, дей, небожчикъ кнзь Матушъ Александровичъ Порыцкий жоне своей панеи Галене Станиславовне на противко вена и всего вношеня ее три тисячи золотыхъ полских записал.

Ино я з уряду замку гдрьского Луцкого посылалъ на то вижомъ служебника моего Федора Степановича, который виж, там бывши, оттоля приехал и, ставши передо мною, до книг замковых тыми словы созналъ: Иж «тых часов у волторок прошлый мца генваря первого дня дворянин его кролевское млсти пан Михайло Игнатовичъ Джуса, маючи при собе мене, вижа з уряду замку Луцкого, а другого вижа Володимерского на имя Гришка Кочановского, к тому сторону людей добрых, ездил з листы гдрьскими до княжатъ Порыцкихъ, хотячы, водле листу его кроле(вское) млсти, пана Фронца Круша и малжонъку его паню Галену Станиславовну Залеского в часть местечка Порыцка и в часть именей Порыцкихъ у трех тисячей золотыхъ полских вѣна, ей от кнзя Матуша Александровича Порыцкаго описаного, увязати. И кгдыж есмо, там до Порыцка к местечку проежчаючи, пытали есмо многихъ подданныхъ тамошнихъ о князех Порыцкихъ, ес-ли бы который с нихъ в замку Порыцкомъ былъ? тогды вси подданныи тамошние повидили намъ, иж кнзь Янушъ Александровичъ Порыцкий ест в замку. А кгдыж, дей, есмо вже приближилися к местечку до воротъ местскихъ, тогды перед нами ворота затворили, и в тых же ворот было большей ста чоловековъ з ручницами, з луки, з рогатинами и з иншимъ рознымъ оружьемъ. Которых пан Михайло Джуса, дворянинъ гдрьский, пыталъ, хто бы межи ними былъ старший? Они отказали, иж самъ войтъ и з мещаны у воротехъ стоить. Тогды пан Джуса, дворянинъ гдрьский, просил, абы ему ворота отворили и его до кнзей, панов своихъ, пустили, поведаючи имъ, иж мает до кнзей Порыцких лист его кролевское млсти. На том войтъ и мещане Порыцкие отказали: иж, дей, «его млст кнзь Янушъ, пан нашъ, давно о томъ приеханю вашомъ ведаеть и для того тут нас поставити казал, абыхмо тебе не пустили.

а о листы, дей, кролевские кнзь его млст, панъ нашъ, ничого не дбаетъ, бо, дей, вжо не первшый ты, дворянин, з листы гдрьскими тут приежчаешъ, але кождого недопускають, еще их бьютъ и гонят, а тобе, дей, тоеж будеть». За тымъ, дворянинъ гдрьский панъ Михайло Джуса просилъ их, абы послали до кнзя своего, штобы толко его с которымъ вижом до себе пустити казал и листъ его кролевское млсти принялъ. Они и того вчинити не хотели и тогож часу заразом стали на кгвалт кликати и в звон звонити. Тогды, дей, зо всѣхъ сторонъ почали людей к местечку бечы, и служебники, которые были зо псы на поли, тамже прибегли. Также пан Михайло Джуса, дворянинъ гдрьский, видячы таковую спротивность напротивко воли и росказаню его кролевское млсти, же на него кгвалту кличуть и въ звонъ звонятъ, то все нами, вижами врядовыми, и стороною людми добрыми, которыи при немъ были, освитчивши, оттоль проч ехати мусил».

И просил пан Фронцъ Крушъ, абы то было записано.

А такъ я тое очевистое вижово сознане в книги записати казалъ.

(К. Ц. А., кн. 2040, л. 1, № 1).

LIII.

Скан: с. 74

(Жалоба дворянина п. П. Оранскаго объ оскорбленіи, нанесенномъ ему при исполненіи обязанностей службы урядникомъ и слугами кн. Ян. Четвертинскаго. Донесеніе вижа по этому дѣлу).

Лѣт Бож. Нарож. 1566, мца февраля 3 дня, в суботу, в обидную годину.

Пришодчи на вряд его кролевское млсти до мене, Войтеха Красовскаго, воротного замку Луцкого, в тот час будучого на местцу пана Петра Ивановича Хомяка, подстаростего, дворянинъ его кролевское млсти пан Павелъ Оранский жаловал плачливе а обтяжливе на кнзя Януша Матеевича Четвертинского, оповедаючы тымъ обычаемъ: иж, дей, «я, маючи при себе вижа вряду замку Луцкого такъ тежъ и сторону людей добрых шляхтичов, ездил искал есми на многих местцох кнзя Януша Четвертенского з листы его кролевское млсти, то есть з манъдатомъ и з увяжчимъ листомъ, а не могъ есми его знайти. Такъ же, дей, нынешнего дня в суботу на Стретене Господне, приехавшы мнѣ тут до Луцка и доведавшися запевне, иж кнзь Януш Четвертинский у дворѣ своемъ на Яровицы ест, тогож часу, поставившы кони в господѣ, пошол есми з вижомъ врядовым и з людми добрыми сторонними до кнзя Януша Четвертенского на Яровицу, хотячы ему дати листы его кролевское млсти, мандатъ и лист увяжчий у третю часть Яровицы и Антоновецъ и во въси тые именя, што кнгни Овдоти Четвертенской малжонокъ ее млсти кнзь Матвей Четвертенский записалъ, ку тому теж мандатъ его кролевское млсти о многие кривды и шкоды кнгни Матеевое Четвертенское и о ночное кгвалтовное отняте третее части именя Яровицкого и Антоновецкого. И кгды, дей, есмо до двора Яровицкого по гребли ишли, тогды видел есми кнзя Януша Четвертенского, а он ишол с кухни до светлицы и потравы у мисах за нимъ несено. И скоро, дей, одно нас обачивши, тогож часу казал перед нами фортку замкнути. И гдыж есмо до фортки пришли, тогды, дей, врядникъ его млсти кнзя Янушов наймя . . . . . з Богданомъ, з дъякомъ, и з Яночкомъ и з иншими слугами княжими а помощниками своими коло двадцати чоловековъ, выбегши з светлицы, за росказанемъ кнзя Януша, пана своего, ино недабаючы на заруки его кролевское млсти, што ему перво сего княгини Матѳеевое Четвертенское лист кролевской давно (?) под пятма тысячми копами грошей, прискочивши до фортки, мене самого оглоблею торчма у перси забили, шапку з усими листы гдрьскими з головы збили; так же, дей, есми шапку з листы пофативши, почал перед ними втекати; а они, дей, за мною, дворяниномъ, такъ теж за вижомъ урядовымъ и з людми сторонними, то ест служебникомъ его млсти кнзя Лва Александровича Санкгушковича Коширского Войтехомъ, а бояриномъ его млсти кнзя Януша Порыцкого Васком Ждановичомъ, прислужникомъ ее млсти кнгни Матѳеевое Четвертинское Семеномъ Федоровичомъ и служебникомъ моимъ Дмитромъ, вганяючи через греблю, кийми и корпы по хрыбту били як мене самого, такъ вижа и сторон людей добрыхъ. И кгды быхмо, дей, перед ними не повтекали, певне бы нас были на смерть позабивали».

Якож той виж врядовый боярин гдрьский Красноселский Павел Некрашевичъ, ставши передо мною очевисто, до книгъ замковых тымиж словы, водлугъ жалобы и оповеданя пана Павла Оранского, дворянина гдрьского, з людми сторонними, выше меноваными, однословне сознал, поведаючы: Иж «кгды есмо нинешнего дня ходили с паном Павлом Оранскимъ до кнзя Януша Четвертенского на Яровицы и, взшедши на греблю, бачили есмо кнзя Януша Четвертенского, а он ишол с кухни до светлицы и потравы в мисах за нимъ несено и, скоро нас обачивши, тогож часу казал перед нами фортку замкнути; и, кгдыж есмо до фортки пришли, тогды врядник его млсти князя Янушевъ Яровицкий наймя Каспор з Богданомъ, з дъякомъ, и Яночкомъ и з иншими слугами княжими а помощниками своими около двадцати чоловеков, которые, выбегши з светлицы и прискочивши до фортки, дворянина его кролевское млсти пана Павла Оранского оглоблею торчма у перси забили и шапку з листы гдрьскими з него были збили так же он, шапку свою из листы на земли пофативши, почали есмо втекати перед ними; а они за паном Павлом Оранскимъ та и теж за мною, вижомъ, и за сторонними людми добрыми, выше меноваными, вганяючи нас через греблю, кийми и корбами по хрыбту били; и кгды быхмо перед ними не повтекали, подобно бы, дей, нас на смерть позабивали».

Где тут же при вижовомъ сознаню дворянин его кролевское млсти пан Павел Оранский показовалъ мне, вряду замковому, збите и рану свою. И видел есми в него на персех у боку левого под цыцкою знакъ чирвоный.

И, хотячи пан Павел Оранский о то перед его кролевскою млстью мовити, просил, абы то было записано.

А так я тую жалобу оповедане его и вижово сознане в книги замку Луцкого записати казалъ.

(К. Ц. А., кн. 2040, л. 30, № 1).

LIV.

Скан: с. 76

(Жалоба п. С. Романовскаго, лентвойта Луцкаго, о неповиновеніи Луцкихъ мѣщанъ ему и его пану, маршалку М. Ело-Малинскому, войту Луцкому. Донесеніе вижа по этому дѣлу).

Лѣта Бож. Нарож. 1566, мца марца 5 дня, у волторокъ.

Приходилъ на вряд его кролевское млсти до мене, Войтеха Красовского, воротного замку Луцкого, в тот час будучого на местцу пана Андрея Ивановича Русина, подстаростего Луцкого, служебник его млсти пана Михайла Еловича Малинского, маршалка его кролевское млсти, пан Станислав Романовский, лантвойт Луцкий, жалуючи и оповедаючи на бурмистров, радeц и всих мещан места Луцкого о томъ, што ж, дей, «вже колко листов его кролевское млсти пан мой, его млст пан Михайло Елович Малинский, до них присылает, абы они его млсти, пану моему, войту Луцкому, и мне, служебнику его, яко лантвойту, послушенство чинили, а они, дей, ничого недбаючи на листы и росказане его кролевское млсти, и до сих часовъ пану моему и мне, служебнику его млсти, жадного повинoватства и никоторого послушенства чинити не хочуть».

Для чогож пан Станислав Романовский, хотячи в том вряде пошуповати, брал у мене вижом з уряду замку Луцкого служебника моего Станислава Милевского. Который виж, там, в мещан Луцких бывши, зась оттоле пришол и, ставши передо мною, до книг замковых тыми словы созналъ: Иж «теперешнего часу пан Станислав Романовский ходил со мною, вижом врядовым, и з стороною до мещан Луцких, то ест до Васка Лукашевича, Щетинки, до Юска Щетиниголова, до Михайлашка и до Степана Пинчука, пытаючи их, естли они хочуть быти под моцю и послушенством пна его пана Михайла Еловича Малинского и его самого, яко лантвойта Луцкого, водле росказаня и листов его кролевское млсти? Тогды тые панове мещане Луцкие, вышeй менованые, тымъ обычаем пану Романовскому отказали: иж, дей, «мы теперечы не толко пана твоего, пана Михайла Еловича Малинского, або тебе, служебника его, але и самого гдря короля его млсти, кроме бурмистров своих, слухати и жадного послушенства чинити не хочемъ». Што онъ мною, вижом врядовым, и стороною освитчилъ».

И хотячи пан Станислав Романовский о томъ до его млсти пана своего пана Михайла Еловича Малинского слати, просил, абы то было записано.

А такъ я тую жалобу оповедане его и вижово сознане в книги замковые записати казалъ.

(К. Ц. А., кн. 2040, л. 60, № 6).

LV.

Скан: с. 78-79

Пану Миколаю Сопезе на маршалковство.

Жикгимонт Август, Божю милостью корол Полский.

Ознаймуем симъ нашимъ листомъ, иж, маючи есмо ласкавый взгляд на службы воеводича Новгородского пана Миколая Павловича Сопеги, которыми он, будучи при дворе нашом от немалого часу, ласку нашу намъ заслуговал, такъ же, ведучи роты ку службе нашой, немалым коштом и накладом своимъ заслугуючи нам, господару, и речи посполитой, звлаща будучи в битве, в которой гетмана неприятеля нашого князя великого Московского Шуйского поражоно, не литуючи горла и маетности своее, нам, господару, ласку нашу заслуговал и тепер заслуговати не перестает, а так мы, щерод хотечи его охотнейшого ку службам нашим учинити, даем ему вряд маршалковство на дворе нашом. Мает он тот вряд держати, в немъ радити и справоватися, яко и иные маршалкове наши; и до войска нашого вести мает под справою своею повет Белский, справуючися в том водле постановеня нашего и статуту земского.

И на то есмо пану Миколаю Сопезе, маршалку нашому, дали сес наш лист, до которого и печат нашу приложити велели.

Писан у Воиню, лет Бож Нарож 1566, месяца апреля 3 дня.

(Л. М., Зап., кн. LI, л. 19).

LVI.

Скан: с. 78

Мандатъ по маршалка пана Яна Шимковича в справе старосты Жомоитского пана Яна Ходкевича о торгненъе словы неповстягливыми съ покиванъемъ руки на его милости, яко на маршалка земского, на замъку Берестейскомъ въ сеймъ, выданный.

Жыкгимонтъ.

Маршалку нашому, старосте Тыктинскому, державцы Вилкомирскому, пану Яну Шимковичу.

Писал и присылал до нас староста Жомоитский, маршалок земский великого князства Литовского, державца Плотеский и Телшовский, панъ Янъ Ходкевичъ, даючи намъ знать о томъ, што ж, дей, ты на теперешнемъ сойме валномъ Берестейскомъ, въ року нинешнемъ шестдесятъ шостомъ месяца июля девятогонадцат дня на замку нашомъ Берестейскомъ, гдѣ его милость съ паны радами нашими справы соймовые отправовали, недбаючи ничого о зверхность нашу господарскую, которую ач кольвекъ под каждымъ часомъ, але еще тымъ большеи на зъездахъ соймовых, маршалокъ земский на собе поносит, словами неповстягливыми кромъ всякого пристойного уваженя стану и достоенства его милости с покиванъемъ руки торгатися еси выжил и немалый розрух таковымъ убелженъемъ особы его милости, великое рады нашое, на сойме еси учинилъ; што панъ староста, яко рада наша, ач з великимъ жалемъ, а ведже уважаючи потребы речи посполите и местце, на котором ся то стало, терпливе заховавши на нас, господара, то вложил, жадаючи, абы ся таковые своволности зверхности нашою господарскою завстегали. Ино кгды ся ты под часом зобраня соймового словы неповстягливыми с покиванъемъ руки противку так великое рады нашое пана старосту Жомоитского, который врядом своим маршалковства земского и с полношенемъ ласки над головами всего рыцерства нашого значить росказаня владности нашое гдрьское, звлаща въ небытности нашой держачи на сойме межи иншими паны радами нашими местце нашое гдарьское, торгнутися еси смел, а тым местца нашого господарского на особе его милости не уважил, тогды мы, господарь, хотячи о томъ выведане на тверде нашомъ ведати, и так непристойные своволности заставовити, приказуемъ тоби, абы еси за симъ листомъ мандатомъ нашымъ перед нами, господаремъ, где кольвекъ на тот час дворомъ нашим будемъ, ку праву стал, и того ся выступку и неповстягливости своей, што тобе ширей на року припаломъ через инстыкгатора нашого ознаймено будет, нам, господару, справил, от поданя тобе сего листу мандату нашого, за две недели; а тот рок за сим листомъ, мандатомъ нашимъ, зложити есмо тобе росказали дворянину нашому Балтазару Лукомскому; ты бы на рок, через того дворянина нашого зложоный, перед нами, господаремъ, ку справе ся становил конечно.

Писанъ въ Люблине, лет Бож Нарож 1566, месяца июля 21 дня.

(Л. М., Зап., кн. XVII, л. 24–25).

LVII.

Скан: с. 80

(Донесеніе вижа и свидѣтельство воротнаго Луцкаго объ отказѣ Луцкихъ мѣщанъ признавать своимъ войтомъ п. М. Ела-Малинскаго).

Лѣта Бож. Нарож. 1567, мца генвара 28 дня, въ понеделокъ, по рацу.

Пришодчи до мене, Войтеха Красовского, воротного замку Луцкого, в тот час будучого на месцу пана Петра Ивановича Хомяка, подстаростего Луцкого, дворянинъ его кролевское млсти панъ Василей Мацковичъ, и просил мя о вижа, перед которым бы мел подавати лист его королевское млсти бурмистром, радцом и всимъ мещаномъ места Луцкого. Я ему на то давалъ вижомъ боярина гдрьского Красноселского Ждана Павловича.

Который виж с паном Васильем Мацковичом до бурмистров, и до радец места Луцкого, маючи при себе людей добрых сторону, ходил. И, пришодчи перед мене, до книг замковых тыми словы сознал: Иж „пан Василей Мацкович, дворянин его кролевское млсти, передо мною лист гдрьский подавал бурмистром и радцом места Луцкого въ дому пана Гришка, который, дей, лист перед ними писар местский Богуш Ванковичь прочитал. В которомъ, дей, листе от гдря его млсти пишет, росказуючи бурмистром и радцом, и всим мещаном Луцким, абы они никого иного не были послушны и не перед ким ся иным не справовали в потребах своих одно, абы были послушни маршалъкна гдрьского его млсти пана Михайла Ело Малинского и передъ нимъ самымъ, або лентвойтом в потребах своих в праве справовалися, и доходы всякие местские пану Елу давали, а Борзобогатых ни в чом и никого иного послушни не были; а естли бы Борзобогатый, або хтож колвек, будучи в месте Луцком, ихъ мещан Луцких под право свое притягал и пожитки местские на себе брати и ихъ в послушенство свое приворочати хотел, абы ся таковому боронили, яко кгвалтовникови“. Который же лист пан Василей Мацкович, дворянин его кролевское млсти, и передо мною, Красовским, на вряде показовалъ и былъ вычитанъ.

А потом тогож дня мца генваря двадцать осмого в понеделок же по обеде, приехавши до места Луцкого, кашталян Любачевский его млст пан Миколай Лысаковский жедал мене, абых был в него до господы его млсти до Матыса Кравца, который мешъкает близу дому войтовства Луцкого. Ямъ ку его млсти шол. Тогды пан Лысаковский слал, просячи пана Василя Мацковича, дворянина его кролевское млсти, абы с ним в его господе видел. А кгдыж панъ Василей приехал до него, пан Лысаковский ему мовил передо мною: „слышу, пане Василей, иж, дей, твоя млст въ тутошнее войтовсво Луцкое хочеш увязовать пана Михайла Ела; а я тобе того не поступлю, бо ся я наперед в тутошнее войтовство на господаря его млсти увязалъ; и буду тобе того боронити моцно; о том ведай; и вам, бурмистромъ, радцомъ и всим мещаномъ Луцким грозно росказую, абысте ся во всемъ пану Василеви, дворянину его кролевское млсти, моцно боронили; естли бы ся у васъ чимъ колвек уступовати хотел; яко о то и лантвойтом вамъ зоставую тогож Щасного Кресилловского, который до сего часу у вас лантвойтом до сего часу был“. В тот же час бурмистр места Луцкого Стецко Лепкович, повставши, мовил: „Пане Любачевский, волим мы твоей млсти вряду твоего послушни быть, нижли пана Михайла Ела“. Пан Василей пыталъ бурмистров и радец, и всих мещан Луцких, естли то всих их одно ело (?), што Стецко мовилъ. Они повидили: „Хто будет дужший, того мы будем послушни“.

Пан Василей Мацкович мною, врядом, то освитчилъши, иж ся то при бытности моей деяло, просил, абы то было до книг замку Луцкого записано.

А такъ я то все, маючи у ведомости своей, в книги замковые записати казалъ.

(К. Ц. А., кн. 2040, л. 24, № 23).

LVIII.

Скан: с. 81

Привилей пну Ярониму Ходкевичу на пят сел у волости Видуклевской вечностью и на местечко Скоды и пят сел у волости Вешвенской etc.

Жикгимонт Август ...

. . . . . . . . . . . . . . . . .

Про то мы, гсдръ, маючи на ласковомъ баченю верные, пилные и на всемъ цнотливые, накладные заслуги пана Яна Ходкевича, старосты Жомойтского, которые он праве от молодости лет своих: первей, на дворе нашомъ, а потом будучи взят на вряд столниковства нашого великого князства Литовского, завжды пилне, а намъ вдячне ласку нашу гсдрьскую заслуговалъ; а кгды на достоенство староства Жомойтского, а потом и на вряд маршалства земского великого князства Литовского и на администрацыю земли Лифлянтское от нас, гсдра, преложонъ былъ, тамъ, на тых местцах и в ряде нашой будучи, знакомите растропне со всякою оздобою, учтивостью маестату нашого гсдрьского и росширеньемъ панства нашого великого князства Литовского, яко высокой раде нашой належить, ни в чомъ не упослежаючи продковъ своих, намъ, гсдру, добре заслуговал и, въ потребах земскихъ панствъ нашихъ с пожиткомъ добра речи посполитое завжды заслугуючи, добре ся нам подобалъ и подобати не переставаеть . . . . . . .

Дан при бытности их млсти пнов рад и иных станов в зобранью войска нашого в Радошковичах, лет Бож. Нарож. 1567, мсца декабра 17 дня.

Подпис руки гсдрьское.

(Л. М., Зап. кн. I, л. 139 об.—142).

LIX.

Скан: с. 82

Листъ до воеводы Виленского, канцлера, ознаймуючи о зврощенью посланца его кр. млсти, для способенья пенезей в пожычку до Кгданщан посыланого, и о выправе посла на сеймъ Пруский.

Воеводе Виленскому, канцлеру нашому великого князства Литовского, старосте Мозырскому, державцы Лидскому и Борисовскому.

Даемъ т. млсти ведати, иж в тых часех прыехал до нас посланецъ нашъ, которого есмо способенья пнзей въ пожычку до Кгданска посылали, с которого то есмо вырозумели, иж кгды бы достаточне отъ вшей млости, панов рад наших, и иных станов здешнего панства нашого великого князства Литовского до Кгданщан, о пожычку пнзей жедаючы, послы отправлены были, тогды бы они немалое сумы пенезей зъ земль посторонныхъ достати, маючы в томъ певную истоту, обручы хотели. А иж теж к тому съемъ теперъ въ Прусехъ быти маеть, на который мы в речах земских, сойму оного панства великому теперъ зложоному належачыхъ, посла нашого теперъ отправуемъ. Тогды бы тымъ лацней и потребней послы, о той речи до них посланые, што певного там при сойме постановившы, справити могли.

Для чого есть того великая а пильная потреба, иж бы т. м., яко преднейшая рада и канцлер наш, листы и посельство до пановъ Прусских и Кгданщан, водле намовы, которую есмо в Городне зъ вшею млстю, паны радами нашыми, учынили, отъ пановъ рад отправившы и печатю своею такъже печатми князей бискупов, Виленского и Киевского, и иншыхъ пановъ рад нашых, которых бы т. м. поблизу около себе досягнути мог, запечатовавши, сезде до нас, гсдра, послалъ. А панъ Виленский, пан староста Жомойтский и иншие панове рады, которые сезде при нас суть, такъже тое посольство запечатають. И о том бы намъ т. м. ознаймилъ, кого бы ся т. м. в том посельстве послати видело. Яко ж бы так добре было, иж бы тотъ посол, кром жадного омешканя, отправленъ былъ, абы весполокъ с посломъ нашымъ, которого на съемъ Пруский вжо есмо отправили, ехати могъ. Бо мы, гсдръ, тому ж послу нашому, на съемъ Пруский отправленому, Кгданщанъ около тое пожычки вживати и з ними то постановене чинити злетили есмо, и тымъ бы ся спешней тая речь отправити могла и кгды бы з одного посолъ отъ в. м., панов рад наших, з нашымъ послом ехалъ и о томъ постановене з ними учинилъ.

Писанъ.

(Л. М. Зап., кн. XLVII, л. 120 об.—121 об.)

LX.

Скан: с. 83

Листъ до воеводы Менского пна Гаврыла Горностая о ехане его самого с почты его противъ людей неприятельскихъ пры пану Ходкевичу, старосте Жомойтскомъ.

Жикгимонт Августъ.

Воеводе Менскому, старосте Каменецкому, пану Гаврылу Горностаю.

Што, с певныхъ намовъ и постановеня вашей млсти, пановъ радъ нашихъ, росказали есмо старосте Жомойтскому, маршалку земскому великого князства Литовского, администратору и гетману земли Ифлянтское, державцы Плотельскому и Тельшовскому, пану Яну Ходкевичу з войском нашимъ подъ замъки неприятеля нашого великого князя Московского тягнути и тамъ, што Бог допоможет, з неприятелем чинити. Ино маем того ведомость, ижъ вже пан староста Жомойтский з воеводою Браславскимъ, старостою Житомирскимъ и Речицкимъ, потягнул; якожъ и почты вшей млсти, пановъ радъ нашихъ, з ними посланы. Нижъли, ижъ бы тымъ большая потужность въ людех войску нашихъ была, и пан староста Жомойтский абы такъ для рады, яко и для большого постраху неприятельского, весполокъ з иншими паны радами быти могъ, тогды здало бы ся намъ, абы твоя млсть самъ особою своею зо всимъ почътомъ своимъ весполокъ с пномъ старостою Жомойтскимъ был.

Яко ж прыказуем и жедаем, ижъ бы еси для потребъ земских и речи посполитое и ласки нашое того собе за трудно не покладаючи, до пна старосты Жомойтского с почътомъ своимъ тягнулъ и тамъ, сполне будучи, яко радами своими, такъ и всякимъ усилованемъ около потребъ военныхъ то чинилъ, што вамъ и войску нашому панъ Бог допоможеть, яко бы ся што доброго и речи посполитой пожыточного а славе нашой гсдрьской учъстивого за старанемъ вашей млсти, радъ нашихъ, вделати могъло, въ чомъ намъ речь вдячную вделаешъ.

Писанъ у Кнышине. Лета Божего Нароженья тисеча пятьсотъ шестдесять осмого, мца февраля 5 дня.

(Л. М., Публ. д., кн. IX, л. 33—34).

LXI.

Скан: с. 84

(Жалоба п. Ст. Кглуховскаго, урядника кн. Л. А. Сангушковича, объ убійствѣ подданнаго его пана п. Ганибаломъ Влохомъ, урядникомъ подканцлера п. О. Воловича. Донесеніе вознаго по этому дѣлу).

Лѣта Божого Нароженя 1568, мца февраля 27 дня.

Писал и присылал на вряд его кролевское млсти до мене, Петра Хомяка, подстаростего Луцкого, врядникъ велможного княжати его млсти князя Лва Александровича Сангушковича Кошерского Горуховский пан Станислав Кглуховский, жалуючи и оповедаючи на врядника велможного пна его млсти пна Остафья Воловича, подканцлерового великого князства Литовского, маршалка дворного, старосты Берестейского и Кобрынского, Мирковского пна Ганибеля Влоха тымъ обычаемъ: Иж, дей, „он тыхъ часов недавно минулых року тепер идучого шесдесять осмого мца февраля семогонадцат дня во второкъ, поймавши влостного подданного, отчича его млсти князя пна моего Завидовского на имя Андрейца Зворику, збил, змордовал, и(ж) одного его на тот час ледве живого оставил; того часу, звезавши ему на шию овцу, без жадное вины его и не обсылаючи в том его млсти князя пна моего а ни мене, врядника его млсти, обесити казал; гдеж, дей, есми трупъ тило небожчика Андрейца вознымъ повѣту Луцкого пномъ Дмитромъ Новоселицкимъ обводил“.

Якож возный повѣту Луцкого Дмитръ Новоселицкий, ставши очевисто передо мною, до книгъ тыми словы созналъ: Иж „тых часовъ недавно минулых мца февраля двадцат четвертого дня у второкъ ездилъ есми от врядника Горуховского пна Станислава Кглуховского зъ служебникомъ его Лавриномъ Кглазовскимъ до врядника Мирковского пна Ганибеля Влоха, гдеж есмо самого пна Ганибеля не застали, бакаляра на местцу его а боярина его млсти пна подканцлерого Григоря. Гдеж тот служебникъ пна Станислава Кглуховского Лавринъ Кглазовский пытал того бакаляра и Григоря, боярина, для которое причины врядникъ их пан Ганибел Влох подданиного князя его млсти Завидовского на имя Андрейца Ворыку безвинне, не обсылаючи князя его млсти, а ни врядника его млсти, обесити казал? Они поведили: иж, дей, „мы о томъ не видим; врядникъ о то ведает, для чого обесити казал“. И того ж часу ездил есми с тым же служебникомъ пна Кглуховского Лаврином огледати того трупу и видел есми, иж тот трупъ висит; у котораго бачил есми на чоли над правым окомъ рану крывавую, а перси сини збиты. Што тот служебник пна Кглуховского мною, возным, осветчил“.

И, хотечи пан Станиславъ Кглуховский, врядникъ Горуховский, о томъ его млсти князю, пну своему, дати знати, просил, абы то было записано.

А так я тую жалобу оповедане его и возного сознане до книг кгродскихъ записати казал.

(К. Ц. А., кн. 2042, л. 60, № 66.)