Акты LXIX-LXXVII: завещания и городские споры (1570-1572): оригинал
Акты LXIX-LXXVII, завещания и городские споры, 1570-1572 годы. Издание, с. 105 и далее. Тексты актов в орфографии издания.
LXIX.
(Заявленіе нареченнаго владыки Пинскаго и Туровскаго п. А. Русина о томъ, что п. Ив. Загоровскій не хочетъ вернуть ему его мамрамы, писанные на имя нѣкоторыхъ пановъ-радъ).
Лѣта Божого Нароженья тисеча пятсот семдесятого, мца генвара 28 дня.
Пришедшы на вряд его кролевское млсти до мене, Петра Хомека, подстаростего Луцкого, его (млсть) панъ Андрей Иванович Русин Берестецкий нареч . . . ный владыка Пинский и Туровский, оповедал . . . . обычаемъ. Иж, дей, „року прошлого шестдесят девя . . . . мца декабра двадцать второго дня у середу, скоро по смерти небожчика отца Ионы, архимандрыта Жидичинского, упросивши есми его млсть пна Петра Загоровского, маршалка его кролевское млсти, выправил есми был сына его мл пна Ивана Загоровского до двору его кролевское млсти, давши ему мамрамов три отвороных, два на полуаркушу а треи на аркуши, а три мамрамы зашитые на листы под печатъю и с подписомъ руки свое под титуломъ владыцьства Пинского и Туровского, на которых мамрамех зашитых до некоторых панов рад его кр. мл., просяти о причину, абы ся их млсти до его кролевское млсти о архимандрытство Жидичинское причинили и ему в томъ допомагати и мне тот хлеб духовный у его кр. мл. архимандрытство Жидичинъское зъеднати, и упросити рачил, панъ Иван Загоровскій написати мел. А так, дей, пан Иванъ Загоровский, у двору его кр. мл. мне ничого доброго не выправивши и того хлеба духовнаго, архимандрытства Жидичинского, у его кролевское мл. и в панов радъ не зъеднавши, а што был, за дозволенемъ пна отца своего за прозбою моею, до двору его кр. мл. посланнищымъ приехалъ и тых мамрамов, которых в мене побрал, мне ни едного, не ведома для которое причины, не отдал и отдати не хочет. А ям, дей, якъ самому его кр. мл., так и паномъ радам никому ничого а никоторое (сумы) пнзей не винен“.
И, перестерегаючи в том невинное шъко . . . . своее, пан Андрей Русин просил, абы то было записано. (А) такъ я тое оповеданье его мл. до книг кгродских записати . . . .
(К. Ц. А., кн. 2044, л. 49, № 49).
LXX.
(Донесеніе вознаго о томъ, что воев. Браславскій кн. Р. Ѳ. Сангушковичъ отказался подчиниться господарскому приказанію — уступить Веницкія корчмы кн. Б. Ѳ. Корецкому, стар. Луцкому, Браславскому и Веницкому).
Лѣта Божого Нароженя 1500 семдесятого, мца оевраля 7 дня.
Ставши очевисто в замку Луцкомъ передо мною, Ярошом Паликиевскимъ, воротнымъ замковымъ, тот час будучимъ на местцу пна Петра Хомека, подстаростего Луцкого, возный поветовый Андрей Былецкий оповедал и тыми словы до книг кгродских ку записованю сознал: иж, дей, „будучи мне з уряду приданнымъ на справы велможному кнзю его млсти кнзю Богушу Федоровичу Корецкому, старосте Луцкому, Браславскому и Веницкому, якож дня нинешнего у волторокъ даты вышей писаное, маючи я при собѣ шляхту людей добрых, то естъ Василя Езерского, подключого Луцкого, а служебника пна Станислава Защинского, лантвойта Луцкого Яна Презынского, ездил есми (от) его млсти кнзя старосты Луцкого з листы его кролевъское млсти; один с канцлереи литовское, писаный року шестдесять осмого, а з другимъ листомъ его кролевское млсти с канцлереи полское, справованый в року шестдесятъ девятомъ, писаный до его млсти кнзя Романа Федоровича Санкгушъка, воеводы Брасловского, гетъмана дворного великого кнзьства Литовского, старосты Житомирского, державцы Речицкого, о корчмы Веницкие (на передмести) и, знашедъчи есми его млсть кнзя воеводу Брославского в дворе его млсти Серниках, и при той шляхте, вышей мененой, давал есми его млсти кнзю воеводе Браславскому тые листы его кролевское млсти, абы его млст кнзь Роман Санъкгушъко тымъ корчмам на передмести Веницкомъ, ведлугъ росказаня и писаня листов его кролевское млсти, дал покой и в тых корчмах шинку ниякого не мел. То пак его млсть кнзь Роман листа его кролевское млсти с канцлереи литовск . . . . приняти не хотел и не принял и его не вчитил, только один листъ с канцлереи корунное принял и копию з него под печатю моею взял, которую вычитавши, поведил тими словы: иж, дей, „я тых корчом кнзю Корецкому не поступлю и еще ся о томъ старати буду, иж або кнзь Корецкий для того староства збудет, або я воеводства збуду.“ Штомъ я, возный, тою шляхтою, вышей мененъною, осветчил“.
А так я тое очевистое сознане возного до книг кгродских записати казал.
(К. Ц. А., кн. 2044, л. 75, № 68).
LXXI.
(Заявленіе подстаросты Луцкаго п. И. Богуринскаго о томъ, что всѣ мамрамы нареченнаго влад. Луцкаго и Острожскаго п. А. Русина на имя господаря и пановъ-радъ отданы имъ п. Я. А. Русину, сыну владыки).
Лѣта Божого Нароженя 1500 семдесятого, мца августа 1 дня.
Передо мною Остаѳемъ . . . . подсудкомъ земскимъ повету . . . . даты вышей описаное будучи
. . . . за прозбою пна Ивана Хребтовича Богуринского (подстаростего Луцкого) на местцу его млсти (врядовомъ подстаростего Луцкому) для прислуханьи тое речи . . . .
. . . .
ростий Луцкий доброволне оповедал и тыми словы до книг кгродскихъ ку записованъю сознал: Иж што, дей, „за жаданьем и прозбою пна Анъдрея Русина, нареченого владыки Луцкого и Острозъского, по смерти пна Марка Жоравницкого, будучы ему на епископьи Луцкой в року шестдесятъ девятомъ, маючы я от его мл немало мамрамов, так отвороных яко и зашитых, с печатю и с подписомъ властное руки его мл., ездил есми до двору его кролевское мл. до Люблина въ потребахъ и справах его млсти около владычества Луцкого; и будучи мне такъ при дворе гдръскомъ, на тых мамрамех отвороных и зашитых якъ до его кролевское мл, такъ и до панов радъ и ни до кого иншого жадных потребъ от его мл не справовал и в себе жадного не оставил, але вси въ целости, штомъ их иле мел, отдал сыну его мл пана Андреевому пану Яну тамъ же в Люблине; вед же кгды бы ся на потомъ, под которымъ часомъ мел показати який кольвек лист на долги, на якую суму пнзей, або на которую колвекъ реч под одною печатю и подписомъ руки пна Анъдрея Русина от мене самого, тогды тот лист на кождомъ местцу у кожъдого права никоторое моцы не маеть и мети не будет; и вечне таковые листы уморою сим моим очевистымъ перед врядомъ сознаньемъ“.
И остерегаючы его мл панъ Анъдрей Русинъ, нареченый владыка Пинъский и Туровский, самъ себе и потомъки свои, абы якие листы змышлоные на томъ ся от кого не показали, просил, абы то было записано.
А такъ мы тое очевистое сознанъе пана Ивана Хребтовича Богуринского, подстаростего Луцкого, в книги кгъродъские Луцкие (въ подлинникѣ дважды) записати казали.
(К. Ц. А., кн. 2044, л. 413, № 431).
LXXII.
(Жалоба мѣщанъ Луцкихъ о наѣздѣ Закревскаго, служебника п. Миколая Дубровскаго, съ товарищами и помощниками на домъ бурмистра Луцкаго).
Лѣта Божого Нароженя 1571, мца июля 23 дня.
Пришедъчы до мене, Ивана Хребтовича Богуринского, подстаростего Луцкого, з местца его млсти пна Михайла Ела Малинского, маршалка его кролевское млсти, войта Луцкого, Ян Рачинский, служебникъ его млсти, а з уряду местцкого бурмистръ на тот час Степан Маскевич и радцами и з ынши многими мещаны Луцкими обтяжливе жаловали и оповедали на служебника пна Миколая Дубровского (въ подлинникѣ пропускъ) Закревского и на бояръ Полонскихъ Яцка а Богдана Кунчичов: Иж, дей, „они, способившися з многими товарыши и з помочниками своими, дня нинешнего в понеделок даты вышей писаное, пришедчы умысльне кгвалтомъ на домъ Степана Масковича, бурмистра Луцкого, почали бити и рубати, хотечи ся добыт и саму бурмистру пакост учинит. А потом, добывши ся в домъ, обачили подданого его кролевское млсти мещанина Луцкого Ждана Санковича, от того дому недалеко стоячи ему на влицы доброволне и безпечне, тот же Закревский с тымъ боярмы и товарыши и с помочниками з добытыми бронями почали на него бити, аж заледве от нихъ в томъ (sic) свой втек; они и там в дом его моцно къгвалтом почали ся добыват, аж мусел от сусед ратунъку волати. В тот час сторожи и слуги месткие были на сторожи. Обачивши оный кгвалт, хотели брану (sic) на крывом мосту замкнути. Они потом, обачивши у броне сторожу и слуг местскихъ, почали на них бити и рубати. А мусела сторожа перед ними втикати. И там же у брони слугу местского Гарасима окрутне збили, змордовали и зранили, в руки левы палцы пооттинали“. Просили мене на огледане того кгвалту домового и броны посеченя и зраненя слуги местского Гарасима о придане возного повѣту Луцкого“.
На штом имъ придал возного Левка Верховского, который, возный, тамъ бывши а кгвалту домового, посеченя броны а ран слуги местского Гарасима огледавши, и до книг ку записованю тыми словы вызнал: „Напервое, видел есми в дому Степана, бурмистра, у ворота битые знаки в колко местцах начжаком; который кгвалт Степан менил быти от Закревского, служебника, и бояр Полонских, пна Дубровскаго, товаришов и помочников ихъ. Потом видел есми у Ждана, мещанина, также ворота и верее побиты и песечоны и в броне троецко; который кгвалт тот Ждан менил быти от того ж Закревского, вышей менованого, и бояр Полонскихъ, товаришов и помочников его. А в слуги местского Гарасима видел есми на руце левой пол палца великого проч оттято, а два палцы средних на той же руце шкодливе оттято, только ледве на скуре зависли, которыми двема пальцы владнути не будет. И там же у броне видел есми кров з раненя того Гарасима, которое зранене тот Гарасим менил собе быти от Закревского и бояр Полонскихъ, товаришов и помочников ихъ.
А такъ я тую жалобу и оповедане Яна Рачинского и теж бурмистра, радец и мещанъ Луцкихъ и сознане возного до книг кгродскихъ записати казал.
(К. Ц. А., кн. 2045, л. 288, № 332).
LXXIII.
(Заявленіе Закревскаго, служебника п. М. Дубровскаго, о томъ, что онъ заключилъ мировую сдѣлку съ мѣщанами Луцкими).
Лѣта Божого Нароженя 1571, мца іюля 25 дня.
Пришедчы и постановившися очевисто на вряде его кролевское млсти в замку Луцкомъ передо мною, Иваном Хребтовичом Богуринскимъ, подстаростимъ Луцкимъ, служебникъ его млсти пна Миколая Дубровского, старосты Полонского, Ян Закревский оповедал и доброволне до книг кгродскихъ вызнал тыми словы: Иж, дей, што «которое заишътье и розницу мѣлъ есми з урядомъ местскимъ Луцкимъ и зо всими мещаны Луцкими, а так, дей, я за радою, намовою и причиною людей добрыхъ такъ о збите, зранене и зелживость свою, яко теж о збите и зранене невинъное слуги местского Гарасима и теж о добыване кгвалтовное в домъ бурмистра Степана и мещанина Луцкого Ждана з урядомъ местскимъ и с тыми меноваными и зо всими мещаны Луцкими поеднал, вгоду и постановене слушное з ними принял. О которое, дей, я вжо збите, зранене и зелживость свою з урядом местскимъ и зо всими мещаны Луцкими мовити и их до жадного права притегати, так теж и никоторых отповедей и поозалок на них самых и на маетности их самъ через себе, товаришов и приятелей своих чинити и на горла ихъ ничим стояти вечными часы не буду и не маю».
И просил вряд местьский и вси мещане Луцкие, абы то было записано.
А так я тое очевистое а доброволное сознане Яна Закревского до книг кгродскихъ Луцких записати казал.
(К. Ц. А., кн. 2045, л. 303, № 342).
LXXIV.
(Господарскій закладный листъ, данный по жалобѣ пановъ Гуляльницкихъ на воеводича Виленскаго п. М. Радивиловича и его урядника п. Г. Ковачинскаго).
Лѣта Божого Нароженя 1571, мца іюля 28 дня.
Писал и присылал до мене, Ивана Хребтовича Богуринского, подстаростего Луцкого, наместник Олыцкий пан Гектор Кавачинский, оповедаючи, иж, дей, «дня вчорашнего мца іюля двадцатсемого дня положоно кспею з листу его кролевское млсти на имено его млсти пна моего уво Иванчичахъ, на которомъ листе дата з Люблина року шестдесятдевятого мца іюля первоговнадцат дня, вжо тому два годы», и просечи, абы тая копея слово от слова до книг была уписана. Которая копея так ся в собе мает: «Жикгимонт Август, Божою милостію корол Полский, великий князь Литовский, Руский, Пруский, Жомойтский, Мазовецкий, пан и дедичъ . . . . . . жоному Богушеви князю Корецкому, старосте ншому Луцкому, верне нам милему, а в небытности его, подстаростему, ласка нша кролевская. Врожоный, верне нам милый! Жаловался перед нами обтежливе шляхетный Янко Ермашовичъ, Иляшъ Степанович Гулялницкие сами от себе и от брати своее врожоное именемъ з Гулялникъ противо врожоному Миколаеви Радивилови, воеводичови Виленскому, и Гекторови Кавачинскому, старосте его на Иванчичах и на Олыце, от слуг его и подданыхъ, которые им на горло их явне отповедают. Што мы, бачечи противо покоеви посполитому, а хотечи их в томъ на здоровю их убезпечити, а тое зуфалство и безъпечност от тых, которые им отповедают, погамовати, заклад наш, жебы обедве стороне не кгвалтемъ, але водлугъ права посполитого против себе заховали, межи ими даваем и закладаемъ три тисечи коп грошей монеты и личбы литовское тымъ листомъ нашим, которого половица стороне бѣгачей, а другая половица до скарбу нашого королевского, коли бы их сторона перестала без вшелякого отпусканя, мает быти дана и заплачона. Иж бы обедве стороны о тым певную ведомость мели, росказуемъ в тым, абы тот заклад нашъ межи преречоными сторонами дано и залажоно до книг кгродскихъ Луцкихъ вписати и через возного земского, ведле звычаю, ведомо обудве сторонам донести и ведомость иншым вчинити росказал; а иначей, под ласкою нашою, абыс в томъ не чинил. Дан з Люблина на сейме валномъ корунномъ, дня одиннадцатого липца, року Божого 1500 шестдесятдевятого».
А так я тую копею з листу его кролевское млсти слово от слова с початку аж до конца до книг кгродскихъ записати казал.
(К. Ц. А., кн. 2045, л. 311).
LXXV.
(Донесеніе вознаго о томъ, что владыка Луцкій и Острожскій п. Ив. Борзобогатый-Красенскій удержалъ у себя мандаты господарскіе: содержаніе мандата по дѣлу о наѣздѣ владыки на домъ писаря и воротнаго замковыхъ).
Року 1572, мца марта 7 дня.
Передо мною Иваном Хребтовичом Богуринским, подстаростим Луцкимъ, ставши очевисто, возный повету Луцкого Марко Збранный до книг кгродских Луцких ку записованю тыми словы сознал: Иж «дня оногдашнего мца марта пятого дня в середу, маючи я при собе шляхту людей добрых — пна Антона Рудецкого (пробѣлъ въ оригиналѣ) — дал есми очевисто два листы, мандаты его кролевское млсти, владыце Луцкому и Острозскому отцу Іоне Борзобогатому Красенскому въ манастыри Жидичинскомъ; оден мандат в жалобе всих обывателей земян шъляхты земли Волынское, а другий мандат в жалобе Юры Хормуза, воротного, а Романа Перевеского, писара, врядников бывших замку гдрьского Луцкого, о томъ, ижъ онъ, будучи, дей, войтомъ Луцкимъ року прошлого шестдесятого, взявши умыслъ непристойный, самъ из сыномъ своим Василемъ и помочниками, нашодчи моцно кгвалтомъ в замок гдрьский Луцкий на господу писара Романа Перевеского а воротного замкового Юры Хормуза в замку гдрьскомъ, збил и зранил; и того воротного, взявши в казнь местскую, осадил; а потом, вынемши с казни местское, осадил в замку; которому воротному, будучи в замку въ казни, пославши сына своего Василя, казал обедве руки обрубати. При которомъ нахоженю на господы их немалы шкоды стали: реистра записаные, книги судовые и иншие листы и справы потребные так и статъки, што мели, погинули. И окрутенство неслыханое над тым воротным Хормузом, врядникомъ замковым, почтивым шляхтичом, вчинити важили, а тымъ маестат его кролевское млсти образили. А их всих, слуг и подданых их въ небезпечност здоровя и теж, за згиненьем на тот час книг судовых земских, в шкоды и траты привели. Што ширей а достаточней и меновите на тых мандатех его кролевское млсти ест описано и доложоно. Которые ж обадва мандаты и з них очинъ списаные под печетю моею отец владыка, от мене, возного, принемши, вычитавши, въ себе их задержал и загамовал до дня нинешнего пятници, хотячи мне, возному, на тые мандаты отказ вчинити и их вернути. А так я дня нинешнего в пятницу ездил есми до отца владыки до Жидичина, просячи его, абы мне тые мандаты его кролевское млсти вернул. А владыка Луцкий так мандатов его кролевское млсти, яко и копей з них списаных, мне, возному, не вернул и въ себе их загамовал; и поведил: иж, дей, «я самъ до его кролевское млсти еду, або сына своего пошълю и там же перед его кролевскою млтю тые мандаты положу, и довемся у его кролевское млсти, естли то з волею его кролевское млсти тые мандаты вышли, або нит?»
А так я тое очевистое сознане возного до книг кгродских Луцкихъ записати казалъ.
(К. Ц. А., кн. 2046, л. 134 об., № 141).
LXXVI.
(Заявленіе Лукаша Лапы, служебника п. Ст. Кграевскаго о томъ, что онъ будетъ въ мирѣ жить съ мѣщанами Луцкими и что его поручителемъ является другой служебникъ п. Ст. Кграевскаго п. В. Бзовскій).
Року 1572, мца мая 15 дня.
Постановившися очевисто на вряде кролевское млсти в замку Луцкомъ передо мною, Ярошомъ Паликиевским, воротнымъ замку Луцкого, будучим за зълеценемь и порученемь на местцу пна Ивана Хребтовича Богуринского, подстаростего Луцкого, про хоробу его, служебник его млсти пна Станислава Кграевского, дворенина его кролевское млсти, Лукашъ Лапа самъ доброволне безъ жадного примушеня сознал: Иж «житомъ выступилъ противку пну Степану Маскевичу, бурмистру Луцкому, и сыномъ его Грицку и Павлу и всему мѣсту, о который выступ мой заслужил есми былъ горло. Якож их млст пнове мещане, вряд зуполный местский и увесь кмин посполитый, на то вси розмилостивши, добре уважаючи у себе напред боязнь Божю, и потомъ паметаючи ласку, приязнь и добродейство его млсти пна моего пна Станислава Кграевского, даровали мя горломъ, толко постерегаючи сами собе и всего кмина посполитого места Луцкого, абыхъ я потом сам през себе, товаришов и приятел своих пномъ мещаномъ всим отповедей, похволок и помсты за то чинити не мел, хотечи то по мне мети, абых ся в том их млсти обликовил и на вряде кгродскомъ то сознал. Где я, дознавши себе в томъ выступе а вчинку своемъ быти виннымъ, а пнов мещан ку собе ласку и добродейство, иж мя горломъ даровали, доброволне то сознавам и присягу на томъ вчинити маю: Иж пнове мещане, вряд местский и увесь кмин посполитый местский, мают от мене, товаришов и приятел моих увезде на каждомъ местцу упокой мети, здоровя и маетности своее быти безпечне вечными часы. А гды бых я сам, товариши и приятели мои о то где колвек якую помсту и шкоду пномъ мещаномъ учинити мел, тогды, где бы колвек мене пнове мещане нашукати мели, мают мене поймати и горломъ казати карати. А я на тот часъ жаднымъ пномъ отзывати и боронити и щити ся не маю и мочи не буду. Якожъ за прозъбою моею его млсть пан Войтех Бзовский, служебник его млсти пна моего, за мне о то их млсти пном мещаномъ прирек и руку на том дал, иж их млсть пнове мещане все мѣсто на каждомъ местцу от мене, товаришов и приятелей моих помсты жадное мети не мают, толко завжды здоровя и маетности своей такъже на каждомъ местцу мают от мене быти безпечны вечными часы. А естли бы пнове мещане што на томъ от мене шкодовали, тогды, дей, на пну Бзовскомъ поискивати мають. А што теж при пойманю мене пан Войтех Бзовский объжаловал был на вряде кгродскомъ и осветчило триста коп грошей на пновъ мещан Луцкихъ, яко бы пну Кграевскому при томъ пойманю тые триста копъ грошей при мне мели быти и зъгинути, теды я то сознавамъ доброволне, же на тот часъ не мел есми в себе тых трох сот копъ грошей, ани жадного гроша пна Кграевъского, пна своего, такъ тежъ не было при мне жадное справы пна Кграевъского».
А так я тое очевистое а доброволное сознане Лукаша Лапы до книгъ кгродских Луцкихъ записати казал.
(К. Ц. А., кн. 2046, л. 280, № 281).
LXXVII.
(Жалоба стольника п. М. Дорогостайскаго о томъ, что, по приказанію старостиной Кременецкой п. С. Семашковой, ея служебники арестовали его подданнаго. Донесеніе вознаго по этому дѣлу).
Року 1572, мца іюня 5 дня.
Присылалъ на вряд его кролевское млсти в замок Луцкий до мене Ивана Хребтовича Богуринского, подстаростего Луцкого, велъможъный пан его млсть пан Миколай Дорогостайский, стольник великого князства Литовъского, державъца Веленский, Бозсакголский и Острозский, тивун Кгонъдинский, служебъника своего Ермолу Савицкого, оповедаючи о томъ: Иж, дей, «што в року теперешнемъ семдесят втором мца мая девятогонадцат дня в понеделок, в небытности моей, будучи мне при его кролевской млсти на сойме Варшавскомъ на службе Речи Посполитое, пни Петровая Семашковая, старостиная Кременецкая, пни Зося Боговитиновна, казавши служебником своим, Крыштофу а Кучковскому, и иншимъ слугамъ своимъ на доброволной дорозе за селомъ до . . . . . ятинским мещанина моего Дорогостайского Васка Федюковича, который по потребе своей ездил до Букоймы кромѣ всякое вины его моцно кгвалтом поймати и до себе до двора своего Добрятинского привести, там же его до столпа ланцугомъ за шию приковати и ручници на руки (скласти) а сверину его, за которую он далъ чотыри копы грошей литовских, з седломъ, рогатину в него взяти велела; а потом тогожъ дня, не вѣдома для которое причины, безправъне того подданого моего Васка пнеи Александровой Семашковой, подкомориной Володимерской, пнеи Барбаре Александровъне с Порѣцка . . . . до Коблина выдала; которого подданого моего Васка бояре пнеи Александровое Семашковое Кгабриял Березка, Микита Михайловичъ, Якимъ Яцковичъ, Максимъ Поповичъ, звезавши его, яко одны неприятели татаре, гньмо при конехъ до самого Коблина вели; тамъ же в Коблине пни подкомориная Володимерская казавши его округне збити, до вежи у везенье всадила, ести и пити давати не велела; въ которомъ везенью въ Коблине тотъ подданый мой Васко болшей двохъ недель седелъ, ажъ, дей, з середы на четвергъ въ ночи мца июня пятого дня с того везенья втекъ“.
А такъ его млсть панъ столникъ, хотячи въ томъ правне поступити, того подданого своего Васка Федюковича в четвергъ, мца июня пятого дня до вряду его кролевское млсти в замокъ Луцкий прислал. Который, ставши очевисто передо мною, въ тые жъ слова одностайне, ничего не отменяючи, яко его млсть панъ столникъ обжаловалъ, поведилъ: яко пни Петровая Семашковая на доброволной дорозе, казавши слугамъ своимъ поймати и до себе привести, в ланцугу за шию всадити и ручницы на руки скласти, сверину з седломъ и рогатину в него взяти велела; а потомъ его заразомъ, тогожъ дня пнеи подкомориной Володимерской до Коблина выдала; там же округне збитый болшей двохъ недель у везенью седелъ, ажъ з середы на четвергъ в ночи с того везенья втекъ.
И на огледане ранъ и збитя бралъ в мене з уряду кгродского Луцкого служебникъ его млсти пна столниковъ Брумла Ставицкий возного повету Луцкого Федора Фурсовича Бронницкого. Который возный, зараз тогожъ дня подданого его млсти пна столникова Васка огледавши, до книгъ кгродских Луцкихъ тыми словы созналъ: Иж, дей, „видел есми в того менованого Васка на обох рукахъ, на мышцахъ межи локтемъ и плечей раны синекрывавые, што ланцугомъ вязано, а на запясти такожъ раны синекрывавые, што в ручницы рук были; а по всему хребту раны синии, киеем битыи“.
И просилъ его млсть панъ столникъ, абы то до книгъ кгродских Луцкихъ было записано.
Которое оповеданье его млсти пна столника а подданого его млсти повесть, такъ тежъ возного очевистое сознанье въ книги кгродские Луцкие записано есть.
(К. Ц. А., кн. 2046, л. 321, № 341).