Br
Брестчина
Производит · Предлагает · Приглашает

Акты LXXVIII-LXXXVI: подданные, имения и судебное исполнение (1572-1576): оригинал

Акты LXXVIII-LXXXVI, подданные, имения и судебное исполнение, 1572-1576 годы. Издание, с. 117 и далее. Тексты актов в орфографии издания.

LXXVIII.

Скан: с. 117

(Жалоба п. Я. Мышки-Варковской о томъ, что кн. К. Острожскій перезываетъ ея подданныхъ въ свои земли).

Року 1572, мца августа 6 дня.

Писал и присылал до мене, Лва Лесоты, подвоего (sic) земли Волынское, будучи я на местцы подстаростего Луцкого пана Петра Хомяка, от его млсти князя Богуша Корецкого, воеводы земли Волынское, старосты Луцкого, Браславского и Веницкого, ее млсть пни Михайловая Мышчина Варковская, кашталяновая земли Волынское, старостина Овруцкая и Гомелская, пни Ядвикга с Курова, жалуючи и оповедаючи на его млсть князя Костентына Костентиновича Острозского, воеводу Киевского, маршалка земли Волынское, старосту Володимерского: Иж, дей, „от давных часовъ, почавши от року шестдесятвторого, его млсть князь воевода Киевский, многие кривды и шкоды именю его млсти пна малжонка моего Варковскому чинечи, и многих подданых отчичов властных Варковских подданым своим Дубенским, Погорелецким, Мокренским и иным з многих сел до именей своих повыкочивати росказал. И, не маючи на том досыть, але, дей, и часу теперешнего по зестю з сего света пна нашего млстивого Жикгимонта Августа, славного короля Полского, великого князя Литовского, Русского, Пруского, Мазовецкого, Иолянтского и иных, пна и дедича, по постановленю их млсти пнов рад и всих обывателев всее земли Волынское в томже року семдесятвтором мца июля двадцатьсемого дня, абы покой посполитый земский внутренний домовый от кожъдого стану, духовного и свецкого, великого и малого, не чинен ни в чом кривды один другому, в покою захован был, его млсть князь воевода Киевский, оное постановлене за ништо себе маючи, легъце оное уваживши, в томъ же року теперь идучом семдесятвтором мца июня двадцатьдевятого дня подданым своим Мокренским з именъя пна малжонка моего Варковского трох подданых отчичов властных ремесников потребных — Федора, тъкача, Хилка, седларя, Савона, лучъника — до именъя своего выкотити велел. И маючи, дей, я о них певную ведомость в селе его млсти Мокром, посылала, дей, есми до его млсти князя воеводы Киевского до Дубна служебника своего почтивого шляхтича Кендераского, просечи его млсти черезъ лист свой обычаемъ суседскимъ, абы оных подданых, яко властных отчичов пна малжонка моего Варковских, выдати росказал. А се его млсть князь воевода, уживаючи великихъ и незносных срокгостей и погрозок над оным служебником моим, хочечи ему непристойне без вышелякое вины его зелживости учинит, торгаючи ся неучтивыми словы, ката на него привести казал, поведаючи: иж, дей, „ты тут для чого иного приехал, а не для тых мужиков“. Которого служебника моего от себе з великою ганбою и соромотою отпустил, а оных подданых выдати не хотел, не поведаючи их вы именю своем. А потом их до именя своего Костентинова, давши им оселост и лист, абы везде доброволне пропущоны были, выпровадити подданым своим велел. А такъ, дей, я, маючи старане о том, яко бых оных подданых отчичов малжонка моего у себе мела, за оным старанем один з оных трох, Федор, тъкач, ест пойман и до мене приведен; а двох еще и до сих часов нетъ. При котором найдень лист князя воеводы Киевского, менечи оных подданых, верху помененых, быт властными своими“.

Который лист князя воеводы Киевского ее млсть до вряду Луцкого прислала, просечи, абы, прочитавши, до книг замковых Луцких записан был.

А такъ я, выслухавши жалобу и оповеданье ее млсти пнее кашталяновое Волынское и прочитавши оный лист князя воеводы Киевского, который был отвореный под печатю его млсти властною, до книг записати казал.

Который лист слово у слово такое в собе мает: „Всем вобец и кожъдому з особна, пном и приятелем моим милым. Костентин Острозский, воевода Киевский, маршалок земли Волынское, староста Володимерский. Приятелский поздоровляючи, ознаймую вшей млсти, иж подданые мои властныи — Хведоръ, тъкачъ, Хилко, седелник, Савон, лучник, — шукаючи собе полезенья, идут на быт до именья моего Костентинова. За которыми я вшей млсти пильне прошу, абысте их вша милость всюда зо всеми статки и маетностями их доброволне, ничего не гамуючи, и безмытне пропущат рачили. А я тую ласку вшей млсти приятелский таковым же способом заделыват повинен буду. С тым ся вшей млсти ласце залецаю. Писан у Дубне, июля тридцатперъвого дня, року пятсот семдесят второго“.

Которое оповеданье и жалоба ее млсти пнее кашталяновое, такъ теж лист оный князя воеводы Киевского до книг врядовых записано есть.

(К. Ц. А., кн. 2046, л. 429 об., № 493).

LXXIX.

Скан: с. 118-119

(Жалоба п. Ф. Чаплича о томъ, что его братъ убилъ его „отчича властного“).

Лета Божого Нароженя 1573, мца июля 4 дня.

Будучи его млсти князю Богушу Корецкому, воеводе земли Волынское, старосте Луцкому, Браславскому и Веницкому, на вряде его млсти в Луцку, росказал его млсть записати: иж, постановившися перед его млстю, (пан) Федор Кадьянович Чаплич Шпановский жаловал и оповедал тыми словы: „Што ж, дей, в року теперешнем, под часом заставленя теперешнего покою посполитого, мца июня двадцатого дня пан Хведор Петрович Чаплич, брат мой, поймал отчича моего Глухонинского, которого а отец и брат рожоный и теперь у мене есть, на имя Костюка Коптева сына и до везеня своего у дворе своем Глухонинском всадил; и тамъ же, дей, его у везенью своим нет ведомо якою смертью уморил, а потомъ умерлого под шибеницу его на кгрунте своем поховати казал“.

И просил пан Федор Кадьянович Чаплич Шпановский, абы тое оповеданье и жалоба его в книги кгродские записано было.

Што есть до книг кгродских Луцких записано.

(К. Ц. А., кн. 2047, л. 190 об., № 279).

LXXX.

Скан: с. 119

(Жалоба п. Я. Гуляльницкаго о томъ, что паны Л. и А. Гуляльницкіе повѣсили подданнаго отца его).

Року 1574, мца июня 28 дня.

Присылал на вряд кгродский замку кгродского Луцкого до мене, Михаила Вильгорского, постаростего Луцкого, от его млсти князя Богуша Корецкого, воеводы земли Волынское, старосты Луцкого, Браславского и Веницкого, пан Янко Гуляльницкий сына своего Михаила, обтяжливе жалуючи и оповедаючи тымъ обычаем: Иж, дей, „року теперь идучого тисеча пятьсотъ семдесятчетвертого мца июня двадцатшостого дня в суботу пан Левко а пан Андрѣй Яновичи Гуляльницкие сами особами своими, нет ведомо для которое причины, наполнившися воли своее, поймавши, дей, моцно кгвалтомъ на добровольной дорозе на кгрунте отца моего в ыменью нашомъ Гуляльницкомъ подданого отца моего на имя Федка без жадного лица злодейского и не просечи, дей, ув отца моего на него о справедливость, обесити дали“.

И просил оный Гуляльницкий через помененного сына своего Михаила, абы то было записано.

А так я тую жалобу и оповеданье его до книг кгродских Луцких записати казал.

(К. Ц. А., кн. 2048, л. 17, № 21).

LXXXI.

Скан: с. 120

(Донесеніе вознаго о томъ, что слуги старосты Кременецкаго кн. Я. М. Збаражскаго не допустили ввести п. Я. Ворону, согласно приговору суда, во владѣніе имѣніемъ своего пана).

Року 1575, мца февраля 4 дня.

Передо мною Михаилом Вилгорским, подстаростим Луцким, от его млсти князя Богуша Корецкого, воеводы земли Волынское, старосты Луцкого, Браславского и Веницкого, ставши очевисто возный повету Луцкого пан Мартин Зарецкий, до книг кгродских Луцких сознал тыми словы: Иж „сего дня в пятницу даты вышшей писаное, будучи мне, возному, при вшей млсти, пне подстаростий, на передместьи Луцком во именю его млсти пна Григоря Гулевича, хоружого земли Волынское на местцу, назначоном за писаньем листов у повет тутошний Луцкий от его млсти князя воеводы Волынского и от их млсти панов депутатов, где ваша млсть был готов з местца князя его млсти пна своего старостинского его млсти князя воеводы Волынского с поветом на вчиненье отправы пну Яну Вороне Боротинскому, водле суду и всказу их млсти пнов депутатов, то есть на вязане во именье князя Януша его млсти Миколаевича Збаражского, старосты Кремянецкого, у Яровицу за суму пнзей шесть сот коп грошей, от панов депутатов пну Вороне всказаную; ино в тот час, приехавши там до вашее млсти, пане подстаростий, и до пановъ поветовников слуги его млсти князя старосты Кремянецкого — Аврамъ Береженский, Томъко Белецкий а Яско Белецкий же з ыншими товарышми своими — мовили, ваша млсть, пне подстаростий, такими словы: Иж, дей, „дошла князя его млсти, пна нашого, з нас, слуг его млсти, таковая ведомост, якобы неякий взказ пан Янъ Ворона на его млсть князя пна нашого от неяких депутатов, под которых суд пан наш не подлегъ, (одержати) мел; и маем таковую ведомост, же ся ваша млсть, пне подстаростий, съ поветом тутошним Луцким до именья князя его млсти пна нашого на Яровицу для въвязыванья ехати хочеш. Теды мы тобе, пне подстаростий, и всех поветовников именем князя его милости пна нашого и сами от себе напоминаем, абысте ваша млсть на таковое увязане до Яровицы, именье пна нашого, не ехали. Естли же в добрый обычай, а не на жадное увязане поедете, теды для вашей млсти, пне подстаростий, бочка меду, а другая пива быти может. А естли же яко инакшей ехати схочете, теды каждого такового, хто бы едно смел до двора князя его млсти на Яровицу ехати, кулями будем потыкати, а порохом кормити. Кгдыж тые депутатове зле а неслушне на князю пну нашом всказ учинили, што им Богъ заплатою будет. Бо князь пан наш под моц и под суд их не подлегъ, а ни их обирал и до каптуру, за которым они судят, печати не прикладал, и на то все, што в тем каптуре написано, не зезволял. А теж на сей час при вашей млсти пновъ рад а ни дыкгнитаров не видим. Пре то не важъся, ваша млсть, тамъ до Яровицы ехати“. И с тым тые менованые слуги князя старосты Кремянецкого с передместья отехали. А потом, за росказанем и посланем твоей млсти, пне подстаростий, ездил есми до Яровицы служебником твоей млсти Миском Малевским и зъ шляхтою людми добрыми — паном Яном Кошкою а пном Львом Вихерским. И кгды вже есмо до Яровицы приежчали, тогды поткали нас перед селом слуги князя старосты Кремянецкого — Аврамъ Береженский а Томъко Белецкий — з ыншими многими товарышми своими, слугами его млсти князя старосты Кремянецкого, з ручницами и з ыншим оружем. Которых служебник твоей млсти, пне подстаростий, Миско, за росказанем твоей млсти, пытал, „есть ли же бы во именье и в двор князя его млсти пна своего Яровицкий, водле суду и всказу депутатского, в суме пнзей в шести сот копах грошей, пну Яну Вороне на князю его млсти, пну нашом, всказаной, поступили“. Тогды тые менованые слуги князя старосты Кремянецкого на то служебнику, або посланцу, вашей млсти передо мною, возным, и перед шляхтою менованою тыми словы поведили: Иж, дей, „князь, пан наш, о том суде всказаню депутатском ничего не ведает, ани с паном Вороною перед депутаты у права стоял, и тых депутатов вся земля Волынская не обирала, и князь его млсть, пан наш, при том, як каптур чинили, не был, и на то не зозволял, а к тому тые ж депутатове, водле каптуру и статуту, сумнением або присегою своею того, иж мели справедливе судити, не поправили. С тых всех причин мы увязаны во именье и в двор князя его млсти, пна нашого, у Яровицу не допустим и моцно того боронити будем; и гдыж увязанья нам князь пан наш моцно боронити росказал“.

Ино мы, чуючы таковый отказ от слуг князя старосты Кремянецкого, с тым есмо от них ехали проч“.

А так я тое очевистое сознане возного до книг кгродских Луцких записати казал.

(К. Ц. А., кн. 2049, л. 13 об., № 10).

LXXXII.

Скан: с. 122

(Жалоба намѣстника княжатъ Жеславскихъ п. В. Копотя о томъ, что Берездовскій урядникъ кн. К. Острожскаго п. П. Мервицкій неоднократно дѣлалъ наѣзды на имѣніе земянина княжатъ Жестовскихъ п. И. Косовича).

Року 1575, мца июля 15 дня.

Писал и присылал на вряд кгродский в замок Луцкий до мене, Михаила Вилгорского, подстаростего Луцкого, от его млсти князя Богуша Корецкого, воеводы земли Волынское, старосты Луцкого, Браславского и Веницкого, наместник Жеславский пан Василей Копот, жалуючи и оповедаючи тым обычаем: Иж, дей, „яко перше сего врядник его млсти князя Костентина Острозского, воеводы Киевского, маршалка земли Волынское, старосты Володимерского, Берездовский пан Прокопъ Мервицкий, по колко крот наизжчаючи моцно кгвалтом з многими помочниками своими немалым войском на именье земенина их млсти пна Иваша Косовича, первым разом череду, волы с плугами, другим разом, всех подданных з жонами, детми и со всею маетностью забравши, до Берездова отпровадил; третім разом так же вышшей мененый Прокопъ Мервицкий, з многими помочниками своими наехавши моцно кгвалтом на имене того ж Косовича, земенина их млсти княжат Жеславских, Семаки, побил, поранил и самого того Косовича оттол з ыминя кгвалтовне вытиснути и выгнати хотел; аж онъ, давши знать суседом своим до инших сел их млсти княжат Жеславских и заволавши на помоч собе, ледвее оборонил и никоторых кгвалтовников, помочников того Мервицкого, на том кгвалте в дому своем поймал, и до вряду его кролевское млсти замку Кремянецкого отослал. Которых ач належало там до Луцка отослать, кгдыж тое именье в повете Луцком лежит, нижли пришло бы ехать з ними через иминя, места и села его млсти князя воеводы Киевского, бо их и минуть нелзе; и маючи о том видомость, же на них от врядников и бояр его млсти князя воеводы стережено, хотечи их поотнимать и самих о зелживость приправить, мусел се волнейшим и безпечнейшим проездом удаты до Кремянеца. То пак потом дня прошлого в понеделок мца июля одиннадцатого дня в року нинешнем семдесятпятом тот же Мервицкий, врядник его млсти князя воеводы Киевского, з многими людми помочниками своими, наехавши моцно кгвалтом на тое ж имене земенина их млсти княжат Жеславских верхомененого Ивана Косовича, его самого на смерть мало не забил, маетность от мала до велика всю побрал, двор его и все село, домов болш тридцати, спалил и на корен бы пустошил“.

И просил пнъ Василей Копот, наместник Жеславский, абы то было записано.

А такъ я тую жалобу и оповедане его до книг кгродских записати казал.

(К. Ц. А., кн. 2049, л. 304 об., № 58).

LXXXIII.

Скан: с. 123

(Донесеніе вознаго о томъ, что коморникъ господарскій п. С. Кгрентовскій вручилъ листы отвороные пановъ-радъ в. кн. Литов., — одинъ панамъ-радамъ, дигнитарамъ и рыцарству воеводства Волынскаго, а другой воев. Кіевскому кн. К. Острожскому).

Року 1575, мца сентебря 19 дня.

Пришодчи на вряд кгродский в замок Луцкий перед мене, Михаила Вилгорского, подстаростего Луцкого, от его млсти князя Богуша Корецкого, воеводы земли Волынское, старосты Луцкого, Браславского и Веницкого, возный повету Луцкого Андрей Сикоръский ку записованю до книг кгродских Луцких тыми словы вызнал: Штож, дей, „за приданем его млсти князя Богуша Корецкого, воеводы земли Волынское, старосты Луцкого, Браславского и Веницкого, был есми на справах велможного пна его млсти пна Миколая Дорогостайского, столника великого князьства Литовского, державцы Бойсакголского, тивуна Кгондинского, при коморнику его королевское млсти пну Станиславе Крентовском, посланом от их млсти пнов рад, дыкгнитаров и всего рыцерства великого князьства Литовского з листы их млсти отвороными под печатми и с подписанем рук их млсти властных, то ест з одним листом до их млсти пнов рад, дыкгнитаров и всего рыцерства обывателев воеводства Волынского, в котором их млсти пнове рада и рыцерство великого князьства Литовского писати рачит до их млсти, жадаючи и упоминаючи их млсть братерским обычаем, иж бы их млсть напоминаути рачили его млсти князя Костентина Острозского, воеводу Киевского, маршалка земли Волынское, старосту Володимерского, абы его млсть о то, што в року теперь идучом тисеча пятьсот семдесят пятом мца июня двадцат третего дня в четверг, за властным росказанем и насланем его млсти, слуги его млсти — Якуб Монинский, Михайло Павлович а Ян Шадурский — з множеством иных слуг, бояр, мещан и подданых его млсти з розных именей его млсти, маючи з собою татар поганцов почот немалый з розмаитою стрелбою и арматою розною, наехавши моцно кгвалтом на имене его млсти пна столниково на село Дорогостай, лежачое в земли Волынской в тутошнем повете Луцком, оное село Дорогостай через колко дней спустошили, великие а незносные шкоды и кривды, бои бояром и подданым его млсти поделали и великое ушкожене в пожитках его млсти самого починили, з себе сам и с тых слуг своих, которые, за ведомостю его млсти, тот кгвалт и наезд чинили, пану столнику справедливость слушную а неотволочную уделал, а на потом таковые речи загамовати рачил. Яко ширей а достаточней в том листе их млсти пнов великого князьства Литовского ест описано. То пак, дей, в року теперешнем тисеча пятьсот семдесят пятом мца сентебря семого дня в середу тот коморник его королевское млсти пан Станислав Крентовский, маючи при собе мене, возного, а при мне были стороны шляхта люди добрые — пан Ян Лещенский, пан Станислав Рогатинский — знашедчи их млсть панов рад, дыкгнитаров и много рыцерства воеводства Волынского сполне будучих на зезде в Шумску в повете Кремянецком, тот лист их млсти пнов великого князьства Литовского отвороный их млстям подал и устне их млсть просил именем их млсти пнов Литовских, абы, тому писаню их млсти местце давши, то, о што их млсть, жадаючи, писати рачили, для их млсть уделали. Их млсть пнове обыватели воеводства Волынского тот лист, от их млсти пнов Литовских до себе писаный, приняли а пну Базилиусови Древинскому, писарови его королевское млсти, читати дали. По вычитаню листу коморник короля его млсти пан Станислав Крентовский просил их млсти пнов Волынских, абы тот лист их млсти пнов Литовских ему назад вернули, а собе з него копею взяли. Их млсть пнове рады, дыкгнитары и рыцерство воеводства Волынского оного листу пну Крентовскому вернути не хотели и поведет их млсть рачили, иж, дей, „тот лист никому иншому, одно нам належит, бо до нас писан: ведже чинечи, дей, досыт жаданью их млсти пнов великого князьства Литовского, водлуг того писанья их млсти, лист свой, упоминаючи его млсть князя воеводу Киевского, абы в себе самого и слуг своих его млсти пну столнику, водлуг жалобы его млсти, справедливость уделати рачил, писали и с посродку себе с тым упоминанем до его млсти послали“.

По таковой, дей, отправе в Шумску коморник его королевское млсти пан Станислав Крентовский зо мною ж, возным, а при мне пред ся шляхта сторона вышшей помененые з другим листом их млсти пнов рад и рыцерства великого князьства Литовского отвороным теж под печатми и с подписом рук их млсти, который их млсть писати рачили до его млсти князя Костентина Острозского, воеводы Киевского, маршалка земли Волынское, старосты Володимерского, жадаючи и упоминаючи его млсти братерским обычаем, абы его млсть в том укривженю его млсти пна столниковом, яко ся вышшей поменило, з себе и слуг своих его млсти пну столнику справедливость слушную и безотволочную учинити и подданым его млсти Дорогостайским за ушкожене и знищене их нагороду уделати рачил, а наперед ку его млсти пну столнику спокойне ся заховати росказал, просто до Костентинова ехал. А приехавши, дей, нам до Костентинова в сем же року семдесят пятом мца сентебра второгонадцат дня в понеделок, знашли есмо там его млсти князя Костентина Острозского, воеводу Киевского, маршалка земли Волынское, старосту Володимерского. То пак его млсть толко одного пна Станислава Крентовского, коморника короля его млсти, до себе на упокой пустити росказавши, там его поселства на упокою слухал и лист их млсти пнов великого князьства Литовского от него взял. А мне, дей, возному, и стороне шляхте при коморнику короля его млсти пну Крентовском до себе на упокой его млсти входити и по справе прислухатися не допустил. То пак, дей, вже отправуючи его млсть князь воевода Киевский, маршалок земли Волынское, староста Володимерский, пна Станислава Крентовского, коморника его королевское млсти, до их млсти пнов рад и рыцерства великого князьства Литовского в середу мца сентебра четвертогонадцат дня в том же теперешнем року семдесят пятом, мене самого на упокой до себе возвати его млсть росказал и, кгдым до его млсти пришол, поведил его млсть тыми словы: „пне, дей, возный, перед тобою зезнавамъ и тобою осветчую, жем взял от пна Станислава Крентовского, коморника его королевское млсти, лист отвороный, писаный до мене в справе пна столника великого князьства Литовского под печатми и с подписом рук их млсти, который, дей, лист я при собе задержил, а пну Крентовскому и никому иному ворочати не годит ми ся, бо иж до мене писан, про то никому иному не належит, одно мне; и на тот, дей, лист до их млстей пнов великого князьства Литовского отписал есм, што ми ся годило“. Ведже, дей, коморник его королевское млсти пан Станислав Крентовский, иж мел в собе поготову с тых обудвух листов вышшей помененых копии, слово в слово описаные, тогды, тые копии, перепечатавши их печатю своею и рукою своею подписавши, зоставил их при его млсти пну столнику великого князьства Литовского“.

А так тое очевистое сознане возного до книг кгродских Луцких записано есть.

(К. Ц. А., кн. 2049, л. 418, № 45).

LXXXIV.

Скан: с. 127

(Жалоба кн. Влад. Збаражскаго о томъ, что воевода Кіевскій кн. К. Острожскій самовольно отнялъ у него справство замка Кіевскаго и назначилъ справцею своего сына).

Року 1576, мца апреля 5 дня.

Будучи его млсти князю Богушу Корецкому, воеводе земли Волынское, старосте Луцкому, Браславскому и Веницкому, на вряде староства его млсти в замку Луцком, постановившися перед его млстью очевисто его млсть князь Владислав Збаразский, справца воеводства Киевского, державца Богоцкий [чтение сомнительно], обтяжливе жаловал и оповедал о том: Иж, дей, „року прошлого тисеча пятсот семдесятпятого мца мая четвертого дня его млсть князь Костентин Костентинович Острозский, воевода Киевский, маршалок земли Волынское, староста Володимерский, не маючи и не показоваючи листов от его кролевское млсти, ани от панов рад коронных и не маючи до мене никоторое причины, з справства воеводства Киевского, которое его кр. млсть Жигкимонт Август мне за послуги мои дати рачил, и з замку Киевского кгвалтовне выгнал, отказуючи мне тыми словы: „абыс, дей, твоя млсть из замку зъехал, бо, дей, тебе якая легкост от мене поткает, кгды зъехати не похочеш“. И пожитки вшелякие, которые колвек от мещан и от арандаторов Киевских на справство мое Киевское, в росказаня его кролевское млсти, приходили, поотнимал; и сына своего князя Януша справцею на том замку Киевском вчинил. В чом мне великую кривду и шкоду вчинил. Которое шкоды и утраты меную соби быти тисечу коп грошей литовских, держачи при собе люду служебного оршак немалый, служачи его кролевское млсти и их млсти паном радам и всей Речи Посполитой, на том наложил“.

И просил его млсть князь Владислав Збаражский, абы тая жалоба и оповедане его млсти в книги кгродские Луцкие записана была.

А так князь его млсть тую жалобу и оповедане его млсти, припустивши ку видомости своей врядовой, до книг кгродских Луцких записати росказал.

(К. Ц. А., кн. 2050, л. 94, № 126).

LXXXV.

Скан: с. 128

(Листъ господарскій отвороный о томъ, что жидъ мѣста Луцкаго Айзакъ Мошеевичъ поручается въ оборону старостѣ Луцкому).

Року 1576, мца июня 27 дня.

Будучи его млсти князю Богушу Корецкому, воеводе земли Волынское, старосте Луцкому, Браславскому и Веницкому, на вряде староства его млсти в замку Луцком, пришодчи перед его млсть подданый гдрьский жид места Луцкого Айзак Мошеевич, оказавши и давши до рук его млсти лист его кролевское млсти отвороный, просил, абы был вычитан и в книги кгродские Луцкие вписан. Которого князь его млсть, огледавши, перед собою читати казал. И так ся в собе мает:

„Стефан, Божию млстию корол Полский, великий князь Литовский, Руский, Пруский, Мазовецкий, Жомойтский, Киевский, Волынский, Подляский, Иолянтский и теж княжа Семикгродское. Велможному князю Богушу Корецкому, воеводе Волынскому, старосте Луцкому, Браславскому и Веницкому, уприйме нам милому, ласку нашу королевскую. Велможный уприйме нам милый! Жаловался нам подданый наш жид Луцкий Айзак Мошеевич о том, иж, дей, никоторые розные особы, а меновите земенин земли Волынское Януш Угриновский зоставши ему винны за правом слушным записми и обовязками их немалые сумы пенезей, тых долгов ему платити не хотят и еще, отповеди и погалки чинячи, в небезпечности и в шкоды его приводят, и трудности задают; а он собе з ними справедливости довести и обороны никоторое в том чинити не может. И бил нам чолом, абыхмо ему, болшей того безправя терпети не допускаючи, о том до твоее млсти лист наш писати и его в обороне твоей, яко воеводы оного краю на сей час, особливе мети велели. Ино, кгдыж он собе таковую кривду и безправе быти менит, тогды хочем мети, абы твоя млсть того подданого нашого жида Айзака Мошеевича в оборону свою взял, от кгвалту, кривд и небезпеченства всякого его боронил и трудности никоторое над право посполитое ему терпети не допустил, так же и справедливости ему о тые долги его Угриновским и кождым тым, до кого ему якое дело было, заховуючи ся водлуг обычаю права посполитого и стуту (sic) земского, доводил, и помочон был, яко бы он безправя ни от кого через то не терпел, на властности своей ничего не шкодовал и нам повторе о то жаловати не мел, конечно. Писан в Кракове, дня четвертогонадцат мца мая, лето Божого Нароженя тисеча пятсот семдесятшостого, панованя нашого року первого. Петр Дунин Волский, короны Полское канцлер“.

А так князь его млсть, за прозбою оного жида Луцкого Айзака Мошеевича, тот лист его королевское млсти с початку аж до конца до книг кгродских Луцких записати казал.

(К. Ц. А., кн. 2050, л. 210 об., № 331).

LXXXVI.

Скан: с. 129

(Листъ господарскій отвороный о томъ, что жидъ мѣста Луцкаго Айзакъ Мошеевичъ берется въ оборону господарскую).

Лета Божого Нароженя 1576, мца июня 27 дня.

Будучи его млсти князю Богушу Корецкому, воеводе земли Волынское, старосте Луцкому, Браславскому и Веницкому, на вряде староства его млсти в замку Луцком, пришодчи перед его млсть подданый гдрьский жид места Луцкого Айзак Мошеевич, оказавши и давши до рук его млсти лист его кролевское млсти отвороный, просил, абы был вычитан и в книги кгродские Луцкие вписан. Которого князь его млсть огледавши, перед собою читати казал. И так ся в собе мает:

„Стефан, Божию млстию корол Полский, великий князь Литовский, Руский, Пруский, Мазовецкий, Жомойтский, Киевский, Волынский, Подляский, Иолянтский и теж княжа Семикгродское. Князем, паном, воеводам, кашталяном, старостам, державцам, вдовам, врядникам земским и дворным, земяном и дворяном нашим, войтом, бурмистром, радцам, мещаном и иного всякого стану людем, подданым нашим гдрьским и теж князским, панским, духовным и светским везде в панствах наших, а меновите в земли Киевской и Волынской. Дошла до нас жалоба от подданого нашого жида Луцкого Изака Мошеевича о том, иж, дей, никоторые розные особы, меновите земенин наш земли Волынское Януш Угриновский, невинне, маючи против ему васнь, уставичне сам через себе, врядников, слуг и людей своих и теж через направу людей обчих на здорове его стоит и безправя з ним уживает, за чим он так в дому своем, яко и на каждом местцу безпечне мешкати не сметь з великою трудностю своею. И бил нам чолом, абыхмо звирхности нашое гдрьское ему в том ратунок и убезпечене через лист наш вделали. А так мы, постерегаючи того, абы за щасливого панованя нашого в панствах наших никому ни в чом безправе ни от кого не деяло, и кгдыж помененный жид Изак, подданый наш, от Угриновского и от иных розных особ собе кгвалт, безправе и небезпеченство здоровю своему быти менует, тогды, звирхности нашое королевское ему в том ратунок и убезпечене чинячи, сим нашим листом его в оборону нашу гдрьскую берем и от вшелякого кгвалту и безправя от всех станов и особ убезпечаем. Якож сим же листом нашим, земенину нашому Янушу Угриновскому и иным всем станом то ознаймуючи, под ласкою нашою гдрьскою и под виною, на взрушителов и противников кглейтов наших в статуте прав земских описаную, приказуем, абысте, о том ведаючи, тому подданому нашому жиду Изайку никоторых отповедей и погрозок, кгвалту, небезпечности и жадного безправя ни в чом николи сами через себе и теж через врядников, слуг, бояр и подданых своих, ани через кого иного чинити не смели и по всем ся ку нему завжды и на кождом местцу спокойно заховали. А кому бы колвек до него было якое дело, абы ся з ним во всем пристойне правом обходил, конечно. Писан в Кракове на сойме коронации нашое, мца мая двадцатчетвертого дня, лета Божого Нароженя тисеча пятсот семдесятшостого, панованя нашого року первого. Петр Дунин Волский, короны Полское канцлер“.

А так князь его млсть, за прозбою оного жида Луцкого Айзака Мошеевича, тот лист его кролевское млсти с початку аж до конца до книг кгродских Луцких записати казал.

(К. Ц. А., кн. 2050, л. 240, № 330).