Br
Брестчина
Производит · Предлагает · Приглашает

Акты XXIII-XXXII: шляхетские споры и судебные поручения (1551-1562): оригинал

Акты XXIII-XXXII, шляхетские споры и судебные поручения, 1551-1562 годы. Издание, с. 27 и далее. Тексты актов в орфографии издания.

XXIII.

Скан: с. 27

Привилей бояромъ Ейшиским Якубу Балтромеевичу и брати его Блажею а Валянтому, зоставуючи их за учиненемъ выводу при шляхетстве и при землях их у волости Ейшиской на службе земской.

Жикгимонт Августъ, Божю милостю великий князь Литовский, Руский, Пруский, Жомоитский, Мазовецкий и иныхъ.

Чиним явно сим нашим листом.

Первей сего дана нам была справа отъ державцы Ейшишъского и Вораньского пана Богдана Хребтовича, яко бы бояры нашы Ейшишъские Якубъ Балтромеевичъ а братя его рожоная Блажей а Валянтый с предковъ своих людми тяглыми а не бояры шляхтою быти мели; которые, дей, перед тым здавна не боярскую, але тяглую службу ку двору нашому Ейшишъскому служывали и дякло и инъные поплаты давали; а тепер ся у службу боярскую удають и ее сслужыти хочуть. С которою справою, коло того нам даною, земли тых бояр нашыхъ, вышей мененых, которые они там у волости Ейшиской мають, через померчего нашого Ивана Михайловича вжо были на волоки померены и платъ на них положонъ. Нижли они били намъ чоломъ, абыхмо их при службе боярской, шляхетъской, зоставили и хотечи перед нами, гсдрем, вывод братею своею, людми добрыми шляхтою, на то вчинити.

Яко жъ мы, хотечи коло того шляхетъства их певную ведомость мети, росказали есмо маршалъкомъ нашимъ — пану Василью Тишкевичу, державъцы Меньскому и Волковыскому, пну Криштофу Юревичу Завиши, пану Яну Шимковичу, державцы Коневъскому и Дубицкому, — которые на справы судовые отъ насъ высажоны были, абы они тым бояром, вышей мененым, оный вывод перед собою вчинити велели. Яко жъ тотъ Якубъ Балтромеевичъ з братею своею рожоною Блажеем и Валентым на час, отъ панов маршалъковъ зложоный, перед ими стали и тот вывод на шляхетство свое, чотырех шляхтичовъ бояр наших Ейшишъских, двох зъ отца, наймя Щастъного Довишевича и Миколая Кондратовича зъ гербу Зденевы, и двох з матъки, Андрея Михайловича а Щасного Невойневича зъ гербу Навъдивъца, ставили. Которые устьне зознавали и присягу на том учинили, же оный Якубъ з братею своею рожоною есть шляхтич, а не люди тяглые. Где жъ панове маршалъкове наши, того выводу ихъ выслухавши и не чинячи той речи конъца, здали то на вырокъ нашъ гсдръский.

Ино мы, гсдрь, не для присягъ и сведецства тых бояр наших Ейшишъских, вышей мененых, але зъ собливое ласки нашое и на жеданье панов рад наших дворных, то вчинили: того Якуба Балтромеевича и братю его рожоную — Блажея и Валентына — при шляхетстве зоставили и сим листомъ нашим зоставуемъ. Мають они сами, дети и потомки их службу боярскую, шляхетскую, конъно а збройно нам служити и гербом своим Зденевою, который через братъю их, бояр наших Ейшишъских, перед паны маршалъки нашими вказыванъ былъ, печататися и всих вольностей шляхетских вживати по тому, яко и иншие бояре шляхта в том панстве нашом великом князстве Литовъском гербы своими ся печатають и вольностей своих шляхетских уживають, на вечные часы. А што ся дотычеть земль ихъ, которые за оною справою, нам даною, вже на волоки померены и на плате нашом розданы суть, тые земли ихъ за ся маеть деръжавца Ейшишъский панъ Богданъ Хребтовичъ сполна имъ вернути, с которых они толъ службою шляхетъскою нам служити мають. И вже через то державцы наши Ейшишъские их самых, детей и потомковъ не мають на службу тяглую приворочати и никоторое трудности въ том им задавати. А што ся теж дотычеть инъшое брати ихъ кревное, не рожоное, которые там же у волости нашой Ейшишъской суть, пред ся службою тяглою ку двору нашому Ейшишъскому служыти и плты волочные нам давати мають.

И на то есмо тому Якубу и брати его — Блажею и Валентину — дали сес нашъ листъ, до которого и печат ншу казали есмо привесити.

Писан у Вилни, лета Божего нароженья тисеча пятсотъ пятъдесят первого году, месяца ноябра осмогонадцат дня.

Станислав Коморовский, писарь.

(Л. М., Зап., кн. XXXV, л. 67 об.–68).

XXIV.

Скан: с. 29

(Жалоба маршалка господарскаго кн. Ал. Андр. Сангушковича о кривдахъ и шкодах, чинимыхъ ему старостою Житомирскимъ кн. Р. Ф. Сангушковичемъ и братомъ последняго кн. Ярославомъ).

Тогож мца декабра 5 дня.

Казано записати.

Присылал до мене, Бориса Ивановича Совы, подстаростего Луцкого, его мл. княз Александро Андреевич Сонкгушковича-Кошерский, маршалок гдрский, жалуючи и оповедаючи тымъ обычаемъ: Штож, дей, „великие а не зносные кривды, трудности и шкоды от князей — а Романа Федоровича Сонкгушковича, старосты его мл. Житомирского, и от брата его мл. князя Ярослава — завше уживам; а тых, дей, недавно прошлых часов мца ноябра двадцат осмого дня в четвергъ княз Ярослав, способившися з многими людми и з слугами своими, приехавши умысльне моцно кгвалтомъ на имене и на замок мой Кошер, подданых моих, людей Кошерских, позбивали и шкоды великие имъ поделали; а потомъ, дей, шодчи до стайни моей, взяли чотырех коней моих турецких и инших речей не мало побрали“. Которыхъ всих шкод реестръ, меновите написаный, в себе быти менит. „А што, дей, мачоха моя на мене менила, яко бых я который кони по смерти небожчика отца своего во Иванчичох побрати мел, ино, дей, тых копей служебники мои видели в князя Ярослава“.

И хотечи его мл. княз Кошерский о то мовити, просил, абы то в книги замковые было записано.

А так я тую жалобу и оповедане через лист его мл. князя Кошерского до книг замковых записати казалъ.

(К. Ц. К., кн. 2035, л. 3).

XXV.

Скан: с. 30

(Заявленія кн. Р. Ф. Сангушковича и дворянина п. И. Б. Несвѣцкого о томъ, что кн. Ал. Андр. Сангушковичъ отказался взять заручный листъ господарскій).

Тогож мца генвара 25 дня.

Присылалъ до мене Бориса Ивановича Сову, подстаростего Луцкого, его мл. княз Роман Федорович Санкгушковича, староста Житомирский, оповедаючи тым обычаемъ: Штож, дей, „княз Александро его мл. Андреевич Сонкгушковича-Кошерский, маршалок гдрьский, дал мне лист его королевское милости заручный о небезпеченство здоровя через дворенина гдрьского пана Федора Ивановича Русина у Свинюсех; я, дей, в тот час будучи вжо на выезде, принявши лист господарьский, казал есми за собою ехати тому дворенину гдрьскому до двора моего Павлович, хотечи ему там лист гдрьский отдати; он, дей, за мною не ехал и листа гдрьского от мене не брал; с которым листом посылал есми дворенина гдрьского пана Иляша Богушевича Несвѣцкого до князя Александра Кошерского, абы листъ гдрьский, который мне дал, до себе взялъ, он, дей, его брати не хотел“.

Якож то дворенинъ гдрьский пан Иляшъ Богушевич Несвѣцкий, ставши передо мною, очевисто тими словы сознал, Што ж „за росказанемъ его млсти князя Романа, старосты Житомирского, искал есми на многих местах князя Александра Кошерского з листом его королевское млсти и, приехавши до Каменя, места его мл., на завтрее Крещеня Гдня, то ест на ден светого Ивана Крестителя мца генвара семого дня во второк, давал есми князю Александру Кошерскому лист гдрьский, от его мл. князю Роману даный; княз Кошерский от мене листу гдрьского не брал, поведаючи: „нехай, дей, княз Роман, староста Житомирский, тот лист гдрьский тому отдаетъ, в кого его взялъ“; я, дей, осветчивши стороною, ехал есми от него; а потом ездил есми до Горухова и, знашодчи там дворенина гдрьского пана Федора Русина, давал есми ему тот лист гдрьский, през него князю Роману его мл. даный; он от мене листу гдрьского брати не хотел, поведаючи, иж, дей, „ми князь Александро Кошерский листу брати не казал“.

А так я тое оповедане его мл. князя Романа и дворенина гдрьского очевистое сознане до книг замковых записати казалъ.

(К. Ц. А., кн. 2035, л. 43 об., № 33).

XXVI.

Скан: с. 31

(Жалоба маршалка господарскаго кн. Ал. Андр. Сангушковича объ ограбленіи и арестованіи его служебника слугами кн. Ром. Фед. Сангушковича).

Тогож мца февраля 24 дня.

Присылал до мене, Бориса Ивановича Совы, подстаростего Луцкого, княз Александро его мл. Андреевич Сонкгушковича-Кошерский, маршалок господарьский, служебника своего Лавренца, жалуючи и оповедаючи обтяжливе на князя Романа Федоровича Сонкгушковича, старосту Житомирского, тымъ обычаем: Што ж, дей, „тот служебник его мл. Лаврен мца февраля десятого дня в понеделок ехал с Перемиля до его милости с пенезми чиншовыми и серебщизными, которых тых всих пнзей было в него пятдесят коп грошей литовское личбы; и приежчаючи, дей, ему до именя князя его милости Рачина, у тот, дей, час княз Роман его мл., переславши слуг своих, под селом Рачинским на доброволной дорозе того служебника его мл. Лаврена збити, змордовати и до окрутного везеня своего у Миркови осадити казал; и в тот, дей, час при том бою взято в него тые вси пенези чиншовые и серебщизные пятдесят коп грошей, к тому коня, седло, опанчу, коц, сагайдак, сабля, рогатина и иных речей не мало; которого, дей, служебника колко дней у везеню своем державши, только самого теломъ его выпустити казал, а тых пнзей, коня и иных речей, вышей описаных, ничого не отдал“. Якож то тот служебник его милости Лаврен передо мною очевисто устне тымиж словы оповедал.

И хотечи его мл. княз Александро Кошерский о то мовити, просил, абы то было записано.

А так я тую жалобу и оповедане его мл. до книг замковых записати казалъ.

(К. Ц. А., кн. 2035, л. 65, № 64).

XXVII.

Скан: с. 32

(Жалоба маршалка господарскаго кн. Ал. Андр. Сангушковича о наѣздѣ на его земли Ковельскаго и Миляновскаго урядниковъ кн. Р. Ф. Сангушковича съ мѣщанами и людьми Ковельской волости. Донесеніе вижа, производившаго дознаніе по этому дѣлу).

Тогож мца июля 16 дня.

Про памет казано записати.

В небыт пана Бориса Ивановича Совы, подстаростего Луцкого, на местцы его Василей Дешковский, писар замку Луцкого.

Писалъ и присылалъ до мене его млст княз Александро Андреевич Санкгушковича-Кошерский, маршалок гдрьский, жалуючи и оповедаючи тым обычаем: Штож, дей, тых часов в суботу прошлую июля второгонадцат дня подданые его милости Кошерские и люди бояр его милости, вышодчи на влостивый кгрунт его милости именя Кошерского ку врочищу недалеко Кушнеровы Могилы и Омелянова Дуба а Пугачовы Горы и Чорнобайлова Стойла, жали свою властивую пашню; то пак, дей, в тот час врядник Ковелский (пропускъ) Янковский а врядник Миляновский (пропускъ) Заруба и Войт Миляновский (пропускъ) Богушовский и бояре повѣту Ковелского — Грицко Клячковский, Станислав Сабавинский, Яцко Попович, Андрей Обланский, Пилип с Ковля — зо всими мещаны и з многими людьми всее волости Ковелское, невѣдомо естли же за росказанем его милости пана старосты Ковелского, албо сами своволне, наехавши умысле моцно кгвалтомъ на тот влостивый кгрунт его милости помененый, подданых его милости людей боярских позбивали и с поля проч зогнали а з них сермяги, шапки, з жонок простницы познимали, кони з возы с хомуты побрали, и сермяги в них поотнимали, и шкоды немалые поделали, а жита нажатого пятдесят коп взяли, а иное збожье(и) ярины потоптали и вытравили; и еще, дей, на том мало маючи, после того третего дня в понедѣлок июля четвертогонадцат тот же врядник Ковелский а другий Миляновский з бояры и з мещаны Гвелескими, и з людьми волости Ковелское, способившися з делы и гаковницами, и з ручницами, зь сагайдаки, з рогатинами и з иными бронами, наехавши повторе моцно кгвалтом на влостный кгрунт князя его милости межи тыми ж врочищами, вышей писаными, влостное пашни его милости и подданых его милости жита пожали и побрали, а иное потоптали, болшей трехсот коп; а оттоля, дей, приехавши понедалеко села со всими тыми людьми, которых, дей, было болшей трех тысечей парсун ездных и пеших, там, дей, на влостном кгрунте его милости пашни подданых его милости осемьсот коп жита потоптали и вытравили, и сеножатей, на которых, дей, вкошувано по триста воз сена, в тот же час вытоптали и потравили; а потом, дей, мало на том маючи, приточивши дела и гаковницы под самое село его милости Залесе, на подданых его милости стреляли и, добывшися, дей, всего, в двох домех клети поотбивали и двери порубали и с клетей сукни, сермяги, плате белое, полотна, мяса, сыры, масла побрали, и за людьми по огородом гоняли, и ярины вышедшие речи огородные попсовали и потоптали, и две колешни огнем спалили, а в тот, дей, час не мало людей подданых его милости позбивали и поранили, и коней постреляли, а великие шкоды поделали. Которых всих шкод реестра, меновите написаные, его млст в себе быти менить.

Для чого ж на обожене и на огледане шкод поделаных а людей збитых и пораненых брано его милости вижом з уряду замку Луцкого боярина гдрского Красноселского Юрка. Который, там бывши и оттоля приехавши, ставши передо мною, тыми словы сознал: иж, „будучи во именю князя Кошерского в Залесю, видел в двох домех у Богуша а в (пропускъ) клети поотбиваны, двери порубаные и розбитые, засеки поломаные; а в других людей видел две колешни спаленых, к тому, дей, по огородех вышеякие ярины потоптаные и попсованые; и видел (пропускъ) на грудех рана з ручницы перепоротою, а на (пропускъ) пану у левой руце, з лука простреленую; и инших людей не мало збитых и пораненых, на тых раны битые синие, которые на реистре меновите сут пописаны; а потом, выехавши из села, видел коня забитого пана Суринова Перевеского, зъ гаркабуза стреленого, за которого, поведает, давано пятнадцат коп грошей; ку тому, поведает, видел жита по полю, так теж ярины, овсы и ячмени, велми много потоптано и выпасено, так теж и сеножат потоптаную и вытравленую“.

А так я тую жалобу и оповедане, и вижово сознане до книгъ замъковыхъ записати казалъ.

(К. Ц. А., кн. 2035, л. 156, № 21).

XXVIII.

Скан: с. 34

(Жалоба п. Гневоша Вороновича, урядника кн. К. Острожскаго, о повѣшеніи княжескаго боярина п. М. М. Жоравницкимъ. Заявленіе вижа по этому же дѣлу).

Року Божого Нароженя 1562, мѣсяца февраля 20 дня.

Матѣй Василевич Четвертинский, справца староства Луцкого.

Писал и присылал до мене врядник Дубенский его млсти князя Костентина Констентиновича Острозского, воеводы Киевского, маршалка земли Волынское, старосты Володимерского, пан Гневош Воронович, жалуючи и оповѣдаючи тым обычаем: иж, де, тых часов в недѣлю зборную мца февраля пятогонадцат дня пан Михайло Маркович Жоравницкий, поймавши боярина его мсти княжетского Полченского Свирида, безвинне, одно наполнившися воли своей, без жадного лица и права, не даючи мнѣ о том вѣдомости, на завтрие в понедѣлок рано казал его обѣсити.

Якож на огледане того вчинку брал в мене вижа боярина гдрского Красноселского Миколая Марковича, который, там бывши и оттоля приехавши, ставши передо мною тыми словы сознал: иж „за посланем врядника Дубенского пна Гневоша Вороновича, ездил с подданными князя его мсти Полченскими и з людьми сторонними огледати того трупу небожчика Свирида и видел его обѣшоного на земли Теслуговской на грунту Теслугово“.

И просил врядник Дубенский пан Гневош Воронович, иж бы то было записано.

А так я тое оповедане врядника Дубенского и вижово сознане до книг замковых записати казал.

(К. Ц. А., кн. 2036, л. 44, № 24).

XXIX.

Скан: с. 34-35

(Жалоба коморника господарскаго п. Я. Клюковского о насиліяхъ, совершенныхъ надъ нимъ панами Борзобогатыми).

Року Божого шестьдесят второго, мѣсяца марта 29 дня.

В небытности пна Бориса Ивановича Совы, подстаростего Луцкого, на местцы его Иван Иванович Хребтович Богуринский, писар замку Луцкого.

Пришодчи в замок Луцкий, коморник его королевской мсти пан Ян Клюковский жаловал обтяжливе на пна Ивана Яцковича Борзобогатого, ключника, городничого, мостовничого и войта Луцкого, и на сына его Василя, оповедаючи тым обычаем: иж, дей, „они, взявши мене на справы свои от господара короля его мсти, задержали мя в себе час немалый. Ям справы, водле потребы их, спешне справовал. А они ми за то и до сих часов досыт не вчинили и шкоды немалые приправили. А еще, дей, над то нынешнего дня в неделю великодную пан Иван Борзобогатый восполок из сыном своим Василем мене безвинне словы нечтивыми соромотили и бити порывали; а потом росказали и направили на мене служебника своего Романа Перевеского и приятеля своего Яна Лукашовича, которые, за росказанем и з направы их, тут же перед ними в светлицы в дворе Заборолском мене збили и змордовали дылем и кожух пошарпали. Ям ся им хотел боронити. То пак сын Борзобогатого Василей, порвавшися, сам рукою своею мене збил и голову оборанил“. Якож и знаки того явны показывал: дылем сукна влаского и кожухом содраную, пошарпаную, и волосы оборваные показывал. В чом собе жал, кривду и шкоду немалую от панов Борзобогатых быти менит и, хотячи с ними о то мовити, просил, абы то было записано.

А так я тую жалобу и оповедане его до книг замковых записати казал.

(К. Ц. А., кн. 2036, л. 57 об., № 28).

XXX.

Скан: с. 35

(Жалоба землянина п. И. Б. Несвѣцкого о насиліяхъ его людямъ, чинимыхъ п. Я. Угриновскимъ. Донесеніе вижа по этому же дѣлу).

Року Божого Нароженя 1562, мца мая 25 дня.

В небытности пна Бориса Ивановича Совы, подстаростего Луцкого на тот час, на местцы его Иван Хрибтович Богуринский, писар замку Луцкого.

Приездил до мене земенин гдрьский пан Иляш Богушевич Несвѣцкий, жалуючи обтяжливе и оповедаючи на пна Януша Угриновского: Иж, дей, „он через заруку гдрьскую пятсот коп грошей, в листе описаную, притязает жону кгвалтовне на дом мой, мене самого и жону мою Олену словы непочтивыми, которые кож-дому почтивому непристойны, срамотил и бити хотел. К тому теж, заставивши мне имѣ (sic) свое Вгриновское з двором, з людьми и зо всим на все, ничого на себе не оставуючи, от часов немалых подданным моим, людем Угриновским, кривды и шкоды безвинне чинит, имено покою не дает и, ходячи на домы кгвалтом, людей збивает, грабит, жонки кгвалтует и великие и обтяжливые прикрости чинит. Што, дей, люди Вгриновские, видячи от него таковыи жал, збытки, кривду и шкоду свою великую, вже колко человѣков проч пошли. А будет ли далей мешкати а не даст покою тому имѣню моему Вгриновскому, тогда и остаток людей проч пойдут. Бо ми те вси, сполочне приходячи до мене, при вижу врядовом поведили: иж, „естли нас от пна Вгриновского не оборонишь, тогды мы вси, збавшися, проч пойдем“.

Якож то и виж врядовый боярин гдрьский Красноселский Пилип Созонович, ставши передо мною, тыми словы сознал: иж, „будучи мне при пану Несвѣцком для справ его вижом, тогды, приходячи, люди Вгриновские с плачом жаловали на пна Вгриновского, поведаючи великий жал свой от него и шкоды, иж, дей, ни для чого иного, толко для збытков пна Вгриновского вси проч пойдем“.

И просил пан Иляш Несвѣцкий, абы то было записано.

А так я тую жалобу оповедане его и вижово сознане до книг замковых записати казал.

(К. Ц. А., кн. 2036, л. 100, № 46).

XXXI.

Скан: с. 36

(Заявленіе дворянина и вижа о врученіи нареченному владыкѣ Луцкому и Острожскому п. М. В. Жоравницкому заручнаго господарскаго листа, даннаго по просьбѣ п. Свиноской, урожденной кн. Чорторыйской).

Року Божого Нароженя 1562, мца іюня 6 дня.

В небытности пна Бориса Ивановича Совы, подстаростего Луцкого на тот час, на местцы его Иван Хребтович Богуринский, писар замку Луцкого.

Пришодчи и постановившеся обличне в замку Луцком, дворенин гдрьский пан Станислав Коневский оповедал и сознал: Иж, де, ее мсть пни Михайловая Михайловича Свиноская пни Федора Федоровна княжна Чорторыйская посылала зо мною, двореном (sic), и з вижом врядовым и з людьми добрыми шляхтою до пна Марка Василевича Жоравницкого, нареченого владыки Луцкого и Острозского, з листом его кр. мл. заручным под десятьма тысечами копами грошей о небезпеченство здоровя своего и слуг своих от пна Марка и сынов служебника своего Павла Черневского. Который яко дня вчорашнего в пятницу, знашодчи пна Марка Жоравницкого в замку у Теслуговском, давал ему при нас очевисто лист его кр. мл. заручный. Пан Марко Жоравницкий листы гдрьски, почтиве принемши, вычитал, а потом Павлу Черневскому лист отдал, а копею с того листа списаную собе взял; а заруку гдрьскую, в листе описаную, сам на себе и на сынов своих о спокойное захованье принял. И то служебник ее мсти паней Свиноской Павел Черневский мною, дворенином его кр. мл., так теж вижом врядовым и шляхтою — Павлом Косинским а Янушем Кызраковским — осветчене вчинил. Якож то и виж врядовый боярин Красноселский Михно Павлович, ставши передо мною, тымиж словы сознал, ничим не отменяючи оповеданя и вызнаня дворенинова.

А так я тое оповедане и вызнане дворенина гдрьского и вижово до книг замковых записати казал.

(К. Ц. А., кн. 2036, л. 114, № 11).

XXXII.

Скан: с. 37

(Заявленія дворянина и вижа о сопротивленіи, оказанномъ имъ, при исполненіи господарскаго порученія, панами Борзобогатыми).

Року Божого Нароженя 1562, мца іюня 9 дня.

В небытности пна Бориса Ивановича Совы, подстаростего Луцкого на тот час, на местцы его Иван Хребтович Богуринский, писар замку Луцкого.

Пришодши до замку гдрьского, пан Василей Петрович Загоровский, дворанин его кролевское мсти, оповедал: Штож, дей, „тыхъ часовъ гдрь король его млст рачил росказати мне з листомъ своимъ гдрьскимъ до именей Ивана Яцковича, ключника, городничого, мостовничого и войта Луцкого, а до Ивана Олехновича Борзобогатыхъ, то ест до Радомышля, до Сухое Воли, до Галичан и до Зборошова ехати, и в тыи ся села вышеймененыи за неотдане сумы пнзей з мыта Берестейской коморы, за рок пятсот пятдесят осмый тисячу двесте девятдесят сем коп грошей и триста золотых чирвоныхъ, а за рок пятдесят девятый, шестдесятый а шестдесят первый, за невчиненье личбы до скарбу гдрьского и за неотдане некоторое сумы пнзей, так теж и за неотдане съ ключа Луцкого сумы пнзей за два роки и за невчинене личбы увезатися, и тыи именя з людми и зо всими пожитками и повинностями ихъ на гдра короля его млст держати до науки гдрьской“.

И просилъ мене, абых ему ку той справе и потребе его кролевской млсти з уряду староства Луцкого вижа придалъ. А так я на тую справу дал его млсти вижом служебника моего Миколая Томковича Ктодлевского, который, тамъ при той справе бывши и што колвек видевши, до книг замковыхъ вызнал тымъ обычаемъ:

„Кгды, дей, пан Василей Загоровский, захопываючися водле листу и росказаня гдрьского, до села Радомышлъского приехал и увязыватися в тое село хотел, пытал, „хто в том селе врядником от Борзобогатых ест?“ Люди, дей, тамошнии Радомышлъскии поведили, ижъ, дей, „тут врядником в нас Станислав Липницкий; нижли, дей, теперь тут его нит, ехал до пна Степана до Красного“. То пак, дей, пан Загоровский там до Красного до того врядника ехал, хотечи ему лист гдрьский увязчий оказати, в котором пишет, жебы, в небытности самыхъ Борзобогатых в тыхъ именяхъ вышей речоных, врядники их увязаня допустили и ни в чом воли и росказаню гдрьскому противни не были. И коли, дей, есмо до двора Борзобогатых до Красного приехали, видели есмо Степана Олехновича Борзобогатого на воротех на кганку стоячи. Нижли намъ вказатися не хотелъ. Одно мати его пни Олехновая Борзобогатая пни (пробелъ въ подлинникѣ) поведила, иж, дей, „сына моего Степана в дому нетъ: ехал дня вчорашнего на войну до Речицы, а што ся, дей, дотычетъ, яком слышала, иж твоя млст, пне Загоровский, за листом и росказанемъ гдрьскимъ не в которой суме пнзей тутъ ув именя мои увязыватися хочешъ, того, дей, я николи не поступлю и того моцно боронити буду, бо, дей, небожчикъ муж мой, сходячи с того света, по смерти своей вси именя, што колвек ихъ ест — выслужоныи, купленыи, закупленыи и всяким обычаем набытыи — мне в суме пнзей позычоной поступил и записал; а дети, дей, мои до всихъ именей ничого не маютъ; а естли, дей, сыны мои што винни гдрю до скарбу зостали, они за то нехай досыт чинят, албо покутують; а я за них платити не буду ани увязане не поступлю“. Пан Загоровский поведил, ижъ, дей, „я тут не своволне приехал, одно за властным росказанемъ и листомъ гдрьскимъ“. Который ей оказал. Она теж, вземши лист гдрьский, перед собою вычести казала и копею з него взала и поведила: иж, дей, „я о тотъ листъ гдрьский мало дбаю и в тых именяхъ увязаня никому не поступлю; а естли, дей, кгвалтомъ и впоромъ своимъ, тамъ ехавши, увязатися всхочеши, а што тебе там потъкает, тогды на мене не диви; бо, дей, тамъ вжо поготову ест, хто тебе честовати будетъ“. Пан Загоровский, поступуючи в том водле права а чинячи досыт росказаню гдрьскому, за ся до того именя Радомышля ехал и, приехавши тамъ, нашли есмо врядника тамошнего Станислава Липницкого, серед села на улицы стоячи и маючи из собою колка десят члвков на конехъ поготову з сагайдаки, в оркгабузы и зо щепы. А потомъ ещо за нами з Красного также поготову колконадцат члвков з бронями на помоч ему прибегли. И пыталъ его панъ Загоровский: „Для чого так противко ему зобрался?“ Он поведил, ижъ, дей, „пни моя пни Олехновая Борзобогатая прислала мене тутъ умысльне зъ служебниками своими и росказала мне, абых в тых именях увязаня не поступил и моцно от тебе боронил; для чого тебе напвоминамъ (sic), абы еси ми рыхле из села кон ехал и людемъ пней моей покой дал“. Пан Загоровский поведил, ижъ „на то ест воля и росказане гдрьское, абых в тыи села Борзобогатых увязался и то на его кролевскую млсть держал, в котором, дей, листе гдрь король его млст рачил росказати писати до васъ, врядниковъ, которыи в тых именях, на листе гдрьском назначеныхъ, от Борзобогатых на тот час врядниками будуть в небытности пнов, противку воли и росказаню гдрьскому не стояли и мне, посланцу его кролевское млсти, противни не были и увязаня не боронили под закладом на его кролевскую млст пятма тысячма копами грошей“. И тот лист гдрьский вряднику оказывалъ. Нижли, дей, врядник листа гдрьского приняти и его слухати не хотел; одно поведил: ижъ, дей, „я о листы таковый ничого не дбаю и слухати не винен“. А потомъ закликал на товарищов своихъ и на подданых тамошнихъ, жебы пна Загоровского и нас всих из села вон гнали, а, гдебы ехати не хотели, росказал бити и забити. Они теж, зо щепы до нас прискочивши, почали гнати изъ села вон, а инъшии хлопи съ кийми, с цепами до ту забегати почали. Пан Загоровский, видечи таковую трудность, оповедавши то мне и стороне людемъ добрымъ, которыи на тот час з нами были, то ест пану Ивану Бурому, дворенину гдрьскому, а пану Олекшею Миколаевичу, служебнику его млсти пна воеводы Виленского, а боярину князя Александра Чорторыйского Мстишинскому Марку (пробѣлъ въ оригиналѣ), проч ехати мусилъ“.

Которое я оповедане пна Василя Загоровского и вижово сознане до книгъ замковых записалъ.

(К. Ц. А., кн. 2036, л. 116, № 15).