1. Добромильская летопись, 1648 — 1700

Аз иерей Семеон Коростенский, на той час будучи намесник Добромилски при церкви Рождества Пречистои Девы, на тоиж церкви сукцесором, тое списал, що ся за моего живота деяло в которых летех. Почавши от року 1648 казацкая война из гетманом Хмелницким — звоевали по самый Люблин.

Року 1649 выляня вод было барзо велико, же села, дворы, замки ломило.

Року 1651 был голод барзо велики: жито было по злотых 10, пшениця 12.

Року 1652 поветря было по вшистъку Полщи.

Року 1653 допустил был Господь Бог зверя лютого, который люди поидал.

Року 1655 знову козаци из Москвою Полще воевали, которые и церкви руйновали и свещенников у церквах пекли.

Року 1656 Шведове по сами Перемышль звоевали.

Року 1657 по Рождестве Христовом вуйна Венgерская; с козаками по самий Краков звоевали.

Року 1672 Турци Каменец Подулски взяли; татарове по самую Вислу спустошили, людий в неволю побрали.

Року 1674 Поляци в Хотеню Турков выбили. Б тым же року голод барзо великий был: жито было по золотых 14; пшениця по 15; людий барзо сила померло.

Року 1673 Цесар турецъкий зе вшистков потугов Украину бурил; Умань и иншии места Украинскии мечом и огном воевал.

Року 1675 Абраам баша Збаразски замок из фундаменту и Подгайце и инъшии места спустошил.

В року 1676 Шайтан баша войско Полское, и круля, и гетманов под Журавном облег и там до часу згоду учинили с собою.

Року 1680 месеца декеврия дня 18 показал Господь Бог комету барзо великую от заходу слонца, которую остролоgове поведают быти на, шест сот и семъдесят и пят мил; знову в рук маленка кометка показалася.

Року 1683 вейзор турецки из великою потугою по сем крот сто тисячи войска под Видьно, место столечъное цесарское спровадил и до оного штурмовал през килка недель, и юж цале достати мал, gдыбы было от Бога найвышого и от Пресвятои Девы обороны не было, котрая и круля полского Иоана третого на то не побудила, котрий из войском своим и козацъким и цесарским векъторию отримали и войско их поразили и под Стигольном еще люпъшую векторию отримали.

Року 1690 был голод велики: жито было по золотых 16, пшениця по 20, овес по 8.

Року 1693 пан Ян Бонавинтура на Красным Красенски, воевода Плотски, староста Варшавски, Штумски, Прагненски, Новомески, отримал купъном маетности Добромилскии Гербуртовскии.

Року 1695, месеца февраля дня 3, татарове семъдесят тисячи под Илъвув пришли и на тойчас великое кровопролитие християнской крови проляли и по иншим местом.

Року 1698 ксонже Саское, на имя Авъгуст, коронованый на крулевство польское.

Року 1699 дороgутня была великая: пшениця была по 34, жито по 26; также было и в року 1700. А в року 1699 месеця сепътеврия, турци из Каменца уступили доброволне, а то для круля Августа, а не для панув Полякув.

В тимже року 1700, месеця февряла дня 12, егомосц отець епископ Премиски, Иннокенти Винницки, пожегнался из светом из вувторка на середу, дивнов а праве неслыханов пригодов: от докторских лекарств, неострожне и неростропне даных, згорел в простиралах, олейками напущоных, объвиненый.