КНЯЖЕНІЕ СВЯТОСЛАВА II. Ярославича - Лѣтопись, орфографія изданія

Святославъ же седѣ вКиеве, прогнавъ брата своего, переступивъ заповедь божию и отца своего. Велий бо есть грѣхъ преступающимъ заповедь отца своего: якоже исперва преступиша сынове Хамови на землю Симову, и по У. лѣтехъ отмщение прияша отбога; отплемени бо суть Симова Еврѣи, иже избиша Хананеское племя, восприяша свой жребий и свою землю. И паки преступивъ Исавъ заповедь отца своего, и прия убийство. Не добро бо есть преступати на предѣлы чюжия.

Тогоже лѣта основана бысть церковь Печерская, епископомъ Юрьевскимъ Михаиломъ, игуменомъ Ѳеодосиемъ Печерскимъ; а Митрополиту Георгию Киевскому и всеа Русии сущу тогда вГрецехъ; при князе Святославе Киевстемъ.

Тогоже лѣта преставися Антоний, игуменъ Печерский, благословивъ и знаменавъ мѣсто церкви святыя стр. 164 богородицы.

Влѣто Ѕ'.Ф.П.В. [1074]

Преставися Ѳеодосей, игуменъ Печерский: и положенъ бысть втойже Пещере, яже самъ создалъ; во второе лѣто царства Романа Диогена. Рцемъже здѣ и успение его мало сице.

Ѳеодоси бо обычай имяше, приходящу постному времени, внедѣлю масленую вечеръ по обычаю, и целовавъ братию всю, и поучивъ ихъ, како провиди постное время вмолитвахъ вночныхъ и дневныхъ, і блюстись от помыслъ лукавыхъ и отбесовского насѣяния. Бѣси бо, рече, насеваютъ черноризцомъ помышления и хотѣния лукава, и тѣмъ врежаеми бываютъ имъ молитви святыхъ; приходящея таковыя помыслы и возбраняти знамениемъ крестнымъ, глаголюще сице: Господи Исусе Христе, боже нашъ, помилуй насъ. И ктому воздержание имѣти отмногаго брашна и пития; въ ядении бо брашна и впитии безмернемъ возрастаютъ помыслы лукавии; помысломже возрастъшимъ, сотворяется грѣхъ. Тѣмже, рече, противившися бесовскому дѣйству и пронырства ихъ, блюстись от лѣности и от многаго сна, бодру быти на пѣние церковное, и на предания отеческая, и на прочитание книжное: таже имѣти воустѣхъ псалтырь Давыдовъ. Подобаетъ черноризцамъ симъ прогоняти бесовское уныние; паче же имѣти себѣ любовь всѣмъ меншимъ, и кстарѣйшинамъ покорение и послушание; старѣйшимже кменшимъ любовь и наказание, и образъ давати собою воздержаниемъ, и бдѣниемъ, и хожениемъ, и смирениемъ: тако наказывати меншия, и утешати я, и тако проводити постъ. Глаголетъ бо сице: яко богъ далъ есть намъ М. дний сихъ на оцыщение души. Сия бо десятина даема отлѣта богу; дни бо есть отбога до года Т.У.Е. а отсихъ дний десятый день воздаяти богови десятину, еже есть постъ сей четыредесятьный, и вняже дни очетившесь душа празнуетъ свѣтло на

Воскресение Господне, веселящесь обозе. Постное бо время очищаетъ умъ человѣку: пощение бо исперва проображенно бысть Адаму первое, не вкушати отдрева единого. Постивъ бо ся Моvсей М. дний, сподобися прияти законъ стр. 165 на горѣ Синайстей, и видѣвъ славу божию: постомъ Самойла мати роди: постившеся Ниневгитяне, гнѣва божия избыша: постися Даниилъ, и видѣния велика сподобися: постився Илья, и на небо взятъ бысть, и вселися впищу породную: постившеся три отроцы, угасиша силу огненну: постися Господь М. дний, и намъ показавъ постное время: постомъ Апостоли искоренивше бесовское учение: постомъ явишася Отцы наши, аки свѣтила вмире, иже и посмерти сияютъ, показавше труды великия, и поты, и воздержание, яко се великий Антоний, и Еvѳимии, и Сава, и прочии Отцы; имже и мы поревнуемъ братие.

И сице поучивъ братию, целовавъ всѣхъ по имени, і тако изхожаше измонастыря, взимая мало коврижекъ, вшедъ впечеру, и затворяше двери впещере, и засыпаше перьстию, и не глаголаша никомуже: ащели бяше нужное орудие, то оконцемъ бесѣдоваше всуботу, или внедѣлю; а во иные дни пребывше впостѣ и вмолитвахъ, воздержаяся крѣпко. И прихожаше вмонастырь впятокъ наканунe Лазоревы суботы; вси бо день кончается постъ дний М.: и начинаемъ отпервого понедѣлника наставши Ѳедоровы недѣли, кончеваетъжеся впятокъ Лазоревъ; а страстная недѣля уставлена есть поститись страсти ради Господня.

Ѳеодосиюже пришедшу по обычаю целовавъ братию, и празнова сними и недѣлю страстную, и дошедши велика дни Воскресение Господа нашего Исуса Христа, по обычаю празнова свѣтло, и впаде вболѣзнь. Разболѣвшу бося ему, и лежавшу дний Е., посемъ бывшу вечеру, повелѣ изнести себя на дворъ; братияже вземше его на санехъ, и поставиша й прямо церкви. И повелѣ созвати братию

всю: братияже удариша вбило, и собрашась вси. Онъже рече имъ: братия моя, отцы мои, и чадо моя! се азъ отхожу отвасъ, якоже яви ми Господь впостное время, впещере ми сущу, изыти отсвѣта сего; нынеже кого хощете имѣти игуменомъ себѣ, да и азъ благословение по- стр. 166 далъ быхъ ему? Ониже рекоша: ты еси отецъ намъ всѣмъ, да егоже изволиши самъ, той намъ буди отецъ и игуменъ, и послушаемъ его, яко и тебѣ. Отецъже нашъ Ѳеодоси рече: шедше кромѣ меня нарцыте, егоже хощете, кромѣ двою братии Николы, Игнатия; а впрочихъ, кого хощете отстарѣйшихъ и до меншихъ. Ониже послушавше его, отступивше кцеркви, здумавше послаша брата два, глаголюще сице: егоже изволи богъ и твоя честная молитва, і еже тобѣ любо, то и намъ. Ѳеодосийже рече имъ: да аще отмене хощете прошати игумена, то азъ вамъ сотворю то, не посвоему избранию, но побожию строению. И нарече имъ Иякова презвитера; братииже не любо бысть, глаголюще: яко не здѣ есть постриженъ; бѣ бо Ияковъ пришелъ соОлтеца збратомъ своимъ Павломъ. И начаша просити Стефана Демественника, ученика Ѳеодосиева, глаголюще: яко сей взрослѣе есть подрукою твоею, и сего намъ вдай. Рече же имъ Ѳеодоси: сего азъ вамъ по божию повелѣнию нареклъ бѣхъ Иякова, сеже вы свою волю творити хощете. И послушавъ ихъ, дастъ имъ Стефана, да той будетъ имъ Игуменъ; благословивъ Стефана, и рече ему тако: се предаю ти монастырь, блюди сопасениемъ; и яже устроихъ вслужбахъ, то держи предания монастырьская, и устава не изменяй, но твори все позакону и почину монастырьскому. И посемъ вземше й братия, и понесоша вкѣлью, положиша его на одрѣ.

Приде Святославъ ссыномъ своимъ Глѣбомъ.

І шестому дню наставшу, больну сущу велми великому Ѳеодосию, приде кнему Князь Святославъ ссыномъ

своимъ Глѣбомъ. И седящу ему у него, и рече ему Ѳеодоси: се отхожу свѣта сего, и се предаю ти монастырь на соблюдение, да что будетъ смешение внемъ; и се порунаю игуменство Стефану, не дай его вобиду. Князьже целовавъ его, и обещась пещися монастыремъ, и іде отнего.

Седмомуже дню пришедшу, изнемогающу Ѳеодосию, призва Стефана и братию, и нача имъ глаголати сице: по моемъ отшествии свѣта сего, аще буду богу угодилъ, и прияль мя будетъ богъ, то по моемъ от- стр. 167 шествии монастырь начнетъ строитися, пребываетъ внемъ благодать; то вѣжте, яко приялъ мя есть богъ. Ащели по моей смерти оскудевати начнетъ монастырь черноризцы и потребами монастырьскими; то вѣдеше будете, яко не угодилъ буду богу. І се ему глаголющу, плакахусь братия, глаголюще: отче, молися зань кбогу; вѣмый бо, яко труда твоего не презритъ богъ. І преседяще братия нощь ту у него. Наставшу дню осмому, во вторую суботу по пасце, вчасъ дний, предастъ душу свою вруцѣ божии, мѣсяца Маия въ Г. день, Индикта въ А.І. И плакашесь по немъ братия. Бѣ бо Ѳеодосей заповѣдалъ положити впещере, идѣже бо показалъ труды и поты многи, рекъ сице: внощь похороните тѣло мое. Якоже и сотвориша. Вечеруже приспѣвшу, братия вземше тѣло его, и положиша впещере, идѣже бѣ показавъ труды многи, проводиша спѣсьми и со свещами честно, на похвалу Господу богу Исусу Христу.

Стефануже предержавшу монастырь и блаженное стадо, еже бѣ совокупилъ Ѳеодоси. Такии черноризцы, яко светила вруси сияютъ: ови бо бѣху постницы крѣпции, овиже на бдѣние, овиже на поклонение колѣнное, овиже наподщение черезъ день и черезъ два, иниже ядуще хлѣбъ сводою, инии зелие сварено; меншии покаряющись старѣйшимъ, несмѣюща предьнима глаголати, но все спокорениемъ и послушаниемъ великимъ; такоже и

старѣйшии имяху любовь кменшимъ, наказаху утешающе, яко чада возлюбленная. Аще нѣкоторый братъ внѣкое прегрешение впадетъ: то утешаху его божественными писании, и разделяюще на себѣ запрещение три ли, или четыре дни, за великую любовь. Таковы бо бяше любый во братии той, и воздержание велико. Ащели братъ нѣкий похожаше измонастыря: то вся братия имяху о томъ печаль велию, посылающе по него, и призывающе его вмонастырю, и шедше вси кланяхуся игумену, и моляху его, и тако примаху брата вмонастырь срадостию. Таковы бо бяху любовницы и воздержницы і постницы.

стр. 168 О нихже реку неколико мужъ чюдныхъ: яко сей первый и Демьянъ презвитеръ бяше таковъ постникъ и воздержникъ, яко разве хлѣба и воды не ясти ему ничтоже і до смерти своея. Аще кто коли приносяше дѣтищъ боленъ, или совершенъ человѣкъ, кацемъ любо недугомъ одержимъ, прихожаше вмонастырь ко блаженному Ѳеодосию: повелеваше сему Демияну, молитву творити болящему; и абие сотворяше молитву, и масломъ помазаше, и тако примаху исцеление приходящии кнему свѣрою. Разболѣвшужеся Демьяну, и конецъ прияти лежащу внемощи, и прииде кнему Ангелъ Господень, вообразе Ѳеодосиеве, даруя ему царство небесное за труды его. Посемже прииде Ѳеодосие збратиею, и приседаху у него; оному же изнемогающу, возрѣвъ на игумена, рече: незабывай игумене, еже еси обещахъ. И разумѣ великий Ѳеодосий, яко видѣние видѣ; и рече ему: ей брате Демьяне, еже есть обещалъ, то ти буди. Онже самъ живъ очи предастъ духъ свой вруцѣ божии: игуменъже и братия похраниша тѣло его.

Такожъ бѣ и другий братъ Еремия, иже помняше крещение Рустей земли. Сему бѣ даръ дарованъ отбога, провидѣти пред будущая: и аще кого видяше впомышлении, обличаше, и втайне й наказываша блюстися от Сатаны. Аще которой братъ умышляше ити измонасты-

ря,

ря; узряше, и приходя обличааше мысль его, и утешаша: или глаголаша кому что, то и збывашеся.

Бѣ же другий братъ, именемъ Матѳей, бѣ прозорливъ. Единою бо ему стоящу вцеркви на мѣсте своемъ, возведъ очи свои, позре по братии, иже стоящу поющу по обѣма сторонама: и видѣ обходяща бѣса во образе Ляха влуде, нося вриполе цвѣтки, еже глаголется лепокъ, и обходя возле братию, взимая изприпола лепокъ, и вержаша на кого любо. Аще прильняше лепокъ впоющихъ отбратии; и мало постоявъ, и разслабленъ умомъ, вину сотворивъ какову любовь исхожаше ис церкви, и шедъ вкѣлию усняше, и не обращуся вцерковь до отпѣния. Ащели вержаше на другаго, и не прильняше кнему стр. 169 лепокъ; и стояше впѣнии крѣпко, дондеже отпаяху утренюю, і тогда идяше вкѣлию свою. И се видя старецъ повѣдааша братии. И паки сейже видѣ старецъ; по обычаю бо сему старцу, отстоявше утренюю предзорями, идоша покѣлиямъ своимъ; сейже бо старецъ послеже исхожааше из церкве: идущуже ему единою, и седе опочивая побилницею, бѣ бо кѣлия его подале церкви; и видѣ, аки толпа пойде отворотъ, возведъ очи свои, и видѣ единого седяща на свинии, а другия текуще около его. И рече имъ старецъ: камо идете? И рече ему седяй на свиньи бѣсъ: по Михаля поТоловковича. Старецъже знаменася крестомъ, и прииде вкѣлию свою. Яко бысть свѣтъ, и разумѣ старецъ, рече келейнику: иди вопрошай, естьли Михаилъ вкѣльи. И рѣша ему: яко изыде даве изсастолпья позаутрении. И повѣда старецъ видѣние се игумену и братьи. Присемъ бо старце Ѳеодосий преставися, и бысть Стефанъ игуменъ, и по Стефане Никонъ, сему старцу еще сущу. Единою ему стоящу на утрени, возведъ очи свои, хотя видети игумна Никона: и видѣ осля стояща на игуменове мѣсте, и разумѣ, яко не всталъ есть игуменъ.

Такожъ и иная многа видѣния провидѣ старецъ, и почи встарости вмонастыри семъ.

Яко се бысть и другий черноризецъ, именемъ Исакий. Яко еще сущу ему вмирстемъ житии, и богату ему сущу, і бѣ убо купецъ родомъ Торопчанинъ: и помысли быти мнихъ, и раздаде имѣние свое требующимъ и монастыремъ, иде квеликому Антонию впечеру, молясь ему, дабы постригъ его во иноцы. И приятъ его Антоний, и возложи нань ризы чернеческия, и нарече имя ему Исакий; бѣ бо имя ему Чернь. Сейже восприя житие крѣпко, облечебося во власяницу, и повелѣ купити себѣ козелъ, и одра, и мѣхомъ облече на власяницу, и осше около его кожа сырая: и затворися впечере во единой улицы вкелейце мале, яко четырехъ лакотъ, и ту моляше бога сослезами. Бѣ же ядь его едина проскура, и та черезъ день, воды вмѣру пияше: и приношаше ему великий Антоний, и подаваше ему оконцемъ, яко ся вместяше рука; и тако приимаше. І того стр. 170 сотвори лѣтъ З. : на свѣтъ не вылазя, ни на ребрехъ не лягая, но и седя мало приимаше сна. И единою по обычаю наставшу вечеру, нача поклонятися поя псалмы, и до полунощия, и утрудяся на дѣле своемъ, и седяше. Единою ему седящу по обычаю, и свѣщу угасившу, внезаапу свѣтъ восия яко от солнца впечере, яко зракъ внимая человѣку; и пойдоста кнему В. юноши красна, и блистаста лице ею аки солнце, и глаголаста кнему: Исакие, мы есмя Ангели, а се идетъ ктебѣ Христосъ; падъ поклонися ему. Онже не разумѣ бесовского дѣйства, ни памяти бысть ему прекреститися; выступя, и поклонися ему аки Христу, бесовску дѣйству. Бѣси же кликнуша, і рѣша: нашъ еси Исакие! И введше его вкѣлицу, и посадиша й, і начаша садитися около его; и бысть полна кѣлья ихъ і улица печерская. И рече единъ отбесовъ, глаголемый Христосъ: возмите сопѣли, і бубны, и

гусли,

гусли, и ударите зело согласно; а Исакий спляшетъ. И удариша вбубны, и вгусли, и всопѣли, и начаша имъ играти, и умучиша, и оставиша еле жива, и отидоша поругавшеся ему. И заутра бывше свѣту, и приспѣвшу вкушанию хлѣба, прииде Антоний по обычаю коконцу, глаголя: Господи благослови, отче Исакие! и не бысть отвѣта. И рече Антоний: се уже преставился есть. И посла вмонастырь по Ѳеодосия и по братию, и окопаше, гдѣ бѣ загражено устие, и пришедше, и взяша, мняще й мертва, принесше положиша й предпечерою, и узрѣша, яко живъ есть. И рече игуменъ Ѳеодосий: яко се отбесовскаго есть дѣйства. И положиша й на одрѣ, и служаше около его Антоний.

Всиеже время прилучись прийти Изяславу изЛяховъ; и нача гнѣватися Изяславъ на Антония про Всеслава, и присла вночи, поя Антония кЧернигову. И возлюби Болдины горы, и іскопавъ печеру, ту ся всели: и есть ту монастырь святыя богородицы на болдиныхъ горахъ и до сего дни.

Ѳеодосийже увидѣвъ, яко Антоний отиде кЧернигову, шедъ збратиею взятъ Исакия, и принесе й ксебѣ вкѣлию, и служаше около его: бѣ бо разслабленъ тѣломъ, яко немощи ему обратитися на другую страну, ни встати, ни сидѣти; но лежаше на единой странѣ, и стр. 171 под ся мочашеся многажды, и червие вкиняхуся подбедру его смочения. Ѳеодосийже самъ своими руками омываше, и опряташа его за два лѣта. Ѳеодосийже моляше бога зань, и молитву творяше надънимъ нощь и день, дондеже на Г.е лѣто проглагола, и слышати началъ, и на ноги нача вставати, аки младенецъ нача ходити: небрежаше ходити вцерковь, и нужею привлечаху его кцеркви. И посемъ повелѣ ему Ѳеодосий, ходити збратиею втрапезу, и посажаше его кромѣ братии, и полагаху предънимъ хлѣбъ, и не взимаше его, но точию вложити вруцѣ

его. Ѳеодосийже рече: положите предънимъ хлѣбъ, и не вкладывайте вруку его, да ястъ самъ. Онже небреже за недѣлю ясти, и помалу оглядався, вкушаше хлѣба, и тако научись ясти. І тако его Ѳеодоси избави от козни диаволя. Исакийже приятъ воздержание паки жестоко.

Ѳеодосиюже преставльшуся, и Стефану внего мѣсто бывшу, Ісакийже рече: се уже прельстилъ мя еси былъ, диаволе, седяща на единомъ мѣсте; а уже не имаше мя победити вмонастыри ходяща. И облечеся во власяницу, и на власеницу свитку вотоляну; и нача уродство творити, помогати поча поваромъ, варя на братию, и на заутреню ходя преди всѣхъ, стояше крѣпко и неподвижимъ. Егдаже приспѣваше зима и мрази лютии, стояше впоршняхъ впротоптоныхъ: и яко примерзаше нози его хкамени, и не подвизаше ногама, дондеже отпояху заутреню, и по заутрени идяше вповарню, и приготовляше огнь, и воду, и дрова. И приходяху протчии повари; единже поваръ бѣ снимъ, именемъ тѣмже Исакие, и рече посмехався Исакию: оно ти седитъ вранъ черный, іди, ими его. Онже поклонився ему доземля, шедъ ворона имъ, и принесе предвсѣми повары: ониже ужасошася, і повѣдаша игумену и братии. И начаша братия чтити я: онже не хотя славы, нача уродство творити, пакостити нача, ово игумену, ово братии, ово мирскимъ человѣкомъ; а инии раны ему даяху: и нача по миру ходити, стр. 172 уродство творя, вселися впечеру, внейже пребылъ; уже бо бѣ Антоний преставился. И совокупи себѣ юныхъ, и воскладаше нанихъ кресты чернеческия спараманы; да ово отъ игумена Никона приимаше раны, ово от родитель тѣхъ дѣтскихъ: се же то все терпяше, и приимаше раны и наготу и студень, день и ночь. Воедину убо нощь вжегше пещъ во истопце у пещеры, яко разгорѣся пѣщъ, бѣ бо утла, и нача пылати пламень утлизнами, и нечемъ ему бысть заложити, вступль ногама босыма, и ста

на пламени, дондеже изгорѣ пещъ: и тогда слезе. И іна многа повѣдаху о немъ; а другое и самовидецъ быхъ; и тако взя побѣду на бѣсы, яко мухи ни вочтоже имяху страшения ихъ. Глаголетъ бо книмъ: аще мя бѣси прельстили есте впещере первое, понеже бо не видѣхъ козней вашихъ и лукавства; нынеже имамъ Господа Исуса Христа бога моего, и на молитву отца Ѳеодосия надѣюся, имамъ победити васъ. Многажды бо бѣси пакости ему дѣяху, глаголюще: нашъ еси, поклонился еси нашему старѣйшине и намъ. Онже глаголаше: вашъ старѣйшина Антихристъ есть, а вы бѣси есть. И знаменаше лице свое крестомъ, и тако исчезняху. Овогдаже паки внощь прихожаху кнему, страхъ ему творяше вмечте, яко се многъ народъ смотыками и лыскари, глаголюще: разсыплемъ печеру сию, і сего загребемъ здѣ. Иниижe глаголаху: бежи Исакие, хотятъ тя загрести. Онже глаголаше книмъ: аще бысте человѣцы, то вдень бы есте пришли; но вы есте тма, и во тмѣ ходите, и тма вы ятъ. И знаменась крестомъ, и тако исчезнуша. Друзииже страшаху его во образе медвѣжии, и ово львомъ и змиями ползяху кнему, овоже всякъ гадъ; і не могоша ему ничтоже сотворити; рѣша ему: о Исакие, победилъ ны еси. Онже рече: яко вы мене есте победили во образе Исусъ Христовѣ и Ангель святемъ, недостойни суще того видѣния; но се теперво поистинне явльшеся вообразе звѣринемъ, и скотиемъ, и змиями, и гадомъ; таци вы то стр. 173 сами есте. И оттуду не бысть ему пакости от бесовъ, яко убо и самъ повѣдаше намъ: яко бысть ми се за Г. лѣта брань ся. И потомъ нача крѣпко жити, и воздержание имѣти, пощение, и бдѣние. И тако живущу ему, сконча житие свое: и разболѣвся впечере, и несоша й вмонастырь, і до осмаго дне скончася о Господе. Игуменъже Иоанъ и братия спрятавше тѣло его, и погребоша й. Тацый бяше черноризцы Ѳеодосиева монастыря! паки сияютъ и по

смерти аки свѣтила, и молятъ бога за здѣ сущую братию, и за мирскую братию приносяща вмонастырь, внемже и до ныне добродѣтельное житие живутъ обще вси вкупе, впѣнии, и вмолитвахъ, и впослушании, на славу богу всемогущему, і Ѳеодосиевыма молитвами соблюдаеми, Аминь.

Влѣто Ѕ'.Ф.П.Г. [1075]

Почата бысть церковь Печерская надъ основаниемъ Стефаномъ игуменомъ, изо основания Ѳеодосиева: а на основании поча Стефанъ, и кончана бысть на Г.е лѣто, мѣсяца Июля въ А.І. день.

Тогоже лѣта приидоша послы изНемецъ къ Святославу. Святославъ же величаяся, показа имъ богатство свое. Ониже видѣвше безчисленое множество злата и сребра и паволоки, і рѣша: се ничтоже есть; се бо лежитъ мертво, і сего суть смѣтие лучше; мужи бо ся доищутъ и болши сихъ. Сице ся похвали Иезекий Царь Июдейский Навходносору Царю Асирийску, его же вся взята бывша вВавилонъ; тако и по сего смерти все имѣние разсыпашась розно.

Влѣто Ѕ'.Ф.П.Д. [1076]

Ходи Володимеръ, сынъ Всеволожъ, и Олегъ, сынъ Святославль, Ляхомъ впомощъ на Чахи.

Преставися Святославъ сынъ Ярославль.

Тогоже лѣта преставися Святославъ, сынъ Ярославль, мѣсяца Декабря въ К.З. день, отъ отрезания желвей: и положиша й вЧернигове у святаго Спаса.

И седепонемъ на столѣ ВСЕВОЛОДЪ, сынъ Ярославль, внукъ великого Владимера, мѣсяца Генваря.