КНЯЖЕНІЕ ВСЕСЛАВОВО.

Всеславъ же седе вКиеве. Сеже богъ яви силу крестную, зане ко Всеславу целоваша крестъ, и яша его: стр. 156 тѣмже богъ наведе на ня поганыя; его же избави яве крестъ честный. Вдень бо Воздвижения, Всеславъ

1068

воздохнувъ рече: о крестѣ честный! понеже втебѣ вѣровахомъ, избави мя отрва сего. Богъ же показа силу крестную, на показание землѣ Руской, да не преступаютъ честнаго креста, целовавше его. Аще преступитъ кто, той здѣ приимeтъ казнь, и на приидущимъ вѣце муку вѣчную приимeтъ; занеже велика есть сила крестная. И седе Всеславъ вКиеве мѣсяцъ З.

Преставися Епископъ Стефанъ

Тогоже лѣта иде владыка Стефанъ вКиевъ, и тамо свои ему холопи удавиша его.

Влѣто Ѕ'.Ф.О.З. [1069]

Пойде Изяславъ сБолеславомъ на Всеслава: Всеславъже пойде противу, и прииде кбелу городу Всеславъ, и бывши нощи утаився Киянъ, бежа избела города нощию кПолотцку. Заутражъ видѣвше людие бежавша князя, возвратишася хКиеву, и сотворше вече, послаша кСвятославу и ко Всеволоду, глаголюще: мы убо сотворили есмя, князя своего прогнаша, а се ныне ведетъ на насъ Ляшскую землю; пойдете во градъ отца своего икняжита. Ащели не хощете, то намъ неволя; зажегше градъ свой, идемъ вГреческую землю. И рече имъ Святославъ: вѣсть исшлемъ кбрату своему. Да аще пойдетъ на вы сЛяхи губити васъ, то мы противу ему ратью идемъ; не дадимъ ему погубити града отца своего. Аще ли хощетъ прийти смиромъ, вмале да приидетъ дружине. И утѣшиста Киянъ. Святославъже и Всеволодъ посласта ко Изяславу, глаголюще: Всеславъ бежалъ, а ты не води Ляховъ хКиеву, противника ти нѣту. Ащели хощете гнѣвъ имѣти, погубити градъ; то вѣси, яко жаль намъ отча стола. То слышавъ Изяславъ остави Ляхи, пойде сБолеславомъ, мало Ляховъ поимъ. Ізяславъ же посла предъ собою сына своего меншаго, Мстислава, хКиеву: и пришедъ Мстиславъ, и сече тѣхъ, иже беша высекли Всеслава испоруба, числомъ О. чади; а иныхъ ослепи, а другихъ безвины погуби не испытавъ.

1069