КНЯЖЕНІЕ ИЗЯСЛАВОВО.

Начало княжения Изяславля вКиеве.

Влѣто Ѕ'.Ф.Ѯ.Г. [1055]

Пришедъ Изяславъ седѣ настолѣ вКиеве: а Святославъ вЧернигове, а Всеволодъ вПереславли, а Игорь вВолодимери, а Вячеславъ вСмоленске.

Тогоже лѣта иде Всеволодъ на Торхи, и победи я.

Тогоже лѣта приходи Булушъ сПоловцы: и сотвори Всеволодъ миръ сними, и возвратишася вспять, отнюдуже бѣ пришли.

Тогоже лѣта клевета бысть на епископа Луку Жидяту, отсвоего холопа Дудика, внеподобныхъ речехъ. И изыде изНовагорода, и іде хКиеву, и осуди ево Митрополитъ Ефремъ, по Дукинымъ рѣчемъ, и злыхъ ево друговъ Демьяна и Козмы клеветамъ: и пребысть тамо три лѣта.

Тогоже лѣта поча княжити вКиеве Изяславъ Ярославичь. При семъ бысть Ѳеодосий игуменъ Печерский.

Влѣто Ѕ'.Ф.Ѯ.Д. [1056] 1056

Преставися Вячеславъ, сынъ Ярославль, вСмоленске. И посадиша Игоря вСмоленскѣ, изВолодимеря выведше.

Влѣто Ѕ'.Ф.Ѯ.Е. [1057]

Победи Изяславъ Голядь.

Тогоже лѣта епископъ Лука Жидята приятъ престолъ свой вНовѣгороде свою власть. Холопуже Дудѣке оскомины быша, урѣзаша ему носа, и обе руцѣ отсекоша, и побежаша вНѣмцы: сицеже и его лукавымъ совѣтникомъ Козмѣ и Домѣяну достойное воздаша по злодеянию ихъ.

Влѣто Ѕ'.Ф.Ѯ.Ѕ. [1058]

Изяславъ и Святославъ и Всеволодъ выняша дядю своего Судислава испоруба; бяше бо сидѣлъ лѣта К.Д. стр. 149 во Псковѣ: и укрепиша его крестнымъ целованиемъ. Онже вышедше испоруба, пострижеся во иноческий чинъ, и ведоша его вКиевъ, и подвизашеся добродѣтельнымъ житиемъ.

Влѣто Ѕ'.Ф.Ѯ.З. [1059]

Преставися Игоръ, сынъ Ярославль.

Преставися Лука епископъ

Тогоже лѣта преставися епископъ Новгородцкой Лука Жидята, идя исКиева наКопысе, мѣсяца Октября въ Е.І. день. Тогоже мѣсяца и гробу преданъ бысть своимъ клиросомъ, бывшу ему епископомъ К.Г. лѣта.

Тогоже лѣта Изяславъ и Всеволодъ и Всеславъ совокупиша вои безчисла, и пойдоша на конехъ и влодияхъ на Торки. Сеже слышавше Торцы, убоявшеся, и побегоша и до сего дни, и промроша бегающе, гнѣвомъ божиимъ гоними, ови отзимы умроша, а инии гладомъ, а друзииже моромъ, судомъ божиимъ. И тако избави богъ Християнъ от поганыхъ.

Тогоже лѣта ходи Изяславъ на Ссолы, и дань даяти заповѣда В'. гривенокъ. Ониже поручившеся, и изгнаша данники. На веснуже пришедше повоеваша о Юрьеве, и грады и хоромы пожгоша, и многа зла сотворше, и до

1059

Пскова дойдоша воюючще. И идоша противу имъ Псковичи и Новгородцы на сѣчю, и паде Руси А'., а Ссолъ безчисла.

Влѣто Ѕ'.Ф.Ѯ.И. [1060]

Первое зло от Татаръ

Приидоша Половцы первое наРускую землю воевати. Всеволодъже изыде противу имъ, мѣсяца Ѳевраля въ В. день: и бившимъся имъ, победиша Всеволода, и воевавще отидоша. Се первое зло бысть от поганыхъ и безбожныхъ врагъ: бысть же тогда князь ихъ Сакалъ.

Поставленъ Епископъ Стефанъ

Тогоже лѣта поставленъ бысть Новугороду епископъ Стефанъ.

Влѣто Ѕ'.Ф.Ѯ.Ѳ. [1061]

Мирно бысть.

Влѣто Ѕ'.Ф.О. [1062]

Мирно бысть.

Влѣто Ѕ'.Ф.О.А. [1063]

Судиславъ преставися, сынъ великого Владимера, братъ Ярославль, во святемъ образе, во иночестве, и вскиме: и положиша й вцеркви святаго Георгия, вмонастырѣ.

Тогоже лѣта вНовѣгороде иде река Волховъ вспять стр. 150 Е. днии. Сиеже знамение не надобро бысть: на Д. е лѣто пожже Новъгородъ Всеславъ, а людi зая.

Влѣто Ѕ'.Ф.О.В. [1064]

Бѣже изНовагорода Ростиславъ воТмутараканъ, сынъ Владимеровъ, внукъ Ярославль, правнукъ великого Владимера: и снимъ бежа Вышата, сынъ Остромиръ, воеводы Новгородцкого. И пришедъ выгна Глѣба, сына Ярославля, внука Ярославляжъ, правнукаже великого Владимера, изоТмутаракани; а самъ седе внего мѣсто.

Влѣто Ѕ'.Ф.О.Г. [1065]

Иде Святославъ Ярославичь на Ростислава Владимерича: Ростиславъ же отступи кромѣ града, не убоявся его, но и не хотя противу дяди своего оружия взяти.

1065

Святославъже пришедъ воТмутараканъ; и посади сына своего Глѣба, и возвратися вспять. Ростиславъже паки пришедъ выгна Глѣба, и самъ седе воТмутаракане; и приде Глѣбъ ко отцу своему.

Тогоже лѣта началъ Всеславъ рать.

Тогоже лѣта бысть знамение на небеси, на западней странe звезда превелика, лучи имущи кровавы, восходящи свечера по заходе солнечномъ: пребысть за З. днии. Сеже проявляшеся не надобро; восемъ бо быша усобицы многи и нашествие поганыхъ на Рускую землю. Сия бысть звезда аки кровава, проявляюще кровопролитие.

Тогоже лѣта вКиеве рыболове ловяше рыбы, выволокоша вневоде дѣтищъ, егоже сходящися позороваховъ довечера дивящася, и паки ввергоша его вводу: бяше бо у него на лицы срамнии удове; иногоже нелзе сказати срама ради.

Тогоже лѣта солнце пременися, и не бысть свѣтило, но аки мѣсяцъ бысть, егоже невѣгласи глаголютъ снедену ему сущу: иже бываютъ сицевая знамения не на добро. Мыже убо посему разумѣемъ, якоже древле при Антиохе во Иерусалиме случися, внезаапу по всему граду за М. днии является на воздусе на конехъ рыщущимъ воружии, златы имуща одежа, и полки убо являемы и стр. 151 оружиемъ движающимся: сеже проявляюще нахождение Антиохово нашествие на Иерусалимъ. І посемъ же при Нероне Цари во Иерусалиме возсия звезда на образъ копейный надградомъ: сеже проявляше нахожение рати отРимлянъ. І паки сицеже бысть при Устинияне Цари: звезда восия на западе испущающи луча: сию прозываютъ блистаницу; и бысть блистающий днии К. І посемъже бысть звездамъ течение свечера до заоутрия, и мнѣши, яко падаютъ звѣзды. І паки солнце безлуча сияше: сеже проявляше крамолы и недуги человѣкомъ и умерствие. Пакиже при Маврикии Цари бысть сице: жена дѣтищъ

1065

роди безо очию и безрукъ; вчреслехъ бѣ ему рыбей хвостъ приросль. И пѣсъ родися шестоногъ. Во Аѳрикииже два дѣтища родистася, единъ о Д. хъ ногахъ, а другой о двою главу. Посемъже бысть при Костянтине Цари Иконоборцы, сына Леонова, течение звѣздное бысть на небеси, оторгахуся на землю, яко видящимъ мнѣти кончину: тогдаже и воздухъ возлияся повелику. ВСирииже бысть трусъ великъ, земли разсѣдшися триехъ поприщъ; и изыде дивно изземля, мска человѣческимъ гласомъ глаголющи.

Ростиславу сущу воТмутаракане, и емлющу дань уКасагъ и у иныхъ странъ: сегоже убоявшеся Грецы, послаша слестию Котопана. Ономуже пришедшу кРостиславу, и ввѣрившуся ему, и чтяше его Ростиславъ. Единоюже пиющу Ростиславу здружиною своею, и рече Котопанъ: Княже, здравъ буди; хощу на тя пити. Онже испивъ половину; а половину дастъ князю пити, дастигъ перстомъ вчашу: бѣ бо имѣя подъ ногтемъ растворение смертное; и дастъ князю, урекъ смерть до И. днии. Княюже испившу, Котопануже пришедшу хКорсуню, и повѣдаше, яко всии день умретъ Ростиславъ: такоже і бысть. Сегоже Котопана побиша камениемъ Корсунстии людие. Бѣ бо Ростиславъ добръ на рати, возрастомъ стр. 152 лѣпъ, лицемъ красенъ, милостивъ ко убогимъ: успе мѣсяца Ѳевраля въ Г. день, и тамо положенъ бысть вцеркви святые богородицы.

Влѣто Ѕ'.Ф.О.Е. [1067]

Заратися Всеславъ, сынъ Брячиславъ, Полотский, внукъ Изяславль, правнукъ великого Владимера: и зая Новъ городъ доНеревскаго конца, и пожже, и пограби вся у святей Софии, и паникадила, и колоколы: и отѣиде. Ярославичиже три, Изяславъ и Святославъ и Всеволодъ, совокупивше воя, и идоша на Всеслава. Зимеже сущи велице, приидоша кМеньску: и Меняне затворишася

1067

вограде. Сииже братеницы взяша градъ Мѣнескъ, изсекоша мужи, а жены и дѣти даша нащитъ, и пойдоша кНемизе Марта въ Г. день; бѣ бо снѣгъ великъ. И пойдоша противу себя, і бысть сѣча зла, и одолѣ Изяславъ и Святославъ и Всеволодъ; а Всеславъ бежа.

Посемъ же, Июня въ І день, Изяславъ и Святославъ и Всеволодъ целоваша крестъ ко Всеславу, рекущи: прииди кнамъ, яко не сотворимти зла. Онже надѣявся о целование креста, перѣха книмъ влодье черезъ Днепръ. Изяславуже вшатеръ предвидущу, и тако яша Всеслава на Рши у Смоленска, и преступивше крестное целование. Изяславъ же приведе Всеслава кКиеву, и всади его впорубъ со двема сынома его.

Влѣто Ѕ'.Ф.О.Ѕ. [1068]

Придоша иноплеменницы наРускую землю Половцы мнози. Изяславъже и Святославъ и Всеволодъ изыдоша противу имъ на Алто: и бывши нощи, и пойдоша противу себѣ, грѣхъже ради нашихъ. Наводитъ бо богъ на насъ скорби погневу своему, за необращение наше кнему, и усобные рати бываютъ и который, отдѣйства дияволя, попущениемъ божиимъ, за наше преступление. Богъ бо не хощетъ зла человѣкомъ, но благая: а дияволъ радуется, злому убийству и кровопролитию, подвизая свары и зависть, братоненавидѣние, клеветы. Землиже согрешивше которой любо, казнитъ богъ смертию, стр. 153 или гладомъ, или навидѣниемъ поганыхъ, ли ведромъ, ли гусинецею, или инѣми казньми. Ащели покаяршеся будемъ, внемъже ны богъ велитъ жити. Глаголетъ бо намъ Пророкомъ: обратитеся комнѣ сердцемъ вашимъ, постомъ и плачемъ. Да аще сице сотворимъ, то всѣхъ греховъ прощени будемъ. Но и мы на злое возвращаемся аки свиния, вкале греховномъ присно валяющеся, и тако пребываемъ; тѣмъже Пророкомъ глаголетъ намъ: разумѣхъ,

1068

умѣхъ, рече, яко жестокъ еси, и глава твоя желѣзна; того ради удержахъ отвасъ дожди, и предѣлъ единъ одождихъ, а другаго бо не одождихъ, и издше земля, и поразихъ вы зноемъ, и различными казньми, то и тако не обратистеся ко мнѣ. Сего ради винограды ваша и смоквы, и нивы, и дубровы ваша истрыхъ, глаголетъ Господь, а злобъ вашихъ не могохъ испрети; но послахъ на вы различныя болѣзни, и смерти тяжкия, и на скоты казнь свою послахъ; то и тако не обратистеся ко мнѣ, но рѣсте: мужаемся. Доколе не насытистеся злобъ вашихъ? Вы убо уклонистеся отпути моего, глаголетъ Господь, и соблазнисте многихъ: сего ради буду свидѣтель скоръ на противныя, и на прелюбодѣя, и на кленущаяся именемъ моимъ всуе, и на лишающая мзды наимнику, и насильствующа сироте и вдовице, и на уклоняющаяся судъ кривъ. По что не совещастеся о гресѣхъ вашихъ, но уклонисте законы моя, и не сохранисте ихъ? Но обратитеся ко мнѣ, и обращуся квамъ, глаголетъ Господь, и азъ отверзу вамъ хляби небесныя, и возвращу отвасъ гнѣвъ свой, доньдеже все изобилуетъ вамъ, и неимутъ изнемощи винограды ваши и нивы ваша: но и вы отягчясте на мя словесы вашими, глаголюще суету; устыже чтутмя, а сердце ихъ далече отстоятъ отмене, глаголетъ Господь. Того ради, ихже убо просимъ, не улучаемъ; будетъ бо, рече, егда призовете мя, азже не послушаю васъ; взыщутъ бо мене злии, и не обрящутъ; не восхотѣша бо ходити путемъ моимъ; стр. 154 да того ради затворяется небо, и злѣ отверзается, ово градъ вдожда мѣсто пуская, овоже мразомъ плоды узнабляя, и землю зноемъ томя нашихъ ради злобъ. Аще ли ся покаемъ от злобъ нашихъ, то аки чадомъ своимъ дастъ намъ прошения, и одождитъ намъ дожди раны и поздны, и наполнятся гумна ваша пшеницы; прольютца точила винная и масличныя, и воздамъ за лѣта, яже

1068

пояша прузи, и хрустове, и гусеницы; сила бо моя великая, южe послахъ на вы, глаголетъ Господь Вседержитель.

Сия слышавше, восттягнемся надобро: взыщете суда, избавите обидимаго, и напокаяние приидемъ, не воздающи зла за зло; ни клеветы за клевету; но любовию прилепимся Господеви, постомъ и рыданиемъ, слезами омывающе вся прегрешения; ибо словомъ нарицающеся Християне, а погански живуще. Себо не поганскими живемъ? Аще бо кто усрящетъ инока, или инокиню, или попа, или жену и дѣвицу; или свинию, или конь лысъ: то плоть и возвращаются назадъ; не поганскили се есть? Себо по дияволю учению кобъ сию держатъ. Друзииже зачиханию вѣруютъ, еже бываетъ на здравие главѣ. Но симъ дияволъ льститъ, и другими нравы всяческии льстими превабляеми от бога, трубами и скоморохи, и смыками, и гусльми, и русальи; видимъ бо игрища утолчена, и людей много множество, яко утихати начнутъ другъ друга поворы дѣюще, отбѣса замышленого дѣла; а вцеркви стоятъ, егдаже бываетъ годъ молитвы, и мало ихъ обретается вцеркви: да сего ради и казни приемлемъ от бога всяческия, и нахожение ратныхъ, по божию повелѣнию приемлемъ казнь грѣхъ ради нашихъ. Мы же на предлежащее возвратимся.

Изяславуже со Всеволодомъ прибегшу хКиеву, а Святославу кЧернигову, и сотвориша вече на торговище, і рѣша людi Киевстии ко князю: се Половцы раз- стр. 155 сыпались по земли взагонехъ; дай намъ, Княже, оружие и кони, еще биемся сними. Изяславъже сего не послуша. И начаша люди его вадити на воеводу на Коснячка; идоша на гору свеча, и приидоша на дворъ Коснячковъ, и необретше его, сташа у двора Брячиславля, и рѣша: пойдемъ, высадимъ дружину свою испогреба. И разделишася на двое: половина ихъ пойде кпогребу, а другая ихъ

1068

иде по мосту. Сииже приидоша на Княжь дворъ, Изяславъ же седе на сѣнехъ здружиною своею: и начаша прѣтися со княземъ, стояще на дворѣ; князюже ізо оконца зрящу, и дружине стоящи укнязя. И рече Тукы, братъ Чюдинъ, Изяславу: видишили Княже, людие возъярилися, посли даже Всеслава блюдутъ. И се ему глаголющу, другая половина людей приде от погреба, и отворивъше погребъ; и рѣша дружина ко князю: се зло есть; посли ко Всеславу, и призови его лестию ко оконцу, да пронзутъ его мечемъ. И не послуша ихъ Князь. Людие же кликнуша, идоша кпорубу Всеславлю; Изяславъ же се видѣвъ со Всеволодомъ, побегоста здвора. Людиеже высекоша Всеслава испоруба, Сентября въ Е.І. день, и поставиша его посрѣде двора Княжа, и дворъ Княжь разграбиша безчисленое множество злата, и сребра, и кунами, и бѣлью. Изяславъ же бежа вЛяхи.

Посемъже Половцемъ воюющимъ около града Чернигова, Святославъ же собра дружины нѣколико, изыде на ня кСновску: и узрѣша ихъ Половцы идуща, и приспроишась противу. И видѣвъ Святославъ множество ихъ, и рече дружине своей: потягнемъ, братие, уже намъ нельзе камо ся дѣти. И удариша по конемъ, и одолѣ Святославъ втрехъ тысящахъ, а Половецъ В'.І'. И тако биеми, а инии истопоша вСнове, а князя ихъ руками яша въ А. Ноября. И возвратися Святославъ спобѣдою всвой градъ.