Лѣта Божего Нароженья 1546, мѣсеца Августа 3 день, у волторокъ, индиктъ 4.
За росказаньемъ господаря короля его милости великаго князя Жикгимонта Августа, Васильемъ Тишкевичомъ а Войтехомъ Ленартовичомъ стался пописъ границъ и шкодъ межи великого княжства Литовского и Коруны Польское.
Напервѣй отъ Берестейского повѣту двора и мѣстечка Воиня, а съ Коруны Польское, отъ Парцова, зъ имѣнья земянъ повѣту Любельского, Андрея и Едама Бранецкихъ. Напервѣй тые-то Бранецкіе оказали початокъ быти границы имѣнью своему зъ великимъ князствомъ рѣку Бранку, которая идеть отъ Воиня, отъ мѣста великого князства, у млынка плебана Воинского, который млынокъ тужъ, подлѣ мѣста Воиня. И повѣдилъ панъ Андрей Бранецкій, ижъ тотъ млынокъ Воинцы держать отъ тридцати лѣтъ; потомъ тотъ же Андрей оповѣдилъ, ижъ тотъ млынъ Воинцы держать отъ двадцати и шести лѣтъ; а въ третій разъ повѣдили (т. е. Бранецкіе) отъ двадцати лѣтъ, и менили собѣ великіе забійства, драпежства, боронячи своее властности отъ людей зъ великого князства Литовского, и реистръ шкодъ своихъ передъ нами оказывали. И повѣдили Бранецкіе, ижъ король его милость рачилъ росказати старостамъ своимъ, абы насъ ото всихъ наѣздокъ, забійства, грабежовъ и ото всихъ крывдъ отъ людей великого князства боронили, и къ тому выводечи свою справедливость ку большому свѣдецтву того ставили шесть свѣтковъ, шляхтичовъ, людей старыхъ, и сами тые Бранецкіе зъ оными свѣтками готовы были ку прысезѣ.
Тутъ же стоячы, два земянины Луковского повѣту Едамъ Кгутъ а Петръ Туровскій оповѣдали, ижъ дей тутъ же пришла земля наша Луковская до того млынка, до рѣки Бранки.
Зъ великого князства врадникъ Воинскій, на имя Сума, съ подданными господарскими Воинскими повѣдили, ижъ то есть кгрунтъ зъ вѣковъ вѣчыстыхъ великого князства по обѣимъ сторонамъ тое рѣчки, и не Бронкою ее зовуть, але зовуть ее Воинкою, а нижей впала у Бронку рѣчку, а млынокъ тотъ въ томъ мѣстѣ стоить уже отъ дву сотъ лѣтъ у во покои, а былъ то млынокъ хлопскій, на имя Яголчинскій, и потомка того Яголки становили, оповѣдали тежъ того млынка и пали згнилые, ижъ тамъ первшіе млыны бывали, и доводъ на то ставили людей добрыхъ старыхъ, бояръ, мужовъ сугранныхъ многихъ. И повѣдилъ тежъ тотъ же врадникъ Воинскій, ижъ дей тотъ млынокъ на той рѣчцѣ на Воинцѣ приданъ есть зъ ласки господарское плебану Воинскому отъ шести лѣтъ, яко господаръ король его милость фундовалъ костелъ у Воинѣ, гдѣ жъ врадникъ и люди Воинскіе и зъ свѣтками готовы были присягнути.
А што ся тычетъ шкодъ ихъ и забійствъ, на то врадникъ и люди Воинскіе повѣдили, ижъ мы жадныхъ шкодъ и забійствъ имъ не чинили и къ тому ся не знаемъ, але намъ многіе шкоды отъ нихъ стали, о которые шкоды свои будемъ мовити на мѣстцу, гдѣ оповѣдати будемъ границы свои.
Бранецкіе отъ того прудка, отъ рѣки, которую менили быти Бронкою, а зъ другое стороны Воиня не менили быти Воинкою, повели насъ черезъ поля, волоки займаючы о плотки мѣста Воинского, и черезъ кустовья и дубровки, яко бы на милю, и оповѣдали, ижъ по праву то есть корунно, а по лѣву великое князство. И ѣдучи черезъ поле, оповѣдали Бранецкіе, яко бы мѣлъ имъ быти копецъ посредъ поля роскопанъ, а знаку жадного нѣтъ. И ѣдучи черезъ тые поля и кустовья, жадныхъ тежъ знаковъ не оказали, ажъ до трехъ копцовъ, которые менять быти угольницами. И повѣдили, ижъ то копецъ одинъ Парцовскій зъ Воинемъ, другій Бранецкій зъ Воинемъ, третій Копеинскій зъ Воинемъ , а Копейная зъ Воинемъ великого князства. Едно бачили есмо, ижъ одинъ копецъ цѣлый есть, а два повѣдили, яко бы мѣли быти розсыпаны отъ Воинянъ, тыхъ двухъ копцовъ знаковъ мало.
Тые жъ панове Бранецкіе повѣдили, ижъ привилей короля Владислава на тые границы нашъ естъ у пана Петра Копеинского, у земянина великого князства Литовского, который прывилей замыка границу Бранецкую съ Копеинскою.
Петръ Копеинскій, земянинъ великого князства, повѣдилъ: мамъ я привилей, але не Бранецкіе, едно свой на свою отчизну, и будеть ли часъ, тогды его окаже.
Врадникъ Воинскій Сума, зъ людьми Воинскими, повѣдили, ижъ яко есмо первѣй того повѣдили, ижъ то есть ставокъ на рѣцѣ, которую Бранецкіе менять быти Бронкою, а Воинцы называють Воинкою, плебана Воинского, даный отъ короля и великого князя его милости господаря нашого милостивого, а такъ што Бранецкіе повѣдають, якобы посередъ поля мѣла быти граница ихъ, куды они вели, того копца не было никгды, и тые поля и кустовье и дубровы по обѣимъ сторонамъ все есть великого князства Воинское, и теразъ то суть волоки Воинскіе, а въ держанью стародавномъ а звѣчыстомъ завсегды въ покойномъ мають.
А што се тычетъ копцовъ тыхъ трехъ, которые менують уголъницами быти, то есть копцы не граничные зъ великимъ князствомъ. Едно выѣждчалъ панъ староста Берестейскій, панъ Александро Ходковичъ, воевода Новгородскій, за росказаньемъ короля его милости, и тые копцы казалъ усыпати Войняномъ отъ Копеянъ, земянъ великого князства, а тому есть семь лѣтъ. А на вси чотыры стороны отъ тыхъ копцовъ то все есть великого князства Литовского къ Воиню, а тые два копцы, которые Бранецкіе менять быти, яко бы Воиняне мѣли роскопати тые копцы, не Воиняне розсыпали, але панъ воевода Судомирскій, панъ Тенчынскій, староста Парцовскій, выславши казалъ роскопати не тыле одны тые два копцы, але и иншые копцы Воинскіе казалъ его милость панъ староста Парцевскій розсыпати, которыхъ знаки слушны есть.
Панъ воевода Судомирскій, панъ Тенчинскій, черезъ прокуратора своего Яна Гришковского, судью Луковского, оповѣдити рачилъ, ижъ тые копцы нарожные Парцовскіе не суть розсыпаны зъ росказанья пана старосты, ено отъ Воинянъ и иншые большъ, которые укаже, ижъ ту есть пры тыхъ нарожникахъ стѣна Парцовская.
Тутъ же стоячы, на томъ же мѣстцу его милости пана воеводы Новгородского, старосты Берестейского, пана Александра Ходковича, земянинъ господарскій, подстаростій Берестейскій, панъ Иванъ Яцыничъ, оповѣдилъ именемъ пана воеводы его милости Новгородского, ижъ то есть копцы сыпаные, за росказаньемъ короля его милости, за выѣханьемъ его милости пана моего, ижъ его милость господарь розказалъ Воинцомъ отъѣхати межы земяны его милости Копеинскими, а не есть то стѣна Парцовская, але есть то со всихъ чотырехъ сторонъ великое князство Литовское, а многіе тутъ копцы были засыпаны, которые его милость панъ воевода Новгородскій росхазалъ усыпати межи поданныхъ господарскихъ великого князства, ено врадникъ Парцовскій тые копцы казалъ пороскопывати, и готовъ я теперъ, врадникъ пана моего, до тыхъ знаковъ роскопаныхъ привести.
Потомъ отъ тыхъ трехъ копцовъ угольныхъ панове Бранецкіе повели просто въ дорозѣ, которая идеть зъ Воиня до Глинного Стоку и оказали копцовъ десеть, одинъ за другимъ роскопаны, менячы ихъ быти межы имѣньемъ Сухое Воли на полдень, а межы Бранецкихъ на заходъ солнца, менячы то быти на обѣдвѣ сторонѣ Коруны Польское, и оповѣдили ся, ижъ тые копцы розсыпаны отъ Воинцевъ.
Врадникъ Воинскій Сума и зъ людьми Воинскими къ тому ся знали, ижъ тые копцы розсыпали, а то въ тотъ обычай, ижъ панъ воевода Судомирскій росказалъ сыпати копцы по властнымъ землямъ на кгрунтъ великого князства двора Воинского. И мы жаловали королю его милости и пану старостѣ Берестейскому, и тые копцы есмо розсыпали за вижомъ пана старосты Берестейского, яко жъ листъ господарскій и листы пана воеводы Новгородскаго на то оказывали, ижъ, за тыми листы и за росказаньемъ господарскимъ, тые копцы роскопали. И оттуль засе повели насъ Бранецкіе черезъ дуброву ку дорозѣ, которая идеть отъ Бранецкихъ до Парцова, и оказали намъ копцовъ осмъ, то вжо всихъ осмнадцать. И повѣдили Бранецкіе, ижъ тые копцы роскопали Воинцы. И Воинцы се ку тому знали, ведлѣ первого описанья, и повѣдили, ижъ тому тры годы, яко были всыпаны, а тры годы яко розсыпали; а на оной сторонѣ дороги, што оны повѣдають, якобы мѣли копцы розсыпаны быти, мы ся ку тому не знаемъ, и тыхъ копцовъ есмо не роскопывали. И повѣдали Бранецкіе, ижъ потуль вже есть граница наша.
Мѣсеца Августа 4 день, назавтрѣе, въ середу, индиктъ 4. Початокъ границъ великого князства двора Воинского повѣту Берестейского.
Напервѣй повели врадникъ Воинскій Сума и подданые великого князства Воинскіе отъ Бѣльска болота, границъ пана Забрзенского Межырѣцкихъ, болотомъ до Луцова ставка, отъ Луцова ставка черезъ гребелку до рѣки Бронки, гдѣ впадываеть Воинка въ рѣку Бронку, а Бронкою рѣкою до Городища. И кгды были на Городищу, тогды врадникъ Воинскій, ставшы на Городищу, повѣдилъ, ижъ то есть на той сторонѣ рѣчки повѣтъ Луковскій, а тое Городище кгрунтъ есть великого князства Воинскій, и поля тые, которые суть около него и зъ стороны Воинское, то есть все Воинское. И готовъ былъ врадникъ Воинскій того доводомъ доводити свѣтки, людьми добрыми, шляхтою, и передъ нами ихъ ставилъ, и прысегами поправити хотѣлъ.
И на томъ тежъ Городищу съ Коруны польское Андрей Бранецкій зъ братьею своею оповѣдилъ, ижъ тотъ кгрунтъ Городищо, на которомъ ваша милость стоите, есть властная отчызна наша, гдѣ дѣдъ нашъ седѣлъ, на имя Сребро, а часу войны, кгды Литва съ Коруною вальчыли, тогды тотъ замокъ Литва спалила, и поля тые, которые суть коло него, наши. И того хотѣли доводомъ довести.
Потомъ зася отъ того Городища вели насъ Воинцы подлѣ рѣчки Бронки, и менили тую рѣчку собѣ быти границею. И недалеко отъѣхавшы, повели насъ влѣво, долиною, до дороги, менуючы быти поправу землю коруны польское, а полѣву великого князства Воинскую. А оттуль вели насъ до гребли, до ставку, который ставокъ прозывають Кокорецкій, и противку того ставка указали намъ на другой сторонѣ дороги селище. И повѣдили Воинцы, ижъ тотъ ставокъ Кокорецкій и селище было чоловѣка Воинского, на имя Кокорева, которого потомки и теперъ есть у Берестьи.
На то Бранецкіе повѣдили, ижъ што Воинцы менують быти рѣку Воинку, тая рѣчка не есть Воинка, але Буеновка, которая впала въ рѣчку у Бронку. А што ся тычетъ оного ставку Кокорецкого, то есть ставокъ нашъ, до которого ставку хлопъ Кокорейка за чотыры корцы жита греблю засыпалъ.
А потомъ отъ того ставку вели насъ черезъ поле до стоку. И будучи на томъ поли, вказали Воиняне крыжъ, и повѣдил и, ижъ на томъ мѣстцу забили Бранецкіе чоловѣка Воинского, который жито свое жалъ на властности своей, и о путь двухъ чоловѣковъ Воинскихъ забито на томъ же мѣстцу.
Бранецкіе на то повѣдили: правда, ижъ забито одного чоловѣка тамъ, ѣдучи зъ ярмарку, а о тыхъ не вѣдаемъ. И о того чоловѣка, кому бы мѣли вину дати, хотѣли есмо право дати, ено вины никому ни дано.
И тымъ стокомъ вели насъ Воиняне яко бы чверть мили до дороги Парцовское, которая идеть отъ Бранецкихъ до Парцова, оповѣдаючи, ижъ по правой сторонѣ то есть корунно, а по лѣвой сторонѣ великое князство, Воинское. А на томъ стоку оповѣдили намъ копецъ, потомъ пень великого дуба оказали, который пень повѣдили быти граничный. А кгды прышли до дороги, тою дорогою оповѣдили намъ Воиняне копецъ, которого прозывають врочищемъ Шадымеръ. И тымъ гостинцомъ вели насъ яко бы на милю до мѣстца врочища до Бабы и повѣдили, ижъ по лѣвой сторонѣ то есть князство, а по праву корунно.
Бранецкіе оказали по правой сторонѣ дороги копцы значные, повѣдаючи, ижъ на лѣвой сторонѣ есть наше, а по правой сторонѣ Суховольское, корунное жъ, указуючи на то листъ права своего подкоморего Любельского.
Воиняне повѣдили, ижъ то есть по праву корунное, а по лѣву наше, ено Бранецкіе своволне а кгвалтовне тые копцы усыпали отъ шести лѣтъ на кгрунтѣ князства Литовского.
И тамъ же тежъ Воиняне повѣдили, ижъ на томъ врочищу Бабѣ сходятьсе села многіе, яко зъ великого князства, такъ съ Коруны Польское.
Тамъ же освѣтчалъ се панъ судья Луковскій прокураторъ именемъ пана Точинского, ижъ тое урочище Баба не есть князства Литовского, але корунное.
Врадникъ Воинскій повѣдилъ, ижъ отъ початку границъ Межырѣцкихъ болота Бѣльского дерево бортное, которое есть по лѣвой сторонѣ и зъ грунтомъ посполу, то есть все великого князства. И готовы есмо того довести знаками, которые есть у деревѣ.
Потомъ вели насъ Воинцы мимо села Чехостовъ дорожкою, займаючи оплотковъ. И повѣдили Воинцы, ижъ тое село Чехостово осажено есть черезъ пана Точинского отъ девети лѣтъ, и вказывали проробки новые; и къ тому дей селу полуволочковъ Воинскихъ семдесятъ отмѣреныхъ, которыхъ былъ панъ Александро Ходковичъ отмѣрилъ Воинцомъ; панъ Точинскій отнялъ и къ тому селу привлащилъ тому три годы. Оттоль привели насъ Воинцы къ Сажевцѣ Фракгантовѣ, а отъ Сажевки просто доломъ черезъ огороды Миляновскіе до Божее Муки, отъ Божее Муки дорожкою до Переровцу. И повѣдили Воинцы, ижъ въ того мѣстца Переровца збираеть се копа зъ великого князства и коруны польское. А отъ того Переровцу повели насъ до границъ князя Василія Подубенского.
И тутъ поткалъ насъ врадникъ князя Василья Полубенского Митько, зъ людьми и зъ свѣтками, и повѣдилъ, ижъ тутъ граница князя моего села Ясенского снела ся зъ границею великого князства двора Воинского, и на то былъ готовъ свѣтками и шляхтою довести. Врадникъ Воинскій зъ людьми Воинскими переводили то людьми добрыми старыми, вѣры годными, и шляхтою многою, ижъ поченшы отъ границы Межырѣцкое, врочища Бѣльска болота и всими тыми граньми, куды насъ вели, по праву корунно, а по лѣву великого князства . И ставили людей добрыхъ суграничниковъ, шляхту добрелѣтную, и готовы были съ тыми свѣтками яко о кгрунтъ, такъ о борти и о границы покаженье, и о копцы разсыпываные, прысегами своими поправити.
Мѣсеца Августа 7 день, въ суботу, индиктъ 4.
Ставши у первшого копца, гдѣ менены быти три копцы отъ пановъ Бранецкихъ, самъ панъ воевода Судомирскій, панъ Янъ Точинскій, повѣдилъ, и жъ тутъ тры копцы были, то есть: нарожница единъ копецъ отъ Воиня, другій копецъ отъ Бранецкихъ, третій копецъ отъ Чехостова съ Копеинскими земяны, и тое село Чехостовъ я осадилъ отъ десяти лѣтъ. А што панове Бранецкіе вели до дороги, которая идеть отъ Бранецкихъ до Парцова, тая дорога не есть граница великому князству съ Коруною, бо дороги не чинять границъ, ено рѣки, болота, долы, горы и копцы. А што ся жалують на мене Воинцы, яко быхъ я семдесятъ полуволочковъ мѣлъ взяти, тогомъ я не вчынилъ, абовѣмъ села засѣли королевскіе, земянскіе, которые села границу межи копцы мають, презъ которые копцы не могу я жадныхъ крывдъ Воиняномъ вчынити. И повелъ его милость насъ панъ воевода отъ тыхъ копцовъ лѣсомъ, яко бы на чтверть мили, и повѣдилъ его милость, ижъ по правой сторонѣ то есть корунно, а по лѣвой сторонѣ великого князства земянъ Копеинскихъ. Въ томъ лѣсѣ не вказалъ его милость намъ жадного знаку и прывелъ его милость насъ до копца и повѣдилъ его милость, ижъ то есть копецъ нарожница селу Чехостову корунному и зъ земяны великого князства Копеиными, и рекъ его милость: томъ я велъ яко зъ ураду моего, а далѣй южъ не веду.
Въ того копца повѣдилъ врадникъ Воинскій, ижъ тотъ копецъ есть не стародавный, але тому есть шесть годъ, якожъ панъ воевода его милость Судомирскій рачилъ повѣдити, ижъ такъ есть, яко тотъ копецъ казалъ сыпати, тому вже шесть годъ. И оттоль взяли земяне Коруны Польское, Миляновцы и Костровцы, яко бы на полночь, и повели черезъ дорожку поблизу того копца и черезъ поля волокъ Копейницкихъ, утираючи дворовъ земянъ Копейницкихъ великого князства, дорогою черезъ болото, которое Миляновцы зовуть Миляновское, а Копеиницкіи зовуть Ратайско, яко бы на чверть мили.
И надъ тымъ же болотомъ оказали намъ копецъ, и менуючи, яко бы тотъ копецъ мѣлъ быти граничный Корунѣ Польской зъ великимъ князствомъ. Напротивку того повѣдили земяне великого князства Копейницкіе: то есть копецъ нашое граници зъ Воинцы, которыхъ копцовъ и граней въ деревьи есть удолжъ не мало. Панъ воевода его милость Новгородскій, панъ Александро Ходковичъ а панъ Никодимъ, староста Мельницкій, за росказаньемъ и за листомъ господарскимъ намъ тыми копцы и гранями заграничыли отъ мѣста его милости господарского Воиня. И оказали листъ господара короля его милости, въ которомъ его милость господарь пишеть, росказуючи пану воеводѣ Новгородскому, старостѣ Берестейскому, а пану Никодиму, старостѣ Мельницкому, абы ихъ милость тымъ земяномъ Копеинцомъ заграничили на тыхъ мѣстцахъ отъ мѣста его милости Воиня. Другій тежъ листъ положили тыхъ пановъ вышеймененыхъ судовый, у которомъ описуеть, ижъ за росказаньемъ господарскимъ по тымъ мѣстцамъ ихъ милость заграничили яко копцы, такъ тежъ въ деревѣ знаки на все на то. Тежъ оказали листъ господаря короля его милости перкгаменовый съ привѣсистою печатью, ижъ господаръ король его милость рачылъ имъ тотъ судъ и выѣздъ на тые земли листомъ своимъ господарскимъ потвердити на вѣчность; яко жъ панъ Точинскій, тужъ стоячи въ копца, повѣдилъ: дармо ся Миляновскіе и Кострове въ то вкладають, менять собѣ быти тотъ копецъ граничный зъ великимъ князствомъ, а то не есть такъ, але то есть копцы промежку Воина и Копеинцовъ. Зася Миляновцы и Кострове земяне корунные поведи у боръ на чверть мили, менячи корунное быти по праву, а по лѣву великого князства. И оказали намъ еще тры копцы, ку которымъ врадникъ Воинскій повѣдилъ, ижъ то есть копцы, на которые есми первѣй листъ господарскій и пана воеводы Новгородского и пана Никодима, старосты Мельницкого, заграниченые Копеинцомъ отъ Воиня, покладалъ.
Потомъ Миляновцы и Костровцы повели насъ черезъ дуброву и боръ, яко бы на двѣ мили, а жадного знаку намъ не оказываючи, и прывели къ селу Рудну Воиницкому великого князства, и черезъ тое село поведи насъ на всходъ солнца до болота, на имя Рудна. И ставши посередъ того болота повѣдил и: то есть граница посередъ того болота князя Василья Полубенского, по лѣву великого князства, а по праву корунно.
Врадникъ князя Василья Полубенского Митько, тужъ ставшы посередъ того болота, повѣдилъ: правда, ижъ то есть граница посередъ того болота князю моему зъ Воинемъ, а не съ Коруною, а Миляновцомъ далѣй, якожъ и копцы посередъ того болота маю зъ Воинемъ. И готовъ былъ довести того свѣтки, людьми добрыми, шляхтою.
Тутъ стоечы врадникъ Воинскій Сума рекъ: я готовъ того доводити свѣтки, людьми добрыми, ижъ то не есть граница Миленовская, ани Костровская, ено Воинская зъ Яблонскою князя Василья Полубенского. И ставилъ людей добрыхъ шляхту и мужовъ двадцати чоловѣковъ.
Посередъ того болота повели Миляновцы и Костровцы весполокъ зъ урядникомъ князя Василья Полубенского.
Тогды Миляновцы и Костровцы менили быти тутъ границу съ княземъ Васильемъ Полубенскимъ. А врадникъ князя Васильевъ менилъ быти тутъ границу зъ Воинемъ. И шли тымъ болотомъ на полторы версты, ажъ до Руденского моста, до дороги, которая бѣжитъ отъ Руденца до Костровъ.
Тутъ повѣдилъ врадникъ князя Полубенского: то есть по обѣимъ сторонамъ поправу и полѣву земля князя моего, а корунное земли тутъ пяди нѣтъ. И прывелъ лѣсомъ до гребелки, и повѣдилъ, ижъ тая гребелка есть на рѣцѣ Ясенцѣ, а тая Ясенка идеть болотомъ и дѣлить Коруну зъ великимъ князствомъ, то вже отъ тыхъ мѣстъ починаеть ся земля великого князства князя моего полѣву, а поправу корунно. Отъ тое гребелки Миляновцы и Костровцы пошли налѣво болотомъ, менячи собѣ границу, а врадникъ князя Василья Полубенского повелъ поправу болотомъ, менячы собѣ быти границу. И ведучы насъ врадникъ князя Васильевъ, поки дерево великое было, оказывалъ намъ грани зарослые старые въ ольхахъ и въ дубѣхъ на многихъ мѣстцахъ, потомъ велъ насъ болотомъ менячы, яко бы туды мѣла быти Ясенка рѣчка.
Миляновцы и Костровцы также вели болотомъ, недалеко промежку собою, индѣй у подверсты, а индѣй на стрѣленье, и сышли се у въ одно мѣсто, гдѣ наужшое болото. И тутъ вже менили съ обѣихъ сторонъ, яко зъ великого князства врадникъ князя Василья Полубенского, такъ Миляновцы и Костровцы, за вѣчыстую и правдивую границу упокойную отъ давнихъ часовъ быти. И повели тымъ болотомъ рѣчкою Ясенкою до великое дороги, которая идеть зъ Берестья до Парцова, и черезъ тую дорогу на крыжъ Ясенкою рѣкою до рѣки Переволоки, которая идеть подъ Парцово, а отъ рѣки Переволоки уверхъ, которую рѣку Переволоку другимъ именемъ называють Пивонеею, а тою рѣкою Пивонеею до Переволоцкихъ земянъ, а отъ Переволоцкихъ земянъ до Хмѣлевскихъ земянъ великого князства и корунныхъ, тоею жъ рѣкою до ставу, который ставъ занялъ панъ Янъ Точинскій, менячы быти все по лѣву великое князство, а поправу отъ Парцова корунное.
Индиктъ 4, мѣсеца Августа 8 день.
Съ того ставу повѣдилъ подстаростій Берестейскій Иванъ Яцыничъ, ижъ тотъ ставъ есть вдѣланъ ку шкодѣ великого князства, бо тая рѣка дѣлить коруну польскую зъ великимъ князствомъ. Панъ Янъ Точинскій повѣдилъ: король ми его милость казалъ заняти.
Подстаростій Берестейскій жалобу тежъ положилъ у того ставу, ижъ съ тыхъ селъ ново осажоныхъ зъ Гугнина и зъ Бондаревки, которыхъ панъ Точинскій осадилъ, переходячы тые воляне съ тыхъ селъ, островокъ на сей сторонѣ у великомъ князствѣ розробливають и шкоду великую чинять. Панъ Точинскій рекъ: южъ я не каже черезъ то тамъ уступати, а мѣйте вы то ку великому князству.
Поѣхавшы далѣй тою рѣчкою уверхъ по сторонѣ коруны польское съ полверсты, оповѣдилъ подстаростій Берестейскій зъ людьми господарскими Коденскими а князя Ивана Полубенского Русиловцы, то есть болото, которое прышло съ тое рѣчки Пивонеи, тымъ болотомъ уверхъ, держачи лѣсъ Бочдаревъ поправу корунный, а островъ великого князства Коденскій и Русиловскій по лѣву. И вели насъ тымъ болотомъ Коденцы яко бы съ полверсты до болота, которое зовуть Гугнино, надъ которымъ село черезъ пана Точинского осажено отъ десяти лѣтъ.
И тутъ ставши надъ тымъ болотомъ, оповѣдили, ижъ по тое болото то есть намъ грань съ Парцовомъ. И повели зася просто къ той жо рѣцѣ Пивонеи, направѣ менячы Хелмскій повѣтъ земянъ Сосновскихъ корунное, а по лѣву ажъ до рѣки Пивонеи — великого князства. И отъ того болота ажъ до рѣки Пивонеи оказывали намъ грани старые зарослые звѣчыстые у соснахъ великихъ у двадцати и въ шести, а иншые многіе повѣдили, ижъ выкажены и выжжены. А отъ тыхъ граней пошла просто граница наша черезъ рѣку Пивонею весполокъ зъ границею Хелмскою: великое князство полѣву, а корунное поправу. Панъ Янъ Точинскій повѣдилъ, ижъ я мамъ за грань корунѣ зъ великимъ князствомъ тую рѣку Пивонею, а то хлопство забрали собѣ здавна входами своими, того я не мамъ за границу, и король ми тежъ его милость казалъ того боронити; я кажу ихъ хлоповъ вѣшати, и тые грани вси каже вырубати.
То початекъ границъ Великого Князства съ Коруною польскою, описуючи гдѣ наколько миль.
Бранецкіе съ коруны почали вести отъ ставку плебана Воинского великого князства вдолжъ на милю.
А панъ воевода Судомирскій, самъ панъ Янъ Точинскій, велъ на чверть мили.
А Миляновскіе съ коруны вели до князя Василья Полубенского границы на три мили; ино про тыхъ Миляновскихъ самъ панъ Точинскій повѣдилъ, ижъ але оны туды ведуть, а прожне ся въ то вступаютъ.
Тые жъ Миляновскіе князя Василья Полубенского границею вели на полторы версты.
Врадникъ Воинскій зъ великого князства велъ отъ границы Межирѣцкое пана Ивана Горностаева на пять миль до князя Василья Полубенского границы.
Тое всее розницы промежку коруны и великого князства у тыхъ мѣстцахъ индѣ на полмили, а индѣ на милю, а индѣ на версту, а индѣ на стрѣленье зъ лука.
А князя Василья Полубенского граница мало не вся супокойливая, мало розницы, на болотѣ на полторы версты и вельми узка, а отъ великое дороги князя Васильевою границою, то есть супокойливо, до Переволоцкихъ земянъ якобы миля.
А отъ Переволоцкихъ земянъ до Хмѣлевскихъ земянъ миля: то тежъ у ву покои; а Хмѣлевскимъ съ Кодняны людьми господарскыми великого князства миля жъ спокойного до болота Гугнина.
Тутъ ставъ панъ Точинскій занялъ къ берегу великого князства на рѣцѣ Пивонеи. И самъ то сознаваеть панъ Точинскій, едножъ повѣдаеть: король ми его милость казалъ. Тутъ панъ Точинскій отнялъ не далеко отъ того ставу у Коденчанъ у Берестейского повѣту въ людей короля его милости великого князства островъ на полмили вдолжъ и поперекъ.
Индиктъ 4, мѣсяца Августа 9 день, въ понедѣлокъ.
То ся почынаеть отъ Парцевского повѣту повѣтъ Хелмскій зъ Берестейскимъ же отъ болота Гугнина, троху попошодъ якобы на стрѣленье въ шапцѣ болотомъ; тутъ ся почали черезъ боръ грани до рѣки Пивонеи: Хелмское поправу, а великое князство по лѣву, — просто черезъ рѣку Пивонею въ долъ на имя у Мостищо, тымъ доломъ Мостищомъ у вольховый багонъ, отъ ольхового багну у Кропивку, отъ Кропивки у Сколотую рѣку вдолъ, а отъ Сколотое рѣки у Турную до поллѣса, а отъ Турное до Андреевскихъ границъ коруны польское до крыжа: то есть всѣхъ Сосновскихъ границъ на полторы мили; тые границы описаные уверху Сосновскіе съ коруны, а Кодняне, люди великого князства, супокойливе зъ обѣихъ сторонъ держать.
Тутъ у того крыжа панове Сосновскіе повѣдили, ижъ потуль есть наше, а то вже по праву Андреевскихъ корунное Хелмского повѣту, а по лѣву то вже есть великого князства Коденское.
А отъ крыжа, повѣдили одностайно, яко съ коруны польское Андреевскіе, такъ тежъ Коденчане и Сополчаны, ижъ отъ того крыжа отъ границы Сосновскихъ наша граница есть супокойная до Жадова верха, того есть яко бы на полмили. И повѣдили, ижъ знаки наши зъ обусторонъ тыми мѣстцы по деревью идуть урубываны.
Индиктъ 4, мѣсяца Августа 12 день, у четвергъ.
Подданые великого князства Литовского повѣту Берестейского люди господарскіе Кодняне, на имя Куль а Омельянъ, Наумъ, зъ иншыми потужники своими, Коденчане, такъ яко въ понедѣлокъ, прыводили ку остаточной стѣнѣ границъ своихъ Жадова верху, которую мають зъ имѣньемъ князя старосты Володимерского Володавскимъ, а зъ другое стороны зъ имѣнья земянъ повѣту Хелмского корунными Андреевскими. А такъ про недбалость я непильность а небытность, и за обсыланьемъ передоѣждчихъ корунныхъ, которые зъ нами ѣздять, иже есмо тыхъ Андреевскихъ отъ понедѣлка три дни ажъ до четверга ждали, оказуючи и освѣтчаючи ся, ижъ другій разъ выводятъ пановъ передоѣждчихъ обойга панства, оказали суть границы, которые ся кончатъ зъ имѣньемъ князя старосты Володимерского. А почынаеть се граница князя старосты его милости Володимерского князя Ѳедора Андреевича Санкгушковича Володковская отъ Жадова верху, на которой стѣнѣ и на початку границъ врадникъ князя Володимерского поткалъ насъ на первшой стѣнѣ и зъ свѣтками, шляхтою, людьми добрыми, оповѣдаючы, ижъ то есть граница князя моего и тутъ се почынаеть граница отъ подданыхъ великого князства повѣту Берестейского съ Коденскими, которая идеть, ѣдучи отъ Парцова по лѣвой сторонѣ отъ Жадова верху, а по правой сторонѣ то есть Хелмскій повѣтъ земянъ корунныхъ пановъ Андреевскихъ, а отъ Жадова верху болотомъ Прыбаражомъ до колодезя, который есть подлѣ гостинца Бруского, который идеть съ коруны до великого князства, отъ того колодезя рѣчкою Скородницею, которая идеть лѣсомъ до броду Ульянова, а отъ того броду Ульянова тоею жъ рѣкою Скородницею до Липичъ. И тутъ на томъ броду Ульяновѣ пріѣхали къ намъ панове Андреевскіе, якобы вже на концу границъ своихъ, и повѣдили, ижъ намъ корунного отнято ку великому князству отъ короля Александра, и хотѣли были то по насъ мѣти, абыхмо ещо третій разъ для нихъ ворочать мѣли. А такъ мы про недбалость ихъ мѣшкаючи для ихъ чотыры дни не годилося намъ для ихъ омѣшкиванья больши того часу тратити. И отъ Ульянова броду по липы, по которые рѣка Скородница дѣлить, граница прышла пановъ Ганскихъ корунная земли Хелмское, и лежыть граница рѣкою Скородницою ажъ до мосту, который идеть изъ Сухавы до Колачовъ. А отъ мосту тою жъ рѣкою Скородницою ажъ до рѣки Володавы, и тая рѣка, повѣдили, на полы дѣлить имѣнье князя старосты Володимирского съ паны Ганскими. И ѣдучи подлѣ рѣки Володавы внизъ ку мосту Володаву, по правой сторонѣ, повѣдили, корунно, а по лѣвой сторонѣ великое князство. Гдѣ въ того мосту стоячы урадникъ князя Володимирского ставилъ свѣтки шляхту людей, старыхъ розныхъ пановъ, хотячи и будучы готовъ доводити границу князя своего, а панове Андреевскіе яко наѣхали насъ у броду, также ѣдучи зъ нами ажъ до мосту, повѣдили, ижъ што по лѣвой сторонѣ, то есть все наше, ено жъ князь староста Володимерскій то въ насъ отнялъ.
На то врадникъ князя старосты Володимерского побѣдилъ, ижъ то николи Андреевскихъ не было, ани они того никгды во вживанью не были.
А отъ мосту тоею жъ рѣкою Скородницою до рѣки Володавы, тоею жъ рѣкою Володою идеть граница князю старостѣ Володимерскому съ паны Ганскими рѣкою наполъ внизъ: по правой сторонѣ корунно, а по лѣву великое князство, тою рѣкою граница идеть на милю олижъ до рѣки Лютое, которая впадываеть въ рѣку Володову. И повѣдили, ижъ тутъ стѣна князю старостѣ Володимерскому съ паны Ганскими по тую рѣку Лютую.
А на другую сторону тоею жъ рѣкою Лютою починаеть се граница пани Крупское съ Коруны князя старостою Володимерскимъ границою. Тою жъ рѣкою Володавою, гдѣ впала Лютая у Володаву, а такъ тая Володава рѣка чынить границу пани Крупской съ княземъ старостою Володимирскимъ, ажъ до мосту того, черезъ который мостъ лежить дорога съ князства до коруны.
У пятокъ, мѣсеца Августа 13 день, индиктъ 4.
Выѣхали есмо зъ Володавы до мосту, который есть мостъ на рѣцѣ Володавѣ, и повѣдилъ подстаростій Хелмскій пана Тарлова Станиславъ Зубрыцкій, ижъ тотъ мостъ Хелмяне на полрѣки робять зъ людьми повѣту Берестейского.
Врадникъ Володавскій князя старосты Володимерского Балтромей Минцовскій повѣдилъ: панове милые, оповѣдамъ то вашей милости, ижъ князя моего отецъ небощикъ чинилъ границу съ паномъ Крупскимъ небощикомъ, и копцы промежку собою засыпали и листы описали подъ винами, естли бы которая сторона ихъ держати не хотѣла, а такъ князь мой розказалъ ми то ознаймити, ижъ тое вгоды своее не отступуеть, а естли бы тежъ пани Крупская держать не хотѣла, тогды тежъ князь мой прыпоминаеть свою границу старую отъ рѣки Лютое ажъ за Орховъ за двѣ мили по болото багонъ.
На то врадникъ пани Крупское повѣдилъ: ждаломъ пановъ моихъ и до тыхъ часовъ, але я о границы науки отъ пановъ моихъ не мамъ, а ни ся въ то вдаваю вымовяючи забѣгами, ижъ съ того имѣнья пани выѣхати мусила до замку Городла.
А такъ есмо опустившы имѣнье пани Крупское и ѣхали есмо отъ подгорья границъ, гдѣ ся починаеть пета пановъ Уханскихъ съ княземъ старостою Володимирскимъ имѣнья княжного Володовского болотомъ Юницею. И съ того болота идеть рѣчка Уюница, которая рѣчка упала у другую рѣчку у Снетонку. А съ тое рѣчки Снетенки пошла граница лѣсомъ великимъ, чрезъ который лѣсъ есть копцы и грани въ деревьи. А съ того великого лѣсу пошла граница черезъ боръ багномъ, по которымъ багнѣ есть граница по деревью грани а по земли копцы ажъ до лѣса и рѣки Радогощи. И тутъ уже граница пришла князя Головнина. Тутъ же стоячы врадникъ пановъ Уханскихъ, на имя Флеріянъ Желехъ и зъ мужми пановъ своихъ повѣдилъ, яко почалася граница отъ подгорья отъ пановъ Крупскихъ стѣны ажъ до того мѣстца рѣки и лѣса Радогоща, то мають панове мои Уханскіе съ княземъ старостою Володимерскимъ зъ имѣньемъ его милости зъ Володовомъ границу по тымъ мѣстцамъ супокойливую.
И тутъ врадникъ князя старосты Володимерского повѣдилъ, ижъ потуль вже есть граница князя моего имѣнья его милости Володавы.
Отъ Жадова верху, гдѣ князя старосты Володимерского врадникъ оказалъ свою границу съ Кодняны до липъ, до стѣны пановъ Ганскихъ, якобы двѣ мили, а отъ липъ до Володавы рѣчки яко бы двѣ мили.
А отъ Володавы рѣчки, гдѣ впадываеть Лютая, до мосту, который есть на той же рѣцѣ Володавѣ, чрезъ который идеть дорога зъ великого князства до Коруны, того есть на тры мили. А отъ мосту до подгорья якобы миля; а отъ подгорья до рѣки Радогощи до границы князя Головнины двѣ мили. Тое всее границы князя Володимерского Володаевское отъ Коруны десеть миль.
И тогожъ дня, у пятницу, на томъ же мѣстцу, у лѣсѣ подлѣ рѣки Радогощи, то есть у границы князя старосты Володимерского, поткалъ насъ врадникъ князя Ѳедора Головнинъ зъ имѣнья его Рожанецъ, на имя Богушъ Чешинскій, и вказалъ намъ границу имѣнью князя своего и повѣдилъ, ижъ тутъ ся починаеть граница князя моего Рожанская и подалъ списокъ, у которомъ описуеть границу съ паны Уханскими рѣчкою Радогощою; тою рѣчкою Радогощою черезъ болото, на полы дѣлячи болото, по лѣвой сторонѣ князство, а по правой сторонѣ корунное. И съ того болота уверхъ Лубли лѣсу, уверхъ богна, а отъ богна на боръ.
И тутъ стоячы врадникъ пановъ Уханскихъ Флеріанъ Желехъ повѣдилъ, ижъ потуль есть граница пановъ моихъ и потуле люди пановъ моихъ ведуть границу, а далѣй ся я не поднимаю вести, ани люди пановъ моихъ, а гдѣ того будеть часъ, тогды панове мои укажутъ границу.
Врадникъ князя Головнина повѣдилъ, ижъ я веду границою стародавною князя моего, напервѣй ку Тяменому лѣсу, а оттоль чрезъ болото къ Соломени градѣ, а отъ Соломени черезъ рѣку Дубоцкую у болото, изъ болота у лѣсъ Деревецкій, а зъ лѣсу Деревецкого къ Сергѣевой ямѣ, а отъ ямы Сергѣевы на Баракови ку гостинцу Луцкому, и тамъ ѣдучи указывалъ знаки зъ обусторонъ у деревьи старые и глубокіе и повѣдилъ, ижъ тыхъ знаковъ есть еще больши.
А врадникъ пановъ Уханскихъ повѣдилъ: я границъ не вѣдаю, але то вѣмъ, ижъ то есть земля пановъ моихъ и часу потребы тогды ся то окаже.
А тое границы всее князя Головнины съ паны Уханскими якобы на двѣ мили.
Индиктъ 4, мѣсеца Августа 14 день, въ суботу.
На Береховичахъ, на гостинцу Луцкомъ, ставшы панъ Янъ Угровецкій изъ староства Любомского повѣдилъ, ижъ моя граница съ Пещча не есть ку границы великого князства прылеглая, але люди староства Любомского изъ Шацка а зъ Свиташа зашли мя отъ великого княства, безъ которыхъ я ничого не могу чинити, а тые дей люди Любомскіе за тымъ не стали, ижъ староста Любомскій естъ на послузѣ короля его милости, а подстаростій есть ѳоръ.
Тужъ подстаростій Берестейскій Иванъ Яцыничъ отъ людей великого князства повѣту Берестейского Олтушковичъ повѣдилъ: я вашу милость поведу границою, которая идеть межи великого князства и Любомля, и прывелъ до Березового броду и повѣдилъ, ижъ то есть граница великого князства съ повѣтомъ Любомскимъ съ паны Угровецкими, посередъ того болота починаеть се отъ границы князя Головнины села его Дубка, а тымъ Березовымъ бродомъ до врочыща Тросковыхъ мховъ, по праву Любомское, а по лѣву великое князьство. Отъ тыхъ Тросковыхъ мховъ до болота Зеленца, которое дѣлить Любомле зъ великимъ князствомъ, по праву Любомское, а по лѣву великое князьство. Отъ того болота до врочища Утовки боромъ ажъ до каменого крыжа, по праву Любомское, а полѣву великое князство. Отъ каменого крыжа до лѣсковъ подлѣ ясеня, отъ лѣсковъ до Заколникъ, отъ Заколникъ до болота Небимеховъ, которое подлѣ озера Орѣхова. По тымъ врочыстымъ мѣстцамъ оказывали знаки грани старые и новые, у многомъ деревью на обѣ сторонѣ урубываные и зарослые. И повѣдили, яко бы иншые грани мѣли быти вырубаны и выжжены; и готовъ былъ подстаростій Берестейскій того до водокъ довести, ижъ то есть старовѣчная граница великого князства селъ зъ Любомлемъ, и ставилъ свѣтковъ, людей добрыхъ, шляхту.
А вдолжъ тыхъ граней по тымъ мѣстцамъ якобы на двѣ мили. Панъ Угровецкій рекъ: которые знаки указують изъ великого князства, тогды я тыхъ знаковъ за знаки не прыймую, бо не суть слушны, а идуть посередъ кгрунту моего.
Мѣсеца Августа 16 день, у понедѣлокъ.
Ставшы на дорозѣ, которая идеть зъ Берестья до Луцка, подстаростій Любомскій Павелъ Чорностовскій зъ людьми повѣту Любомского повѣдилъ: то есть врочыщско Кобылка, ту есть по лѣву великое князство, а по праву Любомско. Котора грань иде отъ тое Кобылки до озера Олтушского, а отъ озера Олтушского до озера Орѣховского.
Подстаростій Берестейскій Иванъ Яцыничъ зъ людьми великого князства повѣту Берестейского повѣдилъ, ижъ то по обѣимъ сторонамъ есть великого князства и во впокойномъ а звѣчыстомъ держаньи мають. И повелъ насъ подстаростій Любомскій Павелъ и въ Уханскіи болоты и островы и дубровами, якобы на милю не вказуючы жадныхъ знаковъ. Потомъ оказывалъ намъ знаки зъ обусторонъ у деревѣхъ урубываные якобы на полтори мили. И потомъ привели насъ подстаростій Любомскій съ паны Уханскими къ соснѣ, которую менили остаточную знаковъ и повѣдили, ижъ по правой сторонѣ Любомско, а полѣву великое князство, которая сосна подъ лѣсомъ стоить, на дорогѣ, которая дорога идеть отъ Радоша до Олтуша межи селъ великого князства, и повѣдили, ижъ въ той соснѣ были знаки гранные, едножъ ихъ вырубали Олтушцы, люди великого князства.
На то повѣдилъ подстаростій Берестейскій панъ Иванъ Яцыничъ зъ мужми тыхъ селъ: по которымъ гранемъ усимъ, урубыванымъ у деревью, вели подстаростій Любомскій съ паны Уханскими и зъ мужми Любомскими Свитяжцы Полемчаны, то есть грани людей повѣту Берестейского села Олтушского а Радешского, мененая здавна Хрипская, которую Хрипщизну Олтушцы отъ давныхъ часовъ держать, а то есть грань положеная отъ пана Сеньки Олизаровича, старосты Берестейского, который за росказаньемъ великого князя его милости Александра судилъ и грани туды поклалъ, и на то подстаростій Берестейскій листъ судовый пана Сенька Олизаровича оказывалъ, у которомъ описуеть, ижъ панъ Сенко Олизаровичъ судилъ и тые грани туды межи тыхъ селъ положылъ. Которые жъ грани идуть непереставаючи межи иншихъ многихъ селъ Берестейскихъ, дѣлячи вышей пяти миль, ажъ до села князя бискупа его милости Луцкого до Замшанъ. И просилъ насъ, абыхмо ѣхали тыхъ граней осмотривати до князя бискупа Луцкого села его милости до Замшанъ яко на три мили, хотячи ихъ намъ оказати. Потомъ оказалъ другій листъ намѣстника Берестейского пана Станислава Михайловича, у которомъ описуеть потвержаючи тотъ судъ и тые грани пана Сенька Олизаровича.
На то повѣдилъ подстаростій Любомскій съ паны Уханскими, ижъ то есть граница, которая дѣлить великое князство зъ Любомлемъ, а то Хрыпъ былъ хлопъ нашъ, который мялъ у Любомли и въ князствѣ, якожъ я мамъ на Хриповщызнѣ волю, село свое, именуетъ тое село Хрипская воля. А мы, яко первѣй повѣдили, ижъ тые грани наши идуть до озера Олтуша, и готовы есмо знакъ указали у соснѣ, у которой уложена была зъ давныхъ часовъ мотыка.
И отъ тое сосны вели на чверть миля, и всю тую границу съ початку якобы въ коло, а на той чверти мили не вказали жадныхъ знаковъ, и привели насъ до пня огорѣлого, у которомъ менили быти отъ предковъ ихъ зъ давныхъ часовъ мѣла быти вложена въ пень мотыка и зарощена; якожъ дей Олтушцы, люди великого князства, довѣдавшися того, и тую мотыку съ тою сосною сожгли, якожъ намъ оказали тотъ пень, у которомъ повѣдили, ижъ грани ихъ выкажены, але мы знаковъ жадныхъ у томъ пни не бачыли. И вели насъ до озера Олтушского, которое озеро подъ селомъ Олтушомъ великого князства якобы на полмили, не вказуючы жадныхъ знаковъ. И повѣдили, ижъ озлѣ того озера Олтушского, которое озеро подъ селомъ Олтушомъ, грань наша лежить до рѣки, которая идеть отъ озера Орѣхова до озера Олтушова. И менили на вголъ того Орѣховского озера двѣ тони ку Любомлю, просто до млынка Орѣховского якобы на милю. И повѣдили, ижъ тотъ млынокъ теперь держать къ великому князству къ селу Орѣхову, а тотъ млынокъ стоить на земли Любомской.
Подстаростій Берестейскій повѣдилъ: куды вели подстаростій Любомскій и паны Уханскіе, то есть по обѣма сторонамъ великое князство; а тые озера великого жъ князства, запродають ихъ кождое зимы, и тотъ платъ до скарбу господарского дають. А тыхъ дву тонь у въ озерѣ Орѣховскомъ никгды яко жыво съ коруны не волочывали, ани жадного уступу у тое озеро не мѣвали. А што менують рѣку межи тыхъ озеръ быти собѣ границою, тое рѣки никгды тамъ не бывало, и теперь ее нѣтъ, якожъ ся то оказало, ижъ ее нѣтъ, босмы тамъ доѣждчали. И повелъ насъ подстаростій Берестейскій зася отъ того врочыща отъ Небимеховъ якобы на чверть мили, и повѣдилъ, ижъ тутъ поправу корунно пановъ Угровецкихъ ажъ до рѣки Перевѣски, а по лѣву великое князство. Тужъ сознали Любомскіе люди Шатцане, ижъ то есть стѣна паномъ Угровецкимъ зъ нами Шатчаны. И велъ насъ подстаростій Берестейскій до рѣки Перевѣски, не оказуючы знаковъ жадныхъ, якобы на полмили голымъ болотомъ, и повѣдилъ, ижъ тою рѣкою Перевѣскою, уверхъ якобы на полмили, дѣлечы великое князство зъ Любомлемъ: по праву Любомское, а по лѣву великое князство ажъ до врочыща Перевѣсья.
Того обводу куды подстаростій Берестейскій велъ, поченшы отъ Березова брода до врочыща Перевѣсья, якобы на тры мили.
А того обводу, куды съ коруны вели, отъ Кобылки до млынка вдолжъ якобы на полпяты мили.
А тое розницы межи Березова броду и межы Кобылки по млынокъ въ ширки съ початку якобы на полмили, а въ серединѣ на милю, опять зася ужѣй се почала сходити, а на остатку якобы на чверть мили.
Индиктъ 4, мѣсеца Августа 17 день, у волторокъ.
Привелъ насъ подстаростій Берестейскій Иванъ Яцыничъ зъ людьми Орѣховскими, и повѣдилъ, ижъ то есть врочыщо Перевѣсье: то есть по праву за рѣкою Перевѣскою Любомско, а по лѣву великое князство. И оказалъ тутъ въ дубѣ грань, на обѣдвѣ сторонѣ урубываные. Подстаростій Любомскій Павелъ повѣдилъ: што ты менишь границу быти тую рѣку Перевѣску и тое врочыще Перевѣсье, то есть по обѣма сторонамъ тое рѣки, то есть Любомско, а гдѣ стоимъ, то есть Шацкій островъ, а на той сторонѣ рѣки, то есть пановъ Уханскихъ людей Островецкихъ, и мы тыхъ граней не прыймуемъ за грани. Зася тоеюжъ рѣкою велъ насъ подстаростій Берестейскій якобы на тры стрѣленья зъ луку и оказалъ намъ сосну, въ которой грани на обѣдвѣ сторонѣ урубываные и повѣдилъ, ижъ тутъ рѣка пришла тая Перевѣска зъ Любомского повѣту; тамъ же по рѣцѣ по обѣма сторонамъ Любомско, а великому князству зъ Любомлемъ идеть граница посередъ того болота на дванадцать миль. И оттоль повелъ насъ болотомъ, якобы съ чверть мили або ближей, менячы границу посередъ болота. И прывелъ насъ до островка, у которомъ повѣдилъ копецъ стародавный: того копца троху знакъ есть; и просто тымъ болотомъ велъ насъ якобы на чотыры стрѣленья до другого островка. И въ томъ островку оказалъ намъ грани въ дубѣ, на обѣдвѣ сторонѣ урубываные, а другій дубовый пень выжженый, у которомъ менилъ быти грань. Отъ того островка просто повелъ насъ болотомъ до третего островка якобы на версту великую, и межы тыхъ острововъ противъ озера Мошонъ оказалъ намъ два копцы. И въ томъ островѣ третемъ оказали намъ двѣ грани въ соснахъ урубываные на обѣдвѣ сторонѣ. И тымъ болотомъ просто вели якобы еще на двѣ версты и оказали посередъ болота копецъ великій, хворостомъ оброслый и дерево зъ него береза выросла. Отъ того копца вели просто болотомъ до лѣса Унеча острова якобы на версту, и оказали у двухъ деревѣхъ у соснахъ грани врубываные. А отъ того лѣса Унеча болотомъ же до груда Побій-Коня якобы на полторы версты а отъ того груда Побій-Коня вели лѣсомъ и болотомъ; съ которого болота повѣдилъ, ижъ рѣка Оръ устала, оказываючы грани свои якобы на добрую милю, и оказали намъ граней на той мили двадцать и двѣ въ деревью, въ соснахъ урубываные на обѣдвѣ сторонѣ, менячы по правой сторонѣ Любомско, а по лѣвой великое князство и прывелъ насъ къ Бабьему.
На то повѣдилъ подстаростій Любомскій съ тивуномъ и зъ людьми села Шацкого, ижъ, куды ты велъ тыми болоты и оказывалъ еси грани и копцы, мы тыхъ граней и копцовъ не прыймуемъ за слушность; бо то есть по обѣма сторонамъ, куды ты велъ, Любомско; а нехай намъ выдадуть або впоменуть тыхъ, хто бы мѣлъ тые копцы засыпывати и граничити, бо того никгды нибыло, завсегды мы держывали у ву покои. И въ того Бабьего повѣдилъ подстаростій Берестейскій, ижъ тутъ ся кончить граница Любомская, а почынаеть ся повѣтъ Ратенскій.
Граница села Орѣховского великого князства зъ границою Залѣскимъ селомъ Ратенскимъ у Бабьего, оттуль пошла берегъ Пегого врочыща, острова, отъ Пегого до врочыща Урека, отъ Урека до Ора болота посередъ мосту, которая рѣчка Оръ идеть тымъ болотомъ индѣ поникла а индѣй оказала.
А отъ тыхъ рѣкъ граница прышла Хотеславская до середины мосту Королева и посередъ болота. И тутъ повѣдилъ подстаростій Берестейскій Иванъ Яцыничъ: якомъ взялъ первѣй того отъ Перевѣсья и веломъ ажъ до тыхъ часовъ болоты по тымъ верхумененымъ врочыщамъ, то все по праву Любомское, а по лѣву великое князство.
Подстаростій Ратенскій панъ Войтехъ Свѣтицкій повѣдилъ: куды оказывалъ панъ подстаростій Берестейскій по рѣцѣ Орю посередъ болота, то и по тымъ врочыщамъ все есть Ратенско; а куды я поведу завтра, тогды то все по праву будеть у Ратенскомъ, а по лѣву великое князство.
Тогожъ дня, мѣсеца Августа 17 день, у волторокъ.
Подстаростій Любомскій Павелъ зъ людьми Шацкими повелъ насъ отъ млынка Орѣховского, который подъ селомъ великого князства Орѣховомъ, оповѣдаючы грани межы Любомля и великого князства, и велъ насъ черезъ поля, черезъ болота и дубровы, посередъ гуменъ Орѣховскихъ на великую полторы мяли, але жадныхъ знаковъ по тымъ мѣстцамъ не оказалъ и прывелъ къ болоту Ору, которое болото подстаростій Берестейскій зъ людьми великого князства Орѣховскими менять собѣ границу быти зъ Любомлемъ. И повѣдилъ подстаростій Любомскій, ижъ потуль есть Шацкое, повѣтъ Любомскій, а то ся вже починаеть граница Ратенская.
Того обводу корунного, поченшы отъ млынка, до горы Плѣшивое, якобы на полторы мили.
А куды подстаростій Берестейскій велъ, поченшы отъ Перевѣсья до Бабьего, якобы на полтрети або на три мили; а тое розницы отъ ставку до Перевѣсья якобы на милю, такъ тежъ и въ посредку; едно ижъ ку Концови ку врочищку названому болоту Орю, гдѣ ся зышли, индѣ на полмили, а индѣ на чверть мили.
Индиктъ 4, мѣсеца. Августа 19 день, въ четвергъ.
Панъ Войтехъ Свѣтицкій подстаростій Ратенскій, зъ людьми короля его милости Ратенскими Залѣсцы, прывелъ насъ ку горѣ, которую менилъ быти, ижъ то есть гора Плѣшивая, и повѣдилъ, ижъ ту ку той горѣ трои грани прышли: одна Любомская и зъ селомъ Шацкимъ, а другая Ратенская, а третяя Берестейская великого князства. И повѣдилъ, ижъ оттуль хочу вести, оказуючы границу Ратну зъ великимъ князствомъ.
Подстаростій Берестейскій Иванъ Яцыничъ зъ людьми великого князства Орѣховскими повѣдилъ, ижъ тая гора есть у великомъ князствѣ Литовскомъ, якожъ бачите ваша милость, ижъ и чертежи по той горѣ есть наши, а граница Ратну зъ великимъ князствомъ, якомъ повѣдилъ третего дня, ижъ идеть посередъ того болота на дванадцать миль, дѣлячи Ратно зъ великимъ князствомъ, якожъ и границы есми вашей милости на томъ болотѣ оказывалъ, бо Ратно и Любомль то было великого князства и взято за короля Казимера. И отъ початку тое горы велъ насъ Свѣтицкій подлѣ болота доломъ, дубровою и лѣсомъ, якобы на полторы версты, а тую гору Плѣшивую всю упустившы у великое князство на лѣво, и велъ насъ Свѣтицкій черезъ болото, которое вышло зъ болота великого, которого есть на стрѣленье; а въ томъ лѣсѣ рѣпа сѣена Орѣховская, гдѣжъ и самъ то панъ Свѣтицкій созналъ, ижъ то есть рѣпа людей великого князства Орѣховскихъ.
Подстаростій Берестейскій повѣдилъ, ижъ то естъ по обѣма сторонамъ великое князство и по тому болоту по островахъ есть гречыхи и проса и пчолы въ деревѣ бортномъ людей великого князства Орѣховскихъ.
Павъ Свѣтицскій повѣдилъ, ижъ куды я веду то, есть по праву Ратенское, а полѣву князство. И велъ насъ дубровкою, замежкомъ нивы якобы зъ версту и прывелъ насъ до дороги, до греды, которая гряда есть подлѣ болота великого, тоею градою ѣдучы якобы съ полверсты, и опустивши тую греду управо, ку болоту великому, и велъ насъ налѣво презъ мхи и борки якобы иа версту, а знаковъ по тымъ мѣстцамъ нигдѣ жадныхъ не оказалъ и прывелъ насъ къ горѣ, которую менилъ быти Бабилецкая.
На то панъ подстаростій Берестейскій зъ людьми повѣдилъ, ижъ то не есть гора Бабилецкая, але зовуть ее Подмаковищемъ, а Бабилецкая гора вже назаде. И отъ тое горы долъ невеликій переѣхавшы, повелъ зася боромъ горою и Иржищи, гдѣ оповѣдалъ, ижъ Иржищько тое у князствѣ, и потомъ зася горою велъ якобы на стрѣленье, а отъ тое горы доломъ, а отъ того долу направо и налѣво горками малыми, я великую граду опустилъ налѣво у князство, отъ тыхъ горъ прывелъ до другое горы троху большое.
Подстаростій Берестейскій повѣдилъ, ижъ то есть по обѣма сторонамъ великого князство, а тая гора не есть Бабилецкая, але зовуть ее Гочинская, и туто грань селамъ великого князства Хотеславцомъ и Орѣховцомъ.
Отъ тое горы велъ Свѣтицкій боромъ якобы на чверть мили и потомъ зася грядою боровою якобы на чверть мили поблизу болотъ, а знаковъ жадныхъ нигдѣ не оказалъ, а зъ гряды ѣхавшы и повелъ черезъ боръ якобы на чверть мили, и прывелъ насъ до горы, которую менилъ Лисову гору, которая гора прышла намъ злѣва, зъ великого князства, а знаковъ жадныхъ и тыми мѣстцы не оказалъ, едно оказывалъ по праву Ратенско, а полѣву великое князство.
Подстаростій Берестейскій повѣдилъ: то естъ по обѣма сторонамъ кгрунтъ великого князства ажъ до половицы болота Оря, и ѣхали тою грядою Боромъ якобы на милю. И повѣдилъ Свѣтицкій, ижъ по праву есть Ратенско, а полѣву великое князство. И опустившы тотъ грудъ у великое князство улѣво, повелъ насъ зле болота управа.
Подстаростій Берестейскій повѣдилъ, ижъ то естъ по обѣма сторонамъ великого князства ажъ по половицы болота Оря. И велъ насъ Свѣтицкій черезъ боръ и черезъ болота, утираючи великого болота якобы на чверть мили ажъ до полмосту, не вказуючи знаковъ жадныхъ, менячы собѣ половицу мосту границу: по праву Ратенско, а по лѣву великое князство.
На то подстаростій Берестейскій повѣдилъ: куды панъ Свѣтицкій, подстаростій Ратенскій, зъ людьми Ратенскими Залѣсцы велъ, то все есть по обѣма сторонамъ великое князство посередъ болота Оря ажъ до полмосту; то есть правда, ижъ полъ мосту естъ великому князству зъ Ратномъ граница: бо тая рѣка индѣ поникла, а индѣ ся оказала.
Панъ Свѣтицкій зъ людьми Ратенскими, съ Тураны и Залѣсцы, повѣдилъ, ижъ отъ мосту по полъ болота рѣка дѣлить Орь по праву Ратенское, а по лѣву великое князство. И зъ обу сторонъ, яко подстаростій Ратенскій Свѣтицкій зъ людьми Ратенскими: Турены и Залѣсцы, такъ подстаростій Берестейскій Иванъ зъ людьми великого князства : Хотеславцы и Орѣховцы, Ляховчаны и Рычаны повѣдили, ижъ то естъ звѣчыстая граница Ратну зъ великимъ князствомъ посередъ того мосту, и мостимъ его по половицы, и то сознаваемъ, ихъ тое болото есть Оръ. А отъ тое горы, которую панъ Свѣтицкій менилъ Плѣшивую, до мосту Королева, ку которому зъ обу сторонъ прызнаваютъ, якъ то естъ Ратну зъ великимъ князствомъ граница, то есть на тры мили, а болотомъ отъ Залѣское границы, куды подстаростій Берестейскій велъ, до тогожъ мосту Королева двѣ мили, а розницы промежку тыхъ мѣстъ индѣ на полмили, а индѣ на чверть мили.
Мѣсеца Августа 20 день, у пятницу.
Вели насъ весполокъ подстаростій Берестейскій Иванъ Яцыничъ - зъ людьми великого князства: зъ Ляховцы и Хотеславцы, зъ Орѣховцы и зъ Рычаны — а подстаростій Ратенскій панъ Войтехъ Свѣтицкій — зъ людьми Турскими села Ратенского — отъ того мосту названого Королева, который мостъ зъ обу сторонъ менують быти супокойный Ратну зъ великимъ князствомъ, и вели по половицы того болота, менуючи то болото Оръ супокойливую границу великому князству зъ Ратномъ, якобы на полмили до островка Соснового. А отъ того островка повелъ насъ подстаростій Ратенскій на лѣво, менячи туды границу Ратну зъ великимъ князствомъ и повѣдаючы, ихъ туды Оръ идеть.
Подстаростій Берестейскій повелъ около того островка у право, менечы тамъ границы великого князства зъ Ратномъ, и туды Оръ идеть. И отъѣхавшы троха отъ того островка на стрѣленье, оказалъ намъ панъ Войтехъ Свѣтицкій ровокъ и воды троха въ немъ и езки малые, менячы быти рѣку Оръ. Подстаростій Берестейскій повѣдилъ, ихъ то не есть рѣка Оръ, але есть ровокъ людей великого князства Хотеславцовъ, у которомъ уюны ловять.
И оттоль отъѣхавшы троху, оповѣдалъ Свѣтицкій долокъ безъ воды, менячы, якобы ту мѣла рѣчка выникнути, а знаку жадного нѣтъ. А отъ того долку отъѣхавшы якобы на чверть мили, оказалъ намъ ровокъ, гдѣ менилъ быти знакъ, гдѣ рѣка Оръ ходи. А подстаростій Берестейскій повѣдилъ, ихъ то не естъ рѣка Оръ, але по обѣимъ сторонамъ великого князства, а то долы естъ копаные, яко обычай есть по болотамъ для въюновъ. И повелъ насъ панъ Свѣтицкій отъ болота влѣво болотомъ подлѣ бору, а великое болото управу опустившы, и прывелъ насъ къ водѣ, которая есть вода у рову, менячы тутъ быти рѣку Оръ, на которомъ рову козы оказывалъ.
Подстаростій Берестейскій повѣдилъ, ихъ то есть по обѣма сторонамъ великое князство, и оттоль велъ насъ болотомъ якобы милю, оказываючы знаки на многихъ мѣстцахъ, ровки, ихъ знать то, коли въ дождчовые лѣта або весною тогды тутъ можеть рѣчка быти, и менять ее Оремъ, и оказывали на многихъ мѣстцахъ езки сухіи по болоту. Подстаростей Берестейскій повѣдилъ, ижъ тое врочыщо не есть Оръ, але то есть рѣчка Непская, подъ Заломличомъ островомъ, и течеть подъ село великого князства, подъ Ляховцы; а по тому болоту, по обѣма сторонамъ тое рѣчки, и куды вели теды, то есть все великого князства. И отъ тыхъ мѣстъ велъ насъ Свѣтицкій, якобы на полмили и привелъ, видячы село великого князства Леховцы, ку броду, который повѣдилъ быти Оремъ. А подстаростій Берестейскій повѣдилъ, ижъ то есть врочыщо Вечье, а то есть бродъ, куды изъ села великого князьства Ляховичъ быдло гонять, а по обѣма сторонамъ то есть великого князства. И оттоль велъ насъ Свѣтицкій болотомъ, якобы на чверть мили ку броду мнѣйшому, а отъ того броду на три стрѣленья привелъ ку третему броду и менилъ, якобы то мѣлъ быти Оръ, И повѣдил, ижъ потуль есть граница села Турского, а то вже почынаеть ся села Кортелишского Ратенского. Подстаростій Берестейскій повѣдилъ, ижъ тые броды вси отъ села Ляховецъ быдло выбило, гонячы у пущу, а то есть болото, — а Оря и рѣчки жадное тутъ нѣтъ, — бо индѣ не мають куды гонити быдла, едно туды: и то все естъ по обѣимъ сторонамъ великое князство, якожъ и сами ваша милость бачите, ижъ болото простое. А оттоль велъ Свѣтицкій болотомъ мало не милю и привелъ ку горѣ кгредѣ, которую гору менилъ быти подгорьемъ, и повелъ тоею горою надъ болотомъ, менячы по праву Ратенско, а полѣву великое князьство.
Подстаростій Берестейскій повѣдилъ: тая гора, которую ты менуешь подгорьемъ, не естъ подгорьемъ, але тая гора идеть зъ великого князства, зовуть ее и тое болото Мокрянское; и по обѣма сторонамъ то естъ великое князство. И вели тоею горою съ полмили надъ болотомъ, которое болото менилъ Оремъ, и зася повернулъ влѣво болотомъ къ Райскому лѣсу, коло борку, до крывыхъ проходовъ, а оттуль ажъ до мостка Перевѣсья. И менилъ подстаростій Ратенскій, якобы тое болото мѣло быти Оръ, и повѣдилъ, ижъ по праву Ратенско, а по лѣву великое князьство.
Подстаростій Берестейскій повѣдилъ зъ людьми великого князьства: куды велъ подстаростій Ратенскій зъ людьми Ратенскими, то естъ по обѣма сторонамъ великого князьства, а не естъ то болото Оръ; але то естъ болото простое Мокрянское селъ великого князьства. И отъ тое горы вели по всимъ тымъ врочыщамъ верху менеными болоты якобы на полторы мили вдолжъ.
Тогожъ дня, у пятницу.
Отъ того соснового гайку велъ насъ подстаростій Берестейскій Иванъ Яцыничъ, зъ людьми великого князства Ляховцы и Хотеславцы и зъ Орѣховцы и зъ Рытчаны, до врочища Велихова острова якобы на милю. Отъ того мѣстца острова Соснова ни чого не видѣли знаковъ, одно спредку смы знашли ровы значные, въ которыхъ были езы, але мѣстца тыи сухи, безъ воды, болото сухо.
И тутъ повѣдилъ подстаростій Берестейскій, ижъ то есть рѣка Оръ, едножъ того лѣта сухого высхло. А потомъ, пріѣждчаючы до острова Велихова, межы островомъ и озеромъ Велиховомъ, тамъ же указалъ намъ мѣстце, гдѣ подстаростій Берестейскій повѣдилъ, ижъ ту рѣка выникла, и потомъ — три мѣстца продлуговатые, недалеко промежку собою, на которыхъ езовъ осмъ, и повѣдилъ, ижъ то есть поникъ тое рѣки Ора, и отъ того мѣстца зася понурилася. И панъ Свѣтицкій повѣдилъ, ижъ то не есть рѣка Оръ, але рѣчка зъ озера выходить ивыжжарище, а отъ Велихова якобы на трои стаи вынурилася опять рѣка Оръ и идеть якобы на милю, не переставаючи, и опять поникла и якобы на двои стаи вынурила, и зася до третьего разу вынурила такежъ, — а на томъ мѣстцу езовъ пять, а потомъ поникла и далѣй ее не было знать ажъ до ястребецъ врочыща Обча, отъ Обча до Папоротного, отъ Папоротного до Доманова. И тутъ оказывали намъ воду якобы студню, менуючы, ижъ тутъ рѣка Оръ указала. Отъ того мѣстца вели насъ сухими болоты на чверть мили, и вказали намъ знакъ другій на болотѣ езъ, а передъ езомъ воду, которую менили, ижъ то есть рѣка тая Оръ, которая идеть отъ Доманова понуремъ. И ведучи насъ до млынка сухими болоты на чверть мили, указывали намъ два знаки, одинъ знакъ ровъ межи лозами и воды не много, и менили быти, ижъ туды рѣка Оръ идеть понуромъ. А недалеко того мѣстца, презъ дорогу переѣхавши Куртелискую, указали на болотѣ воду, такъ якобы студня. Отъ того мѣстца приведи насъ до млынка. И повѣдили люди села Мокрянского великого князства, ижъ тотъ млынокъ есть намъ по половицы и зъ селомъ Кортелишскимъ Ратенскимъ. Отъ того млынка вели насъ болоты сухими, и повѣдили, ижъ тутъ рѣка поникомъ идеть, и знакъ указали ку подобенству рѣки воду, и на ономъ мѣстцу два езы. И отъ того опять вели насъ до другого мѣстца ку границы Дивинской, и вказали намъ тоежъ рѣки знакъ воду, которое воды знакъ есть, ижъ рѣкою идеть черезъ дорогу Кортелискую зъ Новоселокъ ѣдучы до Ратна, и менили, ижъ тая рѣка Оръ дѣлить князство Литовское зъ Ратномъ: поправу Ратенское, а полѣву великое князьство.
Подстаростій Ратенскій повѣдилъ, ижъ то не есть граница великому князству зъ Ратномъ, але по обѣма сторонамъ есть Ратенское, а то, што оказывають, якобы мѣла быти рѣка Оръ, то есть выжары, а иншое хлопи Ратенскіе копали роды для ловенья въюновъ.
Отъ мосту Королева, яко почалъ подстаростій Ратенскій зъ людьми Ратенскими вести, до Дивинское границы, до Перевѣсья мостку, всего того по всимъ тымъ границамъ якобы на шесть миль.
Отъ тогожъ мосту Королева, куды велъ подстаростій Берестейскій зъ людьми великого князства болотомъ ажъ до Дивинское границы, до врочыща Годеня, якобы на пять миль, а розницы промежку тыхъ обводовъ съ початку на версту, а индѣ на подмили, а индѣ на три мили, и зася опять ку концу ку Дивинскимъ границамъ якобы на милю.
Мѣсеца Августа 23 день, у понедѣлокъ.
Подстаростій Берестейскій, Иванъ Яцыничъ, зъ людьми великого князства Дивинцы, привели насъ до острова Годеня и вказали противъ острова Годеня знакъ рѣки ровъ, у которомъ есть вода, и менили, ижъ посредъ того рова болотомъ рѣка Оръ идеть поникомъ, индѣ ся оказала, а индѣ поникла, которого ровку есть поперечного на стрѣленье ку шапцѣ(?). И вели насъ болотомъ, на которомъ болотѣ оказали три ровки безъ воды, менячы быти, ижъ туды рѣка Оръ идеть, а два езки оказали намъ, одинъ на болотѣ, а другій въ ровѣ. Потомъ, приводячы насъ болотомъ ку озеру Берзскому, оказали ровъ предлуговатый безъ воды, которого рову якобы на три стрѣленья. И повѣдили, ижъ то есть рѣка Оръ, которая рѣка есть граница великому князству зъ Ратномъ, поправу то есть Ратенско, а полѣву великое князство. И повѣдили, ижъ тутъ уже у тое озеро Берзское тая рѣка Оръ упала, и привели ку озеру, которое озеро менили быти по половицы Ратну зъ великимъ князствомъ. И вели насъ отъ того озера троха управо болотомъ до островка до сосны, у которой соснѣ менили быти грани свои звѣчыстыи у трехъ мѣстѣхъ. И повѣдили, ижъ тыи грани вырубали и выказили Кортелисцы люди Ратенскіи: того куды насъ вели болотомъ отъ Годеня до сосны якобы на полмили; а отъ сосны вели насъ посередъ болота просто до островка до дуба на полмили, у которомъ дубѣ оказывали грани старые зъ обудву сторонъ урубованые крижы. Отъ дуба вели просто посредъ болота на полмили до врочищка Залазовъ до липы, у которой оказывали грани урубываны зъ обудву сторонъ крижы. А отъ липы вели насъ болотомъ и оказали намъ на берегу болота двѣ сосны, у которыхъ менили быти грани; але есмо бачили зъ едное стороны знаки не вельми значные. И вели насъ отъ липы болотомъ, якобы на чверть мили, и привели до врочища Бабы, до сосны сухое противъ Дѣдня, и повѣдили, ижъ въ той соснѣ были грани наши звѣчисты, але люди Ратенскіе Кортелишскіе тые грани выказили и вырубали.
Подстаростій Ратенскій панъ Свѣтицкій повѣдилъ, ижъ куды подстаростій Берестейскій зъ людьми Дивинскими велъ, теды то все по обѣма сторонамъ есть Ратенское, тыи ровы, которые по болоту они пенили быти рѣкою Оремъ, тые ровы люди Ратенскіе Кортелискіи выкопали для вьюновъ ловенья; а тые дерева, у которыхъ пенили грани быти, тые древа не суть граничные, але бортные людей Кортелискихъ.
Тогожъ дня въ понедѣлокъ, мѣсеца Августа 23 день.
Подстаростій Ратенскій, панъ Войтехъ Свѣтицкій, зъ людьми повѣту Ратенского Кортелискими, вели насъ отъ мосту, который указывають Перевѣсьемъ и Оремъ, до кривыхъ проходовъ, отъ крывыхъ проходовъ до Собичового мху, отъ Собичова мху до перекопа, отъ перекопа до рѣки Рѣсицы до врочища Дѣдня, а отъ Дѣдня до броду Кривого. Ту южъ Самаровская граница села Ратенского починаеть.
Подстаростій Берестейскій, Иванъ Яцыничъ, зъ людьми великого князства Дивинцы, повѣдилъ, ижъ куды подстаростій Ратенскій Свѣтицкій и люди Ратенскіе вели, то есть по обѣма сторонамъ, поправу и полѣву, великое князство, а тотъ бродъ не есть Кривый, але зовуть его Межигорами.
Отъ того мосту Перевѣсья, которого другимъ именемъ называють, зъ Ратна, Оремъ, а зъ великого князства, Перевѣсьемъ, куды вели зъ великого князства по врочищамъ отъ того Годеня до Бабы, якобы на двѣ мили вдолжъ. А куды зъ Ратна вели, отъ того мосту Перевѣсья, по тымъ всимъ урочищамъ, куды оны вели, до врочища, которое называють Кривый бродъ, а зъ великого князства называють тотъ бродъ Межигорами, якобы двѣ мили, а разницы промежку тыхъ врочищъ въ шыршомъ мѣстѣ якобы, на милю.
Мѣсеца Августа 24 день, у волторокъ, индиктъ 4.
Подстаростій Берестейскій Иванъ Яцыничъ зъ людьми великого князства Дивинцы вели насъ отъ тое Бабки сосны сухое посредъ болота Хванева, а отъ болота посредъ крывое нивы, отъ кривое нивы до Бороцкое гати, а отъ гати къ Добрицы, и повѣдили, ижъ ся тутъ вже граница Дивинская и зъ границою Самаровскою села Ратенского доконала, а тутъ вже пришла граница села Ратенского Щедрогоская.
Тогожъ дня подстаростій Берестейскій зъ людьми великого князства Дивинцы вели насъ отъ Добрицы ку врочищу Гончаревѣ, отъ Гончарихи у Кунево болото, отъ болота у Хоморъ къ перевозу, а отъ перевоза къ Гончаровому лѣску, отъ лѣска къ острову Кіеви, отъ Кія къ Угольскимъ горицамъ: тые вси врочища подлѣ рѣки Хомора идуть. И повѣдили, ижъ тутъ вже знела ся граница и зъ селомъ великого князства пана Андрея доктора, съ Углянскимъ, повѣту Кобринского.
Подстаростій Ратенскій, панъ Войтехъ Свѣтицкій, зъ людьми повѣту Ратенского Самаровцы и Щедрогосцы, повѣдилъ: куды велъ подстаростій Берестейскій и зъ людьми Дивинцы повѣту Берестейского, то есть по всимъ тымъ врочищамъ Ратенское, а великому князству тамъ нѣтъ.
Тогожъ дня подстаростій Ратенскій Войтехъ Свѣтицкій, зъ людьми Ратенскими Леликовцы и Повѣтяны и Радостовцы, вели насъ отъ врочища менованого и зъ ихъ стороны Ратенское броду кривого, рѣкою, гдѣ тая рѣка привела на Осмулницы плесо, а другое плесо на тойже рѣцѣ нареченное Колода, а на тойже Колодѣ рѣцѣ плесо Городецъ, а отъ Городца Личково плесо, отъ Личкова плеса до полъ озера Любаня, а отъ озера пошла рѣка Нетеча до Чалищовское пяты села повѣту Кобрынского.
Подстаростій Берестейскій зъ людьми Дивинцы повѣдилъ: што менилъ подстаростій Ратенскій зъ людьми Ратенскими Кривый бродъ, то есть бродъ, такъ его прозывають, Межигорѣ, а тую рѣку зовуть Дивинка, и по той рѣчцѣ озеро зовуть Дивино; и съ того озера великого князства Дивина рѣчка Нетеча вышла, и тая рѣчка течеть якобы на двѣ стрѣленья по острову великого князьства злѣ Кривотина и неходячы границы Челищевское села великого князства и понерла мало не у двухъ миляхъ отъ границы Челищовское; и куды оны вели тыми границами, то есть все великого князства отчизна наша Дивинская, и тое озеро и рѣчку зовуть Дивиномъ, по которомъ озерѣ и по рѣчцѣ и село наше зовуть Дивиномъ. Вдолжъ, куды зъ Ратна вели, отъ того броду, который зъ Ратна зовуть Кривымъ, а зъ великого князства называють Межигоремъ, всего того до Чалищовское границы якобы на три мили; а куды вели зъ великого князства подстаростій Берестейскій и зъ людьми Дивницы отъ врочища Бабы Довглянскихъ людей великого князства вдолжъ якобы на чотыри мили, а розницы въ шырки у шыршомъ мѣстѣ якобы на двѣ мили, а индѣ на полмили, а индѣ на милю.
Мѣсеца Августа 25 день, въ середу.
Люди великого князства повѣту Кобринского Угляне вели насъ отъ границы Дивинское повѣту Берестейского болотомъ и привели до острова Горицы, гдѣ менили быти пяту свою зъ Дивинцы, на которомъ островѣ оказали знакъ у соснѣ зъ едныи стороны скаженый и выжженый, и повѣдили, ижъ тотъ островъ есть нашъ властный звѣчистый, съ которого мы службу служимъ и поплаты даемъ. Оттоль до Сухого лѣса вели презъ болото, и на другомъ островѣ въ березѣ старой оказали намъ знаки зъ обудву сторонъ древа и, ѣдучи болотомъ отъ тыхъ Горицъ до Сухого лѣса, менили быти поправу Ратенское а полѣву великое князьство, и на третемъ островку указали дерево березу старую, зъ обудву сторонъ пробиту, и повѣдили, ижъ то суть сторожи знаковъ нашыхъ, а граница наша посредъ болота идеть, и привели до Сухого лѣса, а отъ Сухого лѣса до Дубина до Ровича, отъ Дубина до Слепятища, оттоль до липы ажъ до пяты Осиповское села повѣту Кобринского людей пана Андрея доктора.
Подстаростій Ратенскій Войтехъ Свѣтицкій зъ людьми Ратенскими Повѣтцы повѣдилъ: не то есть грань Ратну зъ великимъ князьствомъ, а то оны вели по Ратенскому.
А того всего вдолжъ отъ Горицъ границы великого князьства людей Угольницкихъ до границы людей Осиповскихъ пана Андрея доктора на полторы мили, а села Ратенского Повѣтцовъ отъ границы, гдѣ оны мянують пяту свою отъ Чалищевичовъ, до Андрея Докторовыхъ людей села его Осиповского вдолжъ на полторы мили.
А розницы отъ Горицъ, куды изъ князьства люди Углянскіе вели и куды зъ Ратна Повѣтцы вели, межы тыми мѣстцы въ ширьки на полъ мили, а индѣ на версту.
И тогожъ дня подстаростій Ратенскій Войтехъ Свѣтицкій зъ людьми Ратенскими повѣту Ратенского Повѣтцы велъ насъ отъ Чалищевское пяты села великого князьства повѣту Кобринского до врочыща Ранника, отъ Ранника до Всуховъ, отъ Всуховъ до Пруглибка, отъ Пруглибка до волока, гдѣ южъ приходи граница людей пана Андрея Докторовыхъ села его Осиповского, а Головчынского а Татариновичъ.
Врадникъ Городецкій Иванъ зъ людьми великого князьства Угляны на то повѣдилъ: Ратенская граница зъ великимъ князьствомъ не есть то, куды оны вели, але то естъ кгрунтъ великого князьства повѣту Кобринского, бо привели есте до Кобринского села Челищевичовъ, свою грань отъ Чалищевичовъ есте взяли, то все водите кгрунтомъ великого князьства.
Индиктъ 4, мѣсеца Августа 26 день, въ четвергъ.
Вземшы отъ петы людей пана Докторовыхъ Осиповичовъ Волоки рѣки, повелъ староста Ратенскій панъ Янъ Свѣтицкій зъ людьми Ратенскими Радошскими до врочища Кривца, которое естъ врочыще на рѣцѣ Волоцѣ, Волокою рѣкою ажъ до Витерки пяты до границы села корунного Ветелъ.
Пана Андреевы докторовы люди селъ его, Осиповцы, Головчычы, Татариновичы ани ихъ врадникъ Бобровницкій на томъ мѣстцу не сталъ, ани границъ своихъ не выводилъ, за объѣждчаніемъ дворенина господарского Сасина, которого еще избити хотѣлъ, и того дня, коли мы къ Угломъ пріѣхали, онъ передъ нами съ тыхъ селъ зъѣхалъ. Якожъ есьмо и служебника своего Боновского до него посылали, упоминаючы его, абы границы вывелъ и кривды оповѣдилъ, и врадничокъ его отповѣдялъ: король его милость до пана моего меновите въ листѣ не писалъ, а панъ тежъ мой тые села маеть до живота, а границъ не повиненъ водити. Отъ Волоки рѣки до Витерка, куды панъ Свѣтицкій зъ людьми корунными Радошскими велъ, до границы Ветелское вдолжъ якобы на полторы мили.
Тогожъ дня мѣсеца Августа 26 дня, въ четвергъ.
Земянинъ великого князства Гаврило Морхотка велъ насъ границою села своего Велавля, почетны отъ пяты села пана Андрея доктора повѣту Кобринского людей Головчичовъ, отъ Кривого острова по болоту, по рѣтцѣ Волоку ажъ до Красное дубровки, до пяты села Суличовского Павла Біютивского. И повѣдилъ Мархотка, и жъ тая граница посередъ болота того есть мнѣ супокойливая съ повѣтомъ Ратенскимъ, и повѣдилъ, ижъ по праву то естъ Ратенское, а полѣву великое князство, а вдолжъ тое границы, отъ пяты села пана докторова Головчичовъ до пяты села Суличовского, куды Морхотка велъ, вдолжъ на милю.
Тогожъ дня въ четвергъ люди великого князства повѣту Пинского Павла Біютивского Суличовцы повѣдили, ижъ наша граница есть и зъ селы повѣту Ратенского Радошовомъ а Ветляны, и вели насъ Суличовцы, поченшы отъ границы земянина великого князства Гаврила Морхотки отъ дубровки земское рѣкою Пиною до острова Тростянки, отъ острова Тростянки до Дошника острова, до границы села Пинского Ляховецъ, и повѣдили, ижъ то есть поправу Ратенское, а полѣву великое князство. Суличовское границы отъ зеленое дубровки до острова Дошника вдолжъ на полъ мили.
Тутъ уже въ того Дошника починаеться граница села повѣту Пинского Ляховецкая бояръ королевое ее милости Мартина Ширмина а Ивана Почеповского, и повѣдили Суличовцы, ижъ мы по тымъ мѣстцамъ границу супокойливую съ тыми людьми Ратенскими Радошшовцы и Ветляны маемъ.
То есть Гаврила Морхотчыны и людей Павла Біютивского Суличовцовъ границы супокойливое зъ Ратномъ удолжъ на полторы мили.
Августа 27 день, въ пятницу.
Повели насъ люди земянъ повѣту Пинского, Мартина Ширмина а Ивана Почеповского, села ихъ Ляховецкого, поченшы отъ Тростянки острова, отъ пяты людей Павла Біютивского села его Суличовского, и вели межи Батыева а межи селища болотомъ ажъ до Калиновки острова, отъ Калиновки край Хмѣлева лѣса, отъ Хмѣлева лѣса до Бѣсова лѣса, отъ Бѣсова лѣса край Зеленое дубровки, отъ Зеленое дубровки межи Почаева и сельца, Почаевское Ветелское — Ратенско, а сельце Ляховицкое — великого князьства, оттуль межи Красное и общее до Липилъ до пяты Бѣлинское села великого князьства, и по тымъ всимъ врочищамъ поправу Ратенско, а по лѣву великое князство.
Тое границы села Ляховицкого, поченъ отъ Тростянки острова до пяты Бѣлинское, вдолжъ якобы на полторы мили доброе.
Къ той ся границы староста Ратенскій панъ Янъ Свѣтицкій зъ людьми Ратенскими Ветляны оповѣдали, ижъ по тымъ, врочищамъ верхумененымъ яко панъ Гаврило Морхотка зъ людьми своими и зъ людьми Ляховецкими велъ, граница спокойная есть людемъ Ратенскимъ Ветляномъ, едножъ наконецъ тыхъ границъ объ одинъ островокъ невеликій, наймя Дѣденъ, зъ обудву сторонъ споръ мають.
Мѣсеца Августа 28 день, въ суботу.
Отъ того врочища Залипья люди повѣту Пинского королевое ее милости Бѣлинцы вели насъ границою своею, которую границу менили собѣ быти и зъ селомъ Ратенскимъ Ветлемъ, поченши отъ того Залипья до Великого лѣса, отъ Великого лѣса до Затученья острова, отъ Затученья до Заболотья до границы Горецкое людей князя Александра Чорторыйского, и повѣдили, ижъ по тымъ урочищамъ грани были въ деревѣ урубываные, и тые грани почали казити за небощика старосту Пинского пана Ивана Михайловича, и ту тежъ за росказаньемъ королевое ее милости выѣздилъ теперешній староста Пинскій панъ Петръ Кирдей на рокъ положоный отъ ее милости, ижъ мѣло о тую землю право быти тымъ Бѣляномъ зъ людьми Ратенскими Ветляны, а за тыми Ветляны мѣлъ выѣхати староста Ратенскій панъ Райскій; ино панъ Райскій на тотъ рокъ зложоный отъ королевое ее милости не выѣхалъ, и мы тые грани оповѣдили пану старостѣ Пинскому и многимъ люденъ добрымъ, которые были на томъ року при пану старостѣ.
На то староста Ратенскій панъ Янъ Свѣтицкій повѣдилъ, ижъ то естъ грунтъ, куды тые Бѣляне вели, корунный по обѣма сторонамъ, а не то есть грани ца Ратну зъ великимъ князствомъ.
Тогожъ дня въ суботу староста Ратенскій панъ Янъ Свѣтицкій зъ людьми корунными Ветляны повелъ насъ отъ острова Красного до Прекопу, отъ Прекопу до Дѣдня, отъ Дѣдня до Озерищъ, отъ Озерища до Малеевое веретеи, отъ Малеевое до Заньковы рѣчки, отъ рѣчки до Шибеника, отъ Шибеника съ паномъ Полозомъ повѣту Пинского князства великого граница есть, которая идеть до Сырова лѣса, отъ Сырова лѣса до Коростова, отъ Коростова до Заечьего, и тутъ пята съ паномъ Полозомъ и съ княземъ Чорторыскимъ села Горецкого великого князьства, а то вже стрѣтила граница земянъ Чырскихъ корунныхъ.
Того, куды панъ Янъ Свѣтицкій зъ людьми Ратенскими Ветляны отъ острова Красного до Заечьего велъ, вдолжъ якобы на три мили.
На то повѣдилъ земянинъ господарскій Пинского повѣту отъ старосты Пинского пана Петра Кирдея Матей Войтковичъ и зъ людьми Пинского повѣту Ляховцы и Бѣляны и Глиняны: по которымъ мѣстцамъ и врочищамъ велъ староста Ратенскій панъ Войтехъ Свѣтицкій и зъ людьми Ратенскихъ селъ, то есть по всимъ врочищамъ кгрунтъ великого князьства повѣту Пинского королевое ее милости по обѣма сторонамъ, завсегды было у въ упокойномъ держанью тыхъ селъ вышей мененыхъ великого князства, и не токмо тыхъ селъ Бѣлина земли, островы завели тепере, але которые не суть прилеглые ку границы того села Ратенского Ветелского, то естъ Бѣлинское село одно маеть зъ Ратномъ границу зъ людьми Ветляны, а Глиняне и другое село Бѣлино жъ тые села королевое ее милости , и земянскіе сѣдять за границою Бѣлинскою того первшого села Бѣлина; то пакъ вжо перешедшы первшого села Бѣлина земли и зашли тепере Глинянскую и Бѣлинскую другого села землю.
А вдолжъ, куды вели Бѣлянцы, повѣту Пинского люди, отъ Залипъя до Заболотья, границы князя Чорторыйского Горецкое, якобы на полторы мили; а куды велъ староста Ратенскій, поченшы отъ Прекопа, который естъ злѣ Красного острова, ажъ до границы Горецкое князя Чорторыйского и Полозовы до врочища Заячьего вдолжъ якобы на три мили; а розницы въ ширки межы тыхъ границъ индѣ якобы на милю, а индѣ на полторы мили.
Мѣсеца Августа 29 день, въ недѣлю.
Отъ Зоболотья, отъ пяты Бѣлинское села великого князства повели люди князя Александра Чорторыйского Горчане по своимъ врочыщамъ, по границы великого князства зъ Ратномъ, болотомъ, што Горчане мають зъ Ратномъ, напервѣй къ Перекопу, то естъ врочище Окрыково, отъ Перекопа до Липниковъ острова, отъ Липниковъ межы Лядца и Стареча, менячи Лядецъ островъ великое князство, а Старечь островъ Ратенское Цырскихъ, а оттоле къ Припяти рѣцѣ ку врочыщу Проритицы и Припятью рѣкою унизъ держачы, полѣву великое князство, а поправу Ратенское ажъ до Воймина дуба. Едножъ повѣдили, ижъ тая рѣка Припять по обѣимъ сторонамъ великое князство села князей Чорторыйскихъ Горецкого, а справа пришла земля къ Припяти рѣцѣ земянъ Ратенскихъ Цырскихъ, еножъ тые земяне Цырскіе уступу у тую рѣку не мають. А на той сторонѣ направѣ Ратенско: покуль вешшня вода бываеть, потуль Горчане гаты и езы свои мають. А по тымъ всимъ врочыщамъ повѣдили, ижъ супокойливое захованье зъ Ратномъ мають и по всимъ тымъ границамъ князей Чорторыйскихъ, куды насъ вели, якобы на три мили вдолжъ.
Индиктъ 5, мѣсеца Сентебря 1 день.
Мартинъ а Суринъ, Чырскіе земяне Ратенскіе, указують свои границы села Чырского стѣну свою отъ границъ села Ратенского Ветелъ; на которой стѣнѣ ставшы оказали пень и менили его врочищомъ: Селивоновъ пень подлѣ рѣки Припяти повѣдаючы, ижъ, по правой сторонѣ до полъ рѣки Припяти естъ наше звѣчыстое, а по лѣвой сторонѣ Ратенского села Ветелъ, а потомъ рѣкою Припятью до врочыща Торопля, повѣдаючы, ижъ до полъ рѣки по правой сторонѣ наше, а полѣву отъ полъ рѣки вже князство Литовское села Горокъ князя Чорторыйского. При томъ ся освѣтчали, ижъ дей князь Чорторыйскій тутъ на нашомъ кгрунтѣ по половицы рѣки тотъ то млынъ збудовалъ, гдѣ панъ Янъ Точынскій, воевода Судомирскій и староста Ратенскій тотъ млынъ по двакротъ, боронячи нашого кгрунту, казалѣ разметати. Потомъ вели тоею рѣкою Припятью внизъ до врочыща Стульня, повѣдаючи: по правой сторонѣ естъ наше по полъ рѣки звѣчыстое, а полѣву великое князство села князя Чорторыйского Горокъ, тоеюжъ рѣкою до врочыща Сулишова, отъ Сулишова до врочыща Менть, отъ Менть до врочыща Копуръ; и ставшы въ того врочыща Копуръ повѣдили, ижъ дей люди Горецкіе князя Чорторыйского кгвалтомъ на ихъ кгрунтѣ звѣчыстомъ, на полъ рѣки Припяти, мѣстцо заступили, гдѣ ледва могли есмо шесть езовъ поставити, и повѣдаючы, ижъ до полъ рѣки Припяти по правой сторонѣ естъ звѣчыстое Ратенское, а полѣву великое князство повѣту Пинского села Илбезя. Отъ того врочища Копуръ привели до врочища Могилки, гдѣ рѣка Чырь упадаеть у Припять. Того всего Припятью вели якобы на милю, повѣдаючы, ижъ до полъ рѣки Припяти по правой сторонѣ естъ наше звѣчыстое, а по лѣвой сторонѣ великое князство повѣтъ Пинскій, и повѣдаючы, ижъ люди великого князьства Илбежане езовъ осмъ ку нашой кривдѣ на нашомъ властномъ грунтѣ поставили, а два ихъ зрубали, гдѣ толко чотыри цѣлыхъ зостали — отъ того врочыща Могилки черезъ болото до врочыща Передѣла, отъ Передѣла лѣсомъ до Дрежокъ, отъ Дрежокъ лѣсомъ до Шоша острова, отъ Шоша до Болошова боромъ, отъ Болошова до горы Ловчое, отъ горы Ловчое подлѣ болота до Сморчъ, отъ Сморчы подлѣ болота тогожъ Хотимиричь, отъ Хотимиричь мимо средне врочыщо до Добрянинъ, отъ Добрининъ подлѣ болота до мостка, отъ мостка до Смычна лѣса, тымъ лѣсомъ черезъ болото до врочища Медвѣдевы Головы, и тутъ границу оповѣдали Глушскую земянина Ратенского Скорутину. Тыхъ Цырскихъ обвоженѣя вдолжъ якобы на три мили.
На то отповѣдали врадники князя Андрея Кошырского, старосты Луцкого: Ирикъ Сметанка а Тимоѳей Волынецъ а дворанинъ господарскій панъ Левъ Образцовъ, и ту тежъ врадникъ князя Андрея Козечинъ Аввакумъ зъ людми селъ своихъ Ильбязцы, Деревчаны, Быховцы, Орокомцы, Церяны, Любешевцы, Ведерцы, Льбляны, Глушаны, ижъ што староста Ратенскій панъ Янъ Свѣтицкій и зъ земяны и зъ людьми Ратенскими тые границы менують, якобы мѣли тые границы дѣлити князство зъ Ратномъ, по которымъ границамъ вели и врочыща описали, то не естъ граница великому князству зъ Ратномъ, але то естъ грунтъ по обѣимъ сторонамъ великого князства и въ томъ грунтѣ тые врочища, все естъ великого князства.
Панъ Янъ Свѣтицкій, староста Ратенскій, повѣдилъ: правда, ижъ Ратенъ и Любомль былъ великое князство, то пакъ не вѣмъ, яко отшолъ; мовте собѣ съ королемъ его милостью.
Врадники князя Кошырского повѣдили: то будеть вѣдати Богъ а князи нашы, и надѣваемся на Бога, ижъ его милость господаръ отчызнъ князей нашыхъ не отдалить. И въ того мененого врочыща Медвѣдевы Головы мовилъ панъ Янъ Свѣтицкій именемъ пана Олехна Скоруты, менячы быти границу пана Скорутину села его Глушы межы островы ажъ до Каменя, замку князя Андрея Кошырского старосты Луцкого, менуючи по правой сторонѣ Ратенскій островъ на имя Девинъ, а другій островъ Осова и мимо Тихоръ, повѣдаючы поправу Ратенско, а полѣву великое князство. И привелъ насъ панъ Янъ Свѣтицкій зъ людми Глушаны до ставу князя старосты Луцкого замку его Каменицкого, который ставъ естъ подъ самымъ замкомъ Каменемъ: того заводу отъ Медвѣдевы Головы до ставу Каменского якобы на полторы мили. И повѣдилъ панъ Свѣтицкій именемъ Скорутинымъ: то естъ села Скорутина Глушы посредъ тое рѣки по поллотока того до испуста и тутъ ся Скорутина граница кончы.
И тутъ оповѣдилъ предъ нами панъ Войтехъ. Свѣтицкій, подстаростій Ратенскій: то есть моя граница съ паномъ Олехномъ Скорутою Скорутина села Глушы кончить, а моего села Ракова лѣса Илбля починаеть ся по полъ рѣки Цря, подъ замокъ Каменицкій, гдѣ тое мѣсто Каменское осажено: то естъ на правѣ Ратенское, а на лѣвѣ великое князство. И заѣхали мѣста Каменя якобы на осьмдесятъ, або на сто дымовъ, и тою рѣкою подъ замокъ уверхъ до острова до врочыща Дубровицы, якобы на милю. И повѣдилъ, ижъ поправу естъ Ратенское, а полѣву великое князство. И тутъ повѣдилъ служебникъ пана Семашковъ старосты Ковельского Андрей Ивановичъ, ижъ то естъ вже земля королевое ее милости села ее милости Нюйна, и направѣ и налѣвѣ великое князство. Тутъ пану Свѣтицкому съ повѣту Ратенского и людемъ его Ракова Лѣса Илбляномъ жадного уступу нѣтъ.
Князя Кошырского тежъ врадники: Волынецъ а Сметанка повѣдили, ижъ куды велъ панъ Свѣтицкій, то все естъ по обѣма сторонамъ кгрунтъ князя нашого замку его Каменицкого, а то вже пришла граница королевое ее милости села ее милости Нюйна.
Панъ Войтехъ Свѣтицкій и зъ людьми своими Ракова Лѣса а Илбляны велъ насъ, менячы быти границу свою и зъ селомъ королевое ее милости Нюйномъ: въ того врочыща Дубровицы острова увошолъ лугъ у рѣку Цырь, который лугъ менуеть быти панъ Войтехъ Свѣтицкій рѣчкою Дмитровкою, и тою Дмитровкою рѣчкою до лѣса врочыща Передѣла, отъ лѣса Передѣла до озера Мочулна, отъ Мочулна озера до рѣчки Голышовки, отъ Голышовки до рѣки Турьи, менячи быти по праву корунно, а по лѣву князство. И повѣдилъ Свѣтицкій, ижъ тутъ ся граница моя кончы, а тутъ пришла граница села королевского Ратенского Велимецкого а королевое ее милости села зъ великого князства Нюйна.
На то повѣдилъ врадникъ пана Богдана Семашка, старосты Ковельского, Андрей Ивановичъ зъ людьми королевое ее милости Нюенскими, ижъ по тымъ усимъ врочыщамъ, по которымъ панъ Войтехъ Свѣтицкій и зъ людьми своими велъ и описалъ, то все естъ земли властные а кгрунтъ имѣнья королевое ее милости Нюенского, а тая рѣчка, которую онъ менуеть Дмитровкою, не естъ Дмитровка, але то есть рѣчка Сагожа.
Тогожъ дня люди села Ратенского Велимчане вели насъ, менячы быти границу свою и зъ селомъ королевое ее милости Нюйномъ, рѣчкою Голышовкою у верхъ до млынца попа Нюенского, который млынокъ естъ на рѣтцѣ Голышовцѣ, а отъ млынца до Быстрижа рѣчки, и повѣдили Велимчане, ижъ въ тое рѣчки Быстрыжы кончи наша граница зъ Нюйномъ, а починаеть ся граница отъ тое рѣчки села Ратенского Датынского и зъ селомъ великого князства владыки Луцкого — Качиномъ.
На то врадникъ королевое ее милости Нюенскій Андрей Ивановичъ и зъ людьми королевое ее милости Нюенскими повѣдилъ: куды панъ Войтехъ Свѣтицкій и зъ людьми своими повѣту Ратенского Ракова Лѣса и Илбляны и Велимецкими велъ по тымъ усимъ врочыщамъ вышей писанымъ, то все естъ властная а звѣчистая земля кгрунтъ имѣнья королевое ее милости села Нюенского, и того въ держаньи королевое ее милости люди отъ великого князя Витолта ажъ и до сихъ часовъ; а тая рѣчка Быстрижъ естъ граница селу королевое ее милости Нюенскому зъ селомъ владыки Луцкого Качиномъ. И тутъ же стоячы въ тое рѣчки Быстрыжы люди великого князства села владыки Луцкого Качинцы повѣдили, ижъ тая рѣчка Быстрыжъ насъ дѣлить зъ людьми королевое ее милости Нюенскими и по обѣма сторонамъ тое рѣчки естъ великого князства, а Ратенского тутъ ничого нѣтъ.
Датынцы, люди села Ратенского, вели отъ Быстрижы рѣчки до Матеева острова, отъ Матеева острова до Сыновки рѣки. Качинцы люди великого князства повѣдили, ижъ то естъ отъ рѣки Быстрыжы до рѣки Сыновки наша властная отчызная и дѣдизная земля, и отъ давныхъ часовъ мы ее во вжыванью и въ спокойномъ держанью отъ великого князя Витолта ажъ и до тыхъ часовъ маемъ.
Отъ Дубровицы острова до рѣчки Сыновки, куды панъ Войтехъ Свѣтицкій и зъ людьми Ратенскими велъ, вдолжъ на пять миль.
Сыновцы люди Ратенскіе вели насъ, менячы быти границу свою и зъ селы великого князства князя старосты Володимірского князя Ѳедора Андреевича Сангушковича, маршалка земли Волынское зъ Мелцы а зъ Сыновцы, отъ рѣки Турьи Сыновкою рѣчкою до озера Сынова, отъ озера Сынова до Мокры рѣчки, внизъ отъ Мокры рѣчки до Осечна болота, отъ Осечна болота до Песечна озера; а тамъ отъ озера Песечна люди села Ратенского Замшане веди, менячы быти свою границу и зъ селы великого князства князя старосты Володимерского Сереховичы, Грабовцы, рѣчкою Студенкою унизъ, которая рѣчка упада у Вижву рѣку.
Отъ Турьи рѣки, гдѣ Сыновка рѣчка у Турью впада, до Вижвы рѣки, куды люди Ратенскіе Сыновцы, которыхъ изъ князства другимъ именемъ называють Василками, а Замошане вели насъ, вдолжъ на три мили.
На то повѣдилъ врадникъ князя Ѳедора Андреевича Сангушковича, маршалка земли Волынское, старосты Володимерского, Лука Фурсовичъ и зъ людьми князя своего: што повѣдили люди Ратенскіе Замъшане и Василки, менячы быти границу свою отъ Турьи рѣки, гдѣ Сыновка рѣчка у Турью впадаеть до озера Сынова князя моего, то есть по обѣма сторонамъ тое рѣчки кгрунтъ а земля властна великого князства князя моего; а отъ Мокры рѣчки до рѣки Вижвы, то естъ земля а кгрунтъ великого князства по обѣма сторонамъ, князя моего, и зъ людьми королевое ее милости селъ великого князства: Облапскими, а Секунцы, а Гридчаны а Бояры Городищаны посполитая судеревъ. А тые села Василки и Замшане сѣдять на земли а кгрунтѣ великого князства на отчызнѣ князей Санкгушкевичовъ и осажены тые села за Казимера короля и за Олександра, и не одны тые села, але и иншые многіе, бо Ратенъ замокъ былъ великого князства, якожъ часу потребы панове наши будуть о то мовити, яко давно зашло. И тужъ повѣдилъ врядникъ королевое ее милости зъ великого князства Нюенскій Андрей Ивановичъ, ижъ тамъ особливый островъ королевое ее милости на имя Коровичы, церковный и боярскій и людей королевое ее милости великого князства даныхъ пришолъ ку рѣцѣ Вижвѣ.
Мѣсеца Сентября 3 день.
Панъ Янъ Свѣтицкій, староста Ратенскій, зъ людьми Ратенскими села Глуховъ вели насъ, менячы быти границу свою, и зъ людьми великого князства королевое ее милости Вижовцы, черезъ рѣку Вижву смугою, которую смугу менили быти рѣчкою Березовкою, але воды въ ней не было, и вели насъ якобы на полъ мили до дороги, которая идеть отъ мѣста великого князства Вижвы до Ратна. И тутъ въ тое дороги поткалъ насъ врадникъ Любомскій пана Миколая Кграбинъ Андрей, и зъ людьми Любомскими Кремняны. И повѣдилъ панъ Янъ Свѣтицкій весполокъ зъ урадникомъ Любомскимъ пана Кграбинымъ и съ тыми людъими Ратенскими и Любомскими Кремняны, ижъ то вже за тую дорогу посполитая есть земля Ратенская зъ Любомскою села Кремна. И тою Березовою смугою вели насъ Кремняне до болота Чавля якобы на чверть мили, менячы по праву Любомское а Ратенское, а по лѣву великое князство кгрунтъ королевое ее милости, отъ Чавля вели до врочыща Светого озера, отъ озера до врочыща Оста лѣса, отъ Оста гредою до Теремца. И повѣдилъ врадникъ пана Кграбинъ зъ людьми Кремнянскими, ижъ у тое горы врочыща Теремца кончить ся граница того села Ратенского и Любомского Кремнянского, а починаеть ся граница у того Теремца земянъ Любомскихъ Городенскихъ Яна а Василья Обрамовичовъ.
По тымъ усимъ врочыщамъ вдолжъ якобы на двѣ мили. И оповѣдили по тымъ врочыщамъ на многихъ мѣстцахъ знаки урубываны у соснахъ и въ дубѣхъ, а иншіе менили быти повыколываны и пожжены отъ людей королевое ее милости Вижовцовъ, и повѣдил и, ижъ отъ своее памяти и предковъ своихъ тыхъ земль были въ держанью въ покойномъ ажъ до тыхъ мѣстъ, поки князь Ковельскій тые имѣнья свои королевой ей милости продалъ.
На то повѣдилъ панъ Петръ Семашко именемъ брата своего пана Богдана Семашка, старосты Ковелского: яко почали вести панъ Янъ Свѣтицкій зъ людьми Ратенскими и Любомскими села Кремна отъ рѣки Вижвы смугою, менили рѣчкою Березовою, и по всимъ тымъ врочыщамъ вышей описанымъ до горы, которую менують быти врочыщомъ Теремцомъ, то естъ кгрунтъ великого князства королевое ее милости , села ее милости Вижовского, которое село ее милость королевая маеть отъ князя Василья Ковелского, якожъ тые люди королевое ее милости Вижовцы сами, яко памяти ихъ зайдуть и предковъ ихъ, тыхъ земль у покойномъ держанью и вжыванью были ажъ и до сихъ часовъ. А тые границы, которые оны указывають у деревъи врубываны, тыи грани покладалъ князь Сендюшко, который держалъ Ковель и Ратенъ и Любомль и Вижву и вси тые села; ино тые грани чынилъ отъ села своего Вижовского для лововъ, и по тые грани далъ уходъ и на пашню Вижовцомъ; а другіе грани тотъ же князь Сендюшко вчынилъ промежку своихъ имѣней: Ратномъ и Вижвою, бо тое Ратно и Любомль отняли ку Корунѣ за Казимира короля. И хочу вашу милость по тымъ гранямъ повести, которые дѣлять Ратенъ съ Ковлемъ и зъ Вижвою.
Врядники князя Андрея его милости Михайловича Санкгушковича Кошырского, старосты Луцкого, Ирикъ Сметанка, а Тымоѳей Волынецъ, а дворанинъ господарскій Левъ Борисовичъ Образцовъ и панове Завишы, и тутежъ князя Андрея Козечынъ врядникъ Аввакумъ и зъ селы своими: Илбязцы, Деревчаны, Быховцы, Орокомцы, Любешевцы, Ведерцы, Льбляны, Глушаны, ставшы у того врочыща, у Воймина дуба, повѣдили, ижъ то естъ у верхъ Припятью рѣкою по праву великое князство людей князя Чорторыйского Гороцкое, а по лѣву великое жъ князство, едножъ Цырскіе, которые живутъ у селѣ Цырскомъ посполите и теперь зъ нашыми людьми у томъ же селѣ Цырскомъ, маючы отъ нашыхъ людей того села Цырского десятую часть земли межу объ межу, ниву зъ нивою, сѣножать зъ сѣножатью, борть зъ бортью, посполите. мають; бо тые Цырскіе зъ вѣку вѣчыстого великого князства Пинского повѣту, и заложилися ку повѣту Ратенскому за короля его милости Казиміра, и одно тые Цырскіе сами служать до Ратна, а люди нашы, которые въ Цырскомъ селѣ живутъ, яко зъ вѣку служывали намъ ку великому князству, такъ и теперь намъ ку князству служать. А што Горчане, люди великого князства повѣдили границу рѣкою Припятью внизъ, то для того, ижъ тые Цырскіе выломився зъ великого Князства съ Пинского повѣту, и служать ку Ратну, а граница Великого князства съ Коруною то естъ Пинско зъ Ратномъ.
Въ томъ мѣстѣ яко вели Горчане, люди князя Чорторыйского, болотомъ оказуючы свои грани и привели ку Припятѣ рѣцѣ, ку врочыщу Проритицы, и тоею Припятью рѣкою у верхъ граница пришла великого князства Пинская зъ Ратенскою по праву Ратенскихъ селъ Ветлянъ а Щедрогоща, а полѣву великое князство. И вели отъ Проритицы врядники князя Кошырского рѣкою Припятью у верхъ до врочыща Липова острова, отъ Липова острова рѣкою жъ Припятью у верхъ до Брыщова острова, отъ Брыщова острова къ Лысой горѣ, отъ Лысое горы до Косова берега, и повѣдили, ижъ тутъ ся кончыть граница тыхъ селъ нашыхъ.
И ту стоячы повѣдили врядники князя Андрея Кошырского, старосты Луцкого: и дворанинъ господарскій Левъ Образцовъ, и панове Завиты, и врадникъ князя Андрея Козечынъ и съ тыми селы своими верху писаными, ижъ за короля его милости Казимера и за короля Александра и за счастливого панованья короля его милости старѣйшого Жикгимонта, на томъ кгрунтѣ великого князства въ томъ обводѣ осадили зъ Ратна села на имя: Щитинъ, Чернче, Илбле, Раковъ Лѣсъ, Бузаки, Михновичы, Глушу, Борки. И повѣдилъ тежъ врадникъ князя Кошырского, ижъ дей другій годъ, яко панъ Янъ Свѣтицкій, староста Ратенскій, моцне кгвалтомъ на кгрунтѣ великого князства властное озеро князя моего, князя Кошырского, уступуеть на имя въ Доброе. Къ тому тежъ у томъ же кгрунтѣ великого князства многое дерево бортное со бчолами вырубываючы, люди Ратенскіе и свое знамена кладуть, и на все на то доводомъ с душнымъ хочеть доводити. Отъ Проритицы до Косова берега, куды съ князства врадники князя Кошырского вели рѣкою Припятью того всего вдолжъ якобы на шесть миль.
Привели врядники князя Андрея Ко-
шырского Ирикъ Сметанка а Волынецъ и съ товарышы своими, къ мосту, который есть на Припяти рѣцѣ и, переѣхавшы Припять рѣку, повѣдили, ижъ тоею Припятью рѣкою у верхъ граница стародавная естъ Пинску зъ Ратномъ, и то естъ Косовъ берегъ. И тутъ стоячы повѣдили врадники королевое ее милости, Насонъ а Андрей Ивановичъ и зъ мужъми королевое ее милости имѣнья ее милости Хотѣшовского, ижъ зъ другое стороны зъ лѣвое Припети рѣки, ку которой приходи Турья рѣка съ князства отъ Ковля, на которой естъ млынъ пана Яна Свѣтицкого, подъ дворомъ его Щитиномъ, который меновали быти врадники королевое ее милости и врадники князя Кошырского, ижъ тотъ млынъ стоить ку кривдѣ нашой на властномъ кгрунтѣ великого князства, и повѣдили, ижъ тоею рѣкою Турьею поправу внизъ князя Кошырского, а по лѣвой сторонѣ королевое ее милости ажъ до Припяти рѣки и Припятью внизъ ажъ до врочыща берега Косова менячы по обѣма сторонамъ Припяти кгрунтъ великого князьства.
Панъ Янъ Свѣтицкій на то повѣдилъ, ижъ то есть по обѣма сторонамъ, яко Припяти рѣки, такъ тежъ и Турьи наше отчызное отъ давныхъ часовъ у въ упокои. А Хотешовъ и Мостища, села королевое ее милости, то менили быти повѣту Ратенского.
И отъ того Косова берега вели насъ королевое ее милости врядники и зъ мужми королевое ее милости Хотешевскими внизъ Припяти рѣки, и повѣдили, ижъ по правой сторонѣ тое рѣки Припяти князя Кошырского земля, а по лѣвой сторонѣ королевое ее милости; и привели насъ рѣкою Припятью ку врочыщу селищу Солнечкову, и повѣдили, ижъ то естъ островъ королевое ее милости людей Хотешовскихъ, и то естъ селище подданого королевое ее милости Хотешовского Солнечково, издавна тотъ островъ былъ въ держанью къ селу Хотешову за великого князя Витолта и за Швитригайла. А граница Пинску зъ Ратномъ рѣка Припять, а тотъ островъ есть у Ратенскомъ повѣтѣ, которого острова отъ давныхъ часовъ люди королевое ее милости Хотешовскіе у спокойномъ держанью и во вжыванію были за великого князя Витолта и за Швитригайла.
Панъ Янъ Свѣтицкій повѣдилъ, ижъ то естъ дѣдизна моя, и то естъ правда, ижъ Солнечко, который вышолъ былъ съ Хотешева, былъ на томъ троху дальшомъ мѣстцу, альбо на иншомъ кутѣ, дальшомъ того острова, который ку Ратну служылъ, съ чого былъ повиненъ служыти и служылъ, але кгды потомъ престалъ служыти, зася ему то отнято и при Ратну предъ ся зостало.
И вели насъ врядники королевое ее милости отъ рѣки Припяти, опустивши Припять УПРАВО, отъ селища Солнечкова болотомъ Яровымъ мимо озера, которое называють Светое, держачы тое озеро Светое влѣвѣ, и просто болотомъ до другого озера Островъя, а тое озеро Островъе менячы быти по половицы королевое ее милости съ паномъ Яномъ Свѣтицкимъ.
Панъ Свѣтицкій повѣдилъ, ижъ врядники королевое ее милости вели полторы мили назадъ, и вели все имѣньемъ моимъ властнымъ Щитинскимъ ажъ до другого имѣнья Невѣрского и до двора моего, который есть на озерѣ Островьи.
Врядники королевое ее милости, ставшы на концу того озера Островья, повѣдил и, ижъ съ того озера граница вышла болотомъ Островьемъ ажъ до озера Орѣховского.
Панъ Свѣтицкій повѣдилъ, ижъ то все, яко болото, такъ и озеро Островье до границы села короля его милости Щедрогоща повѣту Ратенского, и ѣхавшы тымъ болотомъ якобы чверть мили оповѣдилъ панъ Свѣтицкій, ижъ то вже земля пришла селъ Ратенскихъ Щедрогощская по лѣву, а Радостовская по праву.
Врядники королевое ее милости повѣдил и, ижъ то не есть земля Щедрогощская а ни Радостовская, але есть то все земля королевое ее милости Хотешевская ажъ до озера Орѣхова. И вели врядники королевое ее милости краемъ озера Орѣховского, озеро по праву, а землю королевое ее милости Хотешовскую по лѣву, и привели до рѣчки, которая идеть болотомъ, которую называють Щучья, але того часу въ ней воды не было, и повѣдили, ижъ ся вже тутъ кончыть граница королевое ее милости Хотешевская, а починаеть ся граница князя Андрея Кошырского имѣнья его Рѣчыцкого. И вели насъ врядники князя Андрея Кошырского Сметанка а Волынецъ и зъ людьми князя своего Рѣчыцкими тоею рѣчкою Щучьею уверхъ до рѣчки Вязовенъ, отъ Вязовенъ до Тесоболя озера, пущаючы озеро у право въ Ратенское, отъ Тесоболя ко Мшаному озеру, ото Мшана до Конищъ поповъ Ратенскихъ, отъ Конищъ къ Залубицкимъ мостомъ въ рѣку Припять. Тутъ повѣдили врядники князя Кошырского, ижъ то есть рѣка Припять, яко есьмо первѣй того повѣдили, ижъ тая рѣка Припять чынить границу Пинску зъ Ратномъ; а тотъ островъ, куды врядники и люди королевое ее милости Хотешовскіе и мы тежъ зъ людьми князя своего вели, то есть за границою Пинскою, але естъ у во вжыванью пановъ нашыхъ и людей ихъ за великого князя Витолта ажъ до сихъ часовъ, едножъ моцне кгвалтомъ пчолу намъ дерутъ, дерево бортное казять; а тые села Щедрогощъ а Каморово въ томъ островѣ на кгрунтѣ нашомъ осажены.
И вели Припятью рѣкою якобы на полъ мили, у верхъ держачы посредъ Припяти границы до Выжвы рѣки, отъ Выжвы рѣки до мосту, который есть на Выжвѣ рѣцѣ, черезъ который дорога идеть зъ Ратна до Волыня и до Володимера. И повѣдили, ижъ ся ту кончы граница князя Кошырского имѣнья его Рѣчыцкого и менячы Ратенско по праву, а великое князство по лѣву.
Панъ Янъ Свѣтицкій повѣдилъ, ижъ якомъ первѣй того повѣдилъ, такъ и теперь повѣдамъ, ижъ, куды вели съ князства теды, то естъ по обѣма сторонамъ Ратенско, бо оны опустившы границу, и вели презъ кгрунтъ Ратенскій.
Отъ Косова берега, куды врядники и люди королевое ее милости и врядники и люди князя Кошырского вели отъ Припяти по тымъ врочыщамъ вышей мененымъ до Припяти жъ того острова вдолжъ якобы на пять миль, а въ ширки розницы якобы на три мили, а индѣ меньшы, а индѣ большы.
Индиктъ 5, мѣсеца Сентебра 7 день.
Врядникъ королевое ее милости Андрей Ивановичъ и врядникъ князя старосты Володимерского князя Ѳедора Андреевича Санкгушкевича Лука Фурсовичъ и зъ людьми селъ своихъ королевое ее милости селъ, Облапскими, Секунцы, Гридьковичи, Городищаны а князя старосты Володимерского селъ: Сереховичы, Грабовцы, Мелчаны, Сыновцы, отъ мосту, который есть на Выжьвѣ рѣцѣ, и презъ который дорога идеть зъ Ратна на Волынь и до Любомля, и вели тоею рѣкою Вижвою уверхъ якобы на полтрети мили, и привели до рѣчки Хочевы, которая, повѣдають, идеть отъ Панева ставища и впадаетъ у рѣку Вижву, и повѣдили, ижъ отъ того мосту, который есть на Вижвѣ рѣцѣ, до тое рѣчки Хочевы, то есть земля людей королевое ее милости и князя старосты Володимерского посполитая тыхъ селъ вышейписаныхъ, и по праву тое рѣки Вижвы то есть Ратенское, а по лѣву великое князство, а за тою рѣчкою Хочевою то есть вже одныхъ людей королевое ее милости земля, селъ ее милости Городищанъ, Гридьковцовъ Секунцовъ, а то есть островъ Коровичы.
Панъ Янъ Свѣтицкій повѣдилъ, ижъ што вы тою рѣкою Выжвою вели, менячи быти кгрунтъ свой, то не есть такъ, але то Ратенскій кгрунтъ селъ Выдренецкихъ, а никгды не бывало то ку великому князьству. Панъ Петръ Семашко именемъ брата своего пана Богдана Семашка, старосты Ковельского, зъ людьми великого князства королевое ее милости Вижовцы, вели немного тою рѣкою Вижвою до врочыща Колодины на поле малое, на которомъ рѣпы посѣяны зъ Глухъ села Ратенского, и вказалъ панъ Петръ Семашко сосну, у которой врубъ глубокій съ одное стороны сосны, а другій пень сосны зрубаный, и повѣдилъ зъ мужми села Вижовского, ижъ въ той соснѣ были грани врублены зъ обудвухъ сторонъ, але ихъ такъ годъ скажено, якожъ тое скаженье знаковъ есть обвожено вижы замковъ короля его милости зъ Луцка и зъ Володимера. И повѣдилъ, ижъ то естъ граница межы Выжвы, села великого князства, а Ратенского села Глуховъ.
Панъ Войтехъ Свѣтицкій именемъ брата своего старосты Ратенского повѣдилъ, ижъ тые границы указуеть панъ Семашко, тогды не суть то границы тыхъ селъ, але то естъ зъ обудву сторонъ Глушская земля.
Потомъ панъ Семашко зъ людьми Вижовскими указалъ полька нововыробленые, на которыхъ рѣпы посѣяны, и повѣдилъ, ижъ то Глушчане села Ратенского ново выробили, и два пни на нихъ выжжены, у которыхъ повѣдилъ, ижъ тутъ знаки были, которые Глушчане показили. И оттоле велъ до рѣчки Колодины черезъ поле, на которомъ иржищо и три стожки жыта стоять, и тою рѣчкою Колодиною вели насъ ку горѣ якобы на полъ мили, и надъ тою рѣкою указали дерево ясень, у которомъ указали грани крижы, и повѣдили, ижъ то естъ врочыщо Лядски Берви, и по лѣву естъ князство, Вижовское, а по праву села Ратенского Глуховъ, одно же тая рѣчка высхла, ижъ въ ней вода индѣ есть, а индѣ нѣтъ.
А въ той мили на колькусь мѣстцахъ рѣпы насѣяны и поля нововыроблены, а индѣ жита на новинахъ же Глушчане посѣяли. И велъ насъ недалеко того мѣстца и вказали дерево ясень у которомъ, зъ одное стороны выколото знакъ, а зъ другое стороны выжжено.
На то Глушчане люди Ратенскіе повѣдил и, ижъ то естъ наша стѣна зъ Дубичаны и съ Кремняны, людьми Ратенскими, и того есьмо и теперь во вжыванью; потомъ вказали у деревѣ ясеню такежъ зъ одное стороны знакъ вырубаный, а зъ другое стороны выжженый. И отъ того дерева привелъ насъ до врочыща Липинъ и тамъ указали у двухъ ольхахъ великихъ камень великій, межы тыми древы урослый, и то повѣдил и быти границы Вижвенскіе по лѣву, а по праву Дубичинского села Ратенского.
Панъ Свѣтицкій на то повѣдилъ, ижъ то естъ зъ обу сторонъ Ратенскій кгрунтъ, а Дубичане его во вжыванью.
Панъ Семашко зъ Вижвенскими людьми повѣдилъ, ижъ то естъ звѣчысто Вижвенско князства великого. И вели насъ надъ рѣкою, которая съ Колодынь идеть надъ Холопинымъ лѣсомъ; и вели презъ полька и кошары ажъ до дороги, которая идеть зъ Вижвы до Дубична, и тамъ на дорозѣ оказали Вижвяне дубъ порубаный, въ которомъ повѣдил и быти знаки, але покажены, не знати ихъ, и чересъ тую дорожку на туюжъ рѣку, которая съ Холопина лѣса, якобы на два стрѣленья зъ лука указали дубъ, въ которомъ указали знакъ съ одное стороны древа, а зъ другое стороны вырубаный; а потомъ привели насъ надъ тымъ же Холопимъ лѣсомъ и вказали намъ дубъ, въ которомъ крижи зъ обудву сторонъ, и повѣдили, ижъ то естъ граница Вижвенская, котора чыни граница зъ Дубичаны села Ратенского: по лѣву Вижвенское, князство великое, а по праву Ратенское село Дубичанское. И недалеко того дуба въ дву дубахъ такъ же оказали знаки, ижъ тые дубы три посполу одинъ отъ другого на колько кроковъ, а потомъ отъ тыхъ трехъ дубовъ вели насъ надъ лѣсомъ Лютымъ презъ поля и пашни, межы стоги Кремнецкіе Ратенскіе, и повѣдили, ижъ тые поля были Вижевскіе, але ихъ кгвалтомъ съ Кремна села Ратенскіе отнято. И веди насъ рѣчкою Лютою, которая идеть лѣсомъ Лютымъ, и повѣдили, ижъ и быдло забрано на тыхъ поляхъ, къ чому ся и Ратняне сознали; а потомъ привели до дубу великого, и повѣдили, ижъ то естъ граница наша Вижевская съ Кремномъ; а Кремняне повѣдили, ижъ то естъ граница наша Кремнянская зъ Любочынцы селы Ратенскими, одное половицы съ Кремна, а зъ другого села зъ Любочынца, зъ Любомска; а отъ того дуба вели насъ рѣчкою Лютою до Теремца до врочыща до горы.
А того всего обводу отъ рѣки Вижвы отъ врочыща Колодина до Теремца горы якобы на три мили.
А въ томъ заводѣ куды, зъ Ратна панъ Янъ Свѣтицкій староста Ратенскій велъ, поченшы отъ пня Селивонова, который естъ надъ Припятью, по всимъ урочыщамъ выше описанымъ ажъ до горы врочыща Теремца, такъ тежъ куды обводили зъ великого князства врядники королевое ее милости, и врядники князя Кошырского съ товарышы своими и врядники князя старосты Володимерского, въ тыхъ обѣюхъ заводехъ Ратенскихъ селъ, которые осажены повѣдають на кгрунтѣ великого князства, то естъ: первое село у Цыри селѣ десятая часть Цырскихъ, другое Борки, третяя Глуша, четвертая Щедрогощъ, пятое Щитинъ, шостое Чернче, семое Бузаки, осьмое Раковъ Лѣсъ, девятое Михновичы, десятое Илбле, первоенадцать Велимче, другоенадцать Поступле, третеенадцать Замъшане, четвертоенадцать Датынь, пятоенадцать Васильки; а то въ томъ же заводѣ, который менуеть староста Ратенскій якобы на кгрунтѣ Ратенскомъ мѣли быти осажены села зъ великого князства, то естъ на имя: первое у Цырску, якобы деветь частей, другое Глушка, третее Ведеръ, четвертое Илбле, пятое Лахвичы, шестое Хотешовъ, семое Мостища, а того всего, куды панъ Янъ Свѣтицкій велъ, поченъ отъ Селивонова пня до горы Теремца, вдолжъ якобы на пятнадцать миль.
А куды врядники королевое ее милости и князя Кошырского съ товарыщы своими, поченши отъ рѣчки Проритицы, и куды врядники князя старосты Володимерского вели ажъ до горы Теремца, вдолжъ якобы на семнадцатъ миль. А розницы въ шырки промежку тыхъ обводовъ индѣ на десеть миль, а индѣ на пять, а индѣ на двѣ, а индѣ меньшы.
Индиктъ 5, мѣсеца Сентебря 13 день, въ понедѣлокъ.
Ставшы у горы, у врочыща Теремца земяне повѣту Любомского Городецкіе, Янъ а Василей вели черезъ болото рѣчкою Лютою у низъ до рѣки Вижвы, гдѣ впадываеть Лютая у рѣку Вижву, и тою рѣкою Вижвою уверхъ до рѣки Оходное, и повѣдили межы тыхъ граней Теремца тоею рѣчкою Лютою, и тоею рѣчкою Вижвою до рѣчки Оходное съ обудвухъ сторонъ, яко съ Коруны такъ и съ князьства упокойную границу. И вели Городенскіи земяне тоею рѣчкою Оходною уверхъ до горы Кремяное до дороги великое; отъ тое горы взяли земяне Любомскіе Кграбинскіе а Окунинскіе вели тою дорогою великою, которая идеть зъ Берестья къ Володимеру на Вижву, менячы тую дорогу границу собѣ зъ селомъ великого князства князя Ѳедора Вишневского Видютемъ а зъ селомъ князя Ѳедора старосты Володимерского Смединомъ ажъ до врочыща рѣчки Черньца, и вели тою дорогою якобы на полторы мили. Тутъ панъ Петръ Семашко зъ людьми королевое ее милости Паридубскими повѣдилъ: къ той дорозѣ въ томъ мѣстѣ граница пришла села людей королевое ее милости Паридубского. И вели насъ весполокъ тою дорогою яко зъ великого князьства, такъ съ Коруны якобы на чверть мили, менячы собѣ тую дорогу за впокойливую границу. Потомъ Кграбинскіи съ Окунинскими земяны Любомскими повели съ тое дороги дорогою другою на лѣво, которая идеть до села королевое ее милости великого князства къ Паридубомъ, и вели тою дорогою якобы на чверть мили и пріѣзждчаючы къ селу Паридубомъ, поблизу тую дорогу опустившы влѣво въ село, а насъ повели на право сѣножатьми и польми и перелѣсанками якобы на полъ версты безъ дороги, ижъ тамъ намнѣйшого куса дороги не оказало, и взвели насъ на тую жъ великую дорогу, которою панъ Семашко зъ людьми королевое ее милости велъ. И тутъ на той дорозѣ Кграбинскій съ Окунинскими повѣдили, ижъ потуль естъ наша граница, а то вже естъ земля земянъ Стокорскихъ корунныхъ.
Тогожъ дня въ понедѣлокъ земяне Любомскіе Стакорскіе повѣдили быти границу свою и зъ людьми великого князства королевое ее милости Паридубцы отъ пяты Кграбинского, отъ дороги гостинца Витолтова, у которыхъ мѣстѣхъ Кграбинскій здалъ границу свою противъ села великого князства Сомина, до дорожки, которая идеть отъ Перевалъ до Лукова, и повѣдилъ, ижъ тутъ у тое дорожки пришла граница Кграбинского у потоку.
На то повѣдилъ панъ Петръ Семашко именемъ брата своего пана Богдана Семашка, старосты Ковельского и зъ людьми королевое ее милости Паридубцы: куды Городенскіи и Кграбинскіи и Окунинскіе и Стакорскіе вели, то естъ властная а звѣчыстая земля а кгрунтъ королевое ее милости имѣнья ее милости Паридубского.
Того обводу Стакорскихъ якобы на чверть мили.
Тогожъ дня у понедѣлокъ мѣсеца Сентебря 13 дня.
Ставшы у горы у врочыща Теремца оповѣдилъ панъ Петръ Семашко именемъ брата своего пана Богдана Семашка, старосты Ковельского, што есьми въ субботу оповѣдалъ границу межы селъ королевое ее милости, то естъ замку ее милости Вижовского и села старого Вижовского, ижъ границы великого князства съ Коруною тутъ нѣтъ, бо Ратенъ и Любомль было великого князства а отчызна князей Сендюшковичовъ, а отышолъ тотъ Ратенъ и Любомль за Казимера короля, яко часу своего то все будеть оказано. А то грани промежку селъ Ковельскихъ: Вижвою мѣстечкомъ и селомъ старымъ Вижовскимъ. А теперь тежъ повѣдаю грани такъ же межы селъ: напервѣй отъ того Теремца поченшы рѣчкою Лютою, по праву тое рѣчки Лютое, земянъ Любомскихъ Городенскихъ Яна а Василья, а полѣву королевое ее милости Вижевское, и тою рѣчкою Лютою у рѣку Вижву и рѣкою Вижвою уверхъ.
И повѣдили, межы тыхъ граней, Теремца, тоею рѣчкою Лютою и тоею рѣчкою Вижвою до рѣчки Оходное, зъ обудвухъ сторонъ, яко съ Коруны, такъ съ князства упокойную мають границу. И оттуль вели ку врочыщамъ Лавамъ, отъ Лавъ ку двору Сенкгушкову, который бывалъ у ловищахъ, оттоль тоеюжъ рѣкою къ мостищу Корнину, отъ мостища къ Чорному плесу, отъ Чорного плеса зъ рѣки Вижвы, опустившы рѣку Вижву направо, у рѣчку Чорную, а рѣчкою Чорною уверхъ къ Соломени и тымъ Соломенемъ къ Можковымъ лѣскомъ, отъ лѣсковъ у рѣчку Чернче, и Чернчомъ рѣчкою у Демьяново болото, отъ Демъянова болота на дорогу великую, которая идеть зъ Берестья къ Володимеру на Вижву, тою дорогою чрезъ сельце Стахоры земянъ Любомскихъ на бродъ, менячи тое село поправу Любомское, а полѣву великое князство селъ королевое ее милости Паридубского и Годевицкого. И повѣдили люди королевое ее милости Паридубскіе и Годевитскіе, ижъ у того коловорота наша граница доконала.
На то земяне Стакорскіе Любомскіе повѣдили, ижъ тутъ по обѣимъ сторонамъ наша естъ отчызна.
Обводъ Коруны польское, поченшы отъ Теремца и поки Кграбинскіи съ Окунинскими перестали на дорозѣ, на противку села королевое ее милости Сомина, — по всимъ тымъ врочыщамъ вдолжъ якобы на чотыри мили.
А куды зъ великого князства Семашко зъ людьми Паридубцы вели, поченшы отъ Теремца ажъ до села Стахоръ, по всимъ тымъ врочыщамъ вдолжъ на чотыри мили; а въ тыхъ обводѣхъ обѣюхъ у шырки якобы на милю.
Тогожъ дня скоро съ того сельца у коловорота выѣждчаючы поткали насъ люди великого князства села королевое ее милости Соминцы и повѣдили, ижъ тутъ наша граница зняла ся съ Паридубскою и Годевецкою, и зоставившы тую дорогу великую налѣво и насъ вели направо черезъ поля къ болоту якобы на стрѣленье зъ лука и повѣдили, ижъ посередъ того болота наша граница Соминская, а поправу того болота половица села Луковского земянина Любомского Кграбинского и тымъ болотомъ до Ольхова Лаза, отъ Ольхова Лаза до Дорогинина лѣса; тутъ менили собѣ границу быти съ Окунинскими а зъ Моковскою земяны Любомскими тотъ лѣсъ Дорогининъ наполы. И съ того лѣса Дорогинина вели насъ Соминцы якобы на двѣ стрѣленья зъ лука, и привели къ двумъ озеромъ и менили направѣ озеро быти Окунинскихъ земянъ Любомскихъ, а полѣву озеро Соминъ села великого князства Соминского; тутъ повѣдили направѣ кгрунтъ пановъ Окунинскихъ и пана
Свѣтицкого, села его Трушковского повѣту Любомского, и вели насъ сѣножатьми до рѣчки Рудки, менячы быти поправу землю пана Свѣтицкого Трушковскую, а полѣву Сомнискую великого князства, отъ тое рѣчки Рудки вели ку Лазищомъ лѣсу: у того лѣса менили быти поправу землю Каспора Новоселского, земянина Любомского, а полѣву великое князство, Соминское, Отъ того лѣса Лазищъ до другого лѣса Серебова, у того лѣса Серебова повѣдили, ижъ тутъ вже земля пришла съ права пана Свѣтицкого Поревальская отъ того лѣса Серебова вели насъ до Окуньего болота, отъ того болотца до Коршокова дуба, отъ дуба до дороги Соминское, которая идеть изъ Сомина до Перевалъ; и повѣдили, ижъ тутъ ся вже граница наша кончыть, а поткала граница Торговищская села князя старосты Володимерского. Того обводу, куды врядникъ князя Кошырского зъ людьми Соминскими велъ, поченшы отъ Стахорского села до дороги Торговицкое, по всимъ тымъ врочыщамъ вдолжъ якобы на полторы мили.
На то панъ Янъ Свѣтицкій и Кграбинскіе и Окунинскіе повѣдили: куды вели зъ князства люди королевое ее милости Соминцы, то все естъ кгрунтъ а властная земля наша.
Мѣсеца Сентебря 14 день, у волторокъ.
Земянинъ Любомскій Кграбинскій зъ людьми села своего Лукова повѣдили быти границу свою и зъ людьми великого князства села королевое ее милости Сомина отъ пяты потока, гдѣ здали ему земяне Стакорскіе, до врочыща Соломца, до пяты земянъ Любомскихъ, Окунинскихъ и Гомаковскихъ. Обводу Кграбинского вдолжъ якобы на полъ мили.
На то люди великого князства. королевое ее милости Соминцы повѣдили: куды Кграбинскій велъ, то естъ по всимъ тымъ границамъ наша властная а звѣчыстая земля, а во вжыванью спокойномъ мы ажъ до сихъ часовъ; лечь яко тотъ Кграбинскій тое село купилъ, тогды насъ почалъ вытискати отъ шести годъ.
Того жъ дня мѣсеца Сентебря 14 день, у волторокъ.
Отъ Соломца, пяты Кграбинского села его Луковского земяне Любомскіе Окунинскіе повѣдили быти границу свою и зъ селомъ великого князства королевое ее милости Соминомъ отъ болота Омакова рѣчкою до Соломца рѣчки, отъ Соломца до рову выкопаного зъ озера Соминского, отъ рову до врочыща Трошака Рачыны, и повѣдили, ижъ ся наша граница тутъ кончыть, а пришла граница пана Яна Свѣтицкого. Того обводу Окунинскихъ якобы на милю.
На то повѣдили врядникъ и люди королевое ее милости Соминцы: куды Окунинскіе вели, то естъ властный а звѣчыстый кгрунтъ нашъ и того смы у въ упокойномъ держанью.
Мѣсеца Сентебря 14 день, у волторокъ.
Панъ Янъ Свѣтицкій повѣдилъ, менячы быти границу свою имѣнья своего Перевалъского и зъ селомъ великого князства королевое ее милости Соминомъ, и взявъ границу отъ земянъ Любомскихъ Окунинскихъ села ихъ Омаковского, отъ млына отъ Окунинскихъ оттоль ровкомъ до озера Соминского, и повѣдилъ посредъ того озера границу свою и зъ Соминомъ, отъ того озера уверхъ до млынка Соминского, и повѣдилъ якобы тотъ млынокъ мѣлъ быти збудованъ на кгрунтѣ его, и менилъ тую рѣчку Румянкою, и тою рѣчкою Румянкою до броду, который повѣдилъ на той же рѣтцѣ Румянцѣ, оттоль до лѣса Осового тамъ повѣдилъ панъ Свѣтицкій по лѣвой сторонѣ великое князство князя старосты володимерского, князя Ѳедора Андреевича Санкгушковича, имѣнія его Торговицкого, а поправу Перевальская, отъ того лѣса Осового, займаючи посредъ болота великого до копцовъ старыхъ, которые дей середъ болота стоять, о которыхъ намъ первѣй не повѣдилъ, оттуль до гребелки, которая естъ на тойже рѣтцѣ Румянцѣ, тамъ отъ тое гребелки боромъ, менуючы тую жъ рѣчку Румянку Лозами, до верху болота, и повѣдилъ, якобы съ того болота тая рѣчка Румянка мѣла ити, оттуль презъ двѣ дороги, которые идуть съ перевалъ, одна до Торговища, а другая до Видутя ку дубу надъ озеро. И повѣдилъ, якобы мѣли тотъ дубъ называти кудрявымъ, отъ того дуба якобы на кликъ и повѣдилъ межи дву сосонъ копецъ, и повѣдилъ, ижъ то по лѣву естъ земля князя старосты Володимерского, а поправу имѣнья своего Перевальского, и оттуль полемъ до дву могилъ, отъ тыхъ дву могилъ до лѣса, который зовуть Волчыщомъ, посредъ лѣса того Волчыща до Горожанъ до копца, отъ того копца до другого копца и до Василькова ставку, оттуль до дву могилъ до озера Светого. И посередъ озера ставшы повѣдилъ по лѣву кгрунтъ великого князства, а поправу своихъ селъ, и въ того озера Светого повѣдилъ, ижъ ту пришла земля князей Курцевичовъ имѣнья ихъ Туричанъ. На то повѣдилъ врядникъ Соминскій зъ людьми великого князства Соминскими, и врядникъ князя старосты Володимерского Дользскій Богданъ Кголимонтъ куды панъ Свѣтицкій велъ яко зъ селомъ Соминскимъ королевое ее милости, такъ тежъ зъ имѣньи князя Ѳедора Санкгушкевича, маршалка земли Волынское, старосты Володимерского, Торговицкого и Долзьского, по всимъ тымъ границамъ и врочыщамъ многіе повѣдилъ имена, которые не суть такъ названы, и куды онъ велъ, то естъ кгрунтъ села королевое ее милости Сомина и имѣней князя старосты Володимерского, Торговицского и Долзьского, и которые копцы собѣ меновалъ быти за грань, тамъ копцы никгды не бывали, а не естъ то грань межы тыми имѣньи.
А по тымъ границамъ мы сами не ѣздили, чотыри дни есьмо товарышовъ нашыхъ ждали, хотячы по границамъ ѣхати, оны въ пана Свѣтицкого въ Перевалехъ мѣшкали, потомъ олижъ шостого дня списки намъ прислали.
Мѣсеца Сентебря 14 день, у волторокъ.
Тутъ въ тое дороги, которая изъ Сомина до Перевалъ идеть, у Кошаркова дуба оповѣдилъ врядникъ и зъ людьми князя старосты Володимерского, его милости князя Ѳедора Андреевича Санкгушковича, Долзскій Богданъ Кголимонтъ, ижъ тутъ въ тое дороги кончыть граница села великого князства Соминская, кгрунтъ королевое ее милости , а поткала граница села князя моего Торговицкая; и повѣдилъ, ижъ тутъ границы корунное нѣтъ, бо Ратенъ и Любомль было князей нашыхъ Сендюшковичовъ, якожъ на оный часъ того ихъ милость молчати не будуть.
А што ся тычетъ границы межы селъ, я оповѣмъ. И велъ насъ отъ того Кошаркова дуба ко млыну вѣтренему, гдѣ теперъ капличка стоить; и повѣдили, ижъ тая капличка поставена на властной земли князя моего, а тому есть два годы. Отъ млынка велъ болотомъ Волческимъ ажъ къ перетоку къ Мошенскому лѣсу а ку дорозѣ, которая къ Туричаномъ идеть съ Перевалъ; у которое дороги копецъ оказали, и по праву менили быти корунное, а по лѣву великое князство. И повѣдили, ижъ ся тутъ граница села князя моего Торговицкого кончыть, а починаеть ся земля князей Курцевичовъ, имѣнья ихъ Туричынского. Того обводу князя старосты Володимерского имѣнья его Торговицкого отъ Кошаркова дуба до Мошенского лѣса до дороги, которая къ Туричаномъ съ Перевалъ идеть, вдолжъ на милю.
Панъ Янъ Свѣтицкій на то повѣдилъ, ижъ куды врядникъ князя старосты Володимерского Долзскій велъ, то все естъ властная земля имѣнья моего Перевальского.
Мѣсеца Сентебря 15 день, въ середу.
Панъ Янъ Свѣтицкій, староста Ратенскій, повѣдилъ, менячы быти границу имѣнья своего Перевальского и зъ князи Курцевичы имѣнья ихъ Туричына отъ того озера Светого къ долу, и менилъ якобы тымъ доломъ мѣла рѣчка Романиха выйти съ озера Светого, и повѣдилъ границу свою съ князи Курцевичы до рѣки Турьи, а отъ Турьи повѣдилъ у рѣчку Турку, и повѣдилъ, ижъ на той рѣтцѣ ставъ збудованъ, которого зовуть Вопиханки, отъ того ставку Опиханки повѣдилъ рѣчку Глубочыцу, которая, повѣдаеть, упала у тотъ же ставъ, тою Глубочыцою черезъ лѣсъ Зябки на рогъ болота Королева у Бартошовъ островъ, и тутъ панъ Свѣтицкій повѣдилъ, ижъ ту доконала земля князей Курцевичовъ, а прышла земля великого князства пановъ Овлучемскихъ села ихъ Овлучима, а по праву менилъ свою землю Перевальскую.
Князь Богданъ а князь Михайло Курцевичы на то повѣдили: по которымъ границамъ панъ Свѣтицкій велъ, то естъ властность наша и въ упокойномъ держанью, а кгды будеть того часъ, будемъ умѣти и зъ Свѣтицкимъ о то мовити.
Мѣсеца Сентебря 15 день, у середу.
Въ тое дороги, которая идеть съ Перевалъ до Турычанъ, у копца, гдѣ подалъ границу врадникъ князя старосты его милости Володимерского Долзскій Богданъ Кголимонтъ и зъ людьми села его милости Торговицкого, повѣдили князи Курцевичы: Князь Богданъ а князь Михайло, ихъ то есть на лѣвѣ наша граница, поченшы отъ озера Светого, которое озеро на полы маемъ съ княземъ старостою Володимерскимъ его милости, и межы того озера и копца, злѣ которого стоимъ, маемъ два копцы съ княземъ старостою его милостью. И тые копцы намъ оказали, и повели черезъ дорогу гредою, которая дорога идеть съ Перевалъ до Турычанъ, и повѣдили, ихъ тутъ на правѣ земля повѣту Любомского, кгрунтъ пана Свѣтицкого имѣнья его Перевальского, а на лѣвѣ великое князство села нашого Туричанского повѣту Володимерского, и тымъ грудомъ вели до ставу Хотеновичъ, отъ того ставка посередъ болота Чыстого стругою у Чорную Воду.
И повѣдили, ихъ у тое Чорное Воды граница наша кончить, а починаеться земля пановъ Овлучемскихъ, а шкодъ не повѣдили.
Того обводу, куды князи Курцевичы вели, поченшы отъ того озера Светого до тое Чорное Воды, вдолжъ якобы на полъ мили.
Тогожъ дня въ середу.
Панъ Янъ Свѣтицкій повѣдилъ менячы быти границу свою Перевальскую и зъ земяны великого князства Овлучимскими: паномъ Андреемъ а Иваномъ а Юръемъ Гнѣвошевичы, отъ болота, которое прозываеть панъ Свѣтицкій Королевымъ болотомъ, и повѣдилъ, якобы по тому болоту тая жъ рѣчка Глубочица мѣла ити на гору до лѣса Тишина, отъ того рогу лѣса тоею жъ рѣчкою Глубочицою до Жукова острова, до Обидова: тутъ повѣдилъ, ихъ пята прышла земянъ Любомскихъ Олѣскихъ.
На то панове Овлучемскіе повѣдили: куды Свѣтицкій велъ, то естъ наша звѣчистая земля, которое мы зъ давныхъ часовъ у держанью; а то есть граница правдивая межи селъ нашихъ съ паномъ Свѣтицкимъ, куды мы окажемъ.
Тогожъ дня оповѣдали земяне Олѣскіе и съ людьми короля его милости Олѣскими повѣту Любомского границы свои отъ пяты Свѣтицкого имѣнья его Перевалъ а врочища Потымъя по врочищамъ, то есть: отъ Потымъя посередъ болота до Лютого лѣсу, отъ Лютого до броду Неретуе, отъ Неретуя до Городища надъ озеромъ, а зъ Городища посредъ озера Неретуя и посредъ болота до Мѣшка лѣса, и посредъ того лѣса рѣчкою до Домашнего рѣкою, а зъ Домашнего до Перехрестья врочища при гостинцу Володимерскомъ, а отъ Перехрестья до греды, отъ греды до Кочанова ставку. А тамъ уже пришла граница волости Городельское, староства земли Белзское Стешырыть а Заболотья: по тыхъ усихъ врочищахъ менили собѣ быти Олѣскіе границу съ паны Овлучымскими, князство пущаючы на лѣво, а направо въ Коруну.
На то панове Овлучемскіе повѣдили: по которымъ границамъ вели земяне Олѣскіе и зъ людьми короля его милости Любомского повѣту Олѣскими, то естъ властная земля наша; лечъ оны кгвалтомъ, моцью насъ самыхъ и людей нашихъ изъ земль нашихъ вытискають и вдѣлали намъ шкоду у збожъи у гвалтехъ, у боехъ у грабежохъ въ забираньи быдла и въ подраньи пчолъ, въ порубанью дерева; бо мы малы отца остали, и матка наша вдова: што хотѣли, то грабили, жыто и збожъе брали, земли нашы посѣдали, якожъ въ тыхъ грабежохъ и кгвалтехъ шкодуемъ собѣ на осмъ сотъ копъ грошей.
Тогожъ дня въ середу.
Панове Овлучемскіе: панъ Андрей, а панъ Иванъ, а панъ Юрей Гнѣвошевичи зъ людьми своими Овлучемскими вели отъ Чорное Воды Чыстымъ болотомъ, гдѣ подали имъ границу князи Курцевичи и повѣдили, ижъ тутъ по праву земля повѣту Любомского а кгрунтъ пана Свѣтицкого имѣнья его Перевальского, а по лѣву великое князство, а кгрунтъ имѣнья нашого Овлучемского, и вели тымъ болотомъ двѣ части у великое князство, а третюю часть ку имѣнью пана Свѣтицкого Перевальскому, и менили тымъ болотомъ врочищо Чорную Воду, и вели ажъ до Жукова ставка, и повѣдили, ижъ тутъ ся кончить граница пана Свѣтицкого имѣнья его Перевальского, а вже намъ естъ граница зъ земяны и зъ людьми Олѣскими, и ту тежъ зъ людьми королевскими Олѣскими жъ повѣту Любомского. И отъ того Жукова ставка вели насъ тоею жъ рѣчкою Чорною Водою черезъ Чортовъ лѣсъ, менячи быти поправу кгрунтъ земянъ и людей Олѣскихъ повѣту Любомского, а полѣву имѣнья своего Овлучимского, отъ Чортова лѣса тою жъ рѣчкою Чорною къ ставищу. И повѣдили, ижъ у того ставища посадилъ люди свои земянинъ Любомскій Юхно Олѣскій на кгрунтѣ нашомъ великого князства отъ десети лѣтъ. Отъ того ставища вели тою жъ рѣчкою Чорною, держачы Тешовъ лѣсъ по лѣвой сторонѣ, и мало проѣхавшы тотъ лѣсъ повели насъ на лѣво отъ Чорное Воды, и оповѣдили намъ три копцы, копецъ просто, отъ копца до врочища лѣса Въюнищъ у рѣчку Невѣдомку и тою рѣчкою Невѣдомкою уверхъ до селища Щотова и повѣдили, ижъ тое селищо Щотово по праву Корунно; оттоле вели тоюжъ рѣчкою Невѣдомкою до Ставрова лѣса ажъ у въ озеро Невѣдомку. У того озера повѣдили, ижъ тутъ земянъ и людей Олѣскихъ граница кончаеть ся, а прышла граница села Стежерицкого повѣту Городельского, отъ того озера Невѣдома, куды вели черезъ багны къ Горицамъ, отъ Горицъ багномъ на рогъ лѣса Банилова черезъ болото къ Паровцу, и повѣдили, ижъ тутъ вже граница наша кончить, а пришла граница села великого князства повѣту Володимерского Пузовская.
Того обводу, куды панове Овлучемскіе вели, поченъ отъ болота Чистого ажъ до Паровца границы Пузовское, вдолжъ якобы на полъ четверты мили. А куды Олѣскіе вели, поченшы отъ врочища Потымья, по всимъ врочищамъ до Качанова ставку якобы на чотыры мили, а розницы якобы на двѣ жили, а индѣ на милю.
Тогожъ дня присылылъ до насъ владыка его милость Володимерскій Генадей врадника своего Гаврила, оповѣдаючы, ижъ которое село на имя Стежеричы надано на церковь Володимерскую Пречыстое Богородицы, которое село естъ на сей сторонѣ Бугу отъ великого князства, то пакъ тыхъ недавныхъ часовъ воевода Белзскій панъ Крупскій тое село Стежеричы забралъ и теперь его держить; которое село межы многихъ селъ Володимерского повѣту ено у дву миляхъ отъ Володимера, на што его милость владыка листы и твердости ма и часу своего то хоче оказати.
Мѣсеца Сентебря 16 день, у четвергъ.
Ставшы у того врочыща Паровца, въ которого подали Овлучемскіе земяне великого князства повѣту Володимерского панъ Богушъ, а панъ Тимошъ а Ѳедоръ зъ имѣнья своего Пузова повѣдил и, ижъ тутъ естъ наша граница у пяты пановъ Овлучымскихъ у Паровца и повѣдили, ижъ по праву естъ земля села Стежерицкого Городельского повѣту, а полѣву великого князства, земля имѣнья нашого Пузовского. И вели насъ отъ того врочища Паровца отъ болота границою своею; которую менили быти промежку великого князства села своего Пузова и промежку села Стежерицкого Городльского къ Пещаному броду, отъ броду къ ставищамъ, край грады, держачи граду по праву у Коруну, ажъ до врочища Лѣсковъ, отъ Лѣсковъ вели насъ къ Самотешы, отъ Самотешы до дороги, которая идеть съ Стежеричъ къ Володимеру. Тутъ повѣдили панове Пузовскіе, ижъ тутъ у тое дороги граница наша кончить, а пришла земля Устилузская великого князства а села владыки Володимерского Ѳедоровского великого жъ князства.
Того обводу, куды земяне Пузовскіе вели, поченъ отъ Паровца болота до дороги, которая идеть съ Стежеричъ къ Володимеру, вдолжъ якобы на милю, а поперекъ на полъ мили.
Мѣсеца Сентебря 16 день, тогожъ дня у четвергъ.
Земенинъ господарскій панъ Михайло Котовичъ а врадникъ князя Александра Вишневского Устилузскій и зъ людьми своими села Устилузского вели, менячы быти границу свою и зъ селомъ Городельскимъ Стежеричы, которое село Стежерычы повѣдили быти владыки Володимерского наданое на церковь Володимерскую Пречыстое Богородицы, еножъ тыхъ недавныхъ часовъ Крупскіи кгвалтомъ тое село Стежеричы забрали. И велъ насъ Михайло Котовичъ и врадникъ князя Вишневского отъ гребли Пузовское села великого князства до Волчихъ бродовъ, отъ Волчихъ бродовъ до лѣса Городельского Выдреницы посредъ рѣчки Выдреницы до дороги, которая идеть отъ Городла до Володимера, отъ тое дороги черезъ Бугъ къ тополю до полгаю соснового, отъ гаю на Красную гору, и повѣдили, ижъ тутъ у тое Красное горы наша граница кончыть, а починаеть ся граница князя Александра Вишневского села его Езовского.
А што Пузовскіе повѣдили быти пяту свою у дороги, которая изъ Стержеричъ до Володимера идеть, тая дорога естъ у нашой земли.
Того обводу Михайлова и врадника князя Вишневского отъ гребелки Пузовское до Красное горы вдолжъ якобы на двѣ мили.
На тыхъ есмо границахъ не были.
Мѣсеца Сентебря 17 день, въ пятницу.
Врочыща границъ Городельского староства земли Белзское отъ замку и отъ мѣста и отъ села починаеть ся отъ границы земянъ и людей Олѣскихъ повѣту Любомского зъ имѣньемъ Овлучимомъ земянъ великого князства пановъ Гнѣвошовъ повѣдили быти пяту повѣту Городельского. Отъ врочища, которое называють зъ Городла Ставрово, отъ Ставрова врочища до гати, отъ гати черезъ багонъ, отъ багна боромъ черезъ гору, отъ тое горы черезъ малый багонъ, а отъ того багна черезъ боръ ку великому багну, который багонъ идеть до Невѣдома озера: менили на лѣвѣ великое князство, а по праву Городельское. Отъ Невѣдома озера до великого багну, черезъ который багонъ дорода идеть съ Линя мѣстечка къ дубу, отъ дуба ку соснѣ, которую, менили быти зеленою, которое сосны только пень, отъ сосны на рогъ грады презъ дорогу, которую градою повѣдили якобы мѣла быти граница великому князству зъ Городельскимъ староствомъ: по праву Городельско, а по лѣву великое князство до врочища Качанъ ставка, отъ Качанъ ставка середъ болота къ Паровцу лѣску, и черезъ тотъ лѣсокъ посередъ болота мимо врочищо Чернцы островъ: на лѣво князство менили быти а по праву Чернцы островъ ку Городлу до врочища Свѣтымя озера и по полъ озера того до врочища Городища и мимо врочищо Королевское Становище посредъ болота ку врочищу Годенямъ. Отъ Годеня врочища болота посредъ того болота ку отнозѣ, которая идеть съ того болота, отъ тое отноги черезъ кустовъе ку дорозѣ, а за тою дорогою у подолъ и черезъ поле къ межы, отъ межи до суграни за дорогу Володимерскую ку Милееву озеру и по полъ озера того черезъ Бугъ, отъ Бугу у болото, и тымъ болотомъ подлѣ лозы къ потоку, который идеть отъ тое лозы къ сѣножатемъ князя бискупа Луцкого, отъ тыхъ сѣножатей бискупихъ подлѣ Лозъ доломъ ку колодезю врочищу, которого называють Каменымъ до Стрыжовское границы: на лѣвѣ менили быти великое князство, а по праву Городельское.
На то повѣдили зъ великого князства панове Овлучемскіе и земяне Пузовскіе зъ имѣнья своего Пузова, а панъ Михайло Котовичъ а врадникъ князя Александра Вишневецкого зъ имѣнья Устилуга и другій врадникъ князя Вишневского Езовскій и врадникъ Щасного Львовича Чернейковскій, тотъ тежъ Михайло Котовичъ и зъ зятемъ своимъ паномъ Яронимомъ, воеводичомъ Крупскимъ и зъ урадникомъ Щасного Львовича зъ имѣнья своего посполитого Дудина односталне куды вели отъ Городла и зъ староства корунноного, поченшы отъ границы пановъ Овлучемскихъ земянъ великого князества, тые вси грани и врочища естъ у великомъ князствѣ и кгрунтъ отчызна наша и зъ вѣку великое князство. Коли будетъ того часъ, ясне то оповѣмы и доводомъ слушнымъ ведлѣ обычаю права подперети хочемъ.
Мѣсеца Сентебря 18 день, въ суботу, индиктъ 5.
Врадникъ князя Александра Вишневского Езовскій Богушъ зъ людьми князя своего села Езовского, ставшы у тое горы врочыща Красного, повѣдилъ, ижъ отъ тое горы Красное отъ пяты пана Михайла Котовича и князя моего села Суличевского починяеть се граница имѣнья князя моего Езовская и по правой сторонѣ то естъ земля Городельская повѣту Бѣлзкого, а по лѣву великое князство, и велъ насъ подлѣ тое Красное горы якобы на полторы версты, и тую гору Красную опустившы управо и отъ тое горы просто у Савинъ ровъ у Бугъ, и тутъ оповѣдалъ се врадникъ Хочетовскій князя бискупа его милости Луцкого Собестіанъ Вивинскій, ижъ тутъ ку Бугу на лѣвѣ у великомъ князствѣ посполъ и зъ землями князя Вишневского имѣнья его Езовского у сѣножати князя бискупа его милости кгвалтомъ уступують и забираеть панъ Янъ Свѣтицкій зъ имѣнья своего Стрыжовки. И повѣдилъ врадникъ князя Вишневского, ижъ тутъ се вжо кончи граница села князя моего Езовская и князя бискупа его милости Луцкого сѣножати имѣнья его милости Хотечовского, и по лѣву повѣдилъ быти великое князство, а по праву Городельского повѣту имѣнья пана Свѣтицкого Стрыжовского.
Того обводу врадника князя Вишневского отъ Красное горы до Савина рову до Бугу вдолжъ якобы на полторы версты, а въ ширки якобы на полъ мили.
Тогожъ дня отъ того мѣстца Савина рову велъ врадникъ Щасного Львовича села великого князства Чернейкова Турчынъ до Бугу и повѣдилъ, ижъ тутъ пану моему селу его Чернейкову по полъ Буга по праву Городельского повѣту имѣнья пана Свѣтицкого Стрыжовского а по лѣву великое князство земля пана моего и ведъ насъ подлѣ Буга, менячи собѣ по половицы рѣки Буга границу и велъ насъ мимо село и мимо замочокъ Стрыжово у верхъ рѣки Буга, менячи собѣ границу по половицы Буга якобы на полъ мили. И оттоль прывелъ ку долинѣ, которая идеть зъ Лудинское дубровы у Бугъ, и повѣдилъ, ижъ тутъ ся кончить граница пана моего села его Чернейкова и починаеть ся граница отъ тое долины пана Михайла Котовича и пана моего Щасного имѣнья ихъ Лудинского, а съ тое стороны Буга земля пана Яна Свѣтицкого села его Гусинского. И тутъ стоячы въ того логу оповѣдилъ панъ Михайло Котовичъ и зъ зетемъ своимъ паномъ Яронимомъ Крупскимъ, ижъ починаеть ся земля села нашого отчызного Лудинского, и менили собѣ быти границу по подъ рѣки Буга уверхъ, и веди насъ злѣ Буга подъ село Гусино якобы на чверть мили. И повѣдили, ижъ посредъ ставу Гусинского то естъ наша граница, а отъ ставу веди насъ уверхъ же Бугомъ ажъ до валу врочища Торопля, который къ самому Бугу прышолъ, и повѣдил и, ижъ по праву за Бугомъ граница Свѣтицкого села его Гусина кончить, а прышла земля Петровского а Османскою имѣнья ихъ Городка. И вели насъ уверхъ Буга, менечи собѣ границу по половицы рѣки Буга на правѣ Городельскій повѣтъ села Городецкого, а по лѣву великое князство села Лудинского, и вели мимо село Городецкое Бугомъ и мимо Городищо Волынское, которое естъ по правой сторонѣ Буга, и мимо село свое Аммуково ажъ до Цутнева до села воли королевское повѣту Грубешовского. И повѣдили, ижъ тую волю Цутнево староста Грубешовскій панъ Дубовскій на властной отчизной земли нашой Дудинской осадилъ, и вели черезъ рѣку Цутнево Бугомъ уверхъ до врочища Чорное лозы, и повѣдили въ тое Чорное лозы, ижъ тутъ наша граница отъ Буга идеть влѣво до врочища Глинищъ мимо Поромовскій гай ажъ до села земли владыки Володимерского Боженки, а Бугомъ уверхъ то естъ повѣтъ Володимерскій дѣлить съ повѣтомъ Бѣлзскимъ ажъ до Крылова въ тое границы рѣки Буга отъ Ляховъ забраны села Володимерского повѣту на имя Михалъ, а Поромово, а Кречово а Ясепово.
Отъ того логу, куды велъ Михайло Котовичъ и зъ зятемъ своимъ паномъ Яронимомъ Крупскимъ рѣкою Бугомъ уверхъ до врочища Чорное лозы вдолжъ якобы на двѣ мили, а отъ Чорное лозы до границы Боженицкое вдолжъ якобы на милю а розницы въ шырки, што Свѣтицкіе и Петровскіе и Османскіе изъ селъ своихъ завели, индѣ на полъ мили а индѣ на чверть миль.
Того Михайло Котовичъ и врадникъ Щасного повѣдили отъ дѣдовъ и прадѣдовъ своихъ у держанью, еножъ Петровскіе а Османскіе изъ села своего Городка, бои, кгвалты, грабежы на многихъ мѣстцахъ намъ чынять.
Мѣсеца Сентебря 18 день, въ суботу.
Оповѣдилъ панъ Янъ Свѣтицкій границу имѣнья своего Стрыжовки зъ имѣньемъ князя Александра Вишневского, селомъ великого князства Езовомъ, а зъ имѣньемъ Щасного Львовича Чернейковомъ, а зъ имѣньемъ Михайла Котовича и зятя его пана Яронима Крупского, воеводича Бѣльзкого, Лудинскимъ, оповѣдилъ грани, поченшы отъ Каменя колодезя, гдѣ повѣдили, якобы мѣла быти пята въ того колодезя повѣту Городельского, отъ того колодезя до Бакачъ врочища, отъ Бакачъ до Буга и Бугомъ по полъ рѣки до Чернейкова, отъ Черникова черезъ Бугъ лозами до врочища Рудки, отъ Рудки полемъ до Могилы, отъ Могилы дорогою черезъ дубровы до Гусинское границы до врочища Глубинъ села своего Гусина и зъ селомъ Лудинскимъ великого князства, и побѣдилъ, ижъ отъ тое Глубины починаеть ся граница села моего Гусина зъ селомъ Лудинскимъ отъ Стрыжовское границы дубровами до врочища Дивіи горы, а отъ Дивеи горы польми ку озеру Веренемишу. И тамъ здалъ панъ Свѣтицкій пяту Петровскому села его Городка; которыхъ границъ обудву селъ панъ Свѣтицкій велъ якобы на двѣ мили, и повѣдилъ панъ Свѣтицкій, ижъ мамъ то у въ упокойномъ держанью.
На то панове Лудинскіе повѣдили: въ томъ мѣстѣ зъ вами насъ Бугъ дѣлить по полъ рѣки, а куды ты велъ, то естъ властность наша.
Тогожъ дня, мѣсеца Сентебря 18 день, въ суботу.
Земяне Городельскіе, Петровскіе и Османскіе повѣдили быти границу свою имѣнья своего Городка зъ имѣньемъ Лудинскимъ великого князства пановъ Котовичовъ: напервѣй отъ врочыща рѣченого Рову дубровою горою до врочища Глубокое долины, отъ долины польми и дубровами до Кочаное могилы, отъ тое могилы посредъ озера Ракова, отъ того озера черезъ лѣсъ до Буга.
А того всего укругъ якобы на милю, а въ ширки межы тыхъ двухъ обводовъ Лудинского и Городского якобы на полъ мили.
На то повѣдили панове Людинскіе: куды вели панове Городенскіе, Петровскіе а Османскіе, то естъ отчызна наша по всимъ тымъ границамъ, а намъ граница Бугъ.
Мѣсеца Сентебря 19 день, у недѣлю.
Въ Чорное лозы отъ пяты пановъ Котовичовъ села ихъ Лудинского Бортнова повѣдилъ панъ Гаврило, дворенинъ королевое ее милости и великое кнегини Боны, именемъ владыки его милости Володимерского Генадея и зъ людьми селъ владыки его милости Божанки, Дорогиничъ, Фурсовичъ, Тишковичъ, Полупанщыны, штожъ дей граница повѣту Володимерского съ повѣтомъ Бѣлзскимъ Бугъ естъ по полъ рѣки, а межы тыхъ селецъ вышей описаныхъ владыки его милости и межи селъ повѣту Володимерского, которые села Ляхове привлащыли къ собѣ, а иншые осадили на кгрунтѣ Володимерскомъ и владычества Володимерского, то естъ тые села, которые взяты ку Корунѣ: первое Михалъ, другое Поромовъ, третее Лезница, четвертое Кречово; а то тые села, которые осажены на кгрунтѣ Володимерскомъ и владычнемъ на имя Волчокъ, а другое село на рѣчцѣ Лезницы ново осажено и менують его Лезницою, и повѣдилъ, ижъ тые верху писаные села забраны за короля Александра, а тые осажены отъ осми або надалѣй отъ десети лѣтъ. При томъ тежъ повѣдилъ князь Миколай Збаразскій, штожъ дей съ тыхъ селъ, которые взяты отъ Володимера и ту тежъ зъ имѣнья пана воеводы Судомирского, пана Яна Точинского его милости, съ Крылова земли имѣнья моего Морозовичъ розобрали и на врочищу Волчку, гдѣ было село людей моихъ осажено и его милость панъ воевода Судомирскій тыхъ людей моихъ выграбилъ и съ того врочища ихъ согналъ и свою волю на томъ врочищу Волчку осадилъ. И повѣдилъ панъ Гаврыло, ижъ которые границы межи селъ владыки его милости и межы селъ повѣту Володимерского, я вашу милость по тымъ гранямъ поведу. И велъ насъ отъ Чорное лозы, отъ пяты Котовичовъ имѣнья ихъ Лудинского Бортнова къ Долгой лозѣ, къ Глинищамъ, отъ Глинищъ до Скоморохова кургана, отъ Скоморохова кургана къ долинѣ ку врочищу Жолобову, отъ врочища Жолобова къ Лезницы до дороги, которая идеть отъ Поромова до Лезницы села, тоею дорогою до Петрова озера, держачы Петрово озеро въ лѣвѣ у рѣчку Гуску, и тоею рѣчкою Гускою у Бугъ и посередъ Буга уверхъ до Литовижское границы, до села Молникова Литовижского.
Того всего, куды Гаврило велъ, поченшы отъ Чорное лозы, по всимъ тымъ врочищамъ ажъ до рѣки Гуски и гдѣ рѣчка Гуска упала въ Бугъ и Бугомъ до границы Литовижское, якобы на двѣ мили удолжъ.
Мѣсеца Сентебря 19 день.
Граница ее милости пани воеводиное Судомирское имѣнья ее Крыловского зъ Волынемъ починаеть ся у нарожницы королевское у Цуцновки, отъ Цуцновки ажъ до Колечагъ лѣса, отъ Колечогъ лѣса до гостинца, который идеть до Буртнова, а тотъ гостинецъ напередъ идеть отъ стѣны Лудинское до стѣны Рогошанское князя бискупа Луцкого отъ тое стѣны до стѣны Зельновское тежъ князя бискупа Луцкого, опять отъ тое стѣны Зелиновское ажъ до Бортнова пана Лудинского, которая туды идеть до крыницы, а отъ крыницы до езерка Яновки дороги, и отъ езерка до дубу отъ дубу до нарожницы Порымоской къ Божанки, а отъ тое нарожницы до Петрова озера, а отъ озера до рѣчки Гуски, отъ Рогиничъ села владыки Володымерского его милости, а тая рѣчка упала на верхъ Лесницы ставку ее милости пани воеводиное Судомирское, отъ ставку до Тудорковичъ, а отъ Тудорковичъ до озера, которое идеть подъ горою Тудорскою, а оттуль до Густое лозы, а отъ Густое лозы до рѣчки Свинки, а тая Свинка пришла до границы Морозовичъ, а отъ стѣны Морозовичъ ажъ до стѣны Осмиловское княжатъ Чорторыйскихъ, а отъ того Петницъ става Домоникова тежъ княжатъ Чорторыйскихъ ажъ до села Голубей пани Кголдачовое чого естъ на двѣ мили, которая граница естъ звѣчыстая имѣнья Крыловского зъ Волынемъ. Пры томъ, мы сами, ани вижи наши, ани сторона зъ великого князства ку отказу небыли.
Мѣсеца Сентебря 20 день, въ Понедѣлокъ.
То естъ граница князя Александра а князя Ивана Чорторыйскихъ имѣнья ихъ милости Литовижского, которая недавно положена промежку села, которое село было Володимерское, а теперъ служить до Крылова повѣту Бѣлзского, то естъ на имя Кречево, а князя Чорторыского селъ Литовижскихъ на имя Смиловичи а другое Молниково: напервѣй съ Кречевскою землею у ставка Пятичъ, отъ ставка дорогою Голубскою, которая идеть изъ Смиловичъ до Голубей, тоею дорогою ку озеру Жуковцу. И оповѣдилъ намъ врадникъ князей Чорторыскихъ Литовижскій Василей и зъ людьми Литовижскими на томъ мѣстцу отъ врочища ставка ажъ до озера Жуковца вдолжъ дороги копцовъ тринадцать. И тутъ повѣдилъ въ того Жуковца озера у копца, ижъ тутъ граница кончыть Кречовская села пани воеводиное Судомирское, а починаеть ся земля пани Колдачовое села ее милости Голуби, а зъ другое стороны зъ великого князства кгрунтъ князей Чорторыскихъ села ихъ милости Молникова. И отъ того озера Жуковца вели насъ смужалиною черезъ Бугъ ажъ до Каменое лозы, отъ лозы дубровою у Козій Рогъ черезъ болото уверхъ ставу Карповца, въ томъ мѣстѣ отъ Буга до верха Карповца оказали намъ шесть копцовъ и повѣдили, ижъ пани Колдачовое земля имѣнья ее Голубки повѣту Бѣлзского по праву, а полѣву земля князей Чорторыскихъ имѣнья ихъ милости Литовижского и повѣдили, ижъ въ томъ обводѣ за тыми границами посадилъ панъ Кголдачъ отъ девети лѣтъ село свое на имя Песечное на сыромъ корени и повелъ насъ отъ Карповца врочища къ Днѣпресѣ рѣчцѣ, отъ Днѣпрехи рѣчки къ Блищацкому озеру, отъ озера дорогою Угринскою къ Волчку и къ Гатцѣ; тутъ повѣдили: на правѣ земля пани воеводиное имѣнья ее Тудырковского, а на лѣвѣ Литовижская въ тогожъ врочыща Волчка пришла земля земянъ повѣту Бѣлзского пановъ Бзовскихъ, и повѣдилъ, ижъ тую границу маеть съ паны Бзовскими у въ упокои, поченшы отъ Волчка врочища до Бѣлыхъ Береговъ и просто черезъ Бугъ ажъ до Ливина острова а по кругелъ по дорогу, которая идеть отъ Литовижа до Ждчаровъ, держачы великое князство по лѣву, а повѣтъ Бѣлзскій по праву зъ дороги просто ровомъ врочищомъ розъѣзднымъ ку озеру Бужыщу, отъ озера у Бугъ. Тутъ повѣдилъ врадникъ Литовижскій: на той сторонѣ Буга по праву земля пани воеводиное Судомирское имѣнья ее Пяти-Коровъ посередъ Буга до земянъ границы Городиловцовъ, а съ тыми земяны Городиловскими по полъ Буга жъ ажъ до крыницы Дыменницы, въ тое крыницы гостинецъ естъ, который идеть зъ Сокаля къ Володимеру, и повѣдили, ижъ тотъ гостинецъ дѣлить князей Чорторыскихъ имѣнья ихъ милости Ждарского зъ селомъ земенина великого князства Лаврына Иваницкого, и по праву повѣдили тое дороги земля земянина великого князства Иваницкого, а полѣву земля Литовижская села Ждарского князей Чорторыскихъ, и тутъ здали пяту пану Лаврыну Иваницкому.
Того всего, куды велъ врадникъ Литовизскій Василей, поченшы отъ ставка Пятичъ до Буга, якобы на полъ мили, отъ Буга, отъ озера Жуковца, до Бѣлыхъ Береговъ до Буга жъ якобы на полторы мили, отъ Бѣлыхъ Береговъ до Ливина врочыща и до Кругля и до гостинца, который идеть отъ Литовижа до Ждчаровъ, гдѣ граница Литовизская князей Чорторыскихъ вышла зъ Буга, якобы на милю, то есть на три мили.
Мѣсеца Сентебря 20 день.
А отъ тое нарожницы, гдѣ здалъ пяту границы пану Кгалдачови урадникъ паны воеводиное Судомирское, узявши панъ Кголдачъ границу свою звѣчыстую, тою рѣкою, которая ся починаеть Бугомъ межы селми пани воеводиное Судомирское Кречевомъ а тягнеть се ажъ до рѣки, которую зовуть Урыновка, которая впадываеть у Бугъ, а Бугомъ ажъ до рѣки Волчка, а Волчкомъ ажъ до нарожницы пани воеводиное Судомирское села ее милости Тудорковского до гребли у млынка: того естъ на милю.
При томъ мы сами, ани вижы нашы ани сторона зъ великого князства ку отказу не были.
Мѣсеца Сентебря 21 день, у волторокъ.
Въ того врочыща у Дыменницы крыницы повѣдилъ земенинъ великого князства панъ Лавринъ Иваницкій: тутъ я отъ тое пяты врочища Дыменицы, гдѣ князи Чорторыскіе здали, веду вашу милость границами стародавными, которая есть промежку великого князства повѣту Володимерского и промежку села Сокальского Скомороховъ просто дорогою, которая идеть зъ Володимера до Сокаля подъ гай села Сокальского Скомороховъ, пущаючы гай и село Скоморохи у правѣ, а въ лѣвѣ великое князство, кгрунтъ мой, отъ гаю тою жъ дорогою до гребелки Ильковицкое, которая гребелка естъ на рѣчцѣ на Роятинѣ, и тутъ здалъ границу свою пани Ляховской и людемъ ее Ляховскимъ.
Тою границею, куды панъ Лаврынъ велъ, поченши отъ Дыменинцы до гребли Илковицкое якобы на полъ мили.
Тогожъ дня у волторокъ.
Отъ тое гребли вели насъ люди пани Ляховское села ее милости Ляховского тоею рѣчкою Роятиною у верхъ ахъ до ставу, который ставъ панъ Млечко, земенинъ Бѣлзскій заставилъ къ берегу великого князства на кгрунтѣ пани Ляховское, менячи по правой сторонѣ тое рѣчки повѣтъ Бѣлзскій, а по лѣвой сторонѣ великое князство. И повѣдил и, ихъ посередъ того ставу граница ихъ съ паномъ Млечкомъ естъ, такъ темъ у верхъ тое рѣчки ахъ до крыницы, которая естъ обрублена тыхъ часовъ отъ пана Млечка. Тутъ въ тое крыницы здали люди пани Ляховское пяту свою князю Александру Порыцкому имѣньемъ его милости Порыцку и селу Грушову.
Того обводу, куды вели люди панее Ляховское, поченшы отъ тое гребли Ильковицкое ажъ до крыницы, якобы на полъ мили.
Тогожъ дня у волторокъ.
Отъ тое Крыницы повелъ князь Александръ Порыцкій логомъ у верхъ, откуль тая рѣчка устала, якобы на полъ мили, и менилъ полѣву великое князство, повѣтъ Володимерскій, имѣнья его Порыцка а Грушова, а по праву повѣтъ Бѣлзскій имѣнья пана Млечкова Станятина, и тую долину покинувши у право и велъ насъ просто черезъ гору до другое долины, на которой долинѣ оказалъ намъ кошарыще. И повѣдилъ, ижъ тутъ предковъ его и его самого Волошъя зъ овцами стоивали и тыхъ дубровъ ужывали, и менилъ тутъ по праву землю пановъ Рудкировъ села ихъ Лучичъ, которое было за Александра короля великое князство ку имѣнью Бокѣеву Печиѳостомъ, а по лѣву землю свою села своего Грушова; отъ того кошарыща повелъ до лужка Осового, отъ Осового луга до Глубокое ямы, отъ Глубокое ямы до колодезя, отъ колодезя до Кузмины могилы, отъ Кузмины могилы велъ насъ до копцовъ трехъ, которые копцы есть подъ селомъ его Грушевою, одлѣ дороги, которая дорога идеть зъ Милетина до Володимера на село его Грушово, и тутъ повѣдилъ, ижъ у тыхъ копцовъ трехъ кончыть граница моя села моего Грушова, а починаеть ся земля пановъ Бокѣевъ имѣнья ихъ Милетина, и ту тежъ прышла земля пановъ Рукировъ имѣнья ихъ Лучичъ.
Того обводу, куды князь Александро Порыцкій велъ, поченшы отъ крыницы обрубленое ажъ до копцовъ, по всимъ тымъ врочищамъ якобы на двѣ мили.
Дня 21 Сентебря.
Панъ Городиловскій, земенинъ корунный, велъ границу свою, узявши отъ остаточное нарожницы села корунного Печикуровъ отъ Буга рѣки, Бугомъ все у гору Гольвово ажъ до села королевского повѣту корунного, менячы быти по лѣву князство, а по праву Корунно, менячы стороны великого князства села Ждчаровъ княжатъ Чорторыскихъ, а зъ другое стороны Буга повѣдаючы быти у въ упокойномъ ужыванью, крывдъ ни которыхъ не маеть, границы вдолжъ на милю все Бугомъ.
Тогожъ дня люди села короля его милости Гольвова повѣдили свою границу звѣчистую Бугомъ рѣкою у гору ажъ до стѣны села Скоморохъ королевского, которое держить панъ Янъ Стрѣлъковскій до живота своего, зъ другое стороны Буга селомъ Ждчарскимъ великого князства княжатъ Чорторыскихъ, менечы по правой сторонѣ Корунно, а по лѣву князство, повѣдають быти у въ упокойномъ держанью звѣчыстомъ, крывдъ жадныхъ не маючы.
Тамъ же люди корунные села Скоморохъ замку Сакальского державы пана Миклаша подкоморого короля его милости молодого вели отъ Буга до врочища Дыменицы крыницы до дороги, которая идеть зъ Володимера до Сакаля, и тою дорогою ажъ до Волчка болота, и тымъ болотомъ якобы на версту, и покинувшы тое болото у право вели дорожкою малою якобы на двѣ версты до дубровы, у которой дубровѣ оказали намъ три дубы и повѣдили, якобы мѣли тые дубы окопаны быти, але такъ нѣтъ, и тую дорожку опустившы влѣво а насъ повели гостинцомъ, которого прозывають Татинцомъ ажъ до гостинца, который идеть съ Порыцка до Станятина села пана Млечкова, надъ которымъ менили быти два копцы сыпаные, и повѣдили, ижъ тые копцы мѣди быти промежку селъ великого князства Порыцка а Ляхова, а скажены отъ князя Порыцкого. А того обводу поченшы отъ Дыменницы, по тымъ всимъ врочищамъ якобы на милю. Тутъ тежъ люди села Скомороского здали границу свою земенину повѣту Бѣлзского пану Станиславу Млечку. Панъ Станиславъ Млечко повелъ насъ отъ того мѣстца тымъ же гостинцомъ мененымъ Татинцомъ до долины, отъ долины тоюжъ дорогою ажъ до дубовъ, въ которыхъ менили знаки граничные быти, и повѣдили, якобы князь Порыцкій казалъ тые знаки выжечы, отъ тыхъ дубовъ велъ насъ тою жъ дорожкою Татинцомъ до врочыща Горокъ, отъ Горокъ до врочыща Язвинъ. Тутъ подалъ панъ Млечко границу свою пану Рудкиру селу его Лучычъ, и менилъ тутъ быти по праву повѣтъ Бѣлзскій, а по лѣву великое князство а кгрунтъ князя Порыцкого.
При томъ мы сами, ани вижы наши, ани сторона зъ великого князства ку отказу небыли.
Мѣсеца Сентебра 22 день, въ середу.
Ставшы въ тыхъ трехъ копцовъ, ку которымъ привелъ князъ Александро Порыцкій, ку нарожницы тужъ подлѣ лѣса князя Порыцкого Грушевы панъ Ѳедоръ а панъ Гаврыло Бокѣй повѣдил и, ижъ тутъ ся почынаеть наша граница замочку нашого Милетина отъ границы князя Порыцкого села его Грушовы. У тыхъ тежъ трехъ копцовъ третяя граница пришла съ правое стороны земенина повѣту Сакальского Яна Рудкира села его Лучичъ, которое село Лучычы за Александра короля было великого князства Печиѳостское; и вели насъ Бокеи дорогою, которая идеть зъ Володимера къ Бужску по праву менили быти землю Рукиреву, а по лѣву великое князство, кгрунтъ имѣнья своего Милетина; отъ тыхъ трехъ копцовъ якобы на двѣ стрѣленья зъ лука оказали намъ третій копецъ по правой сторонѣ дороги и тою жъ дорогою ѣдучы такежъ якобы на двѣ стрѣленья оказали намъ копецъ по лѣвой сторонѣ и оттоль вели насъ якобы зъ версту и оказали намъ копецъ неподалеку отъ замочку своего Милетина межи дорогъ, которая идеть зъ Володимера, а другая изъ Сакала до Милетина; потомъ прывели до копца, который есть подлѣ берегу озера пановъ Бокѣевъ Лугу, отъ того копца вели черезъ отногу Серпанецъ посредку болота на имя Луга и берегъ ставу Рукирова посредъ болота потуль вели по тымъ копцомъ и всимъ тымъ мѣстцамъ зъ обудву сторонъ вгодливе тое вгоды отъ тыхъ трехъ копцовъ посредъ болота якобы на милю.
А от толе панове Бокеи вели до отноги посредъ урочища Жидовки долины, менячи быти по праву Рукирово, а по лѣву князство кгрунтъ свой имѣнья своего Милетина, отъ врочыща Жидовки вели насъ панове Бокеи долиною якобы на двѣ стрѣленья, привели до рольи по лѣвой сторонѣ дороги, указуючи намъ горку на той рольи, менячи, ижъ бы ту былъ копецъ, але его взорали панове Рудкирове, а отъ того мѣстца вели дорогою и тоюжъ долиною Жидовкою якобы на стрѣленье и вказали намъ по правой сторонѣ другую горку, менечи тежъ быти копцомъ, и повѣдили, ижъ то естъ другій копецъ. И опустивши тую дорогу и долину у право, а сами ѣхали черезъ гору поораную, и вказали намъ горку менячи быти третій копецъ и подлѣ тое горки дубъ порубаный, въ которомъ знаки крижы зъ обудву сторонъ и далѣй тежъ указали два дубы, въ которыхъ крижы по обѣма сторонамъ, и мало отъѣхавши, опять два дубы съ крыжами, потомъ отъѣхавши указали копецъ, и недалеко отъ того копца два дубы, въ которыхъ крижы по обѣма сторонамъ, и мало отъѣхавши опять два дубы съ крыжами. Потомъ отъѣхавши указали копецъ, и недалеко отъ того копца два дубы съ крыжами зъ обудву сторонъ, потомъ вели насъ на стрѣленье и вказали дубъ, у которомъ знаки крижы и подлѣ него копецъ значный, и потомъ якобы на двое стрѣленья зъ лука прывели насъ по трехъ копцовъ добре значныхъ, и повѣдили, ижъ тутъ ся зышли трои грани: одинъ копецъ менили быти Лещотовскій пана Остророговъ, другій Лучицкій пана Рукировъ, а третій Матовскій пановъ Бокеевъ. И повѣдили, ижъ куды мы вели, то все по праву Рукирово, а по лѣву великое князство кгрунтъ нашъ. А отъ тыхъ трехъ копцовъ вели насъ до врочища Бѣлое крыницы.
А то Рудкиръ повѣдилъ, ижъ тые знаки не суть зъ паны Бокѣи, але суть съ паномъ Остророгомъ села его Лещетовомъ а села моего Лучицы.
Тогожъ дня земенинъ Сакальскій Янъ Рудкиръ велъ насъ отъ посредку болота до врочища Пугачовы горы, отъ Пугачовы горы долиною и горою черезъ дуброву якобы на чверть мили до кургана; тутъ повѣдилъ панъ Янъ Рукиръ, ижъ я тутъ здаю границу пану Остророгови имѣнью его Лещотову.
Панъ Хведоръ а панъ Гаврыло Бохеи повѣдили, ижъ тутъ нѣтъ земли пана Остророговы, але то естъ властная земля наша имѣнья нашого Матова. Отъ того кургана велъ насъ врадникъ пана Остророговъ Пашковскій черезъ дуброву до Бѣлое криницы якобы на тры стрѣленья зъ лука, въ которое Бѣлое крыницы стоячы яко врадникъ пана Остророговъ, такъ панове Бокеи повѣдили, ижъ то естъ граница тая Бѣлая крыница: по лѣву князство, а по праву Корунно. И вели панове Бокеи весполокъ зъ урадникомъ пани воеводиное Судомирское тою Бѣлою крыницою внизъ посредъ болота до копца якобы на тры стрѣленья, который копецъ естъ посредъ болота, и повѣдили, ижъ посредъ того болота граница пани воеводиное Судомирское селу ее Лещетомъ, а на лѣвѣ земенина великого князства Медвѣдеву села его Лешка.
Того обводу пановъ Бокеевъ отъ Жыдовки врочыща долины до Бѣлое крыницы вдолжъ якобы на полъ мили.
А куды Рукиръ велъ, отъ Пугачовы горы до Бѣлое крыницы вдолжъ якобы на полъ мили; а розницы въ шырки межы тыхъ обводовъ на три стрѣленья, а въ иншомъ мѣстѣ якобы на стрѣленье зъ лука.
Повѣдили тежъ панове Бокеи: што на тотъ часъ обвели есмо границу съ паномъ Рукиромъ, то на тотъ часъ маемъ, а стародавная граница то естъ и тое село Лучычы, яко ся у своихъ границахъ маеть: тое село Лучычы было Печыѳостское пановъ Бокеевъ зъ вѣку вѣчыстого а взято за Олександра короля.
Мѣсеца Сентебра 23 день, въ четвергъ.
Врадникъ пани воеводиное Судомирское Пашковскій а дворенинъ господарскій зъ великого князства панъ Станиславъ Медвѣдь вели насъ отъ того копца, который естъ посредъ болота, который копецъ естъ граница пани воеводиной Судомирской съ паны Бокеи до гати, которая гать подъ селомъ великого князства Медвѣдевымъ Ляшки, и повѣдилъ въ тое гати врадникъ пани воеводиное Судомирское, ижъ потуль панее моее граница зъ великимъ княжествомъ села ее Лещотова, а тутъ здаю границу съ князствомъ пану воеводичу Равскому селу его Тартакову, а панее моее граница иде болотомъ въ Коруну на право. И велъ насъ Медьвѣдь посредъ болота рѣчкою внизъ, менуючы свою границу по праву пани воеводиное Судомирское Лещетова, а по лѣву великое князство, кгрунтъ свой, и велъ тоею рѣчкою отъ того копца отъ границы пани воеводиное Судомирское и пановъ Бокеевъ якобы на полъ мили. И отъ тое гати велъ посредъ болота рѣчкою ажъ до Чорное Лозы и межы гати и Чорное Лозы оказалъ осмъ копцовъ а пятнадцать паль набитыхъ. И повѣдилъ Медвѣдь, штожъ тутъ граница противку имѣнья моего естъ земянъ Бобятинскихъ имѣнья ихъ Бобятинъ. А отъ Чорное Лозы велъ насъ посредъ тогожъ болота рѣчкою внизъ якобы на чверть мили до гати Бобятинское и повѣдилъ, ижъ тутъ границу свою зоставую болотомъ, а беру собѣ границу дорогою, которая идеть зъ Бобятина до Тартакова.
Тутъ тежъ въ тое гати оповѣдилъ панъ Станиславъ Волчко, именемъ князя бискупа его милости Луцкого, ижъ тое село Бобятинъ естъ зъ давныхъ часовъ великое князство повѣту Луцкого и мѣлъ бы то повѣдити его милость князь староста Луцкій, еножъ естъ на послузѣ, на войнѣ короля его милости, а съ Коруны жадного оповѣданья и отпору напротивко того не было. И велъ насъ Медьвѣдь тоею дорогою якобы на чверть мили до перехростное дороги, которая идеть зъ Ляшковъ до Колпытова, и велъ тою дорогою первшою до Тартакова, и тою дорогою отъ тое перехростное дороги велъ якобы на чверть мили до млына, который занятъ отъ пана воеводича Равского изъ села его Тартакова. И повѣдилъ, ижъ тутъ тая рѣчка у верхъ посередъ болота дѣлить имѣнье мое Ляшки зъ имѣньемъ пана воеводича Тартаковомъ ажъ до гати, чрезъ которую гать дорога идеть до Спасова села, отъ Первятичъ, менячы по праву пана воеводича Равского, а по лѣву князство. И тутъ въ тое гати здалъ границу пану Александру Кгетолту.
Тужъ панъ Станиславъ Волчко. именемъ князя бискупа его милости Луцкого оповѣдилъ, ижъ село Колпытово а другое Стонятинъ — великое князство, а взято за короля Александра. И ту въ тое гребли стоячы служебникъ пана воеводича Равского Михалъ Березовскій повѣдилъ, ижъ куды велъ панъ Медвѣдь, то все естъ кгрунтъ пана моего, пана Яна воеводича Равского.
Того обводу Медьвѣдева отъ того копца отъ границы пани воеводиное Судомирское и пановъ Бокеевъ до гати, презъ которую гать дорога идеть до Спасова села, вдолжъ якобы на милю, а въ ширки въ шыршомъ мѣстѣ якобы на полъ мили.
Тогожъ дня. Отъ того половицы болота якобы на двѣ стрѣленья велъ насъ панъ Александро Кгетолтъ зъ людьми своими Шпиколосцы, менячы быти границу свою и зъ земяны повѣту Бѣлзского Шофаровскими и села ихъ Спасовского болотомъ же до гребли, и повѣдилъ посредъ того ставку границу свою по праву Шафаровскихъ села ихъ Спаского, а полѣву князство, кгрунтъ свой села своего Шпиколосовъ. И отъ того ставку велъ на лѣво дорогою великою, которая идеть до ставковъ врочыща до гребелки якобы на двѣ версты.
Служебникъ Шафаровскихъ Янъ повѣдилъ, ижъ яко почалъ вести отъ тое половицы болота панъ Кгетолтъ и троху вышей села Первятичъ яко Медвѣдь велъ, то естъ кгрунтъ пановъ моихъ. Отъ тыхъ ставковъ велъ панъ Кгетолтъ посредъ болота, менячи по праву Шафаровскихъ, а полѣву кгрунтъ имѣнья своего Шпиколоского ажъ до гребелки, которая естъ на долинѣ врочищу Пугачовѣ. Служебникъ Шафаровскихъ повѣдилъ: куды веде панъ Кгетолтъ, то естъ кгрунтъ пановъ моихъ. И велъ насъ тою долиною панъ Кгетолтъ у верхъ якобы на полъ мили мимо гору миловую до колодезя, которого повѣдилъ верхъ Пугачовы долины, и отъ того колодезя чрезъ гору и дуброву якобы на чверть мили и черезъ дорогу, которая идеть съ Шпиколосъ до Переспы. И повѣдилъ, ижъ въ тое дороги граница Шафаровскихъ кончыть, а почынаеть ся граница пани Пересопское пани Добричовское, и прывелъ насъ до копца, который менилъ быти собѣ границу съ пани Пересопскою села ее повѣту Белзского Пересопского. И повѣдилъ, ижъ съ тою Пересопскою границу спокойную мамъ; отъ того копца велъ насъ якобы на тры стрѣленья зъ лука ку дорозѣ, которая идеть изъ Сокаля до Стоянова. И оповѣдилъ злѣ тое дороги копецъ и менилъ быти границу свою на правѣ пани Пересопское, а полѣву кгрунтъ свой, и повелъ черезъ дорогу посередъ болота Молозива ажъ до ставку, которого называють Молозовскимъ, а отъ того ставку логомъ ажъ до дороги, которая идеть изъ Стоянова до Сокаля. Съ тое дороги гостинца повернули влѣво другою дорогою, которая идеть до Княжатъ; тутъ здалъ границу Грыцкову Олексѣевича служебнику Денису селу его Хусову, и менили быти поправу повѣту Бѣлзского пана Млечково села его Раждчаловского, а полѣву великое князство села Грыцкова Хусова.
Того обводу Кгетолтова отъ гати, презъ которую дорога идеть на Спасово село, до дороги, которая идеть до Княжатъ, вдолжъ якобы на милю.
И велъ насъ врадникъ Грыцковъ Денисъ тою дорогою якобы на добрую полъ мили до кургана, и менили собѣ быти границу туды и зъ селы повѣту Бѣлзского Бишевомъ а Пересопцы, а отъ того кургана менили собѣ быти границу на правѣ пана Липского, земенина повѣту Бѣлзского, села его Сошна, а полѣву Грыцково села его Хусова, и прывелъ насъ къ ростанемъ и повѣдилъ, ижъ тая дорога на право идеть къ Стоянову, а на лѣво ку Княжу, и велъ насъ тою дорогою Княжскою и повѣдилъ, ижъ на правѣ Стояновское повѣту Сакальского, а полѣву великое князство Грицкова земля. И велъ насъ тою дорогою якобы на полъ мили до лозы Чорное и повѣдилъ, ижъ тутъ граница Стояновская доконала, а прышла земля Торская; менили по праву быти корунно, а полѣву князство, землю Грыцкову села его Хусова. И отъ тое Чорное Лозы повели управо дорогою перехростною долиною, и прывели ку врочищу Вербову Логу, и потомъ прывели насъ ку дорозѣ перехростной и повѣдили, ижъ то естъ врочище Збоище. Того обводу Грыцкова вдолжъ якобы на полторы мили.
И тутъ взялъ врадникъ владыки Володимерского Генадея Гаврыло зъ людьми мѣстечка его Квасовского, менячы быти границу свою и зъ мѣстомъ Сакальскимъ Стояновомъ и велъ насъ долиною и дорожкою влѣво, которая дорога идеть отъ села Бешева до церкви. Стояновское Ильи Светого, и повѣдилъ: по праву мѣстечка Стоянова, а полѣву великое князство мѣстечка Квасова. И вели насъ дубровою якобы на чверть мили, и перевели черезъ дорогу, которая идеть зъ Луцка до Бужска, и вели насъ презъ поле якобы на чверть мили и взвели на дорогу, которая идеть отъ Бешева до Стоянова и тоею дорогою прывели насъ до Сакальского гостинца къ могилѣ врочищу Перелайному. И тутъ повѣдилъ врадникъ владыки Володимерского, ижъ дей тутъ граница владыки Володимерского мѣста его Квасова кончыть, а пана Марка Васильевича, села его Жеравнина, починаеть и зъ мѣстомъ Сакальскимъ Стояновомъ, и поправу повѣдилъ быти мѣста Стоянова, а полѣву имѣнья его Жоравницкого. Отъ Княжское границы до могилы Перелайное обводу владыки Володимерского на полторы мили, а въ ширки якобы на милю.
Отъ тое могилы Перелайное велъ насъ панъ Марко дорогою до воли, которая воля сѣдить одлѣ Церкви Светого Ильи, которую волю менилъ панъ Марко быти осажену отъ осми лѣтъ на кгрунтѣ своемъ великого князства, и тую волю держачы полѣву, а мѣстечко Стояново по праву, ку болоту великому черезъ озерце посредъ гребли. И повѣдилъ панъ Марко, ижъ тымъ болотомъ великимъ по половицы дѣлить границу села моего Жоравниковъ и зъ селомъ коруннымъ Тетовчычы, и тымъ болотомъ великимъ велъ якобы на чверть мили до врочыща кургана, до Турьего Рогу, и тутъ здалъ границу панъ Марко земенину великого князства Микитѣ Ржищовскому.
Подстаростій Сакальскій Андрей повѣдилъ: куды велъ панъ Марко то все естъ корунно, а пану Марку ту ничого нѣтъ.
Того обводу пана Маркова отъ Перелайное могилы до врочища Турьего вдолжъ якобы наполъ мили, а розницы въ шырки якобы на милю.
Мѣсеца Сентебра 23 день, у четвергъ. Врадникъ пани воеводиное Судомирское пани Точынское Пашковскій, стоечы въ гати повѣдилъ: штомъ менилъ первѣй того посредъ болота границу пана своего села Лещетова, а по лѣвой сторонѣ великого князства села Медьвѣдева Ляшковъ, тутъ тежъ здавамъ на лѣвой сторонѣ пану воеводичу Равскому селомъ его Тартакову, Хлопимъ Рогомъ, Стрѣльчу, Копытомъ, а по правой сторонѣ предъ се веду коруннымъ.
И панъ воеводичъ велъ отъ тое гати и отъ рѣчки посредъ болота якобы на стрѣленье и потомъ взялъ влѣво другимъ болотомъ около самого села Ляшковъ, и велъ до гребелки подъ самое село Ляшки якобы на двѣ стрѣленья зъ лука, и тутъ стоячы на гребелцѣ здалъ границу Шаѳаровскому и Озерскому, земяномъ повѣту Бѣлзского, и повѣдилъ панъ воеводичъ: ижъ дей на тые имѣнья мои верхуписаные прывилья въ себе мамъ, и часу своего хочу ихъ оказати. И повѣдилъ, ижъ полѣву князство, а по праву корунно. И отъ тое гребелки велъ насъ долиною якобы на три стрѣленья зъ лука, потомъ узъѣждчаючы на гору одну долину пустилъ управо на Божанки, а сами вели другою долиною улѣво до горы до Спиколосъ, и тамъ ѣхали черезъ поля и дубровки и черезъ дороги, не вказуючы жадныхъ знаковъ ажъ до дороги, которая идеть зъ Ляшковъ до Шпиколосъ. И тутъ стоячы служебникъ Медьвѣдевъ именемъ пана своего повѣдилъ, ижъ гдѣ панъ Шаѳаровскій ведеть съ паномъ Озерскимъ, то естъ земля пана моего до тое дубровки, а отъ тое дубровки земля естъ пана Кгетолтова.
И панъ Кгетолтъ повѣдилъ, ижъ куды ведуть панъ Шаѳаровскій и Озерскій, то естъ властная земля имѣнья моего Шпиколосъ, и потомъ съ тое дороги вели насъ черезъ поля до долины, не вказуючы жадныхъ знаковъ, черезъ ржище и мимо гумна людей пана Кгетолтовыхъ. И повѣдилъ панъ Озерскій, ижъ то естъ долина, которая дѣлить князство съ Коруною, которую зовуть Набожанка, а панъ Кгетолтъ повѣдилъ: яко поля и гумна, куды ведуть, то все естъ имѣнья моего Шпиколосъ, и ѣхавшы отъ тое гребелки якобы близу мили.
Панъ Озерскій по полъ болота здалъ границу пану Шаѳаровскому, которій повѣдилъ: гдѣмъ велъ по тымъ мѣстномъ, по правой сторонѣ Корунно, имѣнья нашого сполного Набожанокъ, а по лѣвѣ пана Кгетолтово; а тутъ по полъ болота здаваю границу пану Шафаровскому имѣнью его Браневу. А панъ Кгетолтъ повѣдилъ, ижъ куды вели панове Ляхове, то все естъ по обѣимъ сторонамъ имѣнья моего Шпиколоского, и панъ Шафаровскій велъ болотомъ около села, займуючы оплотокъ Шпиколосъ рѣчкою ку горѣ, якобы на тры стрѣленья зъ лука, которая выходить съ ставу Шпиколоского до дороги и долины, которая дорога идеть отъ Бешева до Шпиколосъ. А потомъ кгды ся упоминалъ панъ Янъ Бешевскій, повѣдаючы: пане Шафаровскій чому заводитъ мое? и панъ Щафаровскій повѣдилъ: кгды твое, я дамъ покой. И ведшы тою дорогою и вернулся опять назадъ до тое жъ крыницы, и здалъ пану Бишевскому. Панъ Бишевскій отъ тое крыницы велъ по полъ ставу пана Кгетолтова, который подъ дворомъ его Шпиколоскимъ, ажъ до долины, которая дѣлить имѣнье пана Грыцка Кощенского Хосово, которо Хусово повѣдилъ быти корунно, едно князство держить. И тою долиною велъ, повѣдаючы: по правой сторонѣ есть мое имѣнья моего Бешева, едножъ панъ Кгетолтъ того уживаеть, а по лѣвѣ панъ Грыцко ку князству; и тою долиною велъ насъ якобы на шесть стрѣленья зъ лука, не вказуючы знаковъ; и первѣй того велъ якобы на полдень, а потомъ якобы на усходъ солнца черезъ поля и дубровки до дуба великого, который въ долинѣ стоить, въ которомъ повѣдилъ быти знакъ зъ едны стороны, але выжжены, а зъ другое стороны незнать ницъ, а того якобы на версту. А панъ Кгетолтъ повѣдилъ: гдѣ води панъ Бишевскій, то все естъ по обѣма сторонамъ мое, имѣнья моего Шпиколоского, а по лѣву то естъ Грыцково имѣнья его Хусова, а отъ того дуба велъ насъ черезъ дубровки и поля и хрусты до Лозы Пинчуковы. А отъ Пинчуковы Лозы такежъ вели долиною презъ поля и дубровки до Лысое горы, не вказуючы намъ жадныхъ знаковъ, ани въ деревѣ, ани копцовъ; едно повѣдилъ, ижъ то были знаки копцовы, але я не вѣмъ, гдѣ ихъ шукать, кгды покажены. И тутъ въ тое горы Лысое панъ Бишевскій осталъ, а подалъ пану Матею Вишневскому и пану Онтонему Чистовскому, селу ихъ Торковъ, и тутъ взялъ панъ Вишневскій отъ тое горы Лысое долиною подъ село свое Торки, и тамъ велъ насъ долиною Стыковатицою до другое долины до Рудки, мимо села князства великого, едно Хусово Грыцково, а другое Княже, што Москва держить, маючы тые села влѣвѣ, презъ поля ораные и ржища, и повѣдилъ, ижъ тые ролъи и поля и ржища естъ моего села Торокъ, але съ князства его кгвалтомъ робять. И одтоле велъ черезъ поля и долины и черезъ дрокгу великую, которая идеть съ Стоянова до Луцка, а оттоле на дорогу, которая идеть съ Княжа до Квасова, и тою дорогою ѣхавшы, которая идеть надъ долиною и менилъ тую долину Полинова долина, я тутъ уздалъ пану подстаростему Сакальскому пану Андрею Островскому.
А того обводу пана Вишневского естъ съ полъ мили добрую, а по тымъ всимъ мѣстцамъ, куды насъ водилъ, не вказалъ знаковъ, ани копцовъ жадныхъ.
А отъ тое долины Пилиповы крыницы велъ насъ панъ Островскій, менячы быти кгрунтъ имѣнья короля его милости . Сакальского Стоянова, который кгрунтъ панъ подстаростій менилъ и повѣдилъ, ижъ на тотъ часъ во вжыванью владыки Володимерского и его подданыхъ мѣста Квасова. А то повѣдилъ, ижъ оны забрали, кгды то пусто лежало, и тою долиною до гостинца, который идеть съ Стоянова до Володимера якобы на шесть стрѣленья изъ лука, и тымъ гостинцомъ до могилъ, и повѣдили, ижъ на той могилѣ бабу сожгли зъ мѣста Квасова такъ яко на границахъ, а отъ тое могилы Бабъи до долины Чернца презъ поле, и тою долиною врочычщомъ Чернцемъ до крыницы Чернца, и гай на ней. Отъ тое крыницы презъ болото до могилъ Высоцкихъ, отъ могилъ до ставку черезъ греблю Высоцкую просто презъ поле якобы чверть мили, которыхъ дей поль суть во вжыванью кгвалтовномъ презъ пана Марка Жоравинского и владыки Володимерского, Квасова, до гостинца Орѣховского, отъ гостинца до Рудки презъ дубровы мимо Сыново до могилы, гдѣ повѣдили, ижъ естъ копецъ при ней, а оттоле до Небожки озера, и тамъ здаваеть пану Душы, повѣдаючы, ижъ того озера половицу въ князствѣ, а половица въ Корунѣ. Панъ Марко Жоравинскій повѣдилъ, ижъ гдѣ панъ подстаростій Сакальскій велъ съ паны шляхтою корунною, то вшыстко по обѣма сторонамъ естъ княство великое, отчизна властная моя имѣнья моего Жоравинского. А имѣнья владыки Володимерского Квасова и цо панъ подстаростій указуеть копецъ, то естъ копецъ владыки Луцкаго и пана Семашковъ и мой, а кгрунтъ князства великаго.
Того обводу, поченшы отъ гати Медьвѣдевы села Ляшковъ, по всимъ тымъ врочыщамъ до болота и озера Небожки якобы на три мили.
Мѣсеца Сентебра 24 день, въ пятницу. Земенинъ великого князства Микита Ржищовскій велъ отъ того Турьего Рогу посредъ болота великого, менячы быти границу свою и зъ селомъ коруннымъ Тетивчычы, а Пиръятиномъ, а зъ Синковомъ якобы на добрую полъ мили ажъ до болотца, которое пришло зъ лѣвое стороны, которое болотцо называють Рудкою, которое болото Рудка естъ противъ двора Микиты Ржищовского. И повѣдилъ Ржищовскій, ижъ мнѣ ту естъ граница посредъ болота великого зъ имѣньемъ пана Богдана Семашковымъ Бужиномъ, и повѣдилъ, ижъ ту въ того болота Рудки граница моя кончыть, а почынаеть ся граница имѣнья пана Семашкова Бужина.
Тутъ въ того болотца Рудки врадникъ пана Богдана Семашковъ Бужинскій Игнатъ повѣдилъ быти границу свою и зъ селомъ коруннымъ Бириловскимъ, и велъ насъ посредъ того болота великого, держачы село земенина великого князства Микиты Ржищовского и людей его по лѣву у князствѣ, а село Барилова по праву. И повѣдилъ врадникъ пана Семашковъ, ижъ противъ Ржищовского пана Микиты двора земенина великого князства рѣчка на имя Судиловка устала и иде по тому болоту, и великое болото пущаючы у право, и тою рѣчкою Судиловкою и болотомъ меншымъ велъ ажъ на противку села пана Семашкова Бужына, а на противку села корунного Борылова.
На то земенинъ корунный Матей Рокалъ повѣдилъ, ижъ тая рѣчка Судиловка изъ стороны болота моего устала, а иде по моей сторонѣ, а граница села моего Барилова и зъ селомъ великого князства пана Семашковымъ Бужиномъ по половицы болота великого и болота малого Конского. Тужъ панъ Александро Кгетолтъ повѣдилъ, ижъ въ тое болото Коньское и поля и дубровы и островъ, который надъ болотомъ Коньскимъ естъ, посполитое мнѣ съ паномъ Богданомъ Семашкомъ. И вели врадники пана Семашковъ и пана Александровъ тоею рѣчкою Судиловкою по полъ рѣчки, менячы быти границу свою до палечного кола, на правѣ повѣдилъ Бариловского села, Бужского повѣту, а по лѣву великое князство, кгрунтъ имѣнья пана своего Бужинского, а отъ палечного кола тоюжъ рѣчкою внизъ до границы князя Коширского, села его церковного Скрыголова до врочыща Кадолбища. И тутъ здали границу враднику князя Коширского Скрыголовскому. Того обводу пана Семашкова отъ Рудки болота до врочища Кадолбища вдолжъ якобы на милю. Земенинъ корунный Рокалъ повѣдилъ, ижъ то есть врочыще мое, и тые поля и сѣножати суть мои, быломъ ихъ завжды у вживанью. А што панъ Кгетолтъ повѣда, ижъ то естъ кгрунтъ его спольный съ паномъ Семашкомъ, то естъ мой кгрунтъ, и ту въ того Кадолбища здалъ Ракальскій границу пани Майковой, селу ее Увину.
Мѣсеца Сентебра 25 день, въ суботу. Врадникъ князя Александра Коширского Скрыголовскій Пашко велъ насъ отъ того врочыща Кадолбища, менячы быти границу свою и зъ земениномъ коруннымъ Рокалевскимъ, селомъ его Бариловомъ, посредъ рѣки Судиловки, и тоюжъ рѣкою велъ до ставу млина подъ селомъ Уивиномъ. И въ того ставу повѣдилъ, ижъ на правѣ тое рѣчки пани Майковое повѣту Бужского, села короля его милости Уивинского, а по лѣву князя Коширского, и велъ отъ того ставу менячы быти границу свою посредъ рѣчки Судиловки ажъ до Рудки, которая Рудка пришла злѣва и впала у туюжъ рѣчку Судиловку, и повѣдилъ, ижъ ту граница моя кончить, а пришла граница земенина великого князства Микиты Хутровского, села его Мервенского, повѣдаючи по праву корунно а по лѣву князство.
Того обводу врадника князя Коширского Стрыголовского отъ врочыща Кадолбища до Рудки вдолжъ якобы на милю.
Тогожъ дня земенинъ господарскій великого князства Микита Хутровскій велъ отъ Рудки, менячы быти границу свою и зъ селомъ коруннымъ Миколаевомъ, тоюжъ рѣчкою Судиловкою до ставу, который естъ на той же рѣцѣ Судиловцѣ, а отъ того ставу тоеюжъ рѣкою Судиловкою, менячы быти границу свою по половицы тое рѣки до врочыща селища Стерковца, и повѣдилъ, ижъ ту граница села Миколаевского кончыть, а пришла земля пановъ Лащовъ, замочку ихъ корунного Стрымелча, и менилъ ту границу свою по полъ тоежъ рѣки на правѣ повѣту Бужского, а по лѣву великое князство, кгрунтъ свой повѣту Луцкого.
На то повѣдилъ служебникъ Петръ именемъ подстаростего Бужского Якуба Лопатинского: откуль велъ панъ Микита Хутровскій, менячи собѣ по половицы рѣки границу, то естъ кгрунтъ села Миколаевского, староства Бужского, а граница села Миколаевского съ паномъ Микитою тамъ далѣй лежить. Отъ того селища Стерковца велъ Микита тоюжъ рѣчкою подъ замочокъ пана Лащовъ Стрымелчь а подъ село Хутровского Мерве черезъ ставъ, который естъ промежку замочку пановъ Лащовъ и села Хутровского Мервы, якобы на милю. А отъ того ставу велъ якобы на стрѣленье зъ лука до рѣки Стыра, и менилъ поправу пановъ Лащовъ, а по лѣву великого князства, кгрунтъ свой, и тымъ Стыремъ рѣкою уверхъ до врочища Сушковы смуги якобы на милю, и тою смугою велъ уверхъ, менечи по праву корунно, Щуровское, повѣту Бужского, а по лѣву великое князство, кгрунтъ свой села своего Хутрова. И велъ отъ тое смуги Сушковы черезъ дуброву до врочища колодезя якобы на три стрѣленья зъ лука, а отъ того колодезя низкимъ мѣстомъ велъ дубровою мало не на полъ мили до дороги великое, которая идеть отъ Олекса до Луцка на противку врочища Круглого борку, и повѣдилъ Микита Хутровскій, ижъ ту граница моя кончы, а пришла земля князей Курцевичовъ села ихъ Корсовского, менилъ быти поправу корунно, мѣста Щуровского, повѣту Бужского, а по лѣву великое князство, села его Хутровского; и тутъ здалъ пяту свою княземъ Курцевичомъ, селу ихъ Корсовскому.
Тогожъ дня. Земенинъ корунный Матѣй Рокаль Барыловскій велъ, менячы быти границу села своего Барилова, болотомъ великимъ, которое идеть съ Стоянова, которое дѣлить зъ имѣньемъ пана Богдана Семашка Бужиномъ. И отъ того болота, опущаючы болото и рѣку, которую менилъ встати на своемъ кгрунтѣ на его сторонѣ, и меншымъ болотомъ, которое зовуть Коньскимъ болотомъ, и надъ тымъ болотомъ велъ черезъ дуброву сѣножатьми. И прыходячы къ селу князя Коширского къ Скрыголову тое болото Коньское опустилъ улѣвѣ, черезъ поле велъ опять ку томужъ болоту великому, и тамъ ведучы указалъ намъ дубъ, зъ одное стороны зжоный, и повѣдилъ, ижъ тутъ зъ одны стороны знакъ былъ, але выжженъ, а зъ другое стороны знаку небыло, и въ того болота здалъ границу пани Майковой имѣнья ее Увина. Того обводу, гдѣ велъ Рокаля, якобы на чверть мили, и повѣдилъ: куды веду, то естъ въ лѣвѣ князство, а поправу корунно, а то дей поля панъ Семашко сего году началъ сѣяти.
На то врадникъ пана Семашковъ Бужынскій и врадникъ пана Александровъ Кгетолтовъ Полгановскій повѣдили, ижъ гдѣ води Рокаля, то естъ яко поля, такъ дубровы и сѣножати и селища Бужынскіе, на которомъ первѣй тутъ село Бужынъ седѣло: то все естъ великое князство а кгрунтъ пановъ нашихъ имѣнья пана Семашкова Бужына а имѣнья пана Кгетолтова Полганова, и то попове нашы у во вжыванью зъ данныхъ часовъ.
А отъ того болота пани Майковая зъ людьми села корунного, державы своее Увина вела отъ того болота черезъ поле, займуючы все село князя Коширского Скрыголово до болота другого и презъ лѣсъ до Олешкова дуба, отъ того дубу до Точыща врочыща, отъ Точыща до Княжое Водицы, отъ
Водицы Осовыми лужки до Миколаевское границы, которую менилъ Михолаевскій до могилы, котора стоить подлѣ дуба Столоватого, а то вела межы селъ великого князства Галичаны а Колмова а коруннымъ селомъ своимъ Увиномъ, пущаючы князство влѣвѣ, а Коруну вправо.
Того обводу отъ Увина до могилы якобы съ чверть мили, а тутъ у тое могилы пани Майковая здала границу Миколаеву селу пана Познанского, староства Бужского, и отъ тое могилы вели люди села Миколаевского до Вербня, презъ горы, отъ Вербня черезъ врочищо Стырковъ до границы Стрымелицкое замочку пановъ Лащовъ. Того обводу Миколаевцовъ естъ болшъ мили.
И недоѣжчаючи до Стиковца врочища у болотка на дорозѣ, которую зовуть шляхъ Татарскіе, тутъ здали границу Миколаевцы паномъ Лащомъ, и повѣдили, ижъ куды мы вели по тымъ мѣстцамъ, по тую нарожницу дорогу, которая намъ естъ съ паномъ Лащомъ и съ паномъ Микитою Хутровскинъ, то все естъ по праву корунно, а по лѣву великое князство.
И тою дорогою, которую зовуть шляхъ Татарскіе, велъ панъ Лащъ якобы на стрѣленье за лука, а потомъ зъ дороги влѣво дубровою якобы на шесть стрѣленей зъ лука прывелъ насъ на дорогу, которая идеть отъ гостинца до Стрымелча. А надъ тымъ мѣстцемъ, гдѣ взъѣхалъ на дорогу, стоить береза безъ верху стара, а врочыща тому мѣстцу нѣтъ, и тою дорогою до отноги ставу, оповѣдаючи, ижъ влѣвѣ пана Хутровского, а по праву мое, и тою дорогою якобы о двѣ стрѣленья зъ лука. Потомъ повелъ управо дубровою, а дорогу опустилъ влѣвѣ, и тою дубровою посредъ озера просто чрезъ поле до долины, которая естъ подъ селомъ Мервою пана Хутровского, земенина великого князства, а зъ имѣньемъ Стримельча замочку пановъ Лащовъ, бо тотъ замочекъ Лащовъ отъ села Хутровского Мерны на стрѣленье зъ лука презъ рѣчку и болотце, и отъ того рову въ рѣчку Судиловку якобы на стрѣленье велъ насъ, котора впада и ставку пановъ Лащовъ въ рѣку Стыръ. И тою рѣкою Стыремъ внизъ границу менилъ быти зъ великимъ князствомъ по половицы по праву: корунно, а по лѣву князство, и тою рѣкою Стыремъ до Шельгова границы Берестецкое пани Богушевое подскарбиное земское имѣнья ее милости Берестечка. А отъ Шельгова дорогою, котора иде до Слунви, и тою дорогою велъ якобы на полъ мили до врочыща Сушковы долины до нарожницы Корсовское князства великого, а съ Коруны Щуровича пана Познаньского державы, и тутъ панъ Лащъ здалъ свою границу пану Познаньскому.
Того всего обводу пана Лащова отъ могилы до Сушковы долины на три мили. А Хутровского обводу зъ великого князства отъ Рудки до дороги, которая идеть отъ Олекса до Луцка, на противку врочыща Круглого борку якобы на три мили, а розницы въ ширшомъ мѣстѣ якобы на милю, а индѣ иа полъ мили, а индѣ на чверть мили.
На то врадникъ пана Богдана Семашковъ Бужинскій и врадникъ пана Александра Кгетолта Полгановскій, а врадникъ князя Коширского Скрыголовскій а земенинъ великого князства Микита Хутровскій повѣдили: куды вели Матѣй Рокаля Бариловскій, и пани Майковое люди Уиняне, и люди пана Познанского Миколаевцы и панове Лащи, то все вели по великому князству а по властному кгрунту имѣней пановъ нашихъ, якожъ мы того отъ давныхъ часовъ у спокойномъ держанью и вжыванью ажъ до тыхъ часовъ, а Церковъ Матей Рокаля тыхъ недавныхъ часовъ на властномъ кгрунтѣ нашомъ поставилъ; а што пани Майковая село Скрыголово заѣхала, тое село звѣчыстое церковное а повѣту Перемильского. Къ тому тежъ повѣдилъ Хутровскій, ижъ тое Шольгово естъ у властной земли моей кгрунтъ мой, а границы жадное пану Лащу и съ пани Богушевое нѣтъ, ено я мамъ границу съ пани Богушовою.
Мѣсеца Сентебра 27 д. въ понедѣлокъ.
Отъ того врочыща отъ Круглого борка, который естъ по близу дороги великое, которая идеть съ Олекса до Луцка, гдѣ прывелъ панъ Микита Хутровскій, повѣдилъ врадникъ князя Василья Курцевича, державцы Ровенского, Слоновскій Васко и зъ людьми князя своего Слоновскими, ижъ тутъ по праву земля Олексого повѣту Бужского села Конюховъ, а по лѣву великое князство а кгрунтъ князя нашого села его Слоновского. И вели отъ того Округлого борку врочыща дорогою великою, которая идеть отъ Олекса до Луцка, якобы на полъ мили до горы, которую гору называють Узводнемъ, и тою горою вели насъ до рѣки Стыра, гдѣ рѣчка Слоновка упала у Стыръ, якобы на полъ мили, и Стыремъ рѣкою уверхъ вели якобы на милю ажъ до рѣки Смоленки, тоею рѣчкою Смолянкою уверхъ вели якобы на полъ мили до руды ставу, которое мѣстцо называють врочищомъ Болдары, который дей ставъ заставилъ панъ Фридрушъ Олексій зъ имѣнья своею Олеска отъ десети лѣтъ. И повѣдили, ижъ по тымъ всимъ границамъ, куды есмо вели, по праву земля Олексого села его Конюховъ и Щуравицкое, а полѣву великое князство а кгрунтъ нашого села его Слоновского, и тутъ у того ставу врочища Болдаръ пришла граница земянъ великого князства пановъ Опарыпескихъ пана Степана а Михайла а Яска Михайловичовъ. И повѣдилъ врадникъ князя Курцевича Слоновскій, ижъ въ томъ обводѣ нашомъ за тыми границами нашыми посадилъ панъ Фридрушъ Олексій село свое, на имя Поповцы, на кгрунтѣ князя нашого отъ десяти лѣтъ.
На то повѣдилъ панъ Петръ Подгорецкій именемъ пана Станислава Хвридруша, хоружого Галицкого, ижъ поченшы отъ Щуровичъ мѣстечка короля его милости повѣту Бужского, куды велъ врадникъ князя Василья Курцевича, то естъ все корунно а кгрунтъ села пана моего Новосельского замку Олексого, а то естъ граница пана моего рѣка Слоновка: тая дѣлить великое князство зъ кгрунтомъ пана моего ажъ до села великого князства Опарипсовъ, а тое границы тою рѣкою Слоновкою на двѣ мили.
Въ того ставу врочыща Болдырского здалъ врадникъ князя Василья Курцевича села его Слоновского границу земяномъ великого князства паномъ Опарипескимъ Степану а Михайлу. На то повѣдилъ Петръ Подгорецкій именемъ пана Фридрушовымъ, ижъ якомъ первѣй повѣдилъ, такъ и теперъ повѣдамъ, ижъ рѣка Слоновка естъ граница великого князства зъ кгрунтомъ пана моего, а тотъ млынъ Болдарскій и тая Руда естъ кгрунтъ пана моего.
Тымъ ставомъ и рѣкою Смоленкою вели земяне великого князства Опарыпескіе якобы на полъ мили, менячи быти границу свою и зъ селомъ папа Фридрушовымъ Олексого Конюхи, а съ тое рѣки вели презъ лѣсъ якобы на чверть мили до Бѣлевца села, а отъ того села грядою, и повѣдили, ижъ то село теперь естъ пана Фридрушово, але сѣди на властномъ кгрунтѣ нашомъ за Старшого короля господаря нашого его милости и великого князя Жикгимонта посажено. И повѣдили Опарипескіе, ижъ за тымъ селомъ Бѣлевцомъ на врочыщы Вербовцы дворъ и гумно отца нашого былъ.
На то повѣдилъ панъ Петръ Подгорецкій, ижъ то все, куда ведуть Опарипескіе и повѣдають быти кгрунтомъ своимъ, то естъ кгрунтъ пана Фридрушовъ, которого естъ отъ давныхъ часовъ у вжыванью, и не естъ то граница князству съ Коруною, ено то, которуюмъ я первѣй повѣдилъ, рѣка Слоновка. И тою градою прывели насъ Опарыпескіе ку соснѣ порубаной, у которой менили быти зъ обудву сторонъ грани, еножъ повѣдили выпалены. Потомъ прывели до другое сосны спаленое, у которой тежъ менили быти грани и повѣдили, ижъ вызжены. И тужъ оказали намъ знакъ копцовый, и вели тою градою якобы на чверть мили, отъ тое грады вели презъ поле и дубровою якобы на двѣ стрѣленья, и зася вели градою якобы тежъ на двѣ стрѣленья, и на той градѣ оказали намъ два знаки копцовые, потомъ вели насъ дубровою якобы на двѣ версты, а полемъ врочыщомъ Бренымъ якобы на чверть мили, и зася вели боромъ якобы на полъ стрѣленья зъ луна, оказали намъ дубъ, въ которомъ менили быти грани зъ обудву сторонъ. И повѣдили, ижъ люди пана Фридрушовы Конюховцы вырубали и выказили, якожъ и знакъ того естъ, ижъ грани были, и вели тою дубровою якобы на полъ мили и оказали намъ въ той дубровѣ могилу и дубъ на ней зрубанъ, въ которомъ менили быти грани, и прывели къ дорозѣ, которая идеть отъ села великого князства Опарыпсовъ до села корунного пана воеводича Подолъского пана Яна Олексого до Бродовъ, и менили въ тое дороги врочыщо Бесѣды и повѣдили, ижъ дей се тутъ сходятъ завжды на копу село Опарипеское и зъ селомъ Бродскимъ, и направа всякіе. И повѣдили, ижъ то вже на правѣ земля села Бродского ку Лексу тягнеть, а на лѣвѣ великое князство а кгрунтъ села нашого Опарипеского. И вели Опарипескіе отъ того врочыща Бесѣдъ презъ дуброву якобы на милю, а полемъ якобы на чверть мили до врочыща Сопелницы до трехъ курганцовъ, и на той дубровѣ оказали намъ два колодези, менили собѣ быти граничные: одинъ пана воеводича Подольского пана Яна Олексого села его Бродовъ, а другій села своего Опарипеского. И отъ тыхъ колодезей оказали гору, которую менили быти Орле, отъ тое Орли оказали знаки трехъ копцовъ одинъ подлѣ одного неподалеку, потомъ дубовое пеневъе оказали, и повѣдили, ижъ въ нихъ грани были, еножъ люди пановъ Олексихъ выказили, и въ того врочыща горы Сопелничицы и въ тыхъ трехъ курганцовъ повѣдили, ижъ тутъ три грани зышли: одна села великого князства Опарыпеская, а другая земянъ тежъ великого князства Лидуховскихъ, а третяя грань села пана Яна воеводича Подольского Бродского, и повѣдили: куды есмо вели, то все по праву корунно, а по лѣву великое князство, и тутъ дей повѣтъ Луцкій кончыть, а вже починаеть ся повѣтъ Кремянецкій.
При томъ тежъ оповѣдили земяне Опарипескіе, ижъ дей у томъ заводѣ нашомъ на властномъ кгрунтѣ а звѣчыстой властивой земли нашой панове Олексіе осадили села: первое Бѣлевецъ, другое Вербовецъ, третее Шнерево сего лѣта осажоно. Къ тому тежъ ставы на властномъ кгрунтѣ нашомъ засыпали млыны и руды ку пожытку своему посправляли поля, и сѣножати и дерево бортное и озера наши властные позабирали, якожъ на то маемъ листы и свѣдомъе, и часу потребы то оказати хочемъ, которыхъ мы земли зъ вѣку вѣчыстого у держанью и вжыванью были и теперь зъ держанья своего не выпущаемъ.
Къ тому тежъ земяне Луцкіе Рогозницкіе и Ингненскіе оповѣдили: штожъ дей тое село Броды Огерница за короля Александра взято ку Корунѣ отъ пановъ Олексихъ, а то дей естъ близкость наша.
На то панъ Петръ Подгорецкій именемъ пана Яна воеводича Подольского повѣдилъ, ижъ по тымъ всимъ омененымъ врочищамъ, куды вели Опарипескіе, естъ кгрунтъ пана воеводичовъ корунный по обѣма сторонамъ, а тые врочища не суть граница съ князствомъ, але властность пана воеводичова, который ту не ма ни съ кимъ границы, але индѣ вышей по лѣвой сторонѣ естъ съ князствомъ граница Корунѣ, а того кгрунту панъ воеводичъ у вжыванью отъ давныхъ часовъ.
Мѣсеца Сентебра 27 день, у понедѣлокъ.
Тутъ на той дорозѣ стоячы, панъ Лащъ, которая идеть зъ Берестечка, имѣнья пани Богушовое, до Слунви села князя Курцевича Булыгина урочища, которое зовуть Сушкова долина, гдѣ здалъ ураднику пана Познаньского пану Яну Закровскому имѣнья пана Познаньского повѣту Бужского Щуровица, отъ того урочыща Сушковы долины велъ насъ панъ Закровскій тоюжъ дорогою якобы на чверть мили до горы, которую называють Узводнемъ, и отъ тое горы, опустивши дорогу улѣвѣ, повелъ насъ горою Узводнемъ якобы на стрѣленье зъ лука, а потомъ опустившы тую гору управо, велъ насъ на укосъ горы оное полъ мили черезъ межы поля засѣяные ржищки и гречьнищами якобы на полъ мили добрую, не вказуючы намъ жадныхъ знаковъ, ажъ черезъ селище князя Курцевича до рѣки Слоновки до езу, которого зовуть Головный езъ. И тутъ врадникъ пана Познанского здалъ границу Щуровицкую имѣнья его милости пану Фридрушу хоружому Галицкому имѣнью его милости Поповцомъ и Новоселкомъ, и повѣдил, ижъ тутъ полѣву земля великого князства имѣнья князя Курцевича Слонова, а поправу земля корунна имѣнья Щуровицкого.
И тутъ зъѣждчаючы съ тое горы вышейписаное Узводня, гдѣ велъ врадникъ пана Познаньского, и зъ войтомъ Щуровицкимъ, и зъ мѣщаны, тогды тыежъ мужы пана Познаньского сами повѣдил и, ижъ куды врадникъ нашъ зъ войтомъ ѣдуть, мы того не вѣдаемъ, але мы старѣлися тутъ, а границы иншое не мѣли съ Лунвляны, одно тою горою Узводнемъ, а съ тое горы просто у рѣку Стырь.
Но то врадникъ князя Курцевича зъ мужми села князя своего Слововскими повѣдилъ: куды врадникъ пана Познаньского велъ зъ мужми и зъ войтомъ, то зъ обудву сторонъ естъ князство великое а кгрунтъ князя моего и то езъ Головный властный князя моего, якожъ и тые мужы пана Познанского сами сознавають.
Того обводу корунного, поченшы отъ врочыща Сушковы долины, по всимъ тымъ мѣстцамъ ажъ до рѣки Слоновки до врочища езу Головного якобы на милю, а обводу великого князства, куды велъ Курцевича врадникъ, поченши отъ Круглого борка, по всимъ тымъ врочищамъ ажъ до ставу Болдырского, якобы на полъ трети мили, а розницы промежку тыхъ границъ въ ширшомъ мѣстѣ якобы на полторы мили.
И отъ того врочища езу Головного, гдѣ здалъ границу свою врадникъ пана Познаньского Щуровицкій, повѣдилъ панъ Фридрушъ хоружый Галицкій, ижъ то естъ рѣка Слоновка и тутъ починаеться граница Олѣская повѣту моего, а Бузскій повѣтъ кончить. И повѣдилъ, ижъ тоею рѣкою Слоновкою по полъ рѣки уверхъ, на которой рѣцѣ естъ мостъ межы села великого князства Слонова а межы села пана хоружого Новоселокъ, который мостъ по половицы робять и мыто на полъ беруть, ажъ до врочища Везищъ гати, а отъ Везищъ по бродъ Сетратинскій, што ѣздять отъ Конюского села до Бродского села, посередъ ставу Опарипеского земянъ повѣту Луцкого, а отъ млына тоюжъ рѣкою уверхъ до крыницы Гливятинки. Въ тое крыницы пустилъ тую рѣку Слоновку улѣво, а отъ тое крыницы Гливятинки велъ панъ Фридрушъ дорогою, которая идеть изъ села Опарипсовъ до Красного поля, и ведшы тою дорогою якобы на стрѣльбище, и тамъ одну дорогу управо пустилъ до Сопелничъ поля, а влѣво повелъ долиною дорогою, которую зовуть Суходолъ. И тою дорогою ведши якобы на милю и пустили дорогу улѣво на пашни Опарипескіе, а управо насъ повели отъ Суходолъ черезъ поле Красное до горы Дранчы. И Тутъ ведучы насъ повѣдилъ, ижъ по лѣву великое князство, а по праву корунно, и на той горѣ здалъ границу брату своему пану Яну воеводичу Подольскому селу его Бродомъ а другому Черницы. На то повѣдили земяне великого князства Опарипескіе: куды кольвекъ велъ панъ Фридрушъ, то все естъ великое князство а кгрунтъ нашъ села нашого Опарипеского и Немировского, и тогосмы отъ давныхъ часовъ отъ дѣдовъ и прадѣдовъ и отцовъ нашыхъ у спокойномъ держанью, лечъ кгвалтовне то въ насъ отыймують.
Обводу корунного, куды велъ панъ Фридрушъ отъ урочища езу Головного по всѣмъ тымъ врочыщамъ ажъ до лѣсковъ Лидуховскихъ якобы на три мили.
А обводу великого князства земянъ Опарипескихъ, поченшы отъ ставу Болдырского по всимъ тымъ врочыщамъ ажъ до врочыща Сопелничъ, якобы на полъ трети мили; промежку тыхъ обводовъ розницы въ ширшомъ мѣстѣ якобы на милю.
Мѣсеца Сентебра 28 день, у волторокъ.
Отъ тыхъ трехъ курганцовъ и отъ тое горы, которую называють Сопелницкою, гдѣ подали земяне великого князства Опарицескіе пяту свою земяномъ тежъ великого князства Лидуховскимъ пану Гаврилу а пану Михайлу а пану Гнѣвошу и братьи ихъ. И тые панове Лидуховскіе вели насъ отъ тое горы Сопелницкое и отъ тыхъ трехъ курганцовъ на долъ полемъ якобы на версту до долины, которую называють врочищомъ Смолною, и вели насъ посредкомъ тое долины якобы на милю до дороги, которая идеть зъ Бродовъ къ Наквашы, и тою дорогою, которая идеть по той долинѣ верхумененой, до рѣки Икови. Тутъ повѣдили, ижъ куды вели тымъ логомъ, по праву земля селъ Олексихъ: Наквасовского и Черницкого, а по лѣву великое князство а кгрунтъ нашъ. И повѣдили панове Лидуховскіе, ижъ надъ тою рѣкою Иковью посадили панове Олѣскіе люди отъ пяти лѣтъ на властномъ кгрунтѣ нашомъ, якожъ мы тымъ людемъ полъ и сѣножатей своихъ робити же допущаемъ, едножъ съ Олѣска моцне кгвалтомъ збожъя наши побирають и насъ самихъ бьють и земли и сѣножати наши позабирали и многіе грабежи и крывды намъ чинять, еножъ мы предъ се того у держанью и во вживанью. И вели насъ тою рѣкою Иковью унизъ черезъ ставки до ставу, который естъ противъ села Поповского Олеского, и въ того ставу сдали границу свою враднику князя Вишневского, князя Дмитрея и братьи его Вишневецкихъ, Стецку селу ихъ милости Вишневскому Крутнову, и побѣдили ижъ отъ того ставу нижей еще рѣкою сугранною землю мають съ княземъ Дмитреемъ Вишневскимъ зъ имѣньемъ его Крутневомъ.
На то повѣдилъ панъ Лаврынъ Носовскій именемъ пана Яна воеводича Подольского, ижъ, куды веди земяне Лидуховскіе, то все естъ кгрунтъ пана воеводичовъ властность его, и тутъ панъ воеводичъ границы съ князствомъ не ма ни съ кимъ.
Того обводу, куды вели панове Лидуховскіе, поченшы отъ трехъ курганцовъ и отъ горы Сопелницкое, по всимъ тымъ врочыщамъ ажъ до ставу, который подлѣ села Олексого Поповского, якобы на двѣ мили. А розницы промежку тыхъ обводовъ якобы на милю, а индѣ меншы.
Мѣсеца Сентебра 28 день, у волторокъ.
Отъ горы Дранчое, гдѣ здалъ границу свою панъ Фридрущъ хоружій Галицкій села своего Бѣлевца а Вербова а Шнерева пану Яну Олѣскому воеводичу Подольскому и селомъ его Броду и Черневца зъ селми князства великого межы Опарыпсами Немѣревомъ и Лидуховомъ повѣту Кремянецкого, велъ насъ панъ Андрей Жабицкій отъ горы Дранчее и отъ лѣсовъ Лидуховскихъ на другую гору межы лѣсы Супелнича а Середнимъ, гдѣ панъ староста лѣсъ Сопелничій менилъ быти Залозскимъ села Черницъ а Наквасы селъ пана воеводичовъ коруннымъ, а Середній лѣсъ менилъ быти Лидуховскимъ ку князству великому, пущаючи его улѣвѣ. И велъ насъ черезъ горы и долы и черезъ дубровы ажъ до дороги крыжовое, которую зовуть Королевская дорога, котора иде зъ Лидухова до Олекса, а другая дорога съ Поповичъ иде до дуба, которого воженья естъ тою дубровою якобы съ полъ мили, и тою дубровою ведучы не вказалъ намъ жадныхъ знаковъ. А отъ тое дороги крыжовое, которую менили быти Королевскою, велъ насъ до дороги Почаевское черезъ дуброву якобы на чверть мили такъ же безъ знаковъ, и кгды прывелъ къ дорозѣ Почаевской, которая идеть съ Черницы села до Почаева, указалъ тамъ подлѣ тое дороги по лѣвой сторонѣ могилку. И повѣдилъ врадникъ пана воеводича, якобы тая могилка мѣла дѣлити Лидухово село князства великого и зъ селми Корунными Олѣскими: Белены а Поповцы, и повѣдилъ, ижъ по лѣву то естъ Лидуховское, князство, а по праву корунно.
А панове Лидуховскіе, земяне великого князства повѣту Кремяницкого, повѣдили: гдѣ панъ Андрей подстаростій Олѣскій вашу милость води, то естъ все зъ обудву сторонъ великое князство а кгрунтъ нашъ вѣчный, которого есмо во вжыванью ажъ до сихъ часовъ, а отъ тое могилы опустившы тую дорогу влѣво велъ насъ управо дубровою до другое могилы, которую зовуть Бугаева могила, якобы на чверть мили.
И тутъ повѣдилъ панъ Андрей, врадникъ Олѣскій, ижъ тая могила чинить границу пану воеводичу съ княземъ Дмитромъ и зъ братьею его князи Вишневецкими, але не зъ Лидуховскими. И тутъ стоячы въ тое могилы на то повѣдилъ врадникъ князя Дмитрея Вишневского Стецко: што ты менишъ тотъ копецъ за границу собѣ мѣти съ княземъ моимъ, то граница не есть князю моему зъ границою пана твоего, але то естъ граница князя моего съ паны Лидуховскими и съ паны Лосатинскими земяны великого князства повѣту Кремяницкого, которую промежку собою маемъ у великомъ князствѣ, а граница князя моего съ паномъ твоимъ на томъ мѣстцу, гдѣмъ я вашу милость ждалъ и вашей милости то оповѣмъ.
А земяне тежъ повѣту Кремяницкого панове Лидуховскіе повѣдили: што врадникъ пана воеводичовъ Жабицкій мени быти туды границу свою съ князи Вишневецкими, ино мы вашей милости то оповѣдамы, ижъ ту никгды панъ воеводичъ не мялъ, ани ма границы съ князи Вишневскими, але то естъ наша граница весполокъ и зъ земяны Кремянецкими, паны Лосатинскими и съ князи ихъ милости Вишневецкими, которыхъ мы границъ отъ прадѣдовъ и отъ отцовъ своихъ у спокойномъ держанью были и теразъ держымы и вжывамы.
Мѣсеца Сентебра 29 день, въ середу.
Отъ тое гребли, которая естъ подъ селомъ Поповцы, гдѣ здали пяту земяне великого князства повѣту Кремяницкого Лидуховскіе изъ села своего Лидухова, велъ врадникъ князя Дьмитрея Вишневецкого Стецко зъ людьми князя своего Крутенскими, менячы быти границу свою съ паномъ Яномъ воеводичомъ Подольскимъ тою рѣчкою Иковъю внизъ якобы на чверть мили до села Дудина и подъ тымъ селомъ Дубиномъ у броду тое рѣчки повѣдилъ, ижъ то естъ бродъ граница: тутъ права даемъ межы собою, яко зъ великого князства князи и панове, такъ съ Коруны людей своихъ ставять ку справедливости всякое речы; а отъ того броду велъ дорогою, и повѣдилъ, ижъ тое село Дудинъ по праву естъ Олѣское пановъ воеводичовъ Подольскихъ, а по лѣву великое князство грунтъ князей нашихъ селъ ихъ Крутенского и Лопушенского и Бобровецкого, а полѣву тое дороги осадилъ панъ Янъ воеводичъ люди на властномъ кгрунтѣ князей моихъ. И оттоль велъ тою дорогою якобы на двѣ версты, и повѣдилъ, ижъ подлѣ тое дороги по деревъю въ дубѣхъ были грани, але люди пана Яна воеводичовы выказили, еножъ мы ихъ не видѣли. И тою дорогою велъ на долъ до крыницы, которую зовуть Нѣмечова, надъ которою село Нѣмечово сѣди. И повѣдилъ врадникъ князей Вишневскихъ, ижъ то на правѣ село пана воеводичово, а по лѣву грунтъ князей моихъ, и тутъ въ тое крыницы здалъ пяту князю Щепану а князю Водиславу Збаразскимъ селамъ ихъ Нежковцомъ, а Серестцу а Загоръю.
Того обводу князя Вишневского якобы на милю.
На то отъ пана воеводича Подольского Лаврынъ Носовскій, Янъ Каменскій повѣдили, ижъ по тымъ всимъ врочыщамъ, яко почалъ вести врадникъ князя Вишневецкого ажъ до тое крыницы, то все велъ по кгрунту пана воеводичову, которого завжды былъ у вжыванью и теразъ естъ.
Отъ тое пяты, гдѣ здалъ врадникъ князя Вишневского, вели князи Збаражскіе дорогою, держачы село пана Яна воеводичово Нѣмечово по праву, а по лѣву великое князство кгрунтъ отчызны своее, и повѣдили, ижъ на кгрунтѣ нашомъ по лѣвой сторонѣ его милость панъ Янъ воеводичъ осадилъ человѣка своего. И вели тою дорогою презъ гору якобы на чверть мили до озерца малого, которого называють Чеховомъ, отъ того вели дорогою якобы на двѣ стрѣленья до ставу до врочыща Мокрого, который ставъ естъ подъ селомъ пана воеводича Подольского Пали-Коровы, и повѣдили князи Збаражскіе, ижъ по полъ ставу тою естъ граница наша, по праву корунно Олѣское, а по лѣву кгрунтъ нашъ.
На то повѣдилъ Лаврынъ Носовскій именемъ пана Яна воеводича Подольскою, ижъ што кольве князи Збаражскіе менили быти кгрунтомъ своимъ, то все естъ кгрунтъ пана воеводичовъ корунный, и ту ни съ кимъ границы съ князствомъ панъ воеводичъ не ма. И вели насъ князи Збаражскіе отъ того ставу влѣво дорогою якобы на версту, село пана воеводича Пали коровы держачы по праву, до долины врочыща Урви-Хвостовъ вертепа. И подлѣ тое горы оповѣдили на дву мѣстцахъ, менячы быти знаки каменьемъ складеные, и повѣдили, ижъ розвожено, губячы знаки, еножъ одинъ камень великій въ одной ямѣ естъ, а другая яма безъ каменья. И оповѣдили князи Збаражскіе, ижъ дей панъ воеводичъ Подольскій панъ Янъ осадилъ село отъ дву лѣтъ на властной земли а кгрунтѣ нашомъ, которое панъ воеводичъ называеть Кутищомъ; отъ того врочыща Урви-Хвостовъ вертепа вели до дороги, которая естъ по близу оного врочища, котора дорога идеть отъ Кремянца къ Залозцамъ, и тою дорогою вели якобы на чверть мили. И оповѣдилъ врочыщо долъ, которого прозывають Воробъева Лоза, котора естъ поблизу оное дороги, и вели тою рѣкою на полъ мили до ставу, который естъ на рѣтцѣ на Серетцу. И повѣдили, ижъ тотъ ставъ зоставилъ панъ воеводичъ того року на властномъ кгрунтѣ нашомъ селъ нашихъ Нѣжковцовъ и Серетецъ на кгрунтѣ тежъ на властной земли нашой осадилъ панъ воеводичъ села Ячнище, другое Березцы а третее, якомъ первѣй повѣдилъ, Кутище. А воеводиная Подольская пади Ядвига властное отчызное село наше, на имя Дудинъ, безправне тому семь лѣтъ взяла и теперъ держить. И тутъ подалъ пяту свою враднику князя Дьмитрея Вишневского селу его Олексинцомъ на низъ рѣчкою Серетцемъ.
Того обводу князей Збаразскихъ якобы на полторы мили.
На то повѣдилъ Лавринъ Носовскій именемъ пана воеводыча Подольского, ижъ куды ведуть княжата Збаражскіе спочатку и до того врочища рѣчки Серетцы, то все естъ кгрунтъ пана воеводичовъ, и тотъ ставъ и тые села суть осажены на кгрунтѣ пана воеводичовѣ, на который повѣдаеть мѣти привилья, и тутъ панъ воеводичъ не ма ни съ кимъ границы съ князства Литовского.
А што повѣдають, якобы мѣла пани воеводиная Подольская село Дудинъ взяти, то ее милость взяла зъ розсудку съ права пановъ комисарей корунныхъ.
Тою рѣчкою Серетцемъ отъ того ставу, гдѣ подали княжата Збаражскіе границу враднику князя Дьмитрея Вишневского пану Стецку, велъ врадникъ князя Дьмитрея Вишневского зъ людьми князя своего Олексинцы рѣчкою Серетцемъ внизъ якобы на легкую милю до рѣки Серетя, и тою Серетемъ внизъ до Залозецъ якобы на милю, отъ Залозецъ тоюжъ рѣчкою Серетомъ внизъ до Чернеховское границы кнегини Ильиное ее милости кнегини Біяты якобы на милю до врочыща ставу Реневского на тойже рѣцѣ Серету, который повѣдають засыпалъ панъ Янъ воеводичъ Подольскій. И повѣдилъ врадникъ князя Вишневского зъ людьми князя своего, ижъ панъ Янъ воеводичъ Подольскій ку властному кгрунту князей нашыхъ по рѣтцѣ Серетцѣ и по Серету чотыры ставы засыпалъ и пять селъ осадилъ на властномъ кгрунтѣ князей нашыхъ, едно противъ Залозецъ. А чотыре села на рѣтцѣ Мелной.
На то отъ пана воеводича повѣдано, ижъ куды кольве ведуть до границы Залозское и до границы кнегини Ильиноо ее милости Біяты Чернеховское, то все вели презъ грунтъ пана воеводичовъ. А цо повѣдають, же бы ставы чотыры на кгрунтѣ князя Вишневского на рѣтцѣ Серетцѣ и на другой на рѣцѣ Серетѣ засыпалъ и пятъ селъ засадилъ вышемененыхъ, то все учинылъ яко на своемъ властномъ кгрунтѣ, на которые и листы и прывилья маеть. Князя Дьмитрея Вишневского обводу и князей Збаражскихъ, поченши отъ тое гребли, которая естъ подъ селомъ Поповцомъ, гдѣ Лидуховскіе земяне здали пяту князю Дьмитрею Вишневскому до ставу Реневского, по всимъ тымъ вышей описанымъ врочищамъ вдолжъ якобы на полъ шесты мили.
Мѣсеца Сентебра 29 день, въ середу.
Тотъ же врадникъ пана Яна воеводича Подольского Олѣскій Андрей Жабицкій зъ людьми пана своего Велюны а Поповцы велъ, менячы быти границу свою и зъ селы великого князства князя Дьмитрея Вишневского: съ Крутенскимъ а Бобровцомъ, а Лопушнемъ, отъ тое Бугаевы могилы на конецъ лѣса черезъ гору просто якобы на чверть мили до врочыща Озерецъ, которые естъ на рѣцѣ Иквѣ понижей Бобровецъ. Отъ того врочыща Озерецъ до Локотковецъ селища якобы на двѣ стрѣленья зъ лука. И тутъ повѣдили, ижъ дей княжата Вишневскіе осадили двѣ селѣ на кгрунтѣ Олѣскомъ, на имя Крутнево а Бобровцы и полъ села Лопушного. Отъ Локотковецъ вели якобы на версту презъ горы до Лопушное, и тутъ повѣдили, ижъ по полъ села крыницою по праву земля пана воеводичова Олѣская, а по лѣву великое князство а кгрунтъ князей Вишневскихъ. А отъ тое крыницы Лопушенское вели черезъ поля и дубровы якобы на полъ мили до врочища Березовыхъ лозъ, а отъ Березовыхъ лозъ дубровою якобы на чверть мили до могилъ, которым по близу селища Красногодубкого. А отъ могилъ вели дорогою, котора дорога иде зъ Нѣжковцовъ до Збаража якобы на милю до горы Холма, до дороги, которая идеть отъ Чернехова до Вишневца, и повѣдилъ, ижъ тутъ ся кончить граница Олѣская и зъ княжаты Вишневскими, а почынаеть ся и зъ границою кнегини Ильиное замку ее Колодна.
На то повѣдилъ врадникъ княжатъ Вишневскихъ Стецко: куды менилъ быти собѣ границы врадникъ Олѣскій и куды велъ, по всимъ тымъ врочищамъ то естъ властная отчизна и дѣдизна князей Вишневскихъ, и отъ отцовъ и отъ дѣдовъ своихъ тыхъ земль завжды князи мои у держанью и вжыванью и въ упокою ажъ до тыхъ часовъ, а то естъ граница Вишневцу съ Черниховомъ, куды я велъ и врочища описалъ, едножъ за тыми границами и врочищами, которыемъ я описалъ по смерти князя Ивана Вишневского тому тры годы, черезъ тые границы презъ мене описаные приходячы люди пана воеводичовы Олѣскіе кгвалты, бои, грабежи чинять. Къ тому тежъ на властной отчизной земли князей моихъ отъ трехъ годовъ осадилъ панъ воеводичъ пять селъ, якомъ вышей тые села меновите описалъ.
Тутъ тежъ оповѣдилъ князь Щепанъ Збаражскій зъ братьею своею, и тутежъ врадникъ князя Дьмитрея Вишневского панъ Стецко, ижъ въ томъ обводѣ, куды врадникъ пана воеводичовъ Андрей по властной земли нашей велъ, завелъ нашихъ властныхъ селъ, которыхъ есмо отъ дѣдовъ и отъ отцовъ своихъ въ держанью и вживанью упокойномъ были и теперь держимъ, князей Вишневскихъ Крутнево а Лопушное а Бобровцы, а князей Збаражскихъ дворъ Нѣжковцы и зъ селомъ а другое село Серетецъ, а третее, Загорье, то въ тыхъ двухъ обводѣхъ у княжатъ Збаражскихъ и князей Вишневскихъ, которыхъ у въ упокойномъ держанью князи Збаражскіе и князи Вишневскіе, и которые на властномъ кгрунтѣ ихъ панъ воеводичъ осадилъ всѣхъ тыхъ пятнадцать селъ.
Того обводу, куды врадникъ пана воеводичовъ Олѣскій велъ отъ могилы Бугаевы до горы Холма до дороги, которая идеть отъ Чернехова до Вишневца, вдолжъ якобы на три мили.
А куды съ князства врадникъ князей Вишневскихъ и князи Збаражскіе вели отъ гребли, которая естъ подъ селомъ Поповцомъ, до ставу Реневского, въ тыхъ обѣихъ обводахъ вдолжъ якобы на полъ шесты мили.
А разницы въ ширки межи тыхъ обводовъ якобы на три мили.
Мѣсеца Октебра 1 день, въ пятокъ.
Отъ тое дороги, котора идеть отъ Чернехова до Вишневца, недалеко отъ горы Холма тотъ же врадникъ Олѣскій Андрей Жабицкій велъ отъ тое дороги дубровою, менячи быти границу пана Яна, воеводича Подольского, и зъ замкомъ кнегини Ильиное Колодномъ, и и велъ до Бѣлою Холма до горы, и на той юрѣ менилъ быти могилу за копецъ каменемъ зложеную, отъ тое могилы, повышей Игровицы врочища, повышей Ивачева, ажъ до Частоловское границы до могилы, котора лежить подлѣ дороги Колоденское въ дубровѣ по лѣвой сторонѣ. И ту стоячи въ тое могилы, врадникъ пана Яна воеводичовъ Жабицкій весполъ зъ урадникомъ его милости пана Познанского зъ имѣнья его милости Злочевского, которое естъ пять миль отъ Чернехова и зъ иншихъ селъ повѣдили, ижъ тое имѣнье спольно есть пановъ нашихъ съ одного, и тутъ мы здаемъ границу свою враднику Тарнопольскому его милости пана Краковскою, пану Пыстринскому.
Тою обводу врадника пана Яна, воеводича Подольскою, Жабицкою отъ горы Холма и отъ дороги, котора идеть отъ Чернехова до Вишневца до Частиловки границы до могилы, вдлужъ якобы на три мили.
На то повѣдилъ врадникъ кнегини Ильиное ее милости кнегини Біяты Костелецкое Колоденскій Беняшъ зъ людьми кнегини Ильиное, и тутъ тежъ врадници князей Збаражскихъ и князей Вишневскихъ: гдѣ кольве врадникъ пана воеводичовъ Жабицкій водить, то все по обѣма сторонамъ естъ князство великое а кгрунтъ отчизнъ пановъ нашихъ, съ которыхъ кгрунтовъ отчизнъ своихъ панове наши отъ дѣдовъ и прадѣдовъ своихъ завжды у спокойномъ держанью суть; ено не вѣмы, для которыхъ прычинъ то теперъ обводять, и села осажывати и ставы засыпати хочуть, и въ то ся уступуе, до чого отецъ и предкове его ничего не мѣли, ани ся въ то уступовали, якожъ часу потребы ясне ся то окажеть, и будуть умѣти панове наши о то съ паномъ воеводичомъ мовити.
Мѣсеца Октебра 1 день, въ пятокъ.
Въ того ставу Реневского повѣдилъ врадникъ князства Дьмитрея Вишневского Стецко, ижъ тутъ князи моихъ имѣней ихъ милости граница кончить, то естъ въ того ставу Реневского, которое мѣстце называли звѣчистое, коли еще того ставу не было, бродъ Реневскiй. Тутъ здаю границу кнегини Ильиной: кнегини Біятѣ имѣнью ее милолости Чернехову. Отъ того ставу броду врочища Реневского велъ понамѣстникъ Чернеховскій Богданъ зъ бояры и зъ мѣщаны и людьми кнегини Ильиное Чернеховскими. И вели тымъ ровомъ якобы на стрѣленье зъ лука менячи по праву Залозское а по лѣву великое князство а кгрунтъ кнегини Ильиное имѣнья ее Чернехова. И съ того рову веди пасъ на лѣво презъ гору до дороги, котора идеть отъ Залозецъ презъ село Реневское, которое село, повѣдили, ижъ осажено на кгрунтѣ Чернеховскомъ отъ пана Яна, воеводича Подольского, отъ десети лѣтъ, и вели того дорогою якобы на стрѣленье, и одну дорогу опустили влѣво, а другую дорогу управо. И повѣдали, ижъ тутъ отъ двадцати лѣтъ дороги жадное не было: какъ Залозцы поставилъ панъ Мартинъ, такъ тые дороги стали. И въ томъ мѣстѣ повѣдали грани въ дубѣ, але Залозскіе люди выказили, и вели межи тыхъ дорогъ и черезъ дорожки якобы на двѣ стрѣленья до долу, который врочищомъ называють Лозы. А отъ того врочища Лозы, вели дубровою якобы на двѣ версты, и прывели къ логу Бѣлоголовскому, и оказали на той долинѣ яму якобы колодезь, и веди тою долиною якобы на версту ажъ въ рѣчку Бѣлоголовку, на которой рѣтцѣ ставъ вдѣлалъ панъ воеводичъ отъ дву лѣтъ, и презъ тотъ ставъ просто до кургана, повѣдали по лѣву кгрунтъ кнегини Ильиное имѣнья ее Чернехова, а по праву папа Яна воеводича Подольскою Залозское. А отъ того кургана якобы на стрѣленье черезъ гору до долины, которую зовуть Бзовичи, и тою долиною вели уверхъ якобы на версту добрую, и одну долину опустивши управо, а насъ вели влѣво долиною жъ якобы на версту, и зася такежъ одну долину опустивши управо, а насъ вели улѣво долиною жъ якобы на полъ стрѣленья, и оказали колодезь. И повѣдили, ижъ дей съ того колодезя стада, быдла, кони князей нашихъ поивали, которыи по тымъ дубровамъ хожывали. И вели отъ того колодезя черезъ дуброву на версту до дороги, котора идеть отъ Чернехова до Львова, и подлѣ тое дороги оказали врочищо Жидовскіе Лозы. И повѣдили, ижъ тутъ по праву земля пана воеводичова Залозская кончить, а починаеть ся земля пана Познанского села его Олшевского. А отъ того врочища Жидовскихъ Лозъ веди полемъ якобы на великую полъ мили до дву кургановъ врочища Дѣвіихъ и до дороги, которая идеть отъ Золочова до Козлова и до Теребовля, и вели тою дорогою до кургановъ, которые были по лѣву. Тутъ повѣдили, ижъ граница пана Познаньскою села его Олюевского кончить, а пришла земля пана Яна Сѣненского селъ его Глинное и Золочовки, и вели тою дорогою якобы большы мили до врочища Лозъ, которые меновали Олехновы Лозы, и повѣдали, ижъ въ тыхъ Лозъ завсегды со всихъ селъ пограничныхъ яко зъ великою князства такъ съ Коруны Польское на тыхъ границахъ право съ обѣюхъ сторонъ дають, якожъ и съ Коруны Польское Янъ Каменскій и войтъ Залозецкій Шиманъ именемъ пана воеводича то сознали, и оттуды вели якобы на стрѣленье до крыжа каменого, и повѣдили, ижъ то естъ врочище крыжъ Олехновъ, который крыжъ каменный громъ наполы роскололъ, але самъ увесь цѣлъ.
На то отъ пана Яна воеводича Подольского, Янъ Каменскій и зъ войтомъ Залозецкимъ Шимономъ повѣдили, ижъ яко врадникъ князей Вишневскихъ границу здалъ у ставу Реневского кнегини Ильиное. И велъ врадникъ княгини Ильиное ажъ до врочища Жидовскихъ Лозъ, гдѣ повѣдили быти, ижъ граница пана воеводича Подольского кончить, а починаеть ся граница пана Познанского имѣнья его Зохочевского. То все вели презъ властный кгрунтъ пана воеводичовъ имѣнья его Залозского и по обу сторонамъ естъ корунно не маючи зъ жадны стороны границы съ князствомъ, тыле зъ его милостью паномъ Познанскимъ, съ которымъ маю сполны имѣнья и сполны права на тое жъ имѣнье отъ предковъ его королевское милости. А отъ пана Познаньского служебникъ его милости Миколай Островскій а Ондрей Мякитскій а войтъ Едренопольскій повѣдили, ижъ куды врадникъ кнегини ее милости Ильиное Богданъ почалъ вести отъ Жидовскихъ Лозъ отъ границы пана воеводичовы ажъ до врочища Лозъ и крижа названого Олехнова, то все велъ презъ кгрунтъ пана нашого имѣнья Злочевского, которого граница естъ пану моему съ паны зъ Олѣска, съ которыми панъ нашъ ма сполный кгрунтъ и сполны права на тые имѣнья, а ту съ князствомъ жадное границы не ма, ено рѣку Серетъ, то естъ граница великому князству съ Коруною. И вели отъ того врочища крыжа Олехнова тоею жъ дорогою якобы на полторы версты до долины Глубокое, и тую дорогу опустили у право, а насъ вели тою долиною Глубокою влѣво, и повѣдили, ижъ тутъ вже граница Гологорская Синанского кончить, а то пришла граница повѣту Теребовского села Козловского. И вели тою Глубокою долиною ажъ до рѣчки Озерное, и тою рѣчкою унизъ якобы на три версты, и привели до врочища броду Дерлова, и тую рѣчку пустили на право, а насъ вели влѣво и менили быти по праву Теребовского повѣту села Козлова а по лѣву великое князство повѣту Чернеховского.
На то повѣдилъ отъ пана Познаньского, ижъ по тымъ всимъ врочищамъ, куды велъ врадникъ кнегини Ильиное, то все естъ кгрунтъ пана моего, и ту нѣтъ границы пана моего съ кнегинею Ильиною, ено намъ естъ граница рѣка Серетъ.
Отъ того броду Дерлова вели полемъ троху дубровы, займуючи якобы на милю, и привели до руды, которую называють Грузкая. И повѣдили, ижъ тутъ въ тое долины права дають съ обѣюхъ сторонъ яко съ князства такъ съ Теребовского повѣту, тутъ завжды на право ся зъѣждчаемъ. Отъ тое Грузское руды вели якобы зъ версту до каменя, которого менили быти граничнымъ, отъ того каменя вели полемъ межи дубровъ мимо врочище Пуцкову Лозу якобы на милю до врочища могилы Дупленатое, и повѣдили, ижъ у тое могилы такѣ же тутъ права дають зъ обу сторонъ на границы яко съ Коруны такъ съ князства. Отъ тое Дупленатое могилы вели до ставу якобы на полтора стрѣленья, который ставъ естъ на Серету рѣцѣ якобы у полъ ставу, и просто презъ тотъ ставъ до озера Плотичого и долины врочища Плотичого, надъ которою долиною могила сыпаная. И повѣдили, ижъ тотъ ставъ отъ полтора года панъ Тарновскій зоставилъ ку великой шкодѣ имѣнью кнегини Ильиное Чернеховскому, якожъ тотъ ставъ уже у пана Тарновского замовленъ за двѣ тысечы и за двѣстѣ золотыхъ. И тутъ повѣдили, ижъ то по праву повѣтъ Теребовскій селъ Петрикова а Березовицы а Пронятина а полѣву великое князство а кгрунтъ кнегини Ильиное имѣнья ее замку и селъ Чернеховскихъ, и ту ся кончить граница кнегини Ильиное имѣнья ее Чернехова, а починаеть ся земля князей Збаразскихъ села ихъ Лозовое.
Того обводу княгини Ильиное вдолжъ якобы на шесть миль.
А корунного обводу вдолжъ отъ Бугаевы могилы по в симъ тымъ врочищамъ ажъ до Частоловское границы якобы на шесть миль.
А розницы межи тыхъ обводовъ двухъ якобы на пять миль.
А въ томъ заводѣ кнегини Ильиное селъ старыхъ звѣчистыхъ, которые тягнули отъ дѣдовъ и прадѣдовъ ку Чернехову и служили предкомъ князей Збаражскихъ и потомкомъ ихъ ажъ до кнегини Ильиное, а забраны по смерти князя Ильиное, то естъ первое Глубочокъ, другое Цебровщина, третее Озерная мѣсто, четвертое Сервироги, пятое Вертелка, шостое Мшанецъ.
А то, которые села осадилъ панъ Познанскій, яко вынялъ тотъ кгрунтъ зъ рукъ княгини Ильиное, первое Сорвироги село Нагоришнее, которое другимъ именемъ называють Киселевцы, другое Масковцы, третее Воробьевщина. А панъ воеводичъ Подольскій осадилъ двѣ селѣ на Мельной а третье Носовцы.
А то, которые села по смерти князя Костентиновей забраны: первое Реневъ, другое Петрашевцы, третье Ванинъ, четвертое Бѣлоголовы.
А то въ томъ обводѣ ставовъ, которые панъ Краковскій и панъ Познаньскій и панъ Янъ воеводичъ Подольскій по смерти князя Ильины поотнимали а иншіе новые позасыпали. На Глубоцкой рѣтцѣ ставовъ двадцать и чотыры. Подъ мѣстомъ Озернымъ два ставы. Села Сорвироговъ ставъ. Бѣлоголовского села два ставы, а меншихъ у Бѣлоголовѣхъ три ставы. На Вертельцѣ рѣтцѣ ставъ другій. У въ Омшанцы рѣтцѣ ставъ. А то которые ставы по смерти небощика князя Ильина той же земли Чернеховской посыпали. Первый Бозенскій ставъ. Другій у въ Омшанцы ставъ. Два на Мелной. То всихъ ставовъ старыхъ спустныхъ, што по смерти князя Ильи его милости отняты, тридесте и чотыры.
Въ томъ шкоды о три тисечы копъ грошей менять быти по тые лѣта зайспусты. А тыхъ ставовъ, што новозаставлены по смерти князя Ильи его милости , чотыры ставы.
Въ томъ же заводѣ, куды панъ Янъ воеводичъ Подольскій менячи границу свою заѣхалъ, первое мѣсто и замокъ Чернехово, другое Плясковцы, третее Копшанцы, четвертое Янковцы, пятое Сѣрые Береги, шостое Обаренцы, семое и осмое Найгоровицы, девятое Ивачевцы, десятое Малшовцы, первое надцать Ивачовцы Долешніи.
А то тые ставы, которые еще кнегиня Ильиная держить въ томъ же обводѣ пана воеводичовѣ, которыхъ хочеть собѣ мѣти два ставы на Серетѣ, за которыи береть княгиня Ильиная тысячу копъ, а иногды и больши.
На томъ же Серетѣ третій ставъ подъ селомъ Ивачевомъ, который былъ спущенъ, а не занятъ. А на Игоровецкой рѣтцѣ пять ставовъ; на Чернеховцѣ рѣтцѣ два ставы; на Плескорѣцкой рѣтцѣ пять ставовъ. То всѣхъ ставовъ въ томъ обводѣ, куды Ляхове завели, пятьдесятъ и три ставы, а селъ и мѣстъ двадцать и семъ.
Мѣсеца Октобра 3 день, въ Недѣлю.
Врадникъ пана Краковского Тарнопольскій, Пыстрынскій, велъ насъ менячи быти границу свою и зъ князи Збаражскими села ихъ Лозовое, а отъ тое могилы до рѣки врочища Ходоровки дубровою якобы на полъ мили, и тою рѣкою Ходоровкою велъ якобы на милю до крыницы врочища, при которой крыницы суть двѣ могилы и камень на нихъ, и тутъ врадникъ пана Краковского здае границу Давидовскому, и по праву менилъ быти корунно, а по лѣву великое князство князей Збаражскихъ.
На то князи Збаражскіе повѣдили: куды врадникъ пана Краковского Пыстрынскій велъ, то все естъ властный отчизный кгрунтъ нашъ, и велъ по властному кгрунту нашему, которого мнѣ отъ давныхъ часовъ у спокойномъ держанью и вживанью ажъ до того часу.
Тогожъ дня, въ Недѣлю.
Земенинъ Коруны Польское повѣту Теробовского Янъ Довидовскій зъ братомъ своимъ Миколаемъ вели отъ того врочища крыницы отъ дву могилъ, гдѣ врадникъ пана Краковского здали ему границу свою, и менячи быти границу имѣнія своего Ходоровичъ и зъ имѣньемъ великого князства князя Александра Порыцкого зъ Лозовомъ а Байковцы врочища Язвинъ, отъ врочища Язвинъ, которое естъ надъ дорогою, которая идеть до Бѣлого ажъ до долины черезъ дуброву, и тою долиною до рѣчки Ходоровки, а отъ рѣчки Ходоровки поперекъ до осми могилъ сыпаныхъ, которыи, повѣдилъ, якобы мѣли быти усыпаны межи имѣней пановъ Довидовскихъ мѣстечка Черленова а межи имѣней князства великого князей Збаражскихъ, Збаражомъ а Охремовцы. А отъ тыхъ могилъ вели насъ до кургана, которому врочища не оповѣдили, а отъ того кургана велъ насъ черезъ поля и дубровы до врочища Берестокъ, а отъ Берестокъ врочища ку рѣцѣ Задьмишовцѣ. И тутъ здалъ границу свою пану Галицкому каштеляну селу его Каменой, и менили тые границы быты межи имѣней Збаражскихъ замку ихъ милости Збаража а села Охремовца а межи селищъ Довидовскихъ Кропивною а Колиновы руды.
Того обводу ихъ поченши отъ врочища Язвинъ до рѣки Задмишовки вдолжъ якобы на три мили великихъ.
Князь Щепанъ зъ братьею своею Збаражскіе на то повѣдили: куды вели Давидовскіе, то естъ властная звѣчистая отчизна наша, которого мы отъ давныхъ часовъ у держанью и вживанью спокойномъ маемъ ажъ до тыхъ часовъ. А што ся тыче лѣска Березстька, тутъ стоивали подданые наши и дани давали, и ещо надъ то укупывалися и стоивали Теребовского повѣту Скалачане, и намъ съ того ку Збаражу дань давали.
На то подстаростій Теребовскій Якубъ Нелискій зъ людьми Скалатскими повѣдилъ: правда, ижъ тутъ стоивали люди Скалатскіе и дань съ того ку Збаражу даивали, але за мушеньемъ, ижъ князи Збаразскіе на нихъ бирали.
Мѣсеца Октебра, 3 день.
Отъ тое долины и озера врочища Плотичьего, гдѣ здалъ границу свою врадникъ кнегини Ильиное Чернеховскій Богданѣ, вели князи Збаражскіе, князь Александро Порыцкій а князь Щепанъ зъ братьею своею, менячи быти границу замку своего Збаража и зъ паномъ Краковскимъ селомъ его Петриковомъ а зъ Теребовского повѣту зъ селомъ королевскимъ зъ Боркомъ, и повѣдили, ижъ тое озеро на Серетѣ рѣцѣ естъ, которое озеро затопилъ отъ полтора года панъ Краковскій панъ Тарновскій ставомъ, который ставъ заставилъ ку берегу князей Збаражскихъ. И повѣдили, ижъ тое озеро Плотичое зъ вѣку было ихъ властное, и вели отъ того озера якобы на полторы мили ставомъ внизъ рѣкою ажъ до врочища Грузкое долины, и тою долиною Грузкою уверхъ якобы на чверть мили до дву каменей ставеныхъ, а отъ того каменья до рѣчки Дичковы якобы на двѣ стрѣленья ажъ до конецъ лѣска, которій зовуть Стѣнки. А отъ лѣсовъ Стѣнокъ якобы на три стрѣленья до конецъ мосту Борковского, который мостъ естъ на рѣцѣ Гнѣздной. И повѣдили князи Збаражскіе, ижъ тутъ была корчма отъ предковъ нашихъ звѣчистая, и повѣдили, ижъ на томъ мосту пры той корчмѣ половину мыта бирали предкове наши. Отъ того мосту вели якобы на три стрѣленья рѣкою Гнѣздною уверхъ, и тую рѣку Гнѣздную опущаючы у лѣво, а насъ вели у право рѣчкою Теребною, которая Теребовка впадываеть у рѣку Гнѣздную. И тою Теребнею рѣкою вели уверхъ якобы на милю до дубровы до гаю врочища Климкова, а отъ Климкова гаю черезъ дуброву до врочища Марынины Руды. Отъ Марынины Руды до Сабарихи могилы вели князи Збаражскіе, менячи быти границу замку своего Збаражского и зъ селомъ королевскимъ повѣту Теребовского Скалатомъ полемъ до дороги, которая дорога идеть отъ Рамановки до Скалата, и отъ дороги дубровою до врочища Михновы пасѣки, а отъ Михновы пасѣки дубровою до врочища Голого Каменя, а отъ Голого Каменя дубровою до Лѣска, отъ Лѣска дубровою и полемъ до дороги, которая идеть отъ Скалата до Волочищъ, и того дорогою якобы на полъ мили до врочища до Вербовыхъ Лозъ, отъ Вербовыхъ Лозъ долиною якобы на полъ мили до крыницы. И повѣдили князи Збаражскіи, ижъ тутъ ся Скалатская граница кончить, а починаеть ся граница земенина повѣту Теребовского Андрея Орѣховского села его Орѣхова.
И вели отъ тое криницы дубровою презъ гору якобы на полъ версты до врочища долины Глубокое, и тою долиною Глубокою якобы на полъ версты ажъ до рѣки Збручи. И повѣдили князи Збаражскіе, ижъ куды есмо вели, то все по лѣву великое князство а кгрунтъ отчизны нашое, а по праву корунно. И ту ся граница замку нашого и селъ Збаражскихъ кончить, а починаеть ся граница другого замочку нашого Волочищского.
Того всего обводу, князей Збаражскихъ отъ долины и отъ озера Плотичого по всимъ врочищамъ до рѣки Збручее якобы на осмъ миль.
А Давыдовскихъ обводу, поченши отъ врочища Язвинъ ажъ до рѣки Задмишовки, вдолжъ якобы на тры мили а въ ширки розницы межи тыхъ обѣюхъ обводовъ якобы на три мили, а индѣ меншъ, а индѣ больши.
Мѣсеца Октебра 5 день, у волторокъ.
Што князь Щепанъ Збаражскій зъ братьею своею привели границу замку своего и селъ Збаражскихъ до рѣки Збручи, и оповѣдили, ижъ тутъ ея граница ихъ Збаражская въ долины Глубокое въ рѣки Збручи кончи, а починеть ся граница замочку ихъ другого Волочищского. И тою рѣкою Збручею вели внизъ якобы, на двѣ мили, менячи быти границу свою по полъ рѣки, великое князство по лѣву, а по праву Теребовского повѣту села Орѣховского, а другого села староства Каменицкого пана Влодковымъ Рожищомъ ажъ до врочища Пустоловского болота, которое зовуть болото Руда. А тымъ болотомъ Рудою уверхъ до крыницы, отъ крыницы на гору долиною ажъ до копца, на которомъ копцу естъ камень поставленый, того якобы на милю. А отъ того копца и каменя на рогъ дубровы презъ поле до копца, который естъ у дубровѣ Шоломной якобы на полъ мили, а отъ того копца Шоломного черезъ поле якобы на полъ мили до копцовъ трехъ, отъ тыхъ трехъ копцовъ до Сягловки руды якобы на чверть мили, гдѣ Сягловка впала у рѣчку Болванецъ, и перешедши руду Сягловку у вустьи опустивши руду управо, и рѣчкою Болванцомъ уверхъ якобы на чотыры стрѣленья зъ лука до ставу князей Збаражскихъ, который на той рѣтцѣ Болванцу. А отъ тое гребли на гору рѣчкою Болванцомъ ажъ ку Глубокой долинѣ якобы на милю, и тою Глубокою долиною на гору ку Бозкой дубровѣ и ку гостинцу, которій гостинецъ идеть зъ Волочищъ до Чорного острова якобы на полъ мили. И черезъ тую дорогу просто дубровою до Зеленое крыницы якобы на милю. И повѣдили князи Збаражскіе, ижъ дей въ той дубровѣ нашой естъ пасѣка старосты Каменецкого пана Влодкова, которую онъ теперъ маеть на властной земли нашей за дозволеньемъ нашимъ и за листомъ его, который намъ на себе далъ. И повѣдили, ижъ тутъ ся въ Зеленое крыницы доконала граница наша Волочищская зъ великого князства а зъ селы корунными Андрея Орѣховского селомъ его Орѣховомъ, а зъ селомъ пана Матея Влодка Рожищы, а зъ мѣстечкомъ Сатановымъ Ходоровского, а съ Телефусовымъ Кумановомъ, а зъ городкомъ Свирщовымъ съ Чорноостровомъ, который сполно держать панъ Свирщовскій съ паномъ Влодкомъ, старостою Каменицкимъ.
Того обводу князей Збаражскихъ отъ Глубокое долины до Зеленое крыницы вдолжъ якобы на полъ семы мили. И тутъ въ тое Зеленое крыницы здали границу князи Збаражскіе князя Ѳедора Вишневского имѣнью Дорофеевцамъ а кнегини Збаразской, матцѣ своей, замку ее милости Ожеговцомъ.
Тогожъ дня, врадникъ князя Ѳедора Вишневского Дорофеевскій Мартинъ зъ урадникомъ кнегини Збаражское Ожеговскимъ Миклашомъ вели отъ тое Зеленое крыницы, менячи быти границу свою и зъ селомъ старосты Каменицкого пана Влодковымъ Чорноостровомъ полемъ до врочыща Чорное Лозы, гдѣ стоивала пасѣка, съ которое дань давано князю Вишневскому, отъ тое Чорное лозы долиною до верхъ болота Бога, и повѣдили, ижъ тутъ ся у того болота Бога доконала граница князя Вишневского и кнегини Збаражское, а починаеть ся граница Кузминская.
Того обводу князя Вишневского и кнегини Збаражское отъ Зеленое криницы до болота Бога якобы на двѣ мили.
Напротивку того обводу князей Збаражскихъ замочку ихъ Волочищъ мѣлъ быти обводъ корунный, але его намъ не дано. Оттуль есмо съ товариши нашими корунными розъѣхали.
Въ замочку князей Збаражскихъ у Волощычахъ намовили есмо съ тыми товарышы нашими корунными, ижъ мѣли есмо зъ ними знятися на границахъ назавтрее. Оны къ намъ не выѣхали, и ѣхали до Межибожа, отступуючи отъ границъ семъ миль, и велѣли намъ до себе ѣхати до Межибожя. Мы не ѣхали, а ѣхали есмо предъ се по границы великого князства до Кузминское волости, ажъ до Чудновское границы, отъ Чудновское границы Кіевского повѣту до Веницкое и до Браславское границы алижъ до Семаковцовъ, и ихъ есмо яко служебниками такъ тежъ листы нашими навпоминали, абы оны, ведлугъ росказанья господарей ихъ милости, на границы ѣхали. Оны къ намъ прыслали дьяка своего, вымовляючися Татары, другое, ижъ не мають, хтобъ имъ границы оповѣдилъ, яко Чорноострова замочку старосты Каменицкого пана Влодкова, такъ тежъ Межибожья замку воеводы Бѣльзского, такъ тежъ замку господарского Хмѣльницкого, повѣдаючи, ижъ яко староста Каменицкій, такъ тежъ воевода Бѣльскій естъ на послузѣ господарской, а панъ Вислицкій тотъ естъ у во Львовѣ. А врадникъ Хмѣльницкій повѣдаеть, ижъ науки ему отъ пана его о тые границы нѣтъ. И мы на то отповѣдили: гдѣ есмо кольве первѣй того пописывали зъ вами старостъ и державецъ, замковъ и дворовъ господарскихъ, такъ тежъ по князскимъ и панскимъ имѣньямъ, гдѣ ихъ самихъ не бывало, однакожъ врадники и старыи люди границы и шкоды свои намъ оповѣдывали, затымъ есмо жадного омѣшкиванья не прыймовали, и тотъ тежъ староста Кузминскій, панъ Семашко, а кнегини Ильное съ Чуднова врадники и слуги и бояре ее милости пошли въ погоню за Татары, а врадниковъ и людей старыхъ на мѣстце свое оставили и науку имъ дали, и тые намъ тежъ границы свои оповѣдили и ихъ есмо списали, и предъ ся есмо просили черезъ того служебника ихъ, абы ся оны зъ нами зъѣхали межи Вонячина и села Хмѣльницкого и Евча, и о всемъ томъ обмову зъ нами вчинили. И лежали есмо у Вонячинѣ тыйдень ждучи ихъ, оны пріѣхати не хотѣли. Потомъ ѣхали есмо до Веницы, люди съ погони пришли и панъ воевода Бѣльзскій самъ былъ у Веницы. И лежали есмо послѣ пана воеводы тыйдень, и ихъ есмо обсылали, оны быти не хотѣли и до насъ не отписали.
Мѣсеца Октебра 7 день, въ четверкъ.
Войтъ Кузминскій Максимъ зъ бояры и зъ мужми Кузминскими вели отъ болота Бога, гдѣ подали границу свою врадникъ князя Александра Вишневского Дорофеевскій Мартинъ а врадникъ кнегини Збаражское Ожеговскій Миклашъ просто черезъ дуброву и поле до болота Божка, съ которого болота устала рѣка Божокъ, и тою рѣкою Божкомъ внизъ по полъ рѣкою ажъ до села Кузминского Глѣбовцовъ, и менили по праву тое рѣки Божка повѣтъ Каменицкій замку Чорноострова старосты Каменицкого пана Влодкова а пана Свирща, а полѣву великое князство волости Кузминское. Отъ того села Глѣбовцовъ тою жъ рѣкою Божкомъ унизъ до села земянъ Кузминскихъ Котюжинцовъ. Тутъ повѣдили, ижъ границу мають по полъ тое рѣки Божки зъ селомъ Межибожскимъ Везденками. Отъ того села Котюженцовъ вели тою жъ рѣкою Божкомъ унизъ до села Кузминского Дешковцовъ, и повѣдили, ижъ тое село Дешковцы мають границу по полъ рѣки зъ селомъ Межибожскимъ съ Ходковцы. И оттоле тою жъ рѣкою божкомъ унизъ ажъ до села Еремеевского повѣту Кузминского менячы собѣ границу посредъ тое рѣки зъ селомъ Межибожскимъ Пашковцы, а отъ того села Еремеевского тымъ же Божкомъ унизъ по полъ рѣки ажъ до села Межибожского Митковцовъ и до рѣчки Смалчее, которая рѣчка упала у Божокъ, и менили собѣ границу тую рѣчку Смальчю на полы, по праву повѣтъ Межибожскій, а по лѣву повѣтъ Кузминскій. И тою рѣчкою Смальчею уверхъ до дороги, которая идеть отъ Пилевцовъ до Межибожья, и тою дорогою до крыницы, которая крыница идеть посредъ села Пилевцовъ ажъ до рѣки Икови, и просто отъ тое крыницы, гдѣ упала черезъ рѣку Икву и черезъ поле Круглое ажъ до дорогъ, которые дороги розышлися: одна пошла къ Басарабову броду, а другая къ Губину. И тою Басарабовскою дорогою ажъ до Сторожевое могилы, а отъ тое могилы до рѣчки Золви, и тутъ подали границу свою замку кнегини Ильиное ее милости Чуднову.
Того обводу поченши отъ болота Бога по всимъ тымъ врочищамъ ажъ до рѣки Золчи на дванадцать миль.
А въ томъ обводѣ волости Кузминское посадили Ляхове села свои на кгрунтѣ Кузминскомъ, великого князства королевое ее милости.
Съ Каменца село осажено Половцы отъ девети лѣтъ, а зъ Межибожья первое село Янагинцы осажены за Александра короля, другое село Игнатовцы осажено отъ дванадцати лѣтъ, третее Маломолинцы осажено отъ тридцати лѣтъ, четвертое село Волосовцы осажено сего году. То всихъ селъ на кгрунтѣ Кузминскомъ королевое ее милости осажены пяти.
Мѣсеца Октебра 9 день, въ суботу.
Врадникъ кнегини Ильиное кнегини Біяты Костелецкое Чудновскій еня (вѣроятно: емо) зъ бояры и людьми кнегини Ильиное Чудновскими велъ отъ тое могилы Сторожовое и отъ рѣки Золчи, гдѣ здали границу свою люди великого князства королевое ее милости волости Кузминское, менячы быти границу Чудновскихъ селищъ Журбинцовъ а Калинцовъ а зъ Грузскимъ а зъ Ланевщиною а Пелепельщиною а Гридьковщиною а Бурковцы пановъ Калениковичовъ а теперь держить панъ Василей Тишковичъ а Головенчичъ и зъ замкомъ Хмѣльницкимъ и зъ селы замку Хмѣльницкого Ильятьковцы а Кумановцы а зъ Березною. И вели отъ тое могилы Сторожовое отъ рѣки Золчи Чорною дорогою, и повѣдили, ижъ тутъ пришла граница селища Бурковского пановъ Калениковичовъ, а теперъ пана Василья Тишковича, и тою Черною дорогою на могилу Гончариху, отъ могилы Гончарихи къ верхомъ болота врочища Мытника. И тутъ повѣдили, ижъ пришла граница селища Бердичовского пановъ Калениковичовъ, а теперь пана Василья Тишковича, отъ Мытника болота къ Немировцѣ дубровцѣ. И повѣдили, ижъ тутъ пришла земля повѣту Кіевского Улановского городища, отъ дубровки Немировки у руду ку врочищу Бѣлому Рукаву, которую называють другимъ именемъ Тростенецъ, и тою рудою унизъ ажъ до устья руды Головчины. И повѣдили, ижъ тутъ пришла граница Городища пана Семена Кмиты Пыкова и тую Головчину руду опустивши влѣво къ рѣтцѣ Сневотовцѣ поверхъ лѣса Ходоровского, а отъ того лѣса посредъ руды Березовцы, а отъ тое руды Березовки до верху руды Бересницкое, отъ руды Бересницкое до Румынова ставка, а отъ ставка Румыновского тоею жъ рѣчкою внизъ въ рѣку Богъ, и повѣдили: куды по тымъ врочищамъ вели, поченши отъ могилы Сторожовое ажъ до рѣки Бога, по лѣву великое князство повѣтъ Кіевскій волости Веницкое, а по праву повѣтъ Хмѣльницкій.
Того всего обводу отъ могилы Сторожовое по всимъ тымъ врочищамъ ажъ до рѣки Бога вдолжъ якобы на деветь миль, и тутъ здали границу селу великого князства повѣту Кіевского пани Дубицкой Каменагоркамъ.
Мѣсеца Октебра 11 день, въ понедѣлокъ.
Люди пани Настасьи Дубицкое села повѣту Кіевского Каменагорскіе волости Виницкое Семенъ атаманъ а Василей Ивановичъ а Павелъ зъ иншими людьми панее своее вели менячы быти границу свою и зъ селомъ повѣту Хмѣльницкого Евладовскимъ отъ рѣки Бога, гдѣ Румыновка рѣчка упала у Бугъ рѣку просто презъ рѣку Богъ у болото, и болотомъ у въ озеро врочище Уюнее, и посередъ озера къ рубежомъ, которые рубежи на дорозѣ великой Каменогорской. И повѣдили, ижъ въ тое дороги и рубежовъ отъ давныхъ часовъ и отъ предковъ ихъ о злодѣйство и о всякіе крывды яко зъ селъ Лядскихъ такъ зъ селъ великого князства повѣту Кіевского, права собѣ дають. А оттоль просто презъ лѣсъ ку пасѣцѣ Іевовѣ, которую пасѣку Хмѣльничане тыхъ недавныхъ часовъ отнемши на себе держать, а тое Іевовское пасѣки дорогою, которая идеть отъ села повѣту Хмѣльницкого Евладовского, къ селу повѣту Веницкого Яцковцомъ, до рѣчки Бобровки, а отъ рѣчки Бобровки до руды Кропивное до границы земенина Веницкого Кондрата села его Яцковцовъ. И тутъ здали границу Кондрату селу его Яцковцомъ, и повѣдил и: куды есмо вели по тымъ всимъ врочищамъ по лѣву великое князство повѣту Кіевского земля панее нашее, а поправу повѣту Хмѣльницкого.
Того обводу людей пани Настасьи Дубицкое отъ рѣки Бога до руды Кропивное по тымъ усимъ врочищамъ вдолжъ якобы на двѣ мили.
Земянъ Веницкого повѣту Кондрата зъ братьею его дворяниномъ господарскимъ обсылали и сами есмо передъ паномъ Семеномъ Кмитою тому Кондрату Яцковскому мовили и зъ ураду Веницкого неоднокроть его обсылали, абы намъ границы и крывды свои оповѣдилъ и списалъ, и ждали есмо его тыйдень, онъ не былъ. Мы границъ села его Яцковского не писали, бо не мѣли есмо отъ кого справы взяти.
Мѣсеца Октебра 20 день, въ середу.
Панъ Семенъ Кмита зъ людьми двора господарского держанья своего Вонячына оповѣдилъ границы Вонячинскихъ людей повѣту Веницкого и зъ селомъ повѣту Хмѣльницкого Журавлемъ отъ верху Коломозова потока лѣсомъ грядою къ Лозѣ Долгой, которая естъ вышей Бризнелева врочища, отъ Долгое Лозы черезъ Суходольскій потокъ лѣсомъ же на усть Бѣлавинского потока, гдѣ потокъ Бѣлавинскій упалъ въ рѣчку Изгарикъ, и повѣдили: ижъ тутъ пришла граница села повѣту Хмѣльницкого Іевча. Отъ того устья Бѣлавинского вели держачи поляну Бѣлавинскую по лѣву до Романовское дороги, и черезъ тую дорогу до Лозы до дороги Оревятское, которая вышла зъ лозы отъ Іевча черезъ поле просто до Долгого лѣса, тотъ лѣсовъ держачи управѣ до врочыща Лунева лѣска, который естъ посредъ поля, и посредъ того лѣска черезъ поле на рогъ дубровы посередъ лозы, которая естъ у Меткова лѣска, и повѣдили: куды село вели то все по лѣву великое князство повѣту Кіевского волости Веницкое людей Вонячинскихъ, а по праву людей повѣту Хмѣльницкого села Іевча а Журавлевъ, и тутъ ся граница Вонячинская доконала, а починаеть граница пана Семена Кмиты села его Летина.
Того обводу Вонячинского отъ верху Коломозова потока до лозки, которая естъ у Меткова лѣска, вдолжъ якобы на полъ трети мили.
Мѣсеца Октебра 21 день, въ четверкъ.
Панъ Семенъ Кмита зъ людьми села своего Летинского велъ, менячы быти границу села своего Летина, и зъ селомъ повѣта Каменицкого Дьяковцы отъ лозки, которая естъ у Меткова лѣска, гдѣ здали селу границу люди Вонячинскіе до руды Жаселовское полемъ, а отъ руды. Жаселовское дубровою до сѣножати человѣка пана Кмитина Летинского Буйнаковы, а отъ сѣножати Буйнаковы дубровою презъ рѣчку Летинку до лозы, которая естъ на рѣтцѣ Летинцѣ. И повѣдилъ панъ Кмита, ижъ тутъ граница повѣту Каменицкого Дьяковская доконала, а пришла граница другого села повѣту Каменицкого Багриновского. И велъ отъ тое лозы дубровою грядою до болота врочыща Кулиги, и просто черезъ тую Кулигу долиною и дубровою къ лѣсу ку врочыщу Должку, а отъ того лѣса Должка до дороги, которая идеть отъ Летина къ Багриновцомъ и къ березѣ, которая подлѣ тое дороги стоить пробитая, и къ пасѣцѣ Летинской держачи тую пасѣку влѣвѣ. И повѣдилъ панъ Кмита: куды есми велъ, то все по лѣву великое князство повѣту Кіевского Веницкое а кгрунтъ властное, земли моее Летинское, а по праву земля селъ повѣту Каменицкого Дьяковского а Багриновского, и тутъ ся граница моя доконала а пришла граница земянъ Микулинскихъ села ихъ Микулина.
Того обводу пана Кмитина Летинского отъ лозы, которая естъ у Меткова лѣска до дороги, котора идеть зъ Летина къ Бограновцомъ къ березѣ пробитой вдолжъ якобы на полъ трети мили.
Мѣсеца Октебра 22 день, у пятницу.
Земяне повѣту Веницкого Иванъ а Петръ Микулинскіе вели менячы быти границу села своего Микулина и зъ селомъ повѣту Каменицкого Богриновомъ отъ березы пробитое, здѣ здалъ имъ границу панъ Семенъ Кмита дубровою мимо лѣсокъ врочищя Должокъ, отъ лѣска Должка дубровою ажъ до Згари рѣки, и тутъ здали границу матцѣ своей пани Микулинской селу ее Почапинцомъ.
Того обводу Микулинскихъ отъ березы пробитое до рѣки Згари вдолжъ якобы на милю.
Тогожъ дня въ пятницу.
Земянка господарская повѣту Веницкого Духна Микулинская вела менечы быти границу села своего Почапинецъ и зъ селомъ повѣту Хмѣльницкого Лысогорцы, отъ Микулинское границы отъ рѣки Згари, гдѣ рѣчка Кобелка упала у рѣчку Згарь, и тою рѣчкою Кобелкою уверхъ до Лобойковы долины, и черезъ тую долину Лобейкову до лѣса врочыща Сковородчина. А отъ того рогу Сковородчина рудою до рѣчки Ровца, и презъ тую рѣчку Ровецъ до долины Бубновы. И повѣдила Микулинская, ижъ тутъ пришла граница села повѣту Барского Курыловцов, и тою долиною Бубновою вела въ гору лѣсомъ Мыховымъ до потока и до дороги, которая идеть съ Почапинецъ до Курыловичъ, и повѣдила: ижъ куды я вела, то все по лѣву великое князство повѣту Кіевского волости Веницкое земля села моего Почапинецъ а по праву земля села повѣту Хмѣльницкого Лысогорского а другого села повѣту Барского Курыловцовъ, и повѣдила: ижъ ся ту граница моя кончить, а пришла граница пани Михновое Якубовича и зятя ее пана Ѳедора Бокея.
Того обводу Микулинское села ее Почапинецъ отъ рѣки Згары до дороги, которая идеть съ Почапинецъ до Куриловецъ, вдолжъ якобы на три мили.
Мѣсеца Октебра 23 день, въ суботу.
Земянка господарская повѣту Веницкого пани Михновая Якубовича пани Богдана и зъ зятемъ своимъ паномъ Хведоромъ Бокеемъ вели, менячы быти границу села своего Махнавского и зъ селомъ повѣту Барского Курыловцы отъ границы пани Микулинское села ее Почапинецъ отъ дороги, которая идеть съ Почапинецъ до Курыловецъ, гдѣ здала имъ границу Микулинская. И вели отъ тое дороги на лѣво черезъ лѣсъ Мыхновскій до долины и тою долиною до крыницы, съ которое крыницы вышла рѣчка Ольшанка, и тутъ повѣдили: ижъ граница села Махновского кончи, а починаеть ся другого села пани Михновое жъ Новоселецкая граница и зъ селомъ повѣту Барского Бѣликовцы. И вели тою рѣчкою Ольшанкою внизъ до крыницы, и тую рѣчку Ольшанку опустивши влѣво, и отъ тое крыницы просто черезъ гору ку врочыщу Пропастищамъ и къ липамъ, а отъ того врочыща Пронастищъ и отъ липъ долиною черезъ дорогу, которая идеть отъ Бѣликовецъ до Семаковичъ до врочыща Осья, которое Осье по близу дороги. Отъ Осья долиною жъ черезъ лѣсъ пасѣку Семаковскую держачи по лѣву а по праву лѣсъ Бѣликовскій, а отъ того лѣсу черезъ дуброву до Янчалинова рогу, пущаючи пасѣку Семакову влѣво, а по праву земля Бѣликовская. А отъ того рогу Янчалиновского черезъ дуброву до врочыща Язвинъ, отъ врочыща Язвинъ долиною до врочища Саги озерца, отъ Саги черезъ рѣку Ровъ до пяти копцовъ, которые одинъ подлѣ одного по ряду стоять, отъ тыхъ копцовъ долиною презъ лѣски Мжачинскіе, отъ тыхъ лѣсковъ Мжачинскихъ до села Молохонова, и тымъ лѣсомъ Молохоновымъ пасѣки села повѣту Барского Бѣликовскіе держачи по праву, а пани Михновое села Семаковского пасѣки полѣву вдолжъ лѣса ажъ до шляху Кочманского. И повѣдила земянка господарская пани Михновая Якубовича и зъ зятемъ своимъ паномъ Ѳедоромъ Бокеемъ, ижъ тутъ ся граница селъ нашихъ кончи, а починаеть се повѣтъ Браславскій земянъ Браславскихъ Носковичовъ, и куды есмо вели то все полѣву великое князство повѣту Кіевского волости Веницкое селъ нашихъ Махновцовъ а Новоселецъ, а по праву селъ повѣту Барского Курыловцовъ а Бѣликовцовъ.
Того обводу Михновое Якубовича отъ границы Микулинское до шляху Кочманского по всимъ тымъ врочыщамъ вдолжъ якобы на двѣ мили.
Тогожъ дня, мѣсеца Октебра 23 день, въ субботу.
Земяне повѣту Брасловского Иванъ, а Михайло а Стецко а Брайко Носковичи вели, менячи быти границу солища своего Носковского, и зъ селомъ повѣту Барского Слободками отъ шляху Кочманского, гдѣ здала границу имъ пани Михновая Якубовича и тымъ шляхомъ Кочманскимъ черезъ рогъ лѣсу Молохоновского до лѣсу Глинищъ, а отъ того лѣсу врочыща Глинищъ опустивши шляхъ Кочманскій управо вели насъ дорогою дубровою до лѣсу врочища Яроватого, а отъ того лѣса Яроватого до рѣчки Мараѳы, до каменя бѣлого, который лежить на край рѣчки Мораѳы, и черезъ тую рѣчку Мораѳу до врочища Трилѣсу и черезъ тотъ Трилѣсъ до руды потоку Гойчаловского, и тою рудою внизъ мимо пасѣку тыхъ земянъ повѣту Брасловского Носковичовъ, держачи пасѣку влѣвѣ тымъ же потокомъ до горы, которая естъ надъ Войчаловскою долиною, и тутъ здали границу земянину повѣту Браславского Ѳедору Зъяловскому, и повѣдили: куды есмо вели, то все полѣву великое князство повѣту Брясловского а наша властная отчизная земля.
Того обводу Носковичовъ отъ шляху Кочманского до горы, которая естъ надъ Войчаловскою долиною вдолжъ якобы на двѣ мили.
Мѣсеца Октебра 24 день, въ Недѣлю.
Земенинъ повѣту Брасловского Ѳедоръ Зъяловскій велъ, менячи быти границу селища своего Зъяловского и зъ селищомъ повѣту Барского Качмазовскимъ, отъ тое горы, которая естъ надъ Войчаловскою долиною, гдѣ здали ему границу земяне Носковскіе, лѣсомъ тымъ же врочыщомъ Трилѣсовскимъ долиною, потокомъ врочыщомъ Гойчаловскимъ и тоею долиною Гойчаловскою, выходячи съ того лѣса покуль ся тотъ лѣсъ кончилъ, и менилъ быти по лѣву землю повѣту Кіевского отчину свою, а по праву землю Барскую повѣтъ Каменицкій, и тутъ здалъ границу земянину повѣту Брясловского Данку Копыстерынскому.
Того обводу Зъяловского якобы на полъ мили.
Тотъ Копыстеринскій живеть у Барѣ, а тое селищо свое Копыстеринское зъ Бару уживаеть, того границы некому было вывести, и мѣлъ бы тотъ Данко Копыстеринскій здати границу земенину повѣту Браславского Петру Братковичу.
Ино того Петра Братковича подстаростій Веницкій Богушъ Шельвовскій мы тежъ по кольку разъ обсылали, лежали полторы недѣли, тотъ Братковичъ не былъ, потомъ тотъ Петръ Братко прислалъ на списку границы свои зъ земяниномъ повѣту Браславского Игнатомъ Клещовскимъ, и мы тотъ списокъ казали у книги уписати, то естъ имѣніе Петра Братковича Братковцы сугрань зъ Ляхи съ Ѳедоромъ Сеньковскимъ у повѣтѣ Каменицномъ. Напервѣй грани почонъ отъ земли Верхняцкое пошла Братковская земля зъ Лядскою землею сугрань поверхъ ставу Мишкова, отъ Мишкова ставу поверхъ долинъ Кальшовыхъ, а отъ долинъ Калышовыхъ долиною Побойною ажъ до конца Побойное, отъ Побойное долины черезъ Усовича руду, отъ Усовича руды до лѣска до Волчихъ Язвинищъ.
А тотъ Братковичъ мѣлъ бы здати границу свою Бѣлому Скиндирю селищу его Черневцомъ, а тотъ Бѣлый Скиндиръ мѣлъ бы здати границу земенину повѣту Брасловского Русинцу, а такъ вси земяне повѣту Брасловского, которые границы мають съ повѣтомъ Барскимъ и Каменицкимъ ажъ до границы земенина Брасловского Игната Клещовского не стали и послушенства на росказанье его милости господарское, и за обсыланьемъ и росказаньемъ князя Димитрея Ѳедоровича, старостича Володимерского, который естъ на мѣстцу отца своего и на обсыланье подстаростего Брасловского не вчинили и границъ своихъ не вывели.
Пришедши передъ насъ земенинъ повѣту Браславского Игнатъ Стецкевичъ Клещевскій повѣдилъ: отъ кого быхъ я мѣлъ границу свою взяти не вѣдаю, бо ихъ Татаре давно побрали, а отъ давныхъ часовъ пуста, едножъ я свою границу ено вѣдаю, селища своего Русова и зъ земениномъ Барскимъ повѣту Каменецкого Бенькомъ, поченши отъ устья рѣчки Буши, которая пришла съ повѣту Бряславского впала у рѣку Мораѳу, и тою рѣкою Мораѳою унизъ полемъ и дубровою ажъ до рѣки Днѣстра, границы его якобы на три мили, тутъ менилъ посередъ тое рѣчки Мораѳы границу — великое князство Литовское полѣву, а повѣтъ Каменицкій кгрунтъ Барскій по праву по рѣку Днѣстръ, а внизъ Днѣстра по половицы рѣки ажъ до Видова озера великое князство Литовское. И повѣдалъ тотъ Клещевскій, ижъ Петръ, воевода Волоскій, минулый, на властномъ кгрунтѣ моемъ и на Барскомъ на рѣцѣ Змарагтѣ поставилъ млинъ, и по той земли моей Волохове свовольне пасѣки мають и сѣна косять и пашню пашуть.
Хранится въ рукописномъ отдѣленіи Виленской Публичной Библіотеки.